<sup>بە سەرپەرشتی د. ئاسۆ فەرەیدوون، پارێزگاری سلێمانی و لە ژێر دروشمی  (لە نەورۆزی بەرگریدا هەموومان پێشمەرگەین) لە شاری سلێمانی فێستیڤاڵی نەورۆزی ئەمساڵ  بەشێوەیەكی خۆبەخشانە بەڕێوەدەچێت.

بەپێی راگەیەندراوێكی پارێزگای سلێمانی كە وێنەیەكی بۆ (تۆڕی میدیایی رووداو) نێردراوە، رۆژی 2ی ئاداری 2015،  لیژنەی  ئامادەكاری فێستیڤاڵی نەورۆزی ئەمساڵ لە كۆنگرەیەكی رۆژنامەنووسیدا  شێوازی یادكردنەوەی جەژنی نەتەوەیی نەورۆز و چالاكییەكانی  فێستیڤاڵی نەورۆزی ئەمساڵیان خستووەتەڕوو.

ئیبراهیم ئەحمەد، گوتەبێژی لیژنەی ئامادەكار رایگەیاندووە كە هەرچەندە شەڕێكی ناڕەوا سەپێنراوە بەسەر میللەتی كورد لەلایەن گرووپی "تیرۆریستی" داعشەوە، بەڵام نەورۆز  سبموولی راپەڕین و ئازادی و بەرخودان و تێكۆشانی ئەم نەتەوەیەیە و تاكە جەژنێكە كە هەموو نەتەوەی كورد لە هەرچوار پارچەی كوردستان كۆبكاتەوە، بۆیە بۆ بەرپەرچدانەوەی دوژمنانی ئەم نەتەوەیە، بڕیاریانداوە وەك ساڵانی رابردوو ئەم یادە بكرێتەوە و ئەم جەژنە پیرۆز بكرێت  وەك جەژنێكی نەتەوەیی و نیشتمانی. 
 
ئیبراهیم ئەحمەد ئاماژەی بۆ ئەوەش كرد كە لیژنەكە ئامادەكاری كردووە و بڕگە و بابەتەكانی جەژنی ئەمساڵ لە ساڵانی رابردوو جیاواز دەبێت  و زیاتر گیانی  بەرگری و قوربانیدان و بەرخودانی تێدایە و گرنگی بە هەموو ئەو شەهیدانە دەدرێت كە لەم بەشەی كوردستان و پارچەكانی دیکەی كوردستان گیانی خۆیان بەخشیوە. 

گوتەبێژی لیژنەی ئامادەكاری فێستیڤاڵی  نەورۆز داواشیكردووە "هاووڵاتیان بە ژن و پیاوەوە  جلی پێشمەرگانە بپۆشن و ئەم یادە بكرێتە سەنگەرێك دژی داگیركەران و تیرۆریستانی داعش"، ئاشكراشیكردووە كە هەتا 7ی ئەم مانگە دەرگا كراوەیە بۆ هەر كەسێك  كە بیەوێت بەشداری بكات لەم یادە دەتوانێت پەیوەندی بكات بە بەڕێوەبەرایەتی رۆشنبیریی بەشی راگەیاندن  بۆ ئەوەی  بەرهەمەكانی بناسێنت و جێگەیان بۆ بكرێتەوە. 

ئیبراهیم ئەحمەد دووپاتیشیكردەوە "هیچ جۆرە بودجە و بڕە پارەیەك بۆ ئەم مەراسیمە دانەنراوە و هەموو كارەكان خۆبەخشانەیە".</sup>

^{رووداو- سلێمانی}

^3/3/2015

<sup>نائارامییەکانی سووریا و بەتایبەت هێرشەکانی داعش بۆ سەر هەندێک ناوچەی عێراق و باشووری کوردستان، کاریگەری لەسەر دراوسێکانیش هەبووە، بەتایبەت ئێران.

دامودەزگا سەربازییەکانی ئێران ناونووسی خەڵک دەکەن بۆ بەشداریکردن لە شەڕ دژی داعش. بەشێکیان بە روانینی سیاسی و بەشێکیشیان بە روانینی ئایینی.

نوێنەرایەتی حکومەتی هەرێمی کوردستان لە ئێرانیش رایدەگەینێ، تاوەکو ژمارەیەکی زۆر لە هاونیشتمانیانی رۆژهەڵاتی کوردستان پێیان راگەیاندوون، ئامادەن لەرێگەی ئەوانەوە بەشداری شەڕ دژی داعش بکەن.

