<sup>یەمەن لە لێواری رووخان و هەڵوەشاندنەوەدایە. قەیرانی سیاسی و شەڕ و پێکدادان و رەوشی ئابووری نالەبار هەڕەشە لە ئایندەی یەمەن دەکەن. وڵاتانی ناوچەکە و جیهان دەیانەوێت قەیرانی یەمەن بکەنە قەیرانێکی نێودەوڵەتی هاوشێوەی قەیرانی سووریا و لوبنان.     

وڵاتانی عەرەبی هەوڵدەدەن لەڕێگای ئەنجوومەنی ئاسایش و ئەنجوومەنی هاریکاری کەنداو سنوورێک بۆ دەسەڵاتی حووسییەکان دیاری بکەن و ناچاریان بکەن دەستبەرداری راگەیاندنی دەستووری ببن.  

ئەنجوومەنی ئاسایش بڕیاری ژمارە ٢٢٠١  تایبەت بە رەوشی یەمەن دەکرد، بەڵام بڕیارەکە ئاماژەی بە بەندی حەوتی جاڕنامەی نەتەوە یەکگرتووەکان نەکرد، ئەمەش بۆ حووسییەکان وەکو دەستکەوتێک دەبینرێت. 

ئەنجوومەنی ئاسایشی نێودەوڵەتی بەکۆی دەنگ داوای لە حووسییەکان کرد لە دامەزراوە حکومییەکان بکشێنەوە و چەکەکان رادەستی سوپا بکەن، چاودێرانی دیپلۆماسی پێیانوایە ئاماژەنەکردنی بە بەندی حەوت لەژێر فشاری رووسیا بووە، رووسیا هەڕەشەی بەکارهێنانی مافی ڤیتۆی کردووە، ئەمەش سەرەتاییەکە بۆ بەنێودەوڵەتیکردنی قەیرانی یەمەن کە دوور نییە بە دەردی سووریا یاخود لوبنان بچێت.
      
بڕیارەکەی ئەنجوومەنی ئاسایش بۆ وڵاتانی عەرەبی مایەی نیگەرانی بوو. چونکە ئەنجوومەنی هاریکاری کەنداو داوایکردبوو ئاماژە بە بەندی حەوت بکرێت.  

سەرچاوەیەک لە ئەنجوومەنی هاریکاری کەنداو رایگەیاند، ئەنجوومەنی هاریکاری کەنداو چاوەڕێدەکات کە بزانێت ئاخۆ بڕیارەکەی ئەنجوومەنی ئاسایش چی لێدەکەوێتەوە دواتر هەڵوێستی خۆی یەکلادەکاتەوە، ئەو سەرچاوەیە رایگەیاند، کە سەپاندنی سزای ئابووری بەسەر یەمەندا یەکێکە لە بژاردەکانی ئەنجوومەنەکە، ئەمەش بەهۆی ئەوەوە دێت چەکدارانی ئەنساروڵڵای حوسیییەکان کە شیعە مەزهەبن دەسەڵاتی وڵاتیان گرتووەتە دەست.</sup>

rudaw

^18/2/2015

<sup>سەرچاوەیەكی دیپلۆماسی رایدەگەیەنێت، فەرماندە سەربازییەكانی جیهان بە مەبەستی هەڵسەنگاندنی ئاراستەی جەنگی دژ بە رێكخراوی داعش، سبەی چوارشەممە لە ریازی پایتەختی سعودیە كۆدەبنەوە.

سەرچاوەیەكی دیپلۆماسی بە ئاژانسەكانی فەرەنسای راگەیاندووە:" ئەو دیدارە دوو رۆژ بەردەوام دەبێت بۆ تەواوكردنی ئەو گفتگۆیانەی لە پێشووتردا كراون"، بەبەشداری "سەرجەم وڵاتانی پەیوەست" شانبەشانی ویلایەتە یەكگرتووەكان لە شەڕی دژ بە رێكخراوە تووندئاژۆكان، بە وڵاتانی كەنداویشەوە.

ئەو سەرچاوە دیپلۆماسییە كە ناوەكەی ئاشكرانەكراوە، دەشڵێت: "پێموایە ئەم كۆبوونەوەیە بەمەبەستی هەڵسەنگاندنی ساڵانەیە بۆ ئەو دۆخەی، كە ئێمەی تێدایە و تاوتوێی ئەوەش دەكرێت لەم كاتەدا چیبكرێت".

