<sup>لەبەرامبەر یەکدەنگبوونی فراکسیۆنەکانی گۆڕان، یەکێتی،  یەکگرتوو و کۆمەڵی ئیسلامی بۆ هەمووارکردنەوەی یاسای سەرۆکایەتیی هەرێمی کوردستان، سەرۆکی فراکسیۆنی پارتی دیموکراتی کوردستان هەڕەشەی هەڵوەشانەوەی حکومەت و پەرلەمان و هەموو ئەو رێککەوتنانە دەکات کە پێشتر حیزبەکەی لەگەڵ ئەو لایەنانە واژۆیان کردووە.

سەرۆکی فراکسیۆنی پارتی لەپەرلەمانی کوردستان هەڕەشەی هەڵوەشاندنەوەی حکومەت و پەرلەمان و هەموو ئەو رێککەوتنانە دەکات کە لەگەڵ لایەنەکانی دیکە لە هەرێمی کوردستان و بەغدا هەیەتی بۆ دابەشکردنی پۆستەکان، لەئەگەری هەموارکردنەوەی یاسای سەرۆکایەتیی هەرێمی کوردستان و یەک دەنگ بوونی گۆڕان، کۆمەڵ، یەکێتی و یەکگرتوو، لەسەر ئەو بابەتە.

ئومێد خۆشناو سەرۆکی فراکسیۆنی پارتی لە پەرلەمانی کوردستان لە لێدوانێکی بۆ رووداو گوتی:" ئەو ‌هەڕەشەیەیی پارتی دوای ئەوە دێت کە لایەنەکانی دیکە دەیانەوێت یاسای سەرۆکایەتیی هەرێمی کوردستان هەموار بکرێتەوە و  دەسەڵاتەکانی سەرۆکی هەرێم کەم بکەنەوە و  شیوازی هەڵبژاردنی سەرۆک لە ناو خەڵکەوە بگۆڕن بۆ پەرلەمان".

ئەم پێکەنینە سیاسیەی یەکێتی لەگەڵ پارتی خەریکە کۆتایی دێت. چونکە  پاڵی داوەتە پاڵ گۆران و ئەویش پرۆژەی بۆ هەمواری یاساکە هەیە و پێچەوانەی خواستی حزبە هاوپەیمانەکانە.

بێگەرد تاڵەبانی، سەرۆکی فراکسیۆنی یەکێتی لە پەرلەمانی کوردستان، دەربارەی رێککەوتنی فراکسیۆنەکان پەرلەمانی کوردستانلەسەر هەمواری یاسای سەرۆکایەتی هەرێم گەوتی:"  رێکەوتنی فراکسیۆنەکانی پەرلەمان لەسەر هەمواری یاسای سەرۆکایەتی هەرێمی کوردستان شکستی هێنا، زۆربەی لایەنەکان پرۆژەیان بۆ ئەوە هەیە و دەیانەوێت هەموارەکە بە دڵی خۆیانبێ، کۆمەل و یەکگرتووش پرۆژەیەکیان هەیە.

مەروان گەڵاڵی- سەرۆکی فراکسیۆنی کۆمەڵ لە پەرلەمانی کوردستانیش گوتی:" لە پەرلەمانی کوردستان ئەو مشتومڕەی فراکسیۆنەکان لە کاتێکدایە بارزانی داوای هەڵبژاردنی سەرۆکی هەرێمی کوردستانی کردووە، بەو یاسایەی کە ئێستا بەرکارە، ئەگەر کۆمسیۆنی هەڵبژاردنەکان ئامادەیی هەڵبژاردنی هەبێ، پرۆژەی فراکسیۆنەکان بۆ هەمواری یاسای سەرۆکایەتی ، بەهایەکیان نامێنێ".</sup>  

^17/6/2015

<sup>سەرۆکی شارەوانی سنە دانبەوەدا دەنێت کە لەسەر گەندەڵی لە شارەوانی سنە11 کەس دەستبەسەر کراون.

 بەگوتەی سەرۆکی شارەوانی سنە، ئەو کەسانەی دەستگیرکراون، مووچەیان بە کەسانێک داوە کە فەرمانبەری شارەوانی نەبوونە. گەندەڵییەکانی شارەوانی سنە بە چەندین ملیار تمەن دەخەمڵێندرێ، کە بەشی زۆری لە بواری دروستکردنی خانووبەرەدا بووە. 



