<sup>لەکاتی بانگەشەکردن بۆ هەڵبژاردنی پەرلەمان، کە لە ١٧ی ئەم مانگەدا بەڕێوەدەچێت، وەزیری دەرەوەی ئیسرائیل ئەڤیگدۆر لیبەرمان دەڵێت، "عەرەبەکانی ئیسرائیل کە وەفادار نین بەرامبەر دەوڵەتی ئیسرائیل، پێویستە سەریان بپەڕێنرێت". ماڵپەری گۆڤاری نیوس ویک ئەوەی بڵاوکردووەتەوە. 

"ئەوانەی لەگەڵ ئێمەن، شایەنی هەموو شتێکن، بەڵام ئەوانەی دژی ئێمەن، هەقە بە تەور سەریان لە لاشەیان جیابکرێتەوە"، لیبەرمان وا دەڵێت.

قسەکانی لیبەرمان لەلایەن نوێنەرانی کەمینەی عەرەب، کە لە 20%ی دانیشتووانی ئیسرائیل پێکدەهێنن، ناڕەزایی تووندی لێکەوتەوە. ئەحمەد تیبی سەر بە لیستی پارتی یەکێتی لیستی عەرەبی قسەکانی لیبەرمانی بە کردەوەکانی داعش بەراورد کرد.
   
لیبەرمان، وەزیری دەرەوەی ئیسرائیل لە درێژەی قسەکانیدا باسی لەو عەرەبانە کرد، کە لە یادی دامەزراندنی ئیسرائیلدا پەڕۆی رەشیان هەڵکردووە، دەڵێت "ئەوانە جێگایان ئێرە نییە، من بەخۆشحاڵییەوە دەتوانم پێیان بڵێم با بچن بۆ لای سەرۆکی فەڵەستین، مەحموود عەباس".

ئەوە یەکەمجار نییە لیبەرمان لێدوانی تووند ئاراستەی عەرەبەکان بکات، مانگی رابردوو بە ئاشکرا باسی لەوە کردووە کە ئەو ئامادەیە بڕیاری لەسێدارەدان دژی "تیرۆریستان"ی فەڵەستینی جێبەجێ بکات. 

تا ئێستایش وەزیری دەرەوەی ئیسرائیل یەکەم وەزیرە لە دنیادا کە بە فەرمی لەناو وڵاتەکەی خۆیدا ناژی کە نوێنەرایەتی دەکات، ئەو ماڵەکەی لە خانوویەکدایە کە دەکەوێتە ئەو بەشەی کەنارەکانی رۆژئاوا، کە هێشتا لەژێر دەستی ئیسرائیلدایە.
 
بە گوێرەی ئامارەکانی هەڵبژاردن لە ئیسرائیل کە هەفتەی رابردوو بڵاوکراوەتەوە، ئەوە نیشاندەدات کە سەرۆکی پارتی ئۆپۆزیسیۆن هەرزۆگ دەتوانێت حکومەتێکی کولیسیۆنی پێکبهێنێت لەگەڵ پارتە راستڕەوەکەی لیبەرمان و وەزیری ئابووری ئێستا.

سەرۆکوەزیرانی ئێستا، ناتانیاهۆ، ئەوەی ئاشکرا کردووە کە دەستێکی دەرەکی نایەوێت لە هەڵبژاردنەکانی ئەمجارەدا سەربکەوێت، ئەگەرچی ئەو ئاشکرای نەکرد ئەو دەستە کێیە، بەڵام پێدەچێت مەبەستی ئەمریکا بێت.
 
وەزیری دەرەوەی ئیسرائیل، ئەڤیگدۆر لیبەرمان لە جوولەکەکانی رووسایە و لە ساڵی ٢٠١٣ پۆستی وەزیری دەرەوەی ئیسرائیلی وەرگرتووە.</sup> 

^11/3/2015

<sup>ڕێکخراوی جایکای ژاپۆنی لە باشووری کوردستانە، بۆ گەشەپێدانی کەرتی کشوکاڵی بە تەکنیکی تازە و توێژینەوەی زانستی لەو بوارە، لەسەر خاک و ئاو و هەوای کوردستان، بەمەش باشووری کوردستان دەبێتە 150مین ناوچەی جیهان کە جایکا چالاکی کشتوکاڵی تێدا دەکات، بە تایبەتیش لە بواری پەرەپێدانی تەکنیک و پێشکەشکردنی قەرزی کشتوکاڵی.