لەلایەكی دیكەوە سەرچاوەیەكی دیكەی دیپلۆماسی دەڵێت: "ئەو كۆبوونەوەیە لەم نزیكانە دەبێت و بۆ گۆڕینەوەی زانیارییەكانە" و هەلێكیش دەبێت بۆ هەماهەنگیكردن لەو كۆبوونەوەیەشدا بڕیای یەكلاكەرەوە نادرێت.</sup>

^18/2/2015

<sup>هاوسەرۆكی پارتی دیموكراسی گەلان HDP ئاشكرایكرد، كە عەبدوڵڵا ئۆجەلان 10 خاڵی خستووەتە بەردەم حكومەتی توركیا وەك پێشمەرج بۆ چەكدانانی پارتی كرێكارانی كوردستان.

رۆژی 17-2-2015، سەڵاحەدین دەمیرتاش، هاوسەرۆكی پارتی دیموكراسی گەلان HDP دوای كۆبوونەوەی فراكسیۆنی پارتەكەی لە پەرلەمانی توركیا وەڵامی پرسیاری رۆژنامەنووسانی دایەوە.

لە وەڵامی پرسیارێكدا سەبارەت بە ئەگەری چەكدانانی پارتی كرێكارانی كوردستان PKK، دەمیرتاش گوتی: "ئیمراڵی 10 خاڵی خستووەتە بەردەم حكومەتی توركیا. ئەگەر لەسەر ئەو خاڵانە بگەینە رێككەوتن لە كاتێكی كەمدا هەنگاوی پێویست بۆ چەكدانان دەنرێت".

هاوسەرۆكی HDP لەسەر پرۆژە یاسای ئاسایشی ناوخۆش كە لە لایەن پارتی داد و گەشەپێدان AKP ی دەسەڵاتدارەوە پێشنیازكراوە و چاوەڕێدەكرێت بەو زوانە بگاتە بەردەم پەرلەمانی توركیا، گوتی: "ئەو پرۆژە یاسایە نەك تەنها پرۆسەی چارەسەری، بەڵكو هەموو هەوڵەكانی ئاشتی لە كۆمەڵگادا لەباردەبات.".</sup>

^18/2/2015

<sup>ئەمریكا نیگەرانە لە ئاشكراكردنی زانیارییە هەستیارەكانی دانوستاندنی ئەتۆمیی لەگەڵ ئێران لەلایەن ئیسرائیلەوە.

راگەیاندنەكانی ئەمریكا و ئیسرائیل باس لە بڕیارێكی كۆشكی سپی دەكەن بۆ سنوورداركردنی گۆڕینەوەی زانیاریی لەگەڵ ئیسرائیل، لەبارەی دۆسێی دانوستاندنە ئەتۆمییەكانی ئێران.

واشنتن پۆست لە راپۆرتێكدا نووسیویەتی "بێمتمانەیی لەنێوان ئیسرائیل و ئەمریكا تادێت زیاتر دەبێ، چونكە ئەمریكا بەگومانە لەوەی بنیامین ناتانیاهۆ، سەرۆكوەزیرانی ئیسرائیل رێگای بە ئاشكراكردنی زانیارییە نهێنییەكانی دانوستاندنی ئەتۆمی ئێران دابێت بۆ راگەیاندنەكان".

یەكێك لەو زانیارییە نهێنییە ئاشكراكراوانە كە واشنتن پۆست ئاماژەی پێدەكات، رەزامەندی ئەمریكایە بە بەردەوامبوونی چالاكی سنوورداری 6500 ئامێری سەنتەریفیووژ لە رێككەوتنی كۆتاییدا، كە میدیایەكی ئیسرائیلی ئاشكرایكردووە.

ئیسرائیل دژی چالاكبوونی سەنتەریفیوژەكانی ئێرانە بۆ پیتاندنی یۆرانیۆم لە هەر ئاست و جۆرێكدا بێت.</sup>

^17/2/2015

<sup>مەلایەكی عەرەب راستی خولانەوەی زەوی بەدەوری خۆیدا رەتدەكاتەوە و بە بۆچوونی خۆی، بەڵگەی زانستیشی بۆ دەهێنێتەوە.

مەلایەكی عەرەب بە ناوی شێخ بەندەر خەیبەری، لە كاتی گوتنەوەی وانەیەكی ئایینییدا، نكۆڵی لە خولانەوەی زەوی كرد بە دەوری خۆیدا، راشیگەیاند، كە بەڵگەی ئایینی و لۆژیكی هەن، بۆ سەلماندنی قسەكەی.

