<sup>تێد کروز، یەکەم کەس کە ئاشکرایکرد بەشداریدەکات لە هەڵمەتی هەڵبژاردنی سەرۆکایەتی ئەمریکا رەخنەی لە هەڵوێستی وڵاتەکەی گرت لە بەرەنگاربوونەوەی رێکخراوی داعشدا و دەڵێت کە پێویستە هاوکاری زیاتری کورد بکرێت و دەشکرێت کورد ببێت بە سەربازی ئەمریکا.

رۆژی 24-3-2015 تێد کروز لە هەڤپەیڤینێکدا لەگەڵ کەناڵێکی ئەمریکی گوتی: "هێزەکانی پێشمەرگە شەڕی دژی داعش دەکەن، کاریگەرن و دەیان ساڵە هاوپەیمانی ئەمریکان. داعش چەکی ئەمریکی بەدەستەوەیە، ئەوانەی سوپای عێراق کە دەستی بەسەریاندا گرت. بەڵام کورد چەکی پێویستیان پێ نییە. بەداخەوە ئیدارەی ئەمریکا چەک بۆ بەغدا دەنێرێت. من لەو باوەڕەدام کە دەکرێت کورد ببێت بە سەربازی ئێمە".

کروز ئەوەشی خستەڕوو کە لەناوبرنی داعش پێویستی بە جدییەت هەیە و پێویستە هەموو هەنگاوێکی سەربازی بنرێت بۆ ئەو مەبەستە.</sup>

^25/3/2015

<sup>جێگری سەرۆکوەزیرانی تورکیا بەردەوام بوو لەسەر لێدوانە تووندەکانی کە دوو رۆژ پێشتر دەستیپێکردبوو. زۆر بەتووندیش وەڵامی سەرۆکی شارەوانی ئەنقەرەی دایەوە کە هاوکات کەسایەتییەکی دیارە لەنێو پارتی داد و گەشەپێدان.

بڵند ئارنچ، جێگری سەرۆکوەزیران و گوتەبێژی حکومەتی تورکیا، رۆژی 23-3-2015 دوای کۆبوونەوەی ئەنجوومەنی وەزیرانی وڵاتەکەی چووە بەردەم کەناڵەکانی راگەیاندن. ئارنچ لەگەڵ دووپاتکردنەوەی رێزی بۆ رەجەب تەیب ئەردۆغان، سەرۆککۆماری تورکیا، سووربوونی خۆی دەربڕی لەسەر ئەو رەخنانەی رۆژانی پێشوو ئاراستەیکرد.

جێگری سەرۆکوەزیرانی تورکیا هاوکات زۆر بەتووندی وەڵامی مەلیح کۆکچەک، کەسایەتی دیاری نێو AKP و سەرۆک شارەوانی ئەنقەرە لەسەر لیستی ئەو پارتەی دایەوە.

گۆکچەک دوای لێدوانە تووندەکانی ئارنچ بەرامبەر بە ئەرۆدغان لە تویتەرەوە نووسیبووی: "ئارنچ تۆمان ناوێ، دەست لەکاربکێشەرەوە" هاوکات بە عەمیلی نەیارەکانی ئەردۆغانی ناوبرد.

ئەم قسانە ئارنچیان زۆر تووڕەکرد بە شێوەیەک کە لە وەڵامدا گوتی: "من لەگەڵ کاندیدکردنی گۆکچەک نەبووم بۆ شارەوانی ئەنقەرە، ئەم کەسە بۆ دەنگ چووە باوەشی دەوڵەتی هاوتەریبەوە. گەندەڵی کرد و ئەنقەرەی بەخۆڕایی فرۆشت پێیان. ئێستا دەیەوێت بەم قسانە جێگەی خۆی لەدڵی هەندێک کەسدا بکاتەوە و کوڕەکەی بۆ بکەن بە پەرلەمانتار. دوای هەڵبژاردنە گشتییەکان چارەی دەکەم، هەر کەسێکیشی لەپشتەوە بێت، ئەوانیش چارە دەکەم".</sup>

^24/3/2015

<sup>پاش پێشڕەوییەكانی ئەم دواییەی هێزی پێشمەرگە ئێستا داعش لە كێڵگە و كۆمپانیا نەوتییەكان زیاتر لە دە كیلۆمەتر دوور خراونەتەوە و فەرماندە سەربازییەكانی هێزی پێشمەرگەش دەڵێن هیچ مەترسییەك لەسەر ناوچە نەوتییەكان نەماوە.