راوێژکارانی رێکخراوە ژاپۆنییەکە دەڵێن ئەگەر جوتیارانی کوردستان واز لە شێوازە کلاسیکییەکە بێنن و بەکەڵک وەرگرتن لە زانست و کەرەستەی سەردەمییانە کشتوکاڵ بکەن، ئیدی پێویست ناکات، هیچ بەروبوومێکی کشتوکاڵی لە دەرەوە هاوردە بکرێت، بەمەش بەرهەمی نێوخۆیی شوێنی بەرهەمی دەرەوە دەگرێتەوە.

لە باشووری کوردستان زۆربەی ئەو بەرهەمە کشتوکاڵییانەی هەن، وەرزین و جوتیاران تەنیا لە یەک یان دوو وەرزی ساڵدا بەرهەمیان دەبێت. ژاپۆنییەکان هەوڵدەدەن دوای دەستنیشکانکردنی گرفتە کشتوکاڵییەکان، بەهێنانی تەکنیک و کەرەستەی نوێی کشتوکاڵی، جوتیارانی باشووری کوردستان لەسەر ئەوە رابێنن کە لەهەر چوار وەرزی ساڵدا بەرهەمیان هەبێت.</sup> 

^11/3/2015

<sup>هاوسەرۆکی کۆما جڤاکێن کوردستان KCK رایدەگەیێنێت "ئەگەر 10 ماددە پێشنیازکراوەکەی ئۆجەلان قبوڵ نەکرێن، با کەس چاوەڕێی بەستنی کۆنگرە لە ئێمە نەکات". هەروەها وەک خۆی دەڵێ: "تاوەکو ئاپۆ نەیەتە کۆنگرە ئێمە چەک دانانێین". جەمیل بایک لە دیدارێکی تەلەفزیۆنیدا رایگەیاند: "تاوەکو لەگەڵ خودی ئۆجەلان کۆنەبینەوە، تاوەکو ئاپۆ نەیەت و بەرشداریی کۆنگرە نەکات، ئێمە چەک دانانێین، هەروەها بۆ هاتنەخوارەوەی گەریلاکانیش لە چیا پێویستە ئاپۆ بێت و قسە بکات، بگرە ئێمەش وەکو هاوسەرۆکەکان (بایک و بەسێ هۆزات، هاوسەرۆکەکانی KCK) ناتوانین ئەوان لە چیا بهێنینە خوارەوە".

هاوسەرۆکی KCK هەروەها دەڵێ: "درێژەدان بە دروستکردنی قەرەقۆڵ، بنکەی سەربازی، دروستکردنی رێگا سەربازییەکان و ئۆپەراسیۆنەکانی کۆکردنەوەی زانیاری و دروستکردنی بەنداو بە ئامانجی سەربازی نەوەستێنن، ناتوانن دڵنیایی نە بە ئێمە و نە بە هیچ هێزێكی دیموکراتخوازی نێو تورکیا بدەن".

دیدارە تەلەفزیۆنییەکە لەگەڵ هەردوو هاوسەرۆکەکانی کۆما جڤاکێن کوردستان ئەنجامدراوە و ئاماژە بەوە دەکەن، کە راگەیاندنی چەکدانانی پارتی کرێکارانی کوردستان پڕوپاگەندەی هەڵبژاردنە.

هاوسەرۆکەکانی KCK باس لە هەڵبژاردنی 7 ی حوزەیرانی تورکیا دەکەن و ئاماژە بەوە دەکەن: "بە خرۆشانێکی زۆرەوە چاودێری هەڵبژاردنەکە دەکەین، چونکە ئەم هەڵبژاردنە لەمێژووی کۆماری تورکیا گرنگترین هەڵبژاردنە، کە ئایا تورکیا بەرەو فاشیزمێکی سەوز دەچێت، یاخود دیموکراتیزە دەکرێت؟ خەڵك ئەم بڕیارە دەدات".

