<sup>وەك ناڕەزاییەك بەرامبەر سەردانەكەی دەوڵەت باخچەلی، سەرۆكی بزووتنەوەی نەتەوەپەرست MHP، خاوەن دوكانەكانی ئەو شارەی باكووری كوردستان دوكانەكانیان داخست.

لە كاژێر 10:00ـی سەرلەبەیانی ئەمڕۆ هەینی 28ـی تشرینی دووەمی 2014ـەوە، لە نێوەڕاستی شاری دێرسیم، بەتایبەت گەڕەكی سیهەنگ، ژمارەیەكی زۆر پۆلیس و هێزی ئەمنی بڵاوەیان پێكراوە، ژمارەیەكی زۆر خەڵكیش لە گەڕەكی جمهوریەت كۆبوونەتەوە و بەرەو گەڕەكی سیهەنگ دەڕۆن، قوتابییانیش بایكۆتی خوێندنیان كردووە و هاتوونەتە نێو خۆپێشاندانەكەوە.

خۆپێشاندانەكە لەلایەن فیدراسیۆنی مافە دیموكراتی و پێكهاتەكانی شاری دێرسیمەوە رێكخراوە وەك ناڕەزییەك بەرامبەر ئەو قسانەی دەوڵەت باخچەلی، كە لە هەفتەی رابردوودا و  لەیادی كوشتنی سەیدرەزا، لەمیانی وتارێكیدا لەبەردەم پەرلەمانتارانی وڵاتەكەی گوتی: "ئۆجەلان چی بێت ئەو كاتەش سەید رەزا هەمان شت بووە، هەردووكیان تیرۆریستن و پێویستە ئۆجەلانیش وەك سەید رەزا بكوژرێ، لە تونجەلیش هیچ كۆمەڵكوژییەك ئەنجامنەدراوە".

بەپێی بەرنامەی سەردانەكەی باخچەلی، بڕیاربوو كاژێر 9:30 لە خارپێتەوە بچێتە دێرسیم و لە گەڕەكی سیهەنگ نوێژی هەینی بكات و دواتر بچێتە كۆشكی پارێزگا.

هەروەک بڕیاربوو باخچەلی سەردانی جەمخانەی عەلەوییەكانیش بكات، بەڵام پیرانی جەمخانە رایانگەیاندووە، كە نایانەوێ باخچەلی سەردانیان بكات.

77 ساڵ بەر لە ئێستا لە 15ـی تشرینی دووەمی 1937دا، سەید رەزای دێرسیم، كە سەركردەی شۆرشی دێرسیم بوو لەباكووری كوردستان، لەلایەن دەوڵەتی توركیاوە لەسێدارەدرا.</sup>

^{رووداو- دێرسیم}

^28/11/2014

<sup>ئەندامێکی هاوپەیمانی کوردستانی رایدەگەیێنێت کە دەنگ لەسەر پرۆژەیاسای بودجەی 2015 نادەن، ئەگەر هاتوو سزاکانی سەر هەرێمی کوردستان وەک خۆیان مانەوە.

ئەحمەد حەمە رەشید، بڕیاردەری لیژنەی دارایی لە ئەنجوومەنی نوێنەرانی عێراق، رۆژی پێنجشەممە 27ی تشرینی دووەمی 2014 بە تۆڕی میدیایی رووداوی راگەیاند، کە "رۆژی پێنجشەممە ئەنجوومەنی وەزیران گفتوگۆی لەسەر رەشنووسی پرۆژەی بودجەی گشتی عێراق بۆ ساڵی 2015 کرد، بەڵام بەهۆی کێشەی کورتهێنان لە بودجە، نەگەیشتە هیچ بڕیارێک"، ئاماژە بۆ ئەوەش دەکات کە بەهۆیەوە دانیشتنەکە بۆ رۆژی شەممە دواخرا.