پرسی گەندەڵی گەورەترین رووداوێک بووە کە لە ماوەی یەک ساڵی رابردوودا شارەوانی سنە لەگەڵی بەرەوڕوو بووە. پرسێک کە سەرەتا رەتکرایەوە، بەڵام وردە وردە بەرپرسان ناچار بوون دانیپێدا بنێن.

غەریب سەجادی، ئەندامی ئەنجومەنی شاری سنە، سەرەتاکانی مانگی رێبەندان دان بەوەدانا کە گەندەڵی دارایی روویداوە. دواتریش پارێزگاری سنە لە مانگی رێبەندانی رابردوو لە کۆنگرەیەکی رۆژنامەوانییدا هەواڵی گەندەڵی دارایی لە شارەوانی سنەدا پشتڕاستکردەوە و گوتی: لەو پەیوەندییەدا چەندین کەس دەستگیرکراون. 

ئەمە دەرفەتی رەخساند تا بە راشکاوی زیاترەوە باسی گەندەڵییەکانی شارەوانی بکرێ. هێشتا بە وردی بڕی گەندەڵییەکە روون نیە، بەڵام باس لە چەندین ملیار تمەن دەکرێ. بەشێکی پەیوەندیی بە دروستکردنی خانووبەرەوە هەیە.

کامیاب شادمان، سەرۆکی شارەوانی سنە، دەڵێ: لە رەوتی گەندەڵییەکانی شارەوانیدا 11 کەس دەستبەسەر کراون و ئێستا لە زینداندان. 

بەگوتەی سەرۆکی شارەوانی سنە، یەکێک لەو تۆمەتانەی کە دراوەتە پاڵ ئەو کەسانە ئەوەیە کە" مووچەیان بە کەسانێک داوە کە فەرمانبەری شارەوانی نین". شادمان دەڵێ:" سەرەتا ئەوە شارەوانی بوو کە گەندەڵیی دارایی ئاشکرا کر و دواتریش ئەندامانی ئەنجومەنی شار پشتیوانیان لە شارەوانی کردووە".

ئەوە لە کاتێکدایە کە یەکێک لە کێشەکانی ئەنجوومەنی شار لەگەڵ شارەوانی، پرسی گەندەڵییەکان بووە. 

غەریب سەجادی، ئەندامی ئەنجوومەنی شاری سنە، کە یەکێک لە رەخنەگرانی سەرۆکی شارەوانییە، شارەوانی بەوە تۆمەتبار کرد کەلە ماوەی یەک ساڵ و نیودا 200 کەس دامەزرێنراون. دەگوترێ ئەو کەسانە لەسەر داواکاریی کەسانی دیکە دامەزراون.</sup>

^17/6/2015

<sup>بڕیارە سبەی چوارشەممە 17/6/2015، حەیدەر عەبادی سەردانی کۆماری ئیسلامیی ئێران بکات و لەگەڵ گەورەبەرپرسانی ئەو وڵاتە کۆببێتەوە.

بەپێی هەواڵێکی ماڵپەڕی فەرمی حەیدەر عەبادی سەرۆکوەزیرانی عێراق، سەردانەكە لەسەر بانگهێشتی گەورە بەرپرسانی ئێران بووە لەسەرووی هەمووشیانەوە عەلی خامنەیی، رێبەری باڵای شۆڕشی ئیسلامیی ئێران.

بڕیارە لە سەردانەکەدا باس لە چەند تەوەرێکی هاوبەش بکرێت لەنێوان هەردوو وڵاتدا، بەتایبەت شەڕی دژ بە داعش و چۆنییەتی رووبەڕووبوونەوەی رێکخراوەکە.</sup>

^16/6/2015

<sup>رێکخراوی قاعیدە لەیەمەن، دانی بە کوژرانی یەکێک لە سەرکردەکانی دانا بەناوی ناسر وەحێشی، کە لەهێرشی فڕۆکە بێفڕۆکەوانەکانی ئەمریکا کوژراوە، هاوکات رێکخراوی قاعیدە دوای کوژرانی وەحێشی قاسم ریمی کردە بەرپرسی رێکخراوەکە لە نیمچەدوورگەی عەرەبی.