بە دوورخستنەوەی داعش لە ناوچە نەوتییەكان بواری زیاتر بۆ ئەو كۆمپانیایانە دەڕەخسێت كار لەسەر نۆژەنكردنەوەی كێڵگە نەوتییەكان بكەن، چونكە بەگوتەی شارەزایانی بواری نەوت و وزە بەشێك لە كێڵگەکانی كەركووك پێویستیان بە نۆژنكردنەوە هەیە.

بەگوتەی بەرپرسانی ئیدارەی كەركووكیش، ئەگەر كێڵگە نەوتییەكان نۆژەنبكرێنەوە و كۆمپانیای خەبازەش دەست بە بەهەمهێنان بكاتەوە، ئەوە دەتوانرێت لە كەركووكەوە زیاتر لە 300 هەزار بەرمیل نەوت هەناردە بكرێت لە ڕۆژێكدا.

لەهێرشەكانی رابردوویاندا چەکدارانی داعش خۆیان گەیاندە كێڵگە و كۆمپانیا نەوتییەكان لە سنووری كەركووك. جگە لە هێرشكردنیش بەهۆی نزیكی سەنگەرەكانیان لە ناوچە نەوتییەكانەوە بە كاتیۆشا و چەند جۆرە چەكێكی دیكە مەترسیان لەسەر ئەو ناوچانە دروستكردبوو.

لەسەرەتای ڕووبەڕووبونەوەشیان لەگەڵ هێزی پێشمەرگە لە هێرشەكانیاندا بۆریەكی گاز و سێ بۆری نەوتی كۆمپانیای خەبازەیان تەقاندەوە و بۆ ماوەی چەند كاژێرێك كۆنترۆڵیان كرد، بەڵام لە هێرشی پێچەوانەدا هێزی پێشمەرگە داعشی گەڕاندەوە سەنگەرەكانی پێشووتریان.</sup>

^24/3/2015

<sup>پێشانگای بەرهەمە هونەرییەکانی هادی زیائەدینی لە سینەمای بەهمەنی شاری سنە کرایەوە.

 ئەم پێشانگایە بە بۆنەی 27 ە مین ساڵیادی کیمیابارانی شاری هەڵەبجەوە ماوەی 8 رۆژە کراوەتەوە و تا رۆژی چوار شەممەی ئەم هەفتەیەش بەردەوام دەبێت.

یەکێک لە تایبەتمەندییە گرنگەکانی ئەم پێشانگایە، بوونی چەندین پەیکەری ژنە، کە زیاتر بەرچاو دەکەوێت.

بەرهەمەکانی هادی زیائەدینی لە روانگەی هونەرمەندان و سەردانکەرانەوە جێگای سەرنجن و زمانحاڵی ئەو رووداو و کارەساتانەن کە لە مێژووی نەتەوەی کورددا روویان داوە.</sup>

فەلاح رەحیمی /rudaw

^24/3/2015

^{ڕۆژنامه‌یه‌كى به‌ریتانى ئاماژه‌ به‌وه‌ ده‌كات لوبنان به‌ مه‌رج هاوسه‌رى ئه‌بوبه‌كر به‌غدادى ئازاد ده‌كات و مه‌رجه‌كه‌ش ده‌خاته‌ڕوو.}

^{ڕۆژنامه‌ى “دیلى میل”ى به‌ریتانى ئاماژه‌ به‌وه‌ ده‌كات حكوومه‌تى لوبنان ئاماده‌یه‌ هاوسه‌رى ئه‌بوبه‌كر به‌غدا “ساجده‌ دلێمى”ئازاد بكات، به‌مه‌رجێك گۆڕینه‌وه‌ى دیله‌كان له‌نێوان لوبنان و جه‌بهه‌نه‌سره‌ ڕووبدات.}