بەپێی ئەو ئامارە نافەرمییانەی لە ماڵپەڕەکانی ئێراندا بڵاوکراونەتەوە، تاوەکو ئێستا زیاتر لە 5 هەزار کەس ناویان بۆ بەشداریکردن لەشەڕ دژ بە داعش تۆمارکردووە، بەڵام دیارنییە تاوەکو ئێستا چەندین کەس رەوانەی بەرەکانی جەنگ کراون.

هاوکات بەپێی زانیارییەکانی تۆڕی میدیایی رووداو، لە هەندێک شاری رۆژهەڵاتی کوردستانیش ناوی ئەندامانی کوردی سوپای پاسداران بۆ شەڕ دژی داعش تۆماردەکرێت. هەندێک کەسیش دەڵێن لە عێراق و سووریا بەشداری ئەو شەڕانەیان کردووە.

ژمارەیەک ماڵپەڕی رۆژهەڵاتی کوردستانیش لەو بارەوە نووسیویانە، حکومەتی ئێران دەیەوێ لە سۆزی هاونیشتمانی بوونی خەڵکی رۆژهەڵات لەگەڵ باشوور و رۆژئاوای کوردستان بە مەبەستی کۆکردنەوەی هێزی زیاتر لەنێو خەڵک کەڵک وەربگرێ و بەمە رێژەی ئەندامانی کوردی سوپای پاسدارانیش زیاتر بکات.</sup>

^3/3/2015

<sup>زانایانی شوێنەوارناسی گۆڕێکی بەکۆمەڵیان لەژێر سوپەرمارکێتێک لە پاریس دۆزییەوە، کە تەرمی 200 کەسی لەناو دابوو، هاوکات تەرمەکان بەشێوەیەکی رێک لە ناوگۆڕەکەدا دانراون.

زانایانی شوێنەوارناسی داوایانکردووە، ئەو شوێنەی کە سوپەرمارکێتەکەی لێیە، بپشکنرێ بەرلەوەی جارێکی دیکە باڵەخانەی لەسەر دروستبکرێت، لە ناکاو ئەوگۆڕە بەکۆمەڵەیان دۆزیوەتەوە. 

شوێنەوارناسانیش پێیانوایە ئەوکەسانە چەند سەد ساڵێک بەر لە ئێستا، لە ئەنجامی پەتای تاعونەوە مردوون.

ئەو شوێنەی گۆڕە بەکۆمەڵەکەی لێ دۆزراوەتەوە، لە سەدەی دوازدەم تاوەکو سەدەی حەڤدەمی زایینی، گۆڕستانی نەخۆشخانەیەک بووە، بەڵام پێدەچێت ئەوتەرمانە لە سەدەی هەژدەمدا رەوانەی ژێر زەمینەکانی مردن لە پاریس کرابن. کە لە چەند رێڕەوێک پێکهاتووە و تەرمەکانیان  بە مەبەستی پاراستنیان لەو ژێرزەمینەدا داناون.

تاوەکو ئێستا لە هەمان ناوچەی پاریس 8 گۆڕی بەکۆمەڵی دیکە دۆزراونەتەوە،  هەریەک لەحەوت گۆڕەکە، نزیکەی  20 تەرمیان تێدابووە، جگە لە هەشتەمین گۆڕی بەکۆمەڵ نەبێت، کە زیاتر لە 150 تەرمی تێدابووە.</sup>

^{٢/٣/٢٠١٥}

<sup>فەرماندەیەکی پێشووی سوپای ئیسرائیل ئاشکرایدەکات کە ئەو نەیهێشتووە ئیسرائیل گورزی سەربازی لە ئێران بوەشێنێت.

بینی گانتس، سەرۆکی پێشووی دەستەی ئەرکانی سوپای ئیسرائیل، لە هەڤپەیڤینێکدا کە ئەمڕۆ دووشەممە لە کەناڵی دووی تەلەڤزیۆنی ئیسرائیل بڵاودەبێتەوە، ئاشکرایکردووە کە لە کۆبوونەوەیەکی داخراوی سوپا و سەرۆکوەزیرانی ئیسرائیلدا پلانی وەشاندنی گورزێکی سەربازی لە ئێران خراوەتەڕوو. گانتس دەڵێ: "لە کۆبوونەوەکەدا بەتووندی دژی ئەو بیرۆکەیە وەستامەوە و گوتم ئەمە زیان بە ئاسایشی ئیسرائیل دەگەیەنێت". 

سەرۆکی پێشووی دەستەی ئەرکانی سوپای ئیسرائیل دەڵێت: "ئەوکات ئیهوود باراک وەزیری ئاسایش بوو، ئەو دواتر پێیگوتم کە لە دوایین خولەکەکاندا حکومەتی ئیسرائیل لە وەشاندنی گورزە سەربازییەکە پەشیمان بووەتەوە". 