حەمەرەشید ئەوەشی راگەیاند کە "کورتهێنانێکی گەورە لە بودجەی گشتی عێراق هەیە، کە بە(41 ترلیۆن دیناری عێراقی) دەخەمڵێندرێت، لەو کاتەدا کۆی داهاتی عێراق دەگاتە (108 ترلیۆن دیناری عێراقی)، کۆی بەخشینیش دەگاتە نزیکەی (150 ترلیۆن)، ئەمەش بە تەنیا دەبێتە تەحەدا لەبەردەم پەسندکردنی بودجە". حەمەرەشید ئاماژە بۆ ئەوەش دەکات کە هاوپەیمانی کوردستانی دەنگ لەسەر بودجەی 2015 نادات، لە حاڵەتی ئەوەی بەهەمان ئەو سزایانەی بەسەر هەرێمی کوردستان سەپێندراون ببردرێتە ئەنجوومەنی نوێنەران.

بڕیاردەری لیژنەی دارایی ئاماژە بۆ ئەوەش دەکات کە ئەو بەربەستانەی لە بودجەی ساڵی رابردوو 2014 هەبوون، هەمان شتیش لە بودجەی 2015دا هەن، سەبارەت بە بەشی هەرێمی کوردستانیش لە بودجەی گشتی عێراق دا، ئەگەر ئەو بڕەی تایبەتکراوە بۆ هەرێمی کوردستان بگاتە نزیکەی 12%، ئەوا هەرێمی کوردستان لە ئیستحقاقی بودجە مافی دەخورێت".

رۆژی پێنجشەممە ئەنجوومەنی وەزیرانی عێراق لە دانیشتنی نائاساییدا خۆیدا، تاوتوێکردنی پرۆژەیاسای بودجەی ساڵی 2015 بۆ رۆژی شەممەی داهاتوو دواخست، بۆ ئەوەی ئەوخاڵانەی ماون و گفوگۆیان لەبارەوە نەکراوە، لە دانیشتنی داهاتوو تاوتوێی بکرێن.</sup>

^28/11/2014

<sup>رووسیا گاڵتە بە چۆنیەتی مامەڵەكردنی ئەمریكا لەگەڵ رووداوە تووندوتیژ ئامێزەكانی شاری فێرگسن لە ویلایەتی میزۆری دەكات و رایگەیاند، ئەم جۆرە مامەڵەیە بەڵگەیە لەسەر ئەوەی سیاسییەكانی واشنتن دوو روون و مافی ئەوەیان نییە لە رووی مافی مرۆڤەوە وانە بە مۆسكۆ بدەن.

وەزارەتی دەرەوەی رووسیا لە بەیاننامەكدا بە پێویستی دەزانێت، كە ئەمریكا سەرنج لە كێشە فراوانەكانی نێوخۆی وڵاتەكەی لەبارەی مافەكانی مرۆڤەوە بدات لەبری ئەوەی رەخنە لە وڵاتانی دیكە بگریت.

وەزارەتی دەرەوەی رووسیا لەبارەی شاری فێرگسنەوە رەخنەی لە دیموكراتیەتی ئەمریكا گرتووە و رایگەیاندوە، ئەم رووداوە ئەوە نیشاندەدات، كە ناكۆكی رەگەزپەرستی قوڵ و جیاكاری و نایەكسانی لە كۆمەڵگای ئەمریكادا هەیە.

پەیوەندییەكانی نێوان ئەمریكا و رووسیا ماوەی 12 مانگە بەهۆی تۆمەتباركردنی مۆسكۆ لەلایەن واشنتنەوە بە دەستوەردان لە كاروباری ئۆكراینا، تێكچووە.