^{ئه‌و مه‌رجه‌ ئه‌وه‌یه‌ كه‌ جه‌بهه‌ نه‌سره‌ 24 گیراوى لوبنانى ئازاد بكات، له‌ به‌رانبه‌ردا حكوومه‌تى لوبنان هاوسه‌رى به‌غدادى راده‌ستى داعش ده‌كاته‌وه‌.
ئه‌و ڕۆژنامه‌ ئاماژه‌ به‌وه‌ ده‌كات كه‌ هاوسه‌رى به‌غدادى ئێستا دووگیانه‌ له‌ هاووڵاتییه‌كى فه‌له‌ستینى، كه‌ “دلێمى” 3 مانگ هاوسه‌رى به‌غدادى بووه‌، به‌ڵام دواى چوونى بۆ سوریا له‌یه‌كترى جیابوونه‌ته‌وه‌ و دواتر هاوسه‌رگیرى له‌گه‌ڵ كه‌سێكى فه‌له‌ستینى كردووه‌.}

^{ئێستاش له‌لایه‌ن پزیشكى تایبه‌ته‌وه‌ له‌ زیندانى لوبنان چاودێرى ده‌كرێت ئه‌وه‌ش به‌هۆى دووگیانیه‌وه‌.}

^23/3/2015

<sup>بەڕێوەبەری شارەدێی حاجی ئۆمەران رایگەیاند، ئەمڕۆ 22/3/2015 شەپۆلێکی بەفربارین رووی لە شارۆچکەی چۆمان و شارەدێی حاجی ئۆمەران کرد و بەو هۆیەوە کێشە بۆ هاتوچۆی هاونیشتمانیان دروستبووە.

مەغدید عەریف ئەحمەد، بەڕێوەبەری شارەدێی حاجی ئۆمەران بە (تۆڕی میدیایی رووداو)ی راگەیاند، ئەمڕۆ زیاتر لە 12 سانتیمەتر بەفر لە شارەدێی حاجی ئۆمەران باریوە، بەو هۆیەوەشەوە رێگەی سەرەکی نێوان حاجی ئۆمەران- چۆمان داخراوە و گەشتیارێکی زۆریش گیریان خواردووە.

بەڕێوەبەری شارەدێی حاجی ئۆمەران گوتیشی:" لەبەرئەوەی ئەم بەفربارینە پێشبینی نەکراوبوو تیمەکانی راماڵینی بەفر هیچ ئامادەکارییەکیان نەکردبوو، ئێستاش بەهۆی ئەوەی ئەو تیمانە لە پشوودان نەتوانراوە رێگەکە پاکبکرێتەوە".

 مەغدید عەریف ئەحمەد ئەوەشیخستەڕوو، بەفربارین لەو ناوچەیە بەردەوامە و هاتوچۆی هاونیشتمانیان لە نێوان گوندەکانی سەر بە شارەدێی حاجی ئۆمەران زۆر سەختبووە و دەروازەی سنووری حاجی ئۆمەرانیش بەو هۆیەوە داخراوە".

مەغدید عەریف ئەحمەد داواشی لە هاونیشتمانیان کرد، بەهیچ شێوەیەک ئەمشەو گەشت بۆ سنووری شارەدێی حاجی ئۆمەران نەکەن و گەشتەکانیان بۆ سبەی دووشەممە دوابخەن.</sup>

^23/3/2015

^{لە ئاهەنگی گەورەی نەورۆزدا كە لە شاری ئامەد بەڕێوەچوو، پەیامە چاوەڕوان كراوەكەی سەرۆكی زیندانی كراوی پارتی كرێكارانی كوردستان (PKK) خوێندرایەوە.}

^{دوێنێ شەممە 2015-03-21، بە ئامادەبوونی زیاتر لە ملیۆنێك كەس، پەیامێكی “عەبدوڵڵا ئۆجەلان” خوێندرایەوە. لەو پەیامەدا ئۆجەلان دژایەتیی خۆی بۆ دەوڵەتی نەتەوەییی دووپات كردەوە و داوای دەست بەرداربوون لە پڕۆژەی دەوڵەتێكی تایبەت بە نەتەوەیەكی دیاری كراوی كرد. بەڵكو بە پێویستی زانی، دەوڵەتەكان لە سەر چەند بنەمایەكی هاوبەش و بە بوونی دیموكراسی دابمەزرێن و بەردەوام بن.}