لەو چوارچێوەیەدا شێخ بەندەر گوتی: "بۆ نموونە ئێمە دەمانەوێت بە فڕۆكە بچین بۆ چین، ئەگەر فڕۆكە لە ئاسمان رابووەستێت، بە پێی بیردۆزی خولانەوەی زەوی بێت، دەبێت بگەینە ئەو وڵاتە، بەڵام ناگەین، كەوابوو راست نییە. زەوی ناخولێتەوە.".</sup>

^17/2/2015

<sup>مەسعود بارزانی، سەرۆكی هەرێمی كوردستان لەكاتی كۆبوونەوەی لەگەڵ ئادمیڕاڵ پیێڕ دی ڤیلیڕس، سوپاسالاری فەرەنسا رایگەیاند، تیرۆر هەڕەشەیەكی جیهانییە و تیرۆریستان لە هەر شوێنێك دەرفەتیان بۆ بڕەخسێت دەست لە وەحشیگەری ناپارێزن، بۆیە رووبەڕووبوونەوەی ئەو دیاردەیە ئەركی هەموو لایەكە. 

ئەمڕۆ دووشەممە 16ـی 2ـی 2015 لە سەڵاحەدین، مەسعود بارزانی، سەرۆكی هەرێمی كوردستان پێشوازی لە ئادمیڕاڵ پیێڕ دی ڤیلیڕس، سوپاسالاری فەرەنسا و شاندێكی یاوەری كرد، كە پێكهاتبوون لە ژەنەڕاڵ  دی سێت كوێنتین، فەرماندەی ئۆپەراسیۆنە تایبەتەكانی سوپای فەرەنسا و ئاڵێن جوپڕێت، كونسوڵی فەرەنسا لە هەولێر و ژمارەیەك ئەفسەر و راوێژكاری سوپای ئەو وڵاتە.

بەپێی راگەیەندراوێكی سەرۆكایەتیی هەرێمی كوردستان، لە دیدارەكەدا سوپاسالاری فەرەنسا ستاییشی رۆڵی پێشمەرگەی كردووە لە رووبەڕووبوونەوەی تیرۆریستان و پەیوەندی و هەماهەنگیی نێوان هێزەكانی وڵاتەكەی و هێزی پێشمەرگەی بە باش وەسفكردووە. ئەوەیشی دووپاتكردووەتەوە كە "شەڕی تیرۆریستان شەڕێكی هاوبەشی هەموومانە و سوپای فەڕەنساش بەردەوام دەبێ لە یارمەتیدان و هاوكاری و مەشقپێكردنی پێشمەرگە و وڵاتەكەی هەتا لەناوبردنی داعش پابەندی ئەو هاوبەشی و یارمەتیدانە دەبێت". 

هەروەها سوپاسالاری فەڕەنسا جەختی لەوەش كردووەتەوە، كە ئەو میتۆدەی تیرۆریستان بانگەشەی بۆ دەكەن بە هیچ شێوەیەك قابیلی قبووڵ نییە.

لەبەرامبەردا بارزانی سوپاسی گەل و سەرۆك و سوپای فەرەنسای كردووە و ئاماژەی بە هاتنی فرانسوا ئۆڵاند بۆ كوردستان كردووە، ئەو سەردانەشی كە لە كاتێكی زۆر هەستیاردا ئەنجامدرا، بە دووپاتكردنەوەی دۆستایەتیی گەلی فەرەنسا و هەرێمی كوردستانی لەقەڵەمداوە. ئەوەیشی خستووەتەڕوو كە گەلی كوردستان بۆیان دەركەوت كە دۆستێكی مەزنی وەك فەرەنسایان لە پشتە.

بارزانی وێڕای ئاماژەدان بە رووداوەكانی پاریس و كۆپێنهاگن و شوێنەكانی دی، جەختی لەوە كردەوە كە تیرۆر هەڕەشەیەكی جیهانییە و تیرۆریستان لە هەر شوێنێك دەرفەتیان بۆ بڕەخسێت دەست لە وەحشیگەری ناپارێزن، بۆیەشە رووبەڕووبوونەوەی ئەو دیاردەیە ئەركی هەموو لایەكە.