رۆژنامەی واشنتن پۆستی ئەمریکی بڵاویکردەوە، كە رۆژی هەینی رابردوو فڕۆکە بێفڕۆکەوانەکانی ئەمریکا ناسر وەحێشی، سەرۆکی قاعیدەی یەمەنیان لە پارێزگای حەزەرمەوتی لیبیا کردووەتە ئامانج. 

هەروەها ریتا کاتز، بەڕێوەبەری ماڵپەڕی کۆمەڵەی هەواڵگری ئەمریکا ئاماژەی بەوە کردووە، كە جیهادییەکانی یەمەن چەندرۆژێک لەمەوبەر هەواڵی کوژرانی ناسر وەحێشییان بڵاوکردووەتەوە و ئەوانیش دڵنیان لە کوژرانی ئەو سەرکردەیەی داعش.

لە ماوەی رابردوودا وەزارەتی دەرەوەی ئەمریکا بڕی 10 ملیۆن دۆلاری تەرخانکرد بۆ هەر کەسێک کە بتوانێت هاوکارییان بکات و زانیارییان بداتێ لەبارەی شوێنی مانەوە یاخود رادەستکردنی وەحێشی بە هێزەکانی ئەمریکا.

هەروەها رۆژی‌ یەكشەممە 14-6-2015 وەزارەتی بەرگریی ئەمریكا ئاشكرایكرد كە" موختار بلموختار، رێبەری گرووپی ئەلمورابیتوونی سەر بە رێکخراوی ئەلقاعیدەیان لە لیبیا كردووەتە ئامانج". بەڵام گرووپی ئەنسار شەریعەی لیبیا ئەو هەواڵەی رەتکردەوە.</sup>  

^16/6/2015

<sup>لە درێژەی سەردانەکەیدا بۆ وڵاتانی كەنداو رۆژی دووشەممە 15ـی 6ـی 2015 لە شاری ئەبوزەبی، مەسعود بارزانی، سەرۆکی هەرێمی کوردستان و شاندی یاوەری لەگەڵ شێخ موحەمەد بن زاید جێنشینی ئیماراتی یەكگرتووی عەرەبی کۆبوونەوە.

ماڵپەڕی فەرمی سەرۆکایەتی هەرێمی کوردستان بلاویکردەوە، کە لە کۆبوونەوەکەدا باسی پەیوەندییەكانی نێوان هەرێمی كوردستان و ئیمارات و چۆنییەتی بەرەوپێشبردن و فراوانتركردنی كراوە و هەروەها دوا پێشهاتە سیاسی و ئەمنییەكانی عێراق و ناوچەكە گفتوگۆی لەبارەوە کراوە. 

هەر بە پێی ماڵپەڕی فەرمی سەرۆکایەتی هەرێمی کوردستان تەوەرێكی دیكەی ئەم دانیشتنە تاوتوێكردنی بارودۆخی مرۆیی و رەوشی ئاوارە و پەنابەران بووە، كە لەبەر هەڕەشەی داعش ماڵ و حاڵی خۆیان جێ هێشتووە.

رۆژی شەممە، مەسعود بارزانی، سەرۆکی هەرێمی کوردستان، بە سەرۆکایەتی شاندێک بەرەو کوێت و لەوێ لەگەڵ میری کوێت کۆبووەوە، ئەمڕۆش لە ئیمارات لەگەڵ ئەو ولاتە کۆبووەوە. 

ئەندامانی شاندەکە بریتین لە لەگەڵ مەسرور بارزانی راوێژكاری ئەنجوومەنی ئاساییشی هەرێمی کوردستان و فوئاد حوسێن سەرۆكی دیوانی سەرۆكایەتیی هەرێمی کوردستان و عەلی سندی وەزیری پلاندانان و سەلاحەدین بابەكر وەزیری كارەبای حكوومەتی هەرێمی کوردستان.</sup>

^16/6/2015

<sup>رۆژنامەنووس ئەحمەد سەفار کە وەکو راوێژکاری راگەیاندنی عەبدوڵڵا گوڵ سەرۆک کۆماری پێشووی تورکیا کاری کردووە، بەشێک لە نهێنی کاری خۆی لە کۆشکی کۆماری و تایبەتمەندی پەیوەندییەکانی نێوان گوڵ و ئەردۆغان و داودئۆغلو ئاشکرا دەکات. 