سێ رۆژ دوای ئەوەی دادگای ئەمریكا بڕیاری بێتاوانیی بۆ ئەو پۆلیسە سپی پێستە دەركرد، كە تۆمەتبارە بە كوشتنی گەنجێكی رەشپێست، شەپۆلێكی خۆپێشاندان و ناڕەزایی چەند ویلایەت و شارێكی ئەمریكای گرتووەتەوە و دوێنێ چوارشەممە 26ـی تشرینی دووەمی 2014، پۆلیسی ئەمریكا دەستگیركردنی دەیان خۆپێشاندەری راگەیاند.</sup>

^27/11/2014

<sup>بەپێی زانیارییەكانی تۆڕی میدیایی رووداو، هێرشەكەی داعش لە رۆژی چوارشەممە 26ـی تشرینی دووەمی 2014، ئامانج لێی تەنیا دەستبەسەرداگرتنی تەلوەرد نەبووە، بەڵكو ویستوویانە بەرەو كەركووك بهێن. 

ئەنوەری حاجی عوسمان، بریكاری وەزارەتی پێشمەرگە، لە بارەی شەڕەكەی دوێنێی تەلوەرد، رایگەیاند، "هێرشەكەی دوێنێی تەلوەرد زیاتربوو لە هێرشێكی ئاسایی و بەگوێرەی ئۆتۆمبێل و تەرمی كوژراوانی داعش، كە لە دوای خۆیان جێیان هێشتوون، هێرشەكە لەلایەن هێزێكی تایبەت ئەنجامدراوە، كە ئەفغانی و بیانین و هەموویان پەڕۆیەكی سوور بە قۆڵیانەوەیە، كە هێمایە بۆ ئەوەی، هێزەكە خۆكوژی بووە، دایاننەناوە بگەڕێنەوە".

بریكاری وەزارەتی پێشمەرگە ئاماژەی بۆ ئەوەشكرد، كە ئەوان لە حەویجەوە زانیارییان پێگەیشتووە، كە داعش لە هێرشەكەی دوێنێ 150 كوژراویان هەبووە و ئاشكرایكرد، "چەكدارانی داعش لەدوای ئەوەی لە هێرشەكەی دوێنێیان بۆ سەر تەلوەرد، شكان، زیاتر لە 20 هەمەرییان لەدوای خۆیان بە جێهێشتووە، كە چەندین تۆن تەقەمەنیان تێدابووە و بۆ تەقاندنەوە ئامادەكرابوون".
 
بریكاری وەزارەتی پێشمەرگە، كە لە كاتی پەیوەندییەكەی رووداو لە شوێنی شەڕەكەبوو، گوتی، "بەرگرییەكەی ئێمە هەرچەند بە خوێنی حەوت پێشمەرگە و فەرماندەی ئازابوو، 100% سەركەوتووبوو، چونكە شوێنە ستراتیژییەكەمان دەستبەسەرداگرتووە".</sup> 

rudaw

^27/11/2014

<sup>راوێژكاری ئه‌نجوومه‌نی ئاسایشی هه‌رێمی كوردستان رایدەگەیێنێت، به‌غدا نه‌ك هه‌ر ئه‌ركه‌كانی به‌رامبه‌ر هێزی پێشمه‌رگه‌ جێبه‌جێ ناكات، به‌ڵكو رێگریش ده‌كات له‌ گه‌یاندنی هاوكارییه‌كان به‌ پێشمه‌رگه‌، ئه‌مه‌ش بە پێشێلكردنێكی زه‌قی ده‌ستوور نێودەبات.‌ 

رۆژی چوارشه‌ممه‌ 26/11/2014  ، مه‌سرور بارزانی، راوێژكاری ئه‌نجوومه‌نی ئاسایشی هه‌رێمی كوردستان لەگەڵ شاندێكی هاوبه‌شی هه‌ردوو وه‌زاره‌تی به‌رگری و ده‌ره‌وه‌ی ئه‌ڵمانیا به‌ سه‌رۆكایه‌تی ژه‌نه‌ڕاڵ ستاهڵ، جێگری وه‌زیری به‌رگریی بۆ كاروباری ستراتیژی ئه‌رك و چالاكییه‌كان کۆبووەوە.