هەروەها لەبارەی ئەنجامدانی ئۆپەراسیۆنەکەی موسڵ دەڵێن، کە ئۆپەراسیۆنەکە هیچ ئاسان نابێت و ئەگەری ئەوە هەیە تورکیا و ئێران رووبەڕووی یەک ببنەوە. هەروەها ئاماژە بەوە دەکات کە بەهۆی ئەوەی لە موسڵدا زۆرینەیە، ئەگەر حکومەتی عێراقیش واز لە هەڵوێستی مەزهەبگەرایی خۆی نەهێنێ، هێندەی دیکە داعش بەهێز دەکەن لەو شارە. جەمیل بایک دەڵێ: "تورکیا بەهیچ شێوەیەک نایەوێ هێزە شیعەکان بچنە نێو موسڵەوە، ئەو شەڕەی لەسەر موسڵ ئەگەری هەیە ببێتە شەڕی نێوان ئێران و تورکیا".</sup>

^10/3/2015

<sup>ئەنجوومەنى پارێزگاى سەڵاحەدین رایگەیاند، هێزە ئەمنییەکانى عێراق لە چەند قۆڵێکەوە پرۆسەى کۆنتڕۆڵکردنەوەى شارى تکریتیان لەدەست چەکدارانى داعش دەستپێکردووە. رەشید بەیاتى، ئەندامى ئەنجوومەنى پارێزگاى سەڵاحەدین بە (تۆڕى میدیایی رووداو)ى راگەیاند: "ئەمڕۆ بەیانى هێزە ئەمنییەکانى عێراق بە پاڵپشتى هێزەکانى حەشدى شەعبی و هێزى خۆبەخشانى پارێزگاکەو فڕۆکە جەنگییەکانى سوپاى عێراق لە چەند قۆڵێکەوە هێرشیان بۆ کۆنتڕۆڵکردنەوەى شارى تکریت دەستپێکرد".

گوتیشی: "هێزە ئەمنییەکان رووبەڕووى بەرگرییەکى لاوازى چەکدارانى داعش بوونەتەوەو بوونى ژمارەیەک قەناس بەدەست و بۆمبی چێندراو هۆکارى سەرەکى دواکەوتنى پێشڕەوى هێزە ئەمنییەکانە".

رەشید بەیاتى هەورەها دەڵێت: "فڕۆکە جەنگییەکانى هێزى هاوپەیمانان لەو پڕۆسەیەدا بەشدار نین و تەنها هێزى ئاسمانى سوپاى عێراقی بەشدارە". دەشڵێت :"شارى تکریت لە هەموو لایەکەوە گەمارۆدراوەو لە بەیانییەوەش پڕۆسەى سەربازى بۆ کۆنتڕۆڵکردنەوەى دەستیپێکردووەو ئێستا چاوەڕێی کاژێرى سفرین بۆ راگەیاندنى هەواڵى کۆنتڕۆڵکردنەوەى تەواوى شارەکە لە دەست چەکدارانى داعش".

لە سەرەتاى ئەم مانگە هێزە ئەمنییەکانى عێراق بە پاڵپشتى هێزەکانى حەشدى شەعبی و خۆبەخشانى پارێزگاکە پرۆسەى کۆنترۆڵکردنەوەى پارێزگاى سەڵاحەدینیان دەستپێکرد.</sup>

rudaw

^10/3/2015

<sup>پارتی ئازادیی کوردستان کە حیزبێکی رۆژهەڵاتی کوردستانە و ئێستا هێزەکانی لە سنووری کەرکووک دژ بە چەکدارانی داعش لە شەڕدان، رایگەیاند ئەمڕۆ دووشەممە 3 پێشمەرگەی لە کاتی کۆنترۆڵکردنەوە گوندەکانی سمایل ئاوا و سەخرە لە رۆژئاوای شاری کەرکووک نزیک شارەدێی مەلا عەبدوڵڵا شەهیدبوون.

بەپێی راگەیەندراوی پارتی ئازادی کوردستان، سەرلەبەیانی ئەمڕۆ دووشەممە 3 پێشمەرگەی ئەو حیزبە بەناوەکانی دیاکۆ رەحیمی، زانکۆ کامیاران و هێرش سەقزی لە پرۆسەی کۆنترۆڵکردنی رۆژئاوای کەرکووک شەهیدکراون. کە یەکێکیان لە گوندی سەخرە بە قەناس پێکراوە و دوانی دیکەش بەهۆی تەقینەوەی قوتابخانەی گوندی سمایل ئاوا شەهیدبوونە، هەروەها دوو پێشمەرگەی دیکەی ئەو حیزبەش برینداربوونە. 