^{ئۆجەلان لە كاتێكدا دژایەتیی خۆی بۆ دەوڵەتی نەتەوەییی دەردەبڕێت كە ساڵەهای ساڵە گەلی كورد، قوربانی لە پێناو دروست كردنی قەوارەیەكی سیاسیی تایبەت بە خۆی دەدات، چونكە هەمیشە وەك نەتەوەیەكی ژێر دەست، لە لایەن نەتەوە سەردەستەكانەوە دژایەتی كراوە و خوێنی بە ناهەق ڕژاوە.}

^{ئەمەش دەقی پەیامەكەی عەبدوڵڵا ئۆجەلانە:}

^{بۆ هەموو گەلانمان، سڵاو لە نەورۆزی گەلانمان و دۆستانیان و ئەوانەی لەگەڵ ئاشتی، یەكسانی، ئازادی و دیموكراسین.}

^{ئەو قەیرانەی سیاسەتی نیولیبڕالی سەرمایەداریی ئیمپریالیست و نۆكەرایەتیی دكتاتۆریەتی ناوچەكە ڕێی لە سەر كردووەتەوە، بە شێوەیەكی زۆر تێكدەرانە كاریگەری لە سەر هەرێمەكەمان و وڵاتەكەمان كردووە. جیاوازییە ئەتنیكی و ئایینییەكانی گەلەكەمان و كولتوورەكەمان، لەم كەشی قەیرانەدا، ڕووبەڕووی شەڕێكی بێ واتا و دڵڕەقانە بووەتەوە. نە بەها مێژوویی و سەردەمییەكەمان و نە ویژدانی و سیاسییەكەمان لە ئاست ئەو تابلۆیەدا هەرگیز بێ دەنگ و دوورە پەرێز نابێت. بە پێچەوانەوە دەست وەردانی بەپەلە، وەك پێداویستییەكی بەرپرسیارێتی سیاسیی و ئەخلاقی و باوەڕیی ئایینیمان دەبینێت. ئەو تێكۆشانەی گەلانی وڵاتەكەمان بۆ دیموكراسی، ئازادی، برایەتی و ئاشتییەكی ئابڕومەندانە بەڕێوەی برد، ئەمڕۆ لە قۆناغێكی مێژووییی دایە.}

^{تێكۆشانی پڕ لە ئێشی بزووتنەوەكەمان لە ماوەی 40 ساڵدا بە هەدەر نەچوو، پێی ناوەتە قۆناغێكی وەها كە ناكرێ بە هەمان شێوە بەڕێوە ببرێت. مێژوو و گەلانمان داوای چارەسەرییەكی دیموكراتی و ئاشتییانە بە پێی ڕۆحی سەردەم دەكەن.}

^{لەسەر ئەو بنەمایەی لە قۆناغی مێژووییی دۆڵمەباخچەدا بەو ڕاگەیاندنەی لە 10 خاڵ پێك هاتووە و لە لایەن هەموومانەوە بە فەرمی ڕاگەیەندرا، ئێمە ڕووبەڕووی دەست‌پێ‌كردنی پرۆسەیەكی نوێین. بە ڕێككەوتن لە سەر ئەو پرەنسیپانەی لە بەیاننامەكە دایە، بانگی بەستنی كۆنگرەیەك بە پێویست و مێژووییی دەبینم، بۆ ئەوەی (پەكەكە) ئەو تێكۆشانەی نزیكەی 30 ساڵە لە دژی توركیا بەڕێوەی دەبات و لە چەك پێكدێت، دوایی بێنێت، بۆ دیاری كردنی ستراتیژی و تاكتیكە سیاسیی و كۆمەڵایەتییەكانی بەپێی ڕۆحی سەردەم.}

^{هیوادارم كە لە ئایندەیەكی نزیكدا، لەسەر بنەمای ئەو پرەنسیپانە و بە ڕایی كردنی لە لایەن كۆمسیۆنێكی حەقیقەت و ڕووبەڕووبونەوە كە لە ئەندام پەرلەمانی هەنووكەیی و دەستەی چاودێری پێك بێت، بە سەركەتووانە ئەو كۆنگرەیە ببەسترێت. بەوەی لە ڕێی ئەو كۆنگرەیەوە، سەردەمێكی نوێ دەست پێ دەكات، بەو سەردەمە نوێیەش لە نێو كۆماری توركیادا لە سەر بنەمای دەستووری بنەڕەتی، وەك كۆمەڵگەیەكی دیموكراتی و خاوەن ناسنامەیەكی دیموكراتی، پێ دەنێینە نێو قۆناغی پێكەوە ژیانی ئاشتییانە.}