له‌ كۆبوونەوەكەدا شاندەكە پشتگیری ئه‌ڵمانیایان بۆ هێزی پێشمه‌رگه‌ دووپاتكردووەتەوە  سه‌رسامی خۆشیان به‌ خۆڕاگری و گیانفیدایی پێشمه‌رگه‌ له‌ روبه‌ڕووبونه‌وه‌ی چەكدارانی داعش ده‌ربڕیوە، كه‌ كورد و پێشمه‌رگه‌ تاكه‌ هێزی كارایه‌ له‌سه‌ر زه‌وی رووبه‌ڕووی داعش بووه‌ته‌وه‌ و پێشڕه‌وی باشیان به‌ده‌ستهێناوه‌.

ئه‌وه‌شیان خستووەتەڕوو كه‌ ئه‌ركی كۆمه‌ڵگه‌ی نێوده‌وڵه‌تییه‌ یارمه‌تی و هاوكاری كورد بكات و دووپاتیان له‌وه‌ كردووەتەوە‌، پێویسته‌ هاوكارییه‌كان له‌ هه‌موو بواره‌كانی په‌یوه‌ست به‌ كاروباری سه‌ربازی بۆ پێشمه‌رگه‌ فرا‌وانتربكرێن.

لە بەرامبەریشدا راوێژكاری ئه‌نجوومه‌نی ئاسایشی هه‌رێمی كوردستان ئاماژه‌ی به‌و‌ كۆسپ و له‌مپه‌رانه‌ داوە كه‌ حكومه‌تی عێراقی فیدراڵ بۆ گه‌یاندنی هاوكارییه‌كان به‌ پێشمه‌رگه‌ دروستیان ده‌كات و رایگەیاندووە،" به‌پێی ده‌ستوور پێشمه‌رگه‌ به‌شێكه‌ له‌ سیست‌می به‌رگریی عێراق، به‌ڵام به‌غدا نه‌ك هه‌ر ئه‌ركه‌كانی به‌رامبه‌ر هێزی پێشمه‌رگه‌ جێبه‌جێ نه‌كردوون‌، به‌ڵكو رێگریش ده‌كات له‌ گه‌یاندنی هاوكارییه‌كان به‌ پێشمه‌رگه‌، ئه‌مه‌ش پێشێلكردنێكی زه‌قی ده‌ستووره‌ و ده‌خوازین هه‌ڵوه‌سته‌ی له‌سه‌ر بكرێت".</sup>

غازی حارس / rudaw

^26/11/2014

^{ئەندامێکى هاوپەیمانى نیشتیمانى ئاماژە بەڕێککەوتنى هەولێر و بەغدا دەکات ئەوەش دەخاتەڕوو ئەو ڕێککەوتنە سەلماندى کەرکووک کوردستانیە.}

^{ساڵح حسناوى ئەندامى هاوپەرمانى نیشتیمانى لە لێدوانێکدا بۆ “عین عێراق نیوز” ڕایگەیاند قسەکانى سەرۆکى هەرێمى کوردستان لەبەرانبەر ئەحمەد داود ئۆغلۆ لە هەولێر کە گوتى:”لەگەڵ بەغدا ڕێککەوتوین لەسەر ئەوەى هەرێمى کوردستان 150هەزار بەرمیل نەوت لە کەرکووکەوە بداتە بەغدا لەبەرانبەردا بەغدا پێشینەیەکى پارە ڕەوانەى کوردستان بکات”. ڕەزامەند بوونى وەزارەتى نەوتى عێراق بەرانبەر ئەم بڕیارە ئەوەى دەرخست کە نەوتى کەرکووک بووە موڵکى هەرێمى کوردستان و بەعێراق دەفرۆشرێتەوە.
گوتیشى:” حکوومەتى عێراق کاتێک لە 17% ى بودجەى کوردستانى داوە کە دەکاتە 17 ملیار دۆلار و نرخى یەک بەرمیل نەوت بە. 8 دۆلار فرۆشراوە .}