لە هێرشەکانی ئەمڕۆی هێزی پێشمەرگە بۆ سەر چەکدارانی داعش لە سنووری کەرکووک، شارەدێی مەلا عەبدوڵلا و چەندین گوند لەلایەن پێشمەرگەوە بە رووبەری زیاتر لە 100 كیلۆمەتر دووجا کۆنترۆڵکرانەوە.</sup> 

^10/3/2015

<sup>کچێکی ئێرانی دوای ئەوەی لە ماوەی کەمتر لە دووساڵدا، 10 جار شوویکرد،  بەتۆمەتی فێلکردن رەوانەی دادگا کرا. رۆژنامەیەکی ئێرانیش دەڵێت، لەبەرامبەر هەر تەڵاقێکدا 30 هەزار دۆلاری وەرگرتووە.

یەکێک لە رۆژنامە ناوخۆییەکانی ئێران بڵاویکردووەتەوە، کچێکی تەمەن 20 ساڵی خەڵکی ئێران، لە ماوەی کەمتر لە 2 ساڵدا 10 جار هاوسەرگیری ئەنجامداوە، هەریەک لەو کەسانەش کە هاوسەرگیری لەگەڵ کردوون، کەسانی دەوڵەمەندبوونە.

بەپێی هەواڵی رۆژنامەکە، سەرەتا پەیوەندی خۆشەویستی لەگەڵ هەریەک لە کەسەکان بەستووە، دواتر لە ماوەیەکی کورتدا، داوای هاوسەرگیری لێکردوون، بەڵام دوای مارەبڕین ، بەر لە گواستنەوەی یاخود سەرجێیکردن داوای وەرگرتنی تەڵاقی کردووە، ئەمەش لە پێناو بەدەستهێنانی نیوەی مارەییەکەی.

بەپێی یاسای ئێرانی ساڵی 1979 کە شەریعەتی ئیسلام بنەمایەکەیەتی، ئەگەر هاتوو ئافرەتێک لەگەڵ کوڕێک هاوسەرگیری ئەنجامدا، بەبێ ئەوەی سەرجێی لە نێوانیاندا رووبدات، لەکاتی وەرگرتنی تەڵاق کچەکە نیوەی مارەی بەردەکەوێت کە لەسەری مارەبڕدراوە.

رۆژنامە ئێرانییەکە نووسیویەتی، ئەو کچە لەهەر جارێکدا، لە بڕی وەرگرتنی نیوە مارەیەکەی 100 پارچە یاخود 110 پارچە زێڕ کە بە 30 هەزار دۆلاری ئەمریکی مەزەندە دەکرێت، وەریگرتووە.

رۆژنامەکە دەڵێت، بەردەوامی سەردانیکردنی کچەکە بۆ فەرمانگەی باری کەسێتیی بەمەبەستی مارەبڕین و وەرگرتنی تەڵاق لە ماوەی کەمتر لە 2 ساڵ، گومانی لەلایەن بەرپرسانی ئەو فەرمانگەیە دروستکردووە، بۆ ئەو مەبەستەش داوایان لە داواکاری گشتی کردووە، لێکۆڵینەوە لە زۆری مارەبڕین و تەڵاقی ئەوکچە بکات.

رۆژنامەکە ئاماژەی بەوە داوە، لەبەردەم دادوەری لێکۆڵینەوەدا، کچەکە گوتوویەتی ئەوکارەی کە ئەنجامیداوە، هیچ ناکۆکییەکی لەگەڵ یاسادا نییە، بەڵام دادوەر بەمەبەستی وەرگرتنی گوتەی ئەو کەسانەی هاوسەرگیریان لەگەڵ کچەکە ئەنجامداوە، بانگهێشتی کەسەکانی کردووە، هەموویان قسەکانیان وەکو یەک بووە، گوتەی هەموو کەسەکان ئەوە بووە، کە کچەکە فێڵی لێکردوون.</sup> 

