^{سەرۆک وەزیرانی تورکیا رایدەگەیەنێت، کە حکوومەتی تورکیا چەند جارێک داوایان لە بەشار ئەسەد، سەرۆکی رژێمی سوریا و باوکی کردووە، مافی کوردەکان بدات و رەگەزنامەی سورییان بۆ دەربکات.}

^{ئەحمەد داودئۆغڵو، سەرۆک وەزیرانی تورکیا لە چاوپێکەوتنێکی تەلەفزیۆنێکی وڵاتەکەی رایگەیاندووە، کە چەکداری سوری سەر بە رژێمی ئەسەد خۆیان خزاندووەتە نێو ریزەکانی رێکخراوی دەوڵەتی ئیسلامی (داعش).}

^{ئەحمەد داودئۆغڵو ئاماژەی بەوەکردووە، کە ئامانجی هەموو رێکخراوە تیرۆریاستییەکان ”دروستکردنی گەڕەلاوژەیە“ و رایگەیاندووە، کە پارتی کرێکارانی کوردستان، داعش و بەرەی رزگاریی نیشتیمانیی شۆڕشگێڕ دەیانەوێ پشێوی لە تورکیا دروست بکەن و پێیوایە ئەو سێ لایەنە ”وەک یەکن و یەک روویان هەیە“ و پێیوایە رژێمی سوریا لەسەرووی ئەم سێ لایەنەشەوە کاردەکات، بۆ دروستکردنی ئاژاوەگێڕی لە تورکیا.}

^{سەرۆک وەزیرانی تورکیا، رژێمی سوریا بە دروستکردنی داعش تۆمەتبار دەکات و رایدەگەیەنێت، کە زۆرینەی چەکدارانی داعش سورین و رژێمی بەشار ئەسەد پشتگیرییان دەکات.}

^{داودئۆغڵو هەروەها ئاماژەی بە مافی گەلانی کورد و تورکمان لە سوریا کردووە و رایگەیاندووە، تورکیا چەند جارێک هەوڵیداوە بەشار ئەسەد رازی بکا بەوەی ”ناسنامە بداتە ئەو کوردانەی رۆژئاوای کوردستان، کە بێناسنامەن، “لە سەردانەکەمدا لە ساڵی 2011، داوام لە ئەسەد کرد رەگەزنامە بداتە ئەو کوردانەی سوریا، کە لێی بێبەشکراون“.
17/10/2015}

^{سه‌رۆكی كۆریای باکوور كه‌ به‌ سه‌رۆكێكی دكتاتۆر ناوی ده‌ركردوه‌، نامه‌یه‌كی ئاڕاسته‌ی سه‌رۆك كۆماری توركیا (ره‌جه‌ب ته‌ییب ئه‌ردۆگان) كردوه‌ و، له‌ نامه‌كه‌دا پرسه‌ و سه‌ره‌خۆشی لێده‌كات به‌ هۆی ته‌قینه‌وه‌كه‌ی ئه‌نكه‌راوه‌، كه‌ بوه‌ هۆی شه‌هیدبوونی 97 هاووڵاتی.
ئه‌گه‌رچی نامه‌ی سه‌ره‌خۆشییه‌كه‌ی سه‌رۆكی كۆریای باکوور (كیم یۆنگ) زۆر دواكه‌وت و ده‌بوایه‌ له‌ كاتی خۆیدا بیناردایه‌، چونكه‌ هه‌فته‌یه‌ك به‌سه‌ر ته‌قینه‌وه‌كه‌ی ئه‌نكه‌رادا تێپه‌ڕیوه‌، به‌ڵام نامه‌كه‌ی له‌ له‌ میدیاكانی توركیا گرنگی پێدرا. هه‌روه‌ها له‌ ئاژانسی فه‌رمی سه‌رۆكایه‌تی كۆریای باکووریش نامه‌ی سه‌ره‌خۆشییه‌كه‌ دانراوه‌.
نامه‌كه‌ به‌م شێوه‌یه‌یه‌:
“ئێمه‌ دژی هه‌موو كارێكی تیرۆرستین و ئیدانه‌ی ده‌كه‌ین. پرسه‌ و سه‌ره‌خۆشی خۆمان ئاڕاسته‌ی سه‌رۆك كۆماری توركیا و هه‌موو خه‌ڵكی توركیا ده‌كه‌ین. وه‌كو كۆریا دژی هه‌موو كارێكی تیرۆرستین و ئیدانه‌ی ده‌كه‌ین و ئاره‌زوو ده‌كه‌ین برینداره‌كانی ئه‌و ته‌قینه‌وه‌یه‌ به‌ زووترین كات چاك ببنه‌وه‌ و شیفایان بۆ بێت.”
16/10/2015}

^{بزووتنەوەی تاڵیبان لە ئەفغانستان داوای ئاگربەست لە لایەنەکان دەکات، بەمەرجێك هێزە بیانییەكان لەو وڵاتە بكشێنەوە.}