لە درێژەی قسەكانیدا بارزانی باسی سەرەتاكانی سەرهەڵدانی داعش و چۆنییەتی گەشەكردن و پەلاماردانیان بۆ سەر كوردستان كردووە، ئەوەیشی خستووەتەڕوو كە لە سایەی قارەمانێتیی پێشمەرگە پەلاماری تیرۆریستان تێكشكا و پێشمەرگە ئوستوورەی داعشی شكاند و 15000 كیلۆمەتری چوارگۆشەی لەژێر دەستی تیرۆریستانی داعش كۆنترۆڵكردووەتەوە.

سەرۆكی هەرێمی كوردستان هێمای بۆ ئەوەش كردووە،" كە تیرۆریستانی داعش پشت بە هزری تەكفیری و جیهادی و هزری شۆڤینی دەبەستن و ئەم جۆرە بیركردنەوەیە نامرۆڤانەیە هیچ ئایندەیەكی نییە".</sup>

^{١٧/٢/٢٠١٥}

<sup>لایەنگرانی پارتی کرێکارانی کوردستان رێپێوانێك لە بەردەم پەرلەمانی کوردستانەوە بۆ کونسوڵخانەی تورکیا لە هەولێر سازدەكەن، ئەوان پڕبەدەنگ هاواردەکەن و داوای ئازادکردنی عەبدوڵڵا ئۆجەلان، رێبەری بەندکراوی PKK دەکەن.

ئۆجەلان لە نەورۆزی ساڵی 2013 لە پەیامێکدا، كە لە بەرامبەر ملیۆنان کەس لە ئامەد خوێندرایەوە، نەخشەڕێی پرۆسەی چارەسەریی ئاشتی راگەیاند، پرۆسەیەک کە لایەنەگرانی پەکەکە تەنیا ئازادکردنی ئۆجەلان بە کلیلی سەرکەوتنی دەزانن.

دوای 15 ساڵ لە هەڵگیرسانی خەباتی چەکداری، لە 15 ی شوباتی 1999 ئۆجەلانی سەرۆک و دامەزرێنەری پەکەکە لە نایرۆبی پایتەختی کینیا رفێندرا و بۆ تورکیا گواسترایەوە. ئێستاش ئۆجەلان دوای 16 ساڵ بەندکردنی، لە دوورگەی ئیمرالی سەرپەرشتی پرۆسەی چارەسەری پرسی کورد دەکات.</sup>

<sup>خۆپێشاندانەكەی سلێمانی لە شەقامی سالمەوە بۆ بەردەم باخی گشتی سلێمانی ئەنجامدراو كوردانی هەر چوارپارچەی كوردستان بەشداربوون، كە هیواخوازبوون عەبدوڵڵا ئۆجەلان بەر لە هاتنی نەورۆزی ساڵی 2715 ى كوردی ئازادبكرێت.

عەبدوڵڵا ئۆجەلان لە4/4/1948  لە ئورفەی باكووری كوردستان لە دایكبووە و لە ساڵی 1978 پارتی كرێكارانی كوردستانی دامەزراند، نێوبراو 15/2/1999 لەولاتی كینیا دەستگیركراو رادەستی توركیا كرا. لەو كاتیشەوە تائێستا لە دوورگەی ئیمرالی دەستبەسەرە.</sup> 

^17/2/2015

<sup>سەرۆکی پێشووی دەزگای هەواڵگری ئەمریكا پێیوایە باراك ئۆباما چەندان هەڵەی لە سیاسەتەکانی بەرامبەر چەکدارانی داعش لە عێراق و سووریا كردوون.

لیۆن بانیتا، سەرۆکی پێشووی دەزگای هەواڵگری ئەمریکا(CIA) لە هەڤپەیڤینێکدا لەگەڵ تەلەفزیۆنی CNN رایگەیاند:" بێگومان سەرۆک لە سیاسەتەکانی بەرامبەر چەکدارانی داعش هەڵەی کردووە، سەرۆک خودی خۆشی ئەمە دەزانێت، بەڵام ئەمکارە کاتێکی زۆری دەوێت".

بانیتا هەروەها دەڵێت:" گەشبینم بەو کۆششەی ئەمریکا کە لە عێراق ئەنجامیدەدات، پێشموایە کۆتاییەکەی بەدەرکردنی داعش لە عێراق تەواودەبێت".