^{بەو پێیە پاشخانی ئەو كۆماری توركیایەی كە 90 ساڵە پڕیەتی لە شەڕ، دەرباز بین و بەرەو ئایندەیەكی ئاشتی ڕاستەقینە، کە بە پێوەری دیموكراتی گەردوونی ئاوێتە بووە، هەنگاو بنێین. شتێكی كە لە مێژووی نەورۆزی ڕاستەقینەشدا دێت، سڵاو كردنە لە ژیانی كردنی وەها نەورۆزێك، بەڵام دیاردەیەكی كە بۆ گەل و وڵاتەكەمان ڕاستە، دەبێ لە هەمان كات دا بۆ هەرێمەكەشمان بە هەمان شێوەیە بێت.}

^{ڕاستینەی سەرمایەداری ئیمپریالیست بە گشتیی 2 سەد ساڵی دوایی، بە تایبەتی لەم 100 ساڵەی دواییەدا، لە سەر بنەمای نەتەوەپەرستی (نەتەوە – دەوڵەت)، ناسنامەی نەژادی و ئایینی بە شێوەیەكە كە لە دژی جەوهەری خۆی، بە ڕووی خۆیدا داخستووە و یەكیان كردووەتە دوژمن.}

^{واتە بەپێی سیاسەتی پارچە بكە و بەڕێوە ببە، بوونی خۆی بێ بەزەیییانە تا ڕۆژی ئەمڕۆمان هێناوە. دەبێ بزانین هێزەكانی ئیمپریالیست كە دەستیان لە هیواكانیان لە ڕوژهەڵاتی ناوین بەرنەداوە، دوایین زۆردارییان بە شێوەی داعش هاتە ئاراوە، ئەو ڕێكخراوەی كە دڕاندایەتیشی بێ واتا كردووە، بێ ئەوەی بڵێ ئەمە ژن و منداڵە، (كورد، توركمان، عەرەب، ئێزدی، ئاشووری – سریانی)یە، لە دژی هەموو گەل و كەمینەكانی هەرێمەكە، كۆمەڵكوژی دڕندانە ئەنجام دەدات.}

^{ڕۆژ ئەو ڕۆژەیە كە ئەو مێژووە بێ بەزەیی و وێرانكەرە، كۆتایی بێ و پێ بنێتە ئاشتی، برایەتی و دیموكراسییەك كە بەپێی پاشخانی ڕاستەقینەمان بێت. بە ڕاستی دەبینم و بەوە باوەڕم هەیە، نەتەوە دەوڵەتانێكی كە نەتەوەپەرستی وێرانكار، لەناوبەر و پڕ ئاڵۆزی بەرهەمهێناوە، بە كرانەوە بەڕووی سیاسەتی دیموكراتی و ناسنامەی دیموكراتییانە، ناچارن وەرچەرخێن بۆ وڵاتی هاوبەش.}

^{بۆ ئەوەش بانگ لە نەتەوە – دەوڵەتەكان دەكەم، لە ناو خۆیاندا بە سیاسەتی دیموكراتییانە، جۆرێكی نوێی دیموكراتی هاوبەش پێك بێنن، نەتەوە دەوڵەتەكان لە نێو خۆیاندا ماڵی هاوبەشی دیموكراتییانەی ڕۆژهەڵاتی ناوین بونیاد بنێن.}

^{بەم بۆنەیەوە داوا لە ژنان و گەنجان دەكەم كە بەرەو ئازادی لە شەقەی باڵدەدەن و زۆرینەی چەوساوەی كۆمەڵگەكەمانن، لە تێكۆشانی ئازادی و یەكسانیدا لە بواری (ئابووری، كۆمەڵایەتی، سیاسیی و ئاسایشی قۆناغی هەنوكەییمان) چالاكانە بەشدار بن و سەری بخەن.}