بڵاوکردنەوەی ئەو نهێنیانە لەو کاتەدا بە خۆشکەری ئاگری گفتوگۆکانی نێو ئەکەپە دادەندرێت، بە تایبەتی کە لە هەڵبژاردنەکاندا سەرکەوتنی بەدەست نەهێناوەو دەنگەکانی رووی لە کەمبوونەوە کردووە. هەندێک دەنگ پەیدا بوون داوای گەڕانەوەی عەبدوڵا گوڵ دەکەن بۆ ناو ئاکەپە بۆ ئەوەی ئەو پارتە رزگار بکات.

سەفار کتێبێکی بە چاپ گەیاندووەو پیشانی عەبدوڵا گوڵی سەرۆک کۆماری پێشووی تورکیا داوە، بەڵام گوڵ هۆشداری داوە بە سەفار لە بڵاوکردنەوەی کتێبەکە بەر لە ئەنجامدانی هەڵبژاردنەکان، سەفار رەتیش دەکاتەوە هیچ قسەیەک دەربارەی ناوەڕۆکی کتێبەکە بکات.

کتێبەکە باس لە ناکۆکییەکانی نێوان گوڵ و ئەدۆغان دەکات لەم سێ ساڵەی دواییدا. سەرۆکی پێشووی تورکیا بەوە نیگەرانە کە لە دوای ئەو یاسایەک دەرچوو رێگری لێدەکرا بۆ خولی دووەمی سەرۆکایەتی خۆی هەڵبژێرێت. 

سەفار ئاماژە بەوەش دەکات حکومەت سیاسەتەکانی دەرەوەی گوڵی قۆڵبەست کرد، هەروەها ناڕازی بووە لە بەرامبەر سیاسەتەکانی لە دۆسیەی مسر و سوریا. 

هەروەها لە کتێبەکەدا هاتووە لەبارەی ئەو سیاسەتانەوە گوڵ و داود ئۆغلو چەندین جار رووبەروی یەکتر بوونەتەوە و پێی راگەیاندووە کە حکومەتی ئاکەپە وەکو حکومەتی مسر و سوریا هەڵسوکەوت دەکات، ئەوەش بە خراپ بەسەر هەموو لایەنەکاندا دەشکێتەوە. 

هەروەها کتێبەکە بەشێک لە ناوەڕۆکی دانیشتنە تایبەتەکان ئاشکرا دەکات، کە تێیاندا عەبدوڵڵا گوڵ رەخنەی لە سیاسەت و رەفتاری پارتی داد و گەشەپێدان گرتووە، ، نیگەرانی خۆشی دەربڕیوە لەوەی دەرگای بە رووی گەڕانەوەیدا داخراوە بۆ ناو ئاک پارتی و ئەحمەد داود ئۆغلو بۆتە سەرۆکی پارتەکە.</sup>

^16/6/2015

^{پێنج ئەندامی خێزانێکی مسوڵمان، بەهۆی گڕگرتنی شەحنکەرەوەی مۆبایل گیانیان لە دەست دا و پیاوانی ئاگرکوژێنەوەش رایانگەیاندووە، کە ئەوە ترسناکترین رووداوی ئاگرکەوتنەوە بووە لە ماوەی 6 ساڵی کارکردنی ئەوان.}

^{رۆژنامەی میرۆر بڵاویکردووەتەوە، کە کچێک لە ماڵێکی شیفێڵدی بەریتانیا، مۆبایلەکەی لەسەر شەحن (charge) دانابوو، دواتر هەستیکرد ئاگرێکی لێ پەیدابوو، بۆیە بە پەلە بە کەلوپەلەکانی دەوروبەری هەوڵیدا ئاگرەکە بکوژێنێتەوە، بەڵام نەیتوانی، دواتر بانگی دایکی کرد و هەموو هەوڵەکانیان بۆ کوژاندنەوەی ئاگرەکە شکستیان هێناوە و خانووەکە بە تەواوی ئاگری گرتووە و بووەتە هۆی مردنی پێنج ئەندامی خێزانەکە.}

^{پیاوانی ئاگرکوژێنەوە باسیان لەوە کردووە، کە گەرمیی ئاگرەکە 1000پلەی سەدی بووە و ”ترسناکترین ئاگربووە لە ماوەی 6 ساڵی رابردوودا لە ناوچەکە“.}

^15/6/2015

<sup>پەیامنێرانی تۆڕی میدیایی رووداو هەموو رۆژێک لە بەرنامەی نووڕۆژ، نوێترین زانیاریی و هەواڵی ناوچەکانیان دەگوازنەوە.