^26/11/2014

<sup>سەرۆككۆماری پێشووی توركیا پێیوایە لە ئەگەری سەربەخۆبوونی هەرێمی كوردستان ناوچەكە رووبەڕووی ناسەقامگیرییەكی دیكە دەبێتەوە، ئەوەش دەبەستێتەوە بە چەند هۆكارێكەوە.
گیول لە چاتام هاوس لە بەریتانیا بەشداری كۆنفڕاسێكی كرد و گوتی: "لەدوای شەڕی كەنداو، تەنیا هەڕەشەیەك لە ناوچەكەدا هەبووبێت سەدام حوسێن بوو، بەڵام ئێستا هەڕەشەكان زیادیانكردووە".

"نەمانی رێفراندۆم لە رۆژەڤی كورد بە ئەرێنی دەبینین"

گیول لە وەڵامی پرسیاری ئەوەی كە ئایا توركیا كوردستانێكی سەربەخۆ لە عێراق قبوڵ دەكات؟، گوتی: "بڕوامان وایە سەربەخۆبوونی هەرێمی كوردستان ناوچەكە دەخاتە نێو ناسەقامگیرییەكی دیكەوە، ئەوەی كە ئەنجامدانی ریفراندۆم لە رۆژەڤی كورد نەماوە بە ئەرێنی دەبینم، چونكە بەشێك لە سوننە و شیعەكان دەڵێن وڵاتەكەمان دابەش دەبێت".

هەروەها دەڵێ: "نەك هەر لە عێراق، بەڵكو لە هەر وڵاتێكی دیكە بێت، دەبێ مافی هاونیشتمانیبوونی یەكسان بە كورد بدرێت و بە پێی یاساكانی ئەو وڵاتە دەستەبەری ئەو مافەی بۆ بكرێت، بەڵام عێراق خۆی فیدڕاڵە و هەرێمی كوردستانیش لەنێو دەستووردا هاتووە، رێككەوتنیشیان لەسەر نەوت و گاز دڵخۆشكەرە".

عەبدوڵڵا گیول هێشتا بڕوای بە هەستانەوەی حكومەتی عێراق هەیە، بەڵام دەڵێ: "ئەگەر بێت و هەڵەكان راستبكرێنەوە پێشهاتێكی باش دەبێت، ئێمە لە زووەوە گوتومانە كە حكومەتی عێراق هەڵە دەكات كە پێكهاتەیەكی گرنگی عێراق كە سوننەكانە پەراوێز دەخات".

بە بۆچوونی گیول: "داعش زۆر باش توانی توڕەیی سوننەكان ئاراستە بكات، توڕەیی ئەو كەسانەی لە سوپای سەدام دابڕابوون، ئەوانەی هەستیان دەكرد زیندانین، ئەو كەسانەی هەستیان دەكرد وڵاتەكەیان پارچە دەبێت و بەتەواوی كەوتووەتە ژێر كاریگەری ئێران".</sup>

فه‌رهاد چۆمانی/ rudaw

^26/11/2014

<sup>سەرۆكی هەرێمی كوردستان رایدەگەیێنێت،" هەڕەشەی تیرۆریستان بۆ سەر ئاسایشی جیهان و گشت دەوڵەتان جیدییە، بۆ رووبەڕووبوونەوەیشی پێویستە لە بواری فكری و ئابوورییشەوە شەڕیان بكرێت و سەرچاوەی دارایی و داهاتیان وشك بكرێت".