^10/3/2015

^{یه‌كێك له‌و پێنچ گومانلێكراوه‌ی كه‌ له‌ دۆسیه‌ی كوژرانی بۆریس نیمتسۆف تێوه‌گلاون، سه‌ره‌تای ئه‌م هه‌فته‌یه‌ خۆی كوشت و سه‌رجه‌م گومانلێكراوه‌كانیش خه‌ڵكی ناوچه‌ی قه‌وقازی روسیان.}

^{به‌پێی هه‌واڵێكی ئاژانسی سپۆتنیك نیوز-ی روسیا، بیسلان شافانۆف، كه‌ گومانی كوشتنی بۆریس نیمتسۆف، سه‌ركرده‌ی ئۆپۆزسیۆنی روسیای لێكراوه‌ له‌ گرۆزنی پایته‌ختی چیچیان، خۆی كوشتووه‌، یه‌كێكی دیكه‌ش به‌ناوی ته‌یمور له‌نگ ئیسكارخانۆف، یه‌كێك له‌ گومانلێكراوه‌كان و له‌به‌رده‌م دادگای روسیا بیانووی ئه‌وه‌ی هێناوه‌ته‌وه‌ كه‌ له‌كاتی كوشتنی ئه‌و كه‌سایه‌تییه‌دا، ئه‌و وه‌ك هه‌میشه‌ و رۆژانی ئاسایی له‌سه‌ر كاری خۆی بووه‌ و هاوڕێكانیشی گه‌واهیی ئه‌وه‌ی بۆ ده‌ده‌ن.}

^{ئاژانسه‌كه‌ له‌زاری به‌ڕێوه‌به‌ری ئاسایشی فیدراڵیی روسیا ناوی چوار گومانلێكراوه‌كه‌ی دیكه‌ی بڵاوكردووه‌ته‌وه‌ كه‌ دووانیان بران و لای ده‌سه‌ڵاتدارانی روسیا ده‌ستبه‌سه‌رن، به‌ناوه‌كانی (ئه‌نزۆر گۆباشیف و شاكیت گۆباشیف-ی برای، واور داداییف و ره‌مزان باكاییف) كه‌ سه‌رجه‌میان خه‌ڵكی باشووری هه‌رێمی قه‌وقاز-ی باكورن كه‌ جۆرێك له‌ ناسه‌قامگیری و راپه‌ڕین دژی حكومه‌تی مۆسكۆ به‌خۆیه‌وه‌ ده‌بینێت.}

^{پێشتر داداییف ئه‌فسه‌ری پۆلیس بووه‌ له‌ چیچان و جێگری فه‌رمانده‌ی گروپێكی سه‌ر به‌ وه‌زاره‌تی ناوخۆی چیچیانیش بووه‌، هاوكات ئه‌نزۆر گۆباشیف، له‌ دامه‌زراوه‌یه‌كی ئه‌منی له‌ مۆسكۆ-ی پایته‌ختی روسیا كاری كردووه‌.}

^{له‌به‌رامبه‌ریشدا زانا نیمتسۆفا، كچی ئه‌و سه‌ركرده‌ كوژراوه‌ی ئۆپۆزسیۆن رایگه‌یاند كه‌ سه‌رسام نه‌بووه‌ به‌وه‌ی گومانلێكراوه‌كان خه‌ڵكی ناوچه‌ی قه‌وقاز بن و شته‌كه‌ چاوه‌روان كراو بووه‌.}

^9/3/2015

<sup>فڕۆکە جەنگییەکانی هاوپەیمانان پاڵاوگەیەکی نەوتی رێکخراوی داعشیان لە شارۆچکەی گرێسپی لە رۆژئاوای کوردستان تەقاندەوە. شەوی 8-3-2015 فڕۆکە جەنگییەکانی هاوپەیمانان هێرشیانکردە سەر پاڵاوگەیەکی نەوت لە شارۆچکەی گرێسپی لە رۆژئاوای کوردستان. ئەو پاڵاوگەیە کە لەلایەن رێکخراوی داعشەوە کاری پێدەکرا لە ئەنجامی ئەو هێرشە تەقێندرایەوە. هاوکات 30 کەس کوژران.