بانیتا دەشڵێت:" ئەوەی لای من جێگەی پرسیارە، ئایا لە سووریا چەند کاتمان دەوێت تاوەکو بتوانین بەرەنگاری داعش ببینەوە، چونکە تاکە شوێنی ئارام بۆ چەکدارانی داعش سووریایە، بۆیەش لە بەرەنگاربوونەوەیان لە سووریا کاتی زۆرمان دەوێت، هەروەها کێشەی زۆریشمان دەبێت".</sup>

^16/2/2015

<sup>کۆماری ئیسلامی ئێران لیوا سەید بەھائەدینی ئازادکرد کە لایەن ھێزێکی سوپای پاسدارانەوە سەرلەبەیانی ئەمڕۆ یەكشەممە 15 ی شوباتی 2015، لە گوندی لاورانی سەر بە ناوچەی ئیمامی لە سنووری پارێزگای ھەڵەبجە دەستگری کردبوو.

مولازم نەجمەدینی کوڕی لیوا سەید بەئاھەدین بۆ تۆڕی میدیایی رووداو گوتی:" بەیانی ئەمڕۆ باوكم بە قوڵایی زیاتر لە 300 مەتر لە نێو خاکی عێراقەوە لە لایەن سوپای پاسدارانەوە دەستگیرکرا، ئێوارەی ئەمڕۆش بە کەفالەت ئازادکرا، ئێستاش لە شاری پاوەین لە رۆژھەڵاتی کوردستان و بڕیارە سبەی رێکارە یاساییەکان تەواوبکەین و بگەڕێینەوە ھەڵەبجە".

مولازم نەجمەدین هەروەها گوتی:" بەبۆنەی ساڵڕۆژی شۆڕشی ئیسلامی، ئێران سوپایەکی زۆری لە سەر سنوور کۆکردبووەوە، ھەر ئەمڕۆش چەند پلەدارێکی رۆژئاوای سوپای پاسداران ھاتنە لامان و داوای لێبوردنیان کرد كە بە ھەڵە باوکمیان دەستگیر کردبوو".

پێشتر فازڵ بەشارەتی، بەرپرسی لقی١٢ی پارتی دیموکراتی کوردستان لە ھەڵەبجە بە (تۆڕی میدیایی رووداو)ی راگەیاندبوو كە " لیوای خانەنشین (سەید بەھائەددین) لەگەڵ ھەردوو پاسەوانەکانی (عەلی عەلی و کۆسار عوسمان) لەكاتێكدا سەرقاڵی دروستکردنی رێگابوون بۆ گوندەکەیان، هێزێكی سوپای پاسدارانی ئێران چواردەوریان گرتوون و ھەرسێکیان لەگەڵ خاوەنی ئەو شۆفڵەی کاری بۆ کردوون بەرەو شوێنێکی نادیار بردوون".

لیوا سەید بەھائەدین یەکێکە لە پێشمەرگە دێریینەکان و بەشداری شۆڕشی ئەیلوولی کردووە، سێ برای شەھیدکراون لە شەڕی داعشیش برازایەکی شەھیدبووە.</sup>

^16/2/2015

<sup>جەبار یاوەر، ئەمینداری گشتیی وەزارەتی پێشمەرگە لەسەر ئەو هەواڵەی بڵاوبووەتەوە گوایە ژمارەیەك پێشمەرگەی دیلی لای داعش لە بەرامبەر ئازادكردنی 106 چەكداری داعش ئازادكرابن، روونكردنەوە دەدات و ئەو هەواڵە رەتدەكاتەوە. 

جەبار یاوەر بە تۆڕی میدیایی رووداوی راگەیاند:'' بەفەرمی هیچ دیلێکی پێشمەرگە ئازادنەکراوە و ئێمە ئاگاداری هیچ نین، ئەوەی بڵاوكراوەتەوە تەنها پروپاگەندەیە".

ئێوارەی ئەمڕۆ لە شاری کەرکووک، لە تۆڕە كۆمەڵایەتییەكان و چەند ماڵپەڕێك دەنگۆی ئازادكردنی 22 پێشمەرگەی دیلی لای داعش بڵاوبووەوە، لە شاری كەركووكیش بۆ دەربڕینی خۆشی تەقەیەکی زۆری کرا.

هاوكات فەرهاد حەمە عەلی، گوتەبێژی ئاسایشی کەرکووک بە (تۆڕی میدیایی رووداو)ی راگەیاند:'' ئەوە تەنیا قسەیەو هیچ بنەمایەکی نییە''.</sup>

^16/2/2015