مەسعود بارزانی، سەرۆكی هەرێمی كوردستان ئەمڕۆ سێشەممە 25/11/2014 لە سەڵاحەدین،  پێشوازی لە گریگۆ گیزی، سەرۆكی فراكسیۆنی پارتی چەپ لە پەرلەمانی ئەڵمانیای فیدراڵ كرد. بەپێی راگەیێندراوی كۆبوونەوەكە،  لە دیدارەكەدا سەرۆكی فراكسیۆنی پارتی چەپ لە پەرلەمانی ئەڵمانیا وێڕای ئاماژەدان بە پێشكەوتنەكانی هەرێمی كوردستان لە هەموو بوارەكاندا، خستوویەتییەڕوو،" ئێستا لەسەر ئاستی جیهاندا كورد رێز و پێگەیەكی زۆر باشی هەیە و كوردستان بۆ ماوەیەكی درێژ چەوسێندراوەتەوە، بەڵام توانیویەتی كار بۆ ئازادی بكات و رێگەی خۆی سەركەوتووانە بكاتەوە".

سەرۆكی فراكسیۆنی پارتی چەپ دەستخۆشی لە هەرێمی كوردستان و هێزی پێشمەرگە كردووە كە توانیویانە رێگە لە تیرۆریستان بگرن و ئێزدی و مەسیحی و پێكهاتە نەتەوەیی و ئایینییەكانی ناوچەكە بپارێزن. 

گریگۆ گیزی ئاماژەی بۆ ئەوەش  كردووە كە هەرێمی كوردستان بووەتە پەناگەی سەدان هەزار ئاوارە و پاڵپشتیی وڵاتەكەیشی لە یارمەتیدانی مرۆیی بۆ كوردستان و هەروەها هاوكاریكردن و مەشقپێكردنی هێزەكانی پێشمەرگە دووپاتكردووەتەوە.

لە بەرامبەریشدا بارزانی تیشكی خستووەتەسەر بارودۆخی مەیدانی بەرەكانی رووبەڕووبوونەوەی پێشمەرگە و چەكدارانی داعش و ئاماژەی بەوەداوە، كە "هێزەكانی پێشمەرگە توانیویانە رێگە لە پێشڕەویی تیرۆریستان بگرن و تیرۆریستان لە زۆربەی ئەو ناوچانە وەدەربنێن كە داگیریان كردبوون".

سەبارەت بە ئەو هاوكارییە سەربازییانەی لە لایەن وڵاتان پێشكەشی پێشمەرگە كراوە بارزانی ئەوەی خستەڕوو كە" هێشتا ئەو هاوكارییانە لە ئاستی ئەو هەڕەشە و تەحدیاتە نییە كە لە لایەن تیرۆریستانی داعشەوە رووبەڕووی كوردستان بووەتەوە، كەچی لە بەرانبەریشدا تیرۆریستانی داعش ئیمكانیات و چەكی پێشكەوتووی دوو دەوڵەتیان كەوتووەتە دەست".

سەبارەت بە دۆخی ئەو ئاوارانەی كە ئێستا لە باشووری كوردستان جێگیركراون، سەرۆكی هەرێمی كوردستان رایگەیاندووە،" بە هەموو توانایەك یارمەتی ئاوارەكان دەدەین و دەیانپارێزین، بەڵام ئاستی كارەساتەكە و ژمارەی ئاوارەكان یەكجار زۆرە و لە تواناكانی هەرێمی كوردستان تێپەڕیوە، بە تایبەت كە لە وەرزی زستاندا پێویستییەكان زۆرتر دەبن و ئاوارەكانیش تووشی بارودۆخێكی نالەبارتر دەبنەوە". هەروەها هەر لەم دانیشتنەدا قسە لەبارەی بارودۆخی رۆژئاوای كوردستان، چوونی پێشمەرگە بۆ كۆبانێ و پەیوەندییەكانی نێوان هەرێمی كوردستان و ئەڵمانیا كراوە.</sup> 

^25/11/2014

^{لەکۆبوونەوەی پەیمانی باکوری ئەتڵەسی ناسراو بە (ناتۆ) چەند پێشنیارێک بۆ کوردستان کران و بەفەرمیش داواکرا پارتی کرێکارانی کوردستان (پەکەکە) لەلیستی تیرۆر دەربھێندرێت و سەربەخۆییش بۆ باشوری کوردستان ڕابگەیەندرێت.}