^{وێڕای ئەوەش سڵاو لە بەرخودان و سەركەوتنی كۆبانێ دەكەم كە هەم بۆ هەرێمەكەمان و هەم بۆ كۆمەڵگەی نێونەتەوەیی، واتایەكی مەزنی هەیە. لە سەر ئەو بنەمایە سڵاو لە “رۆحی ئاشمێ” دەكەم كە سیمبوڵێكی مێژووی نوێی نێوان گەلانمانە.}

^{ئەو ئاماژانەی لە سەرەوە هەوڵمدا دەست نیشانی بكەم، ئەگەر بە دەستەواژەیەك بڵێم: ئەوە بۆ كۆمەڵگە سەر لە نوێ پاكسازی، بونیادنەوە و داڕشتنەوەی مێژوویی و ڕۆژانەیی، بانگەوازییەكی هێژایە.}

^{جارێكی تر سڵاو لە خودی ئەم نەورۆزە مێژوویییە، بەو هیوای ئەوەی كە بۆ هەموو مرۆڤایەتی ببێتە مایەی خێر. بژی نەورۆز بژی برایەتی گەلان.}

^{عەبدوڵڵا ئۆجەلان}

^{دوورگەی ئیمرالی}

<sup>بەبۆنەی شەهیدکردنی سێ پێشمەرگەکە پێشتر بە دیلی کەوتبوونە دەستی چەکدارانی داعش، مەسعود بارزانی، سەرۆکی هەرێمی کوردستان پەیامێکی بڵاوکردەوە.

سەرۆکی هەرێمی کوردستان لە ناوەڕۆکی پەیامەکەیدا دەڵێت: " بەڵێن بە خانەوادەی ئەو شەهیدانەمان دەدەین کە خوێنی شەهیدان بەفیڕۆ ناچێت و تۆڵەیان دەکرێتەوە و رێگە نادەین تیرۆریستان ئەم تاوانەیان بەسەرەوە بچێت و سزای ئەو کارە دڕندانەیە و هەموو کردەوە چەپەڵەکانیان وەردەگرن".

هەر لەو پەیامەدا مەسعود بارزانی دەشڵێت:" بە پشتیوانیی خوای گەورە و گەلی خۆڕاگری کوردستان، ئەوانەی بەوشێوەیە پێشمەرگەی کوردستان شەهید دەکەن، پێشتر بینیویانە و ئێستا و داهاتووش دەبینن کە چۆن دەستی تۆڵەی پێشمەرگە قارەمانەکانمان دەیانگاتێ".

لە ٢٠١٥/٣/١٩ رێکخراوی داعش گرتەیەکی بڵاوکردەوە کە تێیدا سێ پێشمەرگە لە کۆی ئەو 21 پێشمەرگەیەی کە بە دیل گیراون شەهیددەکات.

دەقی پەیامەکەی سەرۆکی هەرێمی کوردستان

بەناوی خودای گەورە و میهرەبان

هەواڵی دڵتەزێنی شەهیدکردنی سێ پێشمەرگەی دیلی دەستی تیرۆریستانی داعش، کە لەلایەن ئەو تیرۆریستانەوە بەشێوەیەکی دڕندانە شەهید کراون، خەمباری کردین.

بەڵێن بە خانەوادەی ئەو شەهیدانەمان دەدەین کە خوێنی شەهیدان بەفیڕۆ ناچێت و تۆڵەیان دەکرێتەوە و ڕێگە نادەین تیرۆریستان ئەم تاوانەیان بەسەرەوە بچێت و سزای ئەو کارە دڕندانەیە و هەموو کردەوە چەپەڵەکانیان وەردەگرن.

بە پشتیوانیی خوای گەورە و گەلی خۆڕاگری کوردستان، ئەوانەی بەوشێوەیە پێشمەرگەی کوردستان شەهید دەکەن، پێشتر بینیویانە و ئێستا و داهاتوش دەبینن کە چۆن دەستی تۆڵەی پێشمەرگە قارەمانەکانمان دەیانگاتێ.

لەو بۆنە خەمناکەدا، سەرەتا سەرخۆشیی لە خۆمان دەکەین، ئینجا لە خانەوادەی سەربەرزی شەهیدەکان و گەلی کوردستان. شەهیدبوون لە ڕێگەی گەل و نیشتیمان، سەربەرزییە، جا ئەو شەهادەتە بە گوللە بێت، یان بە ئاگر، یان پەتی سێدارە.
 