تەقاندنەوەی پاڵاوگەکە لە شارۆچکەی ئەقچەقەڵا لە باکووری کوردستانەوە بینرا و هەستی پێکرا، تەنانەت شووشەی ژمارەیەک لە خانووەکانی ئەو شارۆچکەیە شکان. بەپێی راپۆرتێکی نەتەوەیەکگرتووەکان کە مانگی تشرینی دووەمی 2014 بڵاوکراوەتەوە، داعش رۆژانە 846 هەزار بۆ 1 ملیۆن و 600 هەزار دۆلاری ئەمریکی دەستدەکەوێت لەڕێگەی بەرهەمهێنانی نەوتەوە.</sup>

^9/3/2015

<sup>رێکخراوی نەتەوە یەکگرتووەکان بۆ پەروەردەو رۆشنبیری و زانست ناسراو بە یونسکۆ، رووخاندن و تێکدانی شوێنەوارەکانی نەمروودی ئاشورییەکان لە عێراق، لە لایەن رێکخراوی داعشی وەک "تاوانی جەنگ" ناساند و بڕیاریشیدا سکاڵا دژی ئەم بابەتە بگەیێنێتە نەتەوە یەکگرتووەکان.

ئێرینا بوکۆفا، بەڕێوەبەری گشتیی رێکخراوی یونسکۆ دەڵێت:" ناتوانین زیاتر بێدەنگبین، بەپێی یاسا نێودەوڵەتییەکان لە کاتی جەنگیشدا دەبێت شوێنەوارە کولتووری و دێرینەکان بپارێزرێن، ئەمەی ئەم رێکخراوە کردوویەتی وەک تاوانی جەنگ دەناسێنین".

زیاتر دەڵێت:" سکاڵای خۆمان سەبارەت بەم بابەتە بۆ ئەنجوومەنی ئاسایشی نێودەوڵەتی و داواکاریی گشتی و دادگای تاوانی نێودەوڵەتی بەرزدەکەینەوە، پێویستە هەموو وڵاتانی دونیا بەرامبەر ئەم تاوانە بووەستنەوە و هەوڵی وەستاندنی بدرێت، چونکە ئەم تاوانە هەوڵێکە بۆ سڕینەوە کەمینەکانی عێراق".

حکومەتی عێراق لە چەند رۆژی رابردوودا رایگەیاند، کە رێکخراوی داعش شوێنەوارە دێرینەكانی نەمروود-ی ئاشووری لە پارێزگای موسڵ تەقاندوونەتەوە، ئەمەش لە دوای بڵاوکردنەوەی ڤیدیۆیی تەقاندنەوەکە لە لایەن رێکخراوەکە خۆی.

وەزارەتی گەشتوگوزار و شوێنەواری عێراق، لە بەیاننامەیەکدا ئەم کارەی داعشی ئیدانەکرد و رایگەیاند، "ئەم رێکخراوە هەمیشە هەوڵی شکاندنی ورەو هەست و سۆزی مرۆڤایەتی دەدات، تاوانی تەقاندنەوەی شوێنەواری نەمروودیش لە موسڵ، یەکێکە لەو زنجیرە تاوانەکانی ئەم رێکخراوە".</sup>

^9/3/2015

<sup>نزیكەی سەدەیەكە ژمارەیەكی زۆر كوردی ئێزدی لە باكووری كوردستانەوە روویان كردووەتە وڵاتانی یەكێتی سۆڤیەتی پێشوو، بەڵام سەرەڕای تێپەڕینی ئەو هەموو ساڵە هێشتا دەستبەرداری كەلتووری خۆیان نەبوون.

لە شاری نیژنی نۆڤگۆرەد، ئێزدییەكانی ئەوێ‌ سەرقاڵی رێوڕەسمی پرسە و شینی شێخەكەیان بوون. ئیبراهیم كە لاوێكی كوردی ئێزدییە، خۆی و چەند ناسیاوێكی دیكەی بەدوامدا هاتن بۆ میوانخانە و بەڕێكەوتین بۆ بەشداریكردن لە پرسەی شێخ. ئەوە یەكەمجارم بوو بەشداری پرسەی ئێزدییەكان بكەم. دەمێك بوو دەمویست بگەمە راستیی ئەو قسانەی لەبارەی ئێزدییەكان بیستبووم. زۆرجار دەگوترا ئێزدییەكان رێگا بەكەسانی غەیرە ئێزدی نادەن لەكاتی ناشتنی مردووەكانیاندا ئامادەبن، دەكرێ‌ ئەم قسەیە هۆكارەكەی ئەوەبێت كە پەیوەندییە كۆمەڵایەتییەكانی ئێزیدییەكان و ئاینەكەشیان تاڕادەیەك داخراوە، بۆیەشە زۆر تۆمەتی ناڕەوا دراوەتە پاڵیان، بەڵام لە راستیدا ئەمانە دوورن لە حەقیقەت.