دهۆک

پەیامنێری رووداو لە دهۆکەوە رایگەیاند، زۆربوونی ژمارەی ئاوارەکان کێشەی زۆری بۆ پارێزگای دهۆک دروستکردووە، بە تایبەت لە وەزری هاویندا و لە رووی دابینکردنی پێداویستییە وەرزییەکان، بەڵام لەگەڵ ئەوەیش ئەنجوومەنی پارێزگای دهۆک بە هۆی ئەوەی تەبایی و لێکنزیکی باشی تێدایە و خەڵک پشتیدەگرن توانیویەتی رۆڵی باش ببینێت لەو رووەوە ، هەرچەند لە پرسی دابینکردنی بەنزیندا هەندێک کێشە دروستبووە و لە تۆڕە کۆمەڵایەتییەکان دەنگۆ بڵاو بووەتەوە کە هۆکارەکەی بۆ لایەنە ئیسلامییەکان و کوتلەیەکی ناو پارتی دەگەڕێندرێتەوە.

ئامەد

پەیامنێری رووداو لە ئامەدەوە رایگەیاند، دوای ئەوەی نزیک لە سێ هەزار پەنابەر روویانکردە گرێسپی و حکومەتی تورکیا رێگای پێنەدان، گریمانی کارەساتێکی گەورە دەکرا ، بەڵام دوای رێگەپیدانیان باس لە رەوشی پەنابەران دەکرێت لە رووی دابینکردنی پێداویستییەکانیان و ئێستا 440 هەزار پەنابەری سووری لە تورکیا و باکووری کوردستانن، چاوەڕواندەکرێت لە داهاتوودا ئەو ژمارەیە بگاتە نزیک ملیۆنێک و داوا لە نەتەوە یەکگرتووەکان کراوە هاوکار بێت بۆ دابینکردنی پێداویستییەکانیان.

ئەنقەرە

پەیامنێری رووداو لە ئەنقەرەوە رایگەیاند، سەرۆککۆماری تورکیا بە نیازە لەگەڵ سەرۆکی پارتە براوەکانی هەڵبژاردنەکانی ئەو وڵاتە کۆ ببێتەوە، هەروەها کاندیدێکی کوردی هەدەپە فەلەکناز ئوجا کە پێشتر رایگەیاندبوو" ناتوانێ بە زمانی تورکی سوێند بخوات و بە زمانی کوردی سوێند دەخوات"، بووەتە مایەی مشتومڕ و دواجار پارتەکەی داوای لێکردووە بە زمانی تورکی سوێند بخوات. 
 
بەغدا

پەیامنێری رووداو لە بەغداوە رایگەیاند، بڕیارە رۆژی دووشەممە 15-6-2015  کۆنگرەیەکی نێودەوڵەتی بە سەرپەرشتی حەیدەر عەبادی سەرۆککۆماری عێراق بەڕێوە بچێت و تێیدا عەبادی وتارێک بدات.

 چاوەڕواندەکرێت لە وتارەکەیدا عەبادی هەندێک بابەتی تازە باس بکات لە بارەی پلانی رووبەڕووبوونەوەی داعش، هەروەها بڕیارە ئەمڕۆ لە پەرلەمانی عێراق لیژنەی لێکۆڵینەوەی کەوتنی موسڵ ئەنجامی لێکۆڵینەوەکانی رابگەیەنێت و ناوی بەرپرسە تێوەگلاوەکان و زانیاری تازە لەو بارەیەوە ئاشکرا بکات. رایشیگەیاند، هێزەکانی حەشدی شەعبی تۆمەتبار کراون بەوەی ئازاری خەڵک دەدەن لە ناوچەی ئەنبار و ئەوەش بوەتە هۆکاری ئەوەی، هێزەکانی حەشدی شەعبی لە ناو خۆیاندا تووشی پەرتەوازەیی بن.
 
نیویۆرک  

پەیامنێری رووداو لە نیویۆرکەوە رایگەیاند، سەلیم جبوری سەرۆکی پەرلەمانی عێراق ئەمڕۆ لەگەڵ رێکخراوی نەتەوە یەکگرتووەکان کۆدەبێتەوە و پێشبینی دەکرێت داوای هاوکاریی زیاتر بکات بۆ ئاوارەکانی عێراق.