بەپێی یاساکانی ئیسرائیل، سەرۆکوەزیران دەسەڵاتی ئەوەی هەیە کە بەبێ گەڕانەوە بۆ رای سەرۆکی دەستەی ئەرکان یان هەر فەرماندەیەکی دیکەی سەربازی فەرمانی وەشاندنی گورزی سەربازی بۆ ئێران یان هەر وڵاتێکی دیکە دەربکات.

گانتس تاوەکو دوو هەفتە لەومەوبەریش سەرۆکی دەستەی ئەرکانی سوپای ئیسرائیل بوو، بەڵام ئێستا ژەنەڕاڵ گادی ئایزکۆت جێگەی گرتووەتەوە.</sup> 

^2/3/2015

^{لە سنووری‌ مه‌خمور و خازر، فڕۆكە جەنگییەكان هێرشیان كردەوە سەر چەكدارانی ڕێكخراوی تیرۆریستی‌ داعش، ئەمڕۆش دوای‌ گەمارۆدانیان لەلایەن پێشمەرگەوە، 15 چەكداری‌ ئەو رێكخراوە تیرۆریستییە كوژران، پێشتریش 17 چەكداریان خۆیان ڕادەستی‌ هێزەكانی‌ پێشمەرگە كرد.}

^{ئه‌فسه‌رێكی‌ هێزه‌كانی‌ پێشمه‌رگه‌، كه‌ داوایكرد ناوی‌ بڵاو نه‌كرێتـه‌وه‌، بە خەندانی‌ ڕاگەیاند :"ئەمڕۆ لە سنووری‌ تەل ریم، شەڕێكی‌ قورس بوو لەنێوان هێزەكانی‌ پێشمەرگە و رێكخراوی‌ تیرۆریستی‌ داعش".}

^{ئەو ئەفسەرە، وتیشی :" هێزەكانی‌ پێشمەرگە توانییان چەكدارانی ڕێكخراوی تیرۆریستی داعش گەمارۆ بدەن و تا دوای‌ نیوەڕۆش شەر بەردەوام بوو، هەر لەو شەڕەدا لاشەی‌ 15 چەكدار بەجێمان و فڕۆكە جەنگییەكانیش بۆردوومانی‌ دەكرد".}

^{ئەوەشی‌ ئاشكراكرد، كە دوێنێ‌ 17 چەكداری‌ داعش، بە بێ هیچ شەڕكردنێك خۆیان رادەستی‌ هێزەكانی‌ پێشمەرگە كرد، وتیشی :" بەخۆیان و چەكەكانیانەوە رادەستی‌ نەجات عەلی‌، بەرپرسی لقی‌ مەخووری‌ پارتی‌ بوون".}

^{ئاماژەی‌ بەوەشدا، كە دواتر ژمارەیەكی تر لە چەكدارانی‌ ڕێكخراوی تیرۆریستی داعش ویستیان خۆیان رادەستی‌ هێزەكانی‌ پێشمەرگە بكەن، كە پێشتر هەماهەنگی‌ بوو، بەڵام لەلایەن فڕۆكە ئەمریكییەكانەوە كوژران.}

^{هاوكات ئەفسەرێكی‌ تر، بەخەندانی‌ راگەیاند :"فڕۆكە جەنگییەكان لە سنووری‌ گەندی‌ كەزەكانی‌ ناوچەی‌ كاكەیی لە خازر بردوومانێكی‌ خەستی‌ چەكدارانی‌ ڕێكخراوی تیرۆریستی داعش دەكات".}

^{تەئكیدی كردەوە، كە فڕۆكەكان جیاواز لە هێرشەكانی‌ پێشوویان، بۆ ماوەیەكی زۆرە بە ئاسمانی‌ ناوچەكەدا دەسووڕێنەوە و بۆردوومان دەكەن، وتیشی :" ئەم ناوچەیە زیاتر فڕۆكەی‌ كەندی‌ هێرش دەكەنە سەر چەكدارانی‌ ڕێكخراوی تیرۆریستی داعش ".}

^2/3/2015

^{سەرۆکی میسر پێیوایە یەکڕیزی نێوان لایەنەکان هۆکارێکە بۆ بەرەنگاربوونەوەی داعش، دەشڵێت، وڵاتانی عەرەبی لە لاوازترین باردان بۆ رووبەڕووبوونەوەی تیرۆر.}

<sup>لە هەڤپەیڤینێکدا لەگەڵ رۆژنامەی شەرقولئەوسەتی چاپی سعودی، عەبدولفەتاح سیسی، سەرۆکی میسر رۆژی یەکشەممە 1ی ئاداری 2015 رایگەیاند:" پێویستمان بەیەکڕیزی هەیە، ئەمەش یەکەم هەنگاو دەبێت بۆ لەناوبردنی چەکدارانی داعش، یەکڕیزی واتە هەبوونی هەماهەنگی و هاوکاری لە هەموو بوارەکاندا".