مسعود بارزانی</sup>

^{سەرۆکی هەرێمی کوردستان}

^{٢١ـی٣ـی٢٠١٥}

<sup>سەرۆکوەزیرانی تورکیا، بەناوی دەوڵەت و حکومەتی تورکیاوە قسەیکرد و ئاماژەی بەوەکرد، بە هەر نرخێک بێت، پرۆسەی ئاشتی سەرکەوتوو دەبێت.

ئەحمەد داودئۆغڵو، سەرۆکوەزیرانی تورکیا، لەشاری ئیستەنبوڵ ئەمڕۆ 2015/3/21 بەشداربوو لە جەژنی "ئێمە بەیەکەوە تورکیاین، جەژنی بەهار" و گوتی: "حیزبێک لە ئەنقەرە و حیزبێکیش لە ئامەد(دیاربەکر) تەنیا ئەوە نییە کە روو لە کۆڵانێک بکەین و قسە بکەین، بەڵکو نەورۆز جەژنی هەموو مرۆڤایەتییە، نەورۆز جەژنی کورد، تورک و فارسەکانە".

داودئۆغڵو هۆشداری ئەوەیدا کە هیچ کەسێک پرۆسەی ئاشتی نەکاتە ئامرازی سیاسەتی رۆژانە و گوتی: "هیچ کەسێک بە مانۆڕی تاکتیکییەوە پرۆسەی ئاشتی نەکاتە ئامرازی سیاسەتی رۆژانە، با نەچێتە رۆژئاوا، ناوەڕاست و باکووری تورکیا و ژمارەیەک کاری دوژمنکارانە بکات، با نەچێتە رۆژهەڵات و باشووری رۆژهەڵاتی تورکیا (مەبەست لە باکووری کوردستانە) و بانگەوازی تووندوتیژی هاوشێوەی بانگەوازەکەی 6-7 ی تشرینی یەکەم نەکات".

ئەم گوتەیەی داودئۆغڵو ئاماژەیە بەو بانگەوازەی کە سەڵاحەدین دەمیرتاش، هاوسەرۆکی پارتی دیموکراتی گەلان HDP  بۆ کوردانی تورکیا و باکووری کوردستانی کرد بۆ پشتیوانیکردن لە کۆبانێ، بڕژێنە سەر شەقامەکان و لەمەوە خۆپیشاندان لە چەند شارێکی باکووری کوردستان و تورکیا روویاندا و لە ئەنجامدا زیاتر لە 40 کەس بوونە قوربانی.</sup>

^22/3/2015

^{بۆ جیاكردنەوەی سنووری هەردوو پارێزگای بابل و كەربەلا لە سنووری پارێزگای ئەنبار، بەرپرسانی ناوخۆیی ئەو دوو پارێزگایە خەندەقێكی درێژ لێدەدەن و بەشی زۆری كارەكانی پڕۆژەكەش كۆتاییان هاتووە.}

^{“عەقیل مەسعوودی” سەرۆكی لیژنەی ئەمنی لە ئەنجوومەنی پارێزگای كەربەلا لەبارەی خەندەقەكەوە گوتی: “به‌فەرمانی وەزارەتی بەرگری و دوای وتوێژێكی زۆر لەگەڵ فەرماندە باڵا ئەمنییەكان، گەیشتینە ئەو راستییەی، كە هەڵكەندنی خەندەقێك بە قوڵی دە مەتر و بە پانی شەش مەتر و بە درێژایی 42 كیلۆمەتر بۆ جیاكردنەوەی كەربەلا و بابل لە ئەنبار لێبدرێت، ئەمەش بۆ راگرتنی پێشڕەویی و هێرشەكانی چەكدارانی داعش بۆ سەر ناوچەكانی باشوور و ناوەڕاستی عێراق”.}

^{مەسعوودی ئاماژەی بەوەشكرد كە تێچوونی هەڵكەندنی خەندەقەكە، شازدە ملیار دیناری عێراقیە كە دەگاتە دوازدە ملیۆن دۆلاری ئەمەریكی}

^21/3/2015