جبوری لەگەڵ ئەمینداری گشتی نەتەوە یەکگرتووەکانیش کۆ دەبێتەوە و پێدەچێت لەو کۆبوونەوەیە رەوشی ئەمنی باس بکەن و داوای هاوکاریی زیاتر لە رووی ئەمنییەوە بۆ عێراق بکات.</sup>

^15/6/2015

<sup>لەدوای روودانی هێرشەکانی ئەم دواییەی پاریس و تاوانبارکردنی لایەنە ئیسلامییەکان بە کاری توندڕەوی لەو وڵاتە، بۆ یەکەمجار حکومەت بە فەرمی لەگەڵ دەستەی باڵای گفتوگۆکردنی ئیسلام کۆدەبێتەوە.

سەرچاوەیەک لە وەزارەتی کاروباری ناوخوی فەرەنسا رایگەیاند:" ئەمڕۆ دووشەممە ١٥ ی حوزەیرانی ٢٠١٥، بۆ یەکەمجار حکومەتی فەرەنسا بەفەرمی لەگەڵ دەستەی باڵای گتوگۆی ئیسلام کۆدەبێتەوە وئامانجی کۆبوونەوەکەش بریتییە لە سەرلەنوێ درووستکردنەوەی پەیوەندییەکی نوێ لە نێوان حکومەتی فەرەنسا و موسڵمانانی ئەو وڵاتە، کە لەدوای هێرشە توندڕەوەکانی مانگی یەنایەری رابردوو لە پاریس روویاندا،  ئەو پەیوەندیەیە لە نێوان حکومەت وموسڵمانانی دانیشتووی فەرەنسا تێکچوبوو".

سەرچاوەکەی وەزارەتی کاروباری ناوخۆی فەرەنسا ئاماژەی بەوەشکردووە، کۆبوونەوەکەی نێوان حکومەتی فەرەنسا و دەستەی باڵای گفتوگۆکردنی ئیسلام کۆبوونەوەیەکی فەرمییەو هاوکات کۆبوونەوەکەش لە تەلاری وەزارەتی کاروباری ناوخۆ لە پاریس بەڕێوەدەچێت، لە کۆبوونەوەکەش ١٢٠ نوێنەری یەکێتی و رێکخراو و چالاکوانانی ئایینی ئیسلام تێیدا بەشداریدەکەن و ژمارەیەکی دیکەی توێژەرانی ئایینی ئیسلام بەشداردەبن.

بە گوێرەی زانیارییەکانی سەرچاوەکە، ئامانجی سەرەکی کۆبوونەوەکەی نێوان حکومەت و دەستەکە، تاوتوێکردنی رەوشی ئەمنی فەرەنسا دەبێت و هاوکات هاوکاری و پشتیوانی نێوان حکومەت و دەستەکە لە پاراستنی رەوشی ئەمنی فەرەنسا دەبێت.

لە فەرەنسا پەیڕەوانی ئایینی ئیسلام ئازادەنا ئەرکە ئایینییەکانیان بەجێدەگێێنن و هاوکات نزیکەی ٣ هەزار مزگەوت هەیە و ساڵانەش لە فەرەنساوە گەشتی حەج وعەمرە ئەنجامدەدرێت و حکومەتی فەرەنسا هەموو ئازادییەکی ئایینی دەستەبەرکردووە.</sup>

^15/6/2015

^{بڕیارە ئەمڕۆ دووشەممە لە قاهیرەی پایتەختی میسر دە کەسایەتی کوردستانی خەڵات بکرێن. خەڵاتکردنەکە لەلایەن رێکخراوی کتێبی بێسنوور، ئەکادیمیای ئەمریکی بۆ زانست و تەکنۆلۆجی و زانکۆی کەمبرێجەوە دەکرێت و تێیدا هەریەک لە شڤان پەروەر، عەبدولڕەحمان سدیق، شوکریە رەسوڵ، خەسرەو جاف، کوردستان موکریانی، ئەحمەد سالار، مەتران رەبان، سیروان بارزانی، عەزیز محەممەد و هێدی بڕوانامەی فەخری زانکۆی کەمبریجیان پێدەبەخشرێت.}

^15/6/2015