سیسی پێیوایە، ناتوانرێت پلانە ئەمنیی و سیاسییەکان تەنیا لە پرۆسەی سەربازی و ئەمنیدا کورتبکرێنەوە، بەڵکو دەبێت بە یەکگرتوویی رێوشوێنی تووند بگیرێتەبەر، هەروەها دەبێت بەرپەرچیان بدرێتەوە لە ناوچەکەدا.</sup>

^{سیسی وڵاتانی عەرەبی بە جەستەیەکی بریندار و لاواز دەچووێنێت، هەروەها دەربارەی بەرەنگاربوونەوەی داعشیش لەلایەن وڵاتانی عەرەبییەوە هۆشداریدا و گوتی" وڵاتانی عەرەبی لە مەترسیدان و جەستەی عەرەبی بریندارە، هەروەها ئەو جەستەیە لە لاوازترین باردایە".}

^2/3/2015

^{سه‌رۆكی ولایه‌ته‌ یه‌كگرتووه‌كانی ئه‌مه‌ریكا رێگه‌ به‌ ئه‌نجومه‌نی پیران نادات ده‌ستبخاته‌ هه‌ر رێككه‌وتنێك كه‌ له‌باره‌ی به‌رنامه‌ ئه‌تۆمییه‌كه‌ی ئێرانه‌وه‌ ئیمزا بكرێت.}

^{برنادیت میهان، وته‌بێژ به‌ناوی ئه‌نجومه‌نی ئاسایشی نه‌ته‌وه‌یی ئه‌مه‌ریكا بڵاویكرده‌وه‌ كه‌ باراك ئۆباما مافی ڤیتۆ له‌دژی پڕۆژه‌یاسایه‌ك به‌كارده‌هێنێت كه‌ ئه‌نجومه‌نی پیران ره‌زامه‌ندیی له‌سه‌ر ده‌ربڕیووه‌ و تیایدا رێگه‌ به‌خۆی ده‌دات پێداچوونه‌وه‌ بۆ هه‌ر رێككه‌وتنێك بكات كه‌له‌سه‌ر به‌رنامه‌ ئه‌تۆمییه‌كه‌ی ئێران ئیمزا بكرێت.}

^{برنادیت میهان راشیگه‌یاند كه‌ پێویسته‌ باشترین هه‌ل به‌ لایه‌نی دانوستانكاری ئه‌مه‌ریكا بدرێت تا له‌ كێشه‌ی به‌رنامه‌ ئه‌تۆمییه‌كه‌ی ئێران سه‌ركه‌وتوو بن نه‌ك شكست بهێنن.}

^{پڕۆژه‌یاسای پێداچوونه‌وه‌ به‌ رێككه‌وتنی ئه‌تۆمی كه‌ ئه‌نجومه‌نی پیرانی ئه‌مه‌ریكا په‌سه‌ندی كردووه‌، باس له‌وه‌ ده‌كات كه‌ له‌ماوه‌ی پێنج رۆژدا ده‌قی رێككه‌وتنه‌كه‌ بخرێته‌به‌رده‌م كۆنگرێس و رێگه‌ش به‌ باراك ئۆباما نادات تا داوی 60 رۆژ له‌ رێككه‌وتنه‌كه‌ش هیچ سزایه‌ك هه‌ڵوه‌شێنێته‌وه‌ كه‌ كۆنگرێس به‌سه‌ر تارانیدا سه‌پاندووه‌.}

^1/3/2015

^{پارێزگاری موسڵ بە تۆڕی میدیایی رووداوی گوت:” تورکیا بڕیاریداوە بە هەموو شێوەیەکی سەربازی و لۆجیستی هاوکاری گرتنەوەی موسڵ بدات.”}

^{ئەسیل نوجەیفی ئاماژەی بەوەکرد ئەنکەرە چەک و تەقەمنیشمان بۆ دەنێرێ.}

^{ئەم گوتانە نوجێفی دوای سەردانی ئوسامە نوجێفی برای دێت بۆ تورکیا کە لەگەڵ ئەردۆغان و داودئۆغڵۆ کۆبوویەوە.}