^{ئەمڕۆ ڕێکخراوی ناتۆ کۆبوونەوەی ژمارە ٦٠ی بۆ پەرلەمانتارانی ڕێکخراوەکە لەشاری دەنھاگ ـ ی ھۆڵەندا سازکرد، کە دەستەی پەرلەمانتارانی ناتۆ پێکھاتوون لەپەرلەمانتارانی وڵاتانی ئەندامی ڕێکخراوی پەیمانی باکوری ئەتڵەسی ناسراو بە (ناتۆ) لەپەرلەمانی ئەوروپا.}

^{لەکۆبوونەوەکەدا پەرلەمانتاران چەند باسێکیان پێشکەشکرد لەبارەی کێشەکانی ئۆکراین و ھەروەھا شەڕ دژی داعش، لەو نێوەندەشدا بەوردی باسی ڕۆڵی کورد کرا لەڕووبەڕووبونەوەی گروپی تیرۆریستی داعش لەعێراق و سوریادا.}

^{پیتەر پیلز ئەندامی پەرلەمانی ئوسترالیا کە ھاوکات ئەندامی پەرلەمانی ناتۆشە چەند پێشنیازێکی ئاراستەی ڕێکخراوی ناتۆو یەکێتی ئەوروپا کردو وتی:"پێویستە ھەرێمە کوردییەکان لەتورکیا، ئێران و سوریا مافی ئۆتۆنۆمییان پێبدرێت و ھەرێمی کوردستانیش مافی دەوڵەتی سەربەخۆی ھەیەو پێویستە ڕێگری لێنەکرێت".}

^{لەکۆتا خاڵی پێشنیارەکەیدا ئەو پەرلەمانتارە ئوسترالییە وتووشیەتی:"پێشتر ڕێکخراوی ڕزگاریی فەڵەستینی خرابووە لیستی تیرۆرەوە، بەڵام دواتر ئەو ڕێکخراوە لەلیستی تیرۆر دەرھێندرا، لەبەرئەوە پێویستە لەئێستاشدا پەکەکە ھەمان ئەو شانسەی پێبدرێت و لە لیستی تیرۆری نێودەوڵەتی دەربھێندرێت و ناوی بسڕدرێتەوە".}

^{ئەو پەرلەمانتارە باسی لەوەشکردووە، ئێستا گەورەترین شەڕی دژی گروپی تیرۆریستی داعش لەسەرئاستی جیھان، کورد دەیکات، "بۆیە پێویستە بەگرنگییەوە لەڕۆڵی کوردان بڕوانرێت و ھاوکاری بکرێن".}

^{داواشی لەناتۆو یەکێتی ئەوروپا کردووە، بەزووترین کات بکەونە ناو ھەوڵدانەکانیانەوەو نێوانگیریی تورکیاو پەکەکە بکەن، وتووشیەتی:"ئەگەر تورکیاش گرنگی بەمە نەدات، پێویستە ناتۆ فشاری بخاتەسەر".}

^{دەستەی پەرلەمانتارانی ناتۆ لەساڵی ١٩٥٥وە لەلایەن ١٥٨ پەرلەمانتاری یەکێتی ئەوروپاو پەرلەمانتارانی ئەو وڵاتانەی ئەندامی ناتۆن پێکھێندرا، دواتر لەساڵی ١٩٦٦دا وەکو دەستەی باکوری ئەتڵەنتیک ناسێندراو پاشان لە ١٩٩٩دا لەلایەن فراوانتر کراو ژمارەیەکی زیاتر لەپەرلەمانتارانی وڵاتانی ئەندامی ناتۆو پەرلەمانی ئەوروپا بەشداریی کۆبوونەوەکان دەکەن.}

^25/11/2014