ئەو دەمەی گەیشتینە ئەو گەڕەكەی پرسەكەی لێ‌ بەڕێوەدەچوو، دەیان ئۆتۆمبێل لەمبەر و ئەوبەری گەڕەكەكە وەستابوون. خەڵكێكی زۆر دەهاتن و دەچوون. سەرجەمیان غەمگین و نیگەران دیار بوون بە لەدەستدانی شێخ. هاوكات دڵخۆشیش بوون بە دیداری دۆست و ئازیزانیان كە وا دیاربوو چەندین ساڵە یەكدییان نەبینیوە بەهۆی دوورییان لەیەكدی. هەمووان سڵاو لەیەكدی دەكەن، ئافرەت و پیاوەكانی كە خزمن، یەكدی ماچ دەكەن.

كێشەی هەرە گەورەی ئەوان نەبوونی لالش و پەرستگای دینییانە، بۆیە ناچارن ماڵ یاخود هۆڵێك بەكرێ‌ بگرن بۆ بەڕٍێوەبردنی پرسەكەیان. پرسەی شێخ لە هۆڵێكی گەورەی ئەو شارە بەڕێوەدەچوو، كاتێك چووینە ژوورەوە لەبری سڵاو گوتیان "براوۆ". سەرجەم ئامادەبووانیش "براوۆ"یان گوتەوە، مەبەست لە "براوۆ" برامان بوو، بەشدارانی پرسە هاوخەمیی خۆیان بەوە دەردەبڕن.

سەدان پیاو و ئافرەت لە هۆڵەكە دانیشتوون و بەشێكیشیان بەپێوە وەستاون، لە ناوەڕاستی هۆڵەكەدا تەرمی كۆچكردوو لەناو سندووقێك دانراوە. مردووەكە سێ‌ رۆژ پێشتر شۆردراوە، دەستەیەك جلوبەرگی جوانی كراوەتەبەر و پاشان بەكفن داپۆشراوە. لە تەنیشت سەری كۆچكردوو، شێخ رەشیدی برای بەدیارییەوە وەستاوە و قەول و بەیت و دوعای بەسەردا دەخوێنێ‌. ئەو سندووقەی تەرمەكەی لەناودایە كراوەیە و سەر و سیمای كۆچكردوو دەبینی. بەشێك لەوانەی دێنە پرسەكە، مردووەكە ماچ دەكەن، لە چواردەوری سندووقی تەرمەكە چەندین چەپكە گوڵ دانراون، لە دیواری پشتەوەی هۆڵەكەش پارچە فەرشێكی گەورە هەڵواسراوە. لەسەر ئەم فەرشە چەندین وێنەی قەبارە گەورە هەڵوسراون، ئەمانە وێنەی كەسوكار و هاوڕێ‌ نزیكەكانی كۆچكردوون.

دوو كەسی باڵابەرز كە لە بۆنە خۆش و شادییەكاندا مرۆڤ دەخەنە كەیف و سەما، لەم پرسەیەدا ئامادەبووانیان نوقمی دڵتەنگی و غەمباری كردبوو. دوو نەیژەن ئاوازێكی غەمگین ئاوێزانی قەول و بەیتی شێخ رەشیدی برای كۆچكردوو دەكەن، هەر كە شێخ دەوەستێ‌ دوو ئافرەتی بەتەمەن بەردەوامی دەدەن بە لاواندنەوەكانیان. سەیركردنی ئەم دیمانانە مرۆڤ غەمگینتر دەكەن.