^1/3/2015

^{23ی ئەم مانگە چەکدارانی داعش، هێرشیانکردە سەر چەند گوندێکی مەسیحینشین لە دەورووبەری تل تەمەری پارێزگای حەسەکەی رۆژاوای کوردستان و نزیکەی 250 کەسی ئاشوورییان رفاند. بەڵام رەنگە بتوانرێت ئاشوورییەکان بە گۆڕینەوەی دیلەکانی لای یەکینەکانی پاراستنی گەل YPG، رزگاربکرێن.}

<sup>نوێنەری پارتی یەکێتی دیموکراتی PYD لە ئەوروپا، زوهات کۆبانی لە لێدوانێکدا بۆ ئاژانسی هەواڵی سوێدی TT رایگەیاندووە "یەکینەکانی پارستنی گەل بڕیاریانداوە و ئامادەن دیلەکانی داعش لەگەڵ ئەو ئاشووریانەی کە رفێندراون بگۆڕنەوە. ئەم بڕیارە چەند کاژێرێک پێش ئێستا دراوە و هێشتا هیچ هەڵوێستێکی داعشمان نەبیستووە".

بە گوێرەی قسەکانی نوێنەری ئەوروپای PYD ، نزیکەی 600 چەکداری داعشیان لایە، کە زیاترە لەو ئاشووریانەی کە داعش بەزۆرەملێ گرتوونی.</sup>

^{رۆژی هەینی تۆڕی ئاشووری بۆ مافەكانی مرۆڤ رایگەیاند كە دانوستاندنەكان بۆ ئازادكردنی بارمتە ئاشوورییەكان دەستیپێكردووە، ئەو دانوستاندنەش لە رێگەی چەند كەسێكی نێوانكاری ئاشووری و ریشسپییانی عەشیرەتە عەرەبییەكان لە جەزیرەی سووری ئەنجامدەدرێت. بەپێی بەیاننامەیەكی تۆڕی ئاشووری بۆ مافەكانی مرۆڤ ، كە كۆپییەكی بۆ (تۆڕی میدیایی رووداو) نێردراوە، "رێڕەوی دانوستاندنەکان زۆر بەنهێنی بەڕێوەدەچن لەپێناو پاراستنی گیانی گیراوەکان، کە ژمارەیان زیاتر لە ٢٥٠ کەس دەبێت و زۆربەیان ژن و منداڵ و بەتەمەنەکانن". هەمان رۆژ فیدراسیۆنی کۆمەڵەی ئاشوورییەکان بۆ (تۆڕی میدیایی رووداو) پشتڕاستیان کردەوە کە بەلایەنی کەمەوە 15 لەو رفێنراوە مەسیحییانە لەلایەن داعشەوە سەربڕاون.}

rudaw

^1/3/2015

<sup>چەکدارانی حووسی، کە لە مانگی رابردوودا شاری سەنعای پایتەختی یەمەنیان کۆنترۆڵکرد، رێککەوتننامەیەکی لێکتێگەیشتنیان لە بواری گەشتی ئاسمانی لەگەڵ حکومەتی ئێران واژۆکرد.

بەپێی رێککەوتننامەکە، هێڵی ئاسمانیی یەمەنی و هێڵی ئاسمانیی ماهان راستەوخۆ لە سەنعاوە گەشت دەکەن بۆ ئێران، هەروەها بە پێچەوانەشەوە. بەپێی رێککەوتنەکە هەموو رۆژێک دوو گەشت لەنێوان تاران و سەنعا ئەنجامدەدرێت.

چاودێران پێیانوایە ئەم هەنگاوەی حووسییەکان بۆ شکاندنی کۆشەگیریی هەرێمییە، کە چەند رۆژێکە تێیکەوتووە. وڵاتانی وەکو سعودییە، قەتەر، بەحرەین و کوەیت بڕیاریانداوە کە باڵیۆزخانەکانیان لە سەنعاوە بۆ شاری عەدەن بگوازنەوە. بەوپێیەی عەبد رەبە مەنسوور هادی لەوێ دادەنیشێت و ئەوان ئەو بە سەرۆکی وڵاتەکە دەزانن.

لە مانگی رابردوودا چەکدارانی ئەنساروڵڵای حووسییەکان شاری سەنعای پایتەختیان کۆنترۆڵکرد. وڵاتانی کەنداو، ئێران تۆمەتبار دەکەن کە لە پشتی حووسییەکانەوەیەو دەیەوێت پێگەی شیعە لە یەمەن بەهێزبکات.</sup>

^1/3/2015