لە كاژێر 6ی ئێوارە تا 10ی شەو لەناو هۆڵی پرسەكە مامەوە. لەو ماوەیەدا كۆمەڵ كۆمەڵ خەڵك دەهاتن بۆ پرسەكە. لە تەنیشتمەوە كەسێك وەستابوو ناوی سیامەند بوو. سەبارەت بە رێوڕەسمی پرسەی ئێزیدییەكانی رووسیا گوتی "كاتێك ئێزدییەك دەچێتە بەر دلۆڤانی خودێ‌، چەند رۆژێك پرسەی بۆ دادەنێین، ئێمە سێ‌ رۆژە لەم هۆڵە پێشوازی لە میوانەكان دەكەین. بەهۆی ئەوەی كوردی ئێزدی لە زۆر شار و هەرێمە دوورەكانی رووسیاوە دێن بۆ بەشداریكردن لە پرسە، بۆیە پێویستە سەرجەم خزم و كەسە نزیكەكان كۆچكردوو ببینن، لەماوەی ئەم چەند رۆژەی پرسەشدا سەرجەم میوانەكان لای ماڵە كوردەكان دەمێننەوە تا رۆژی ناشتن".

 سیامەند درێژەی بە قسەكانی دا و گوتی "ئەوانەی بۆ بەشداریی لە پرسەكە هاتوون، دابەشی سەر ماڵەكان كراون، خواردن و خواردنەوە و شوێنی نووستنیان بۆ دابینكراوە، هیچ میوانێك ناچێتە میوانخانە، بەڵكو هەركەسێك لای خۆیەوە چەندین كەس دەباتەوە ماڵی خۆی. ئەمەش وەك هاوكاری و پشتیوانییەك بۆ خاوەنی پرسەكە كە یەكێكە لە جوانترین دابونەریتەكانمان".

هەر میوانێك بێتە ژوورەوە لە بری سڵاوكردن دەڵێـت "براوۆ". سیامەند گوتی "مەبەست لە براوۆ ئەوەیە كە دەمانەوێ‌ هاوسۆزی و خەمباریی خۆمان بۆ خاوەنی پرسەكە دەرببڕین، براوۆ مەبەست برایە، واتە برامان بوو".   

بەهۆی ئەوەی خزم و دۆستانی كۆچكردوو، رێگایان دوورە و پێڕاناگەن رۆژی یەكەم بەشداری بكەن لە مەراسیمی ناشتندا، بۆیە تەرمەكە بۆ ماوەی چوار رۆژ رادەگیرێت و نانێژرێت. سەبارەت بە پاراستنی تەرمەكەش لە تێكچوون، سیامەند گوتی "بەهۆی بەكارهێنانی دەرمانێكی تایبەت یاخود دەرزی، تەرمەكە لە تێكچوون دەپارێزرێت.

لەناو ئێزیدییەكاندا چوار چین هەن: شێخ، پیر، مورید و فەقیر. ئەوەی كۆچی دوایی كردووە سەر بەچینی شێخە، كەواتە رێگا پێنەدراوە كەسانی چینێكی دیكە تەرمەكە بشۆن. شەوی چوارەم دوای تەوابوونی پرسەكە، بەرەبەیانی زوو تەرمەكە لەلایەن برای ئاخرەت (برای ئاخرەت: رۆژی پێش هاوسەرگیری كەسەكە، كەسێكی دیكە دەكاتە برای ئاخرەتی خۆی) تەرمەكە بە تەواوی دادەپۆشێت و خەتمی دەكات. بەرەبەیانی هەمان رۆژ بە رێوڕەسمێكی تایبەت تەرمەكە دەبردرێت بۆ گۆڕستان و بە ئامادەبوونی ژمارەیەكی زۆر لە مورید و شێخ و پیر، تەرمەكە دەخرێتە ناو گۆڕ. سەری مردوو دەخرێتە لای رۆژئاوا و قاچەكانیشی بۆ رۆژهەڵات، پاشان گرێی كفنەكە دەكەنەوە و دوعای بۆ دەكەن و تەلقینی دەدەن، دواتر هێدی هێدی تەرمەكە دادەپۆشن و گۆڕەكە پڕدەكەنەوە و كێلی بۆ دادەنێن. ئەوانەی هاتوونەتە سەر گۆڕستانەكە دوای دانانی چەپكەگوڵ لەسەر گۆڕەكەی، خواحافیزی لە مردووەكە دەكەن.</sup> 

^9/3/2015