^{بزووتنەوەی چەکداری تاڵیبان لە ئەفغانستان، لە بەیاننامەیەکدا رایگەیاند " تاڵیبان نیازی وەستاندی شەڕی هەیە و داوادەکەین ئاگربەست رابگەیێنێن، هاوکات ئاگربەستەکەش لەلایەن ئێمە وە مەرجدارە بە کشانەوەی هێزە بیانییەکان لە ئەفغسنتان، بەتایبەت هێزەکانی ئەمریکا".}

^{بەیاننامەکەی بزووتنەوەی تاڵیبان ئاماژەی بەوەش کردووە، كە بۆ کۆتاییهێنان بە جەنگ ئامادەن دەست بە دانوستاندنی بەئاکام لەگەڵ هەموو لایەنەکانی پەیوەندیدار بکەن، بەو مەرجەی هێزەکان لە ئەفغانستان بکشێنەوە و دوای ئەوە دەوڵەتێکی ئیسلامی لە ئەفغانستان دروستبکرێت، ئینجا ئاگربەست رادەگەیێنن.}

^{تاڵیبان، كە بەهێزترین گرووپی چەكداری بەرهەڵستكاری حكومەتە و چەند ناوچەیەكی لەدەستدان، لە بەیاننامەکەدا جەختدەكاتەوە " کاتێک ئەفغانییەکان گەیشتنە ئەو بڕوایەی کە داگیرکردنی وڵات کۆتایی پێهاتووە و هێزە بیانییەکان دەکشێنەوە، ئەو کاتە دەشێت بە ئاسانی سەرجەم کێشەکان چارەسەربکرێن و لەڕێگەی دیالۆگەوە لایەنە سیاسییەکان دەگەینە رێککەوتن".
16/10/2015}

^{“باراك ئۆباما” سه‌رۆككۆماری ئه‌مریكا، جێبه‌جێ كردنی بڕیاری پاشه‌كشه‌ پێكردنی هێزه‌كانی ئه‌مریكای له‌ئه‌فغانستان دواخست. جه‌ختیشی له‌وه‌ كرده‌وه‌ كه‌ هێزه‌كانی ئه‌فغانستان تاكو ئێستا نه‌گه‌یشتوونه‌ته‌ ئه‌و ئاسته‌ی بتوانن به‌ره‌نگاری تیرۆر ببنه‌وه‌.}

^{له‌ پرێس كۆنفرانسێكدا له‌كۆشكی سی، گوتی: ” هێزه‌كانی ئه‌مریكا كه‌ 9800 سه‌ربازن، زۆربه‌ی ساڵی داهاتوو له‌ئه‌فغانستان ده‌مێننه‌وه‌”.}

^{هه‌روه‌ها گوتی: ” ڕێگه‌ناده‌م به‌وه‌ی ئه‌فغانستان بكرێته‌ په‌ناگه‌یه‌ك بۆ تیرۆریستان تاكو لێیه‌وه‌ جارێكی تر په‌لاماری نه‌ته‌وه‌ كه‌مان بده‌ن”.}

^{ئاماژه‌ی به‌وه‌شدا كه‌ هێزه‌كانی ئه‌فغانستان ناتوانن به‌ره‌نگاری تاڵیبان و قاعیده‌ ببنه‌وه‌.}

^{هه‌روه‌ها ئه‌وه‌یشی دووپات كرده‌وه‌ كه‌ئه‌مریكا بڕیاریداوه‌ هێزه‌كانی له‌ساڵی داهاتوودا له‌و وڵاته‌ بمێننه‌وه‌. جگه‌له‌وه‌ش بۆ دواتر 5500 سه‌رباز بمێننه‌وه‌ بۆ چاره‌سه‌ر كردنی دۆخی ئه‌منی. چونكه‌ دۆخی ئه‌منی له‌و وڵاته‌دا زۆر له‌رزۆكه‌. له‌زۆرناوچه‌شدا ئه‌گه‌ری داڕووخانی دۆخه‌كه‌ هه‌یه‌. دووپاتیشی كرده‌وه‌ كه‌ گرنگه‌ مه‌شق به‌هێزه‌كانی ئه‌فغانستان بكه‌ن.
16/10/2015}

^{له‌میانه‌ی دانیشتنێكیدا له‌گه‌ڵ “مه‌سعود بارزانی ” سه‌رۆكی هه‌رێمی كوردستان،نوێنه‌ری سكرتێری گشتی نه‌ته‌وه‌ یه‌كگرتووه‌كان له‌ عێراق نیگه‌رانی خۆی له‌به‌رانبه‌ر گرژییه‌كانی هه‌رێمی كورستان ڕاده‌گه‌یه‌نێت و ئاماژه‌ش بۆ ئه‌وه‌ده‌كات كه‌ هێرشكردنە سەر بارەگای لایەنەكان ئاكامی خراپی دەبێت و چارەسەری كێشەكان ناكات.}

^{به‌پێی هه‌واڵێكی ماڵپه‌ری فه‌رمی سه‌رۆكایه‌تی هه‌رێمی كوردستان،ڕۆژی چوارشەممە 14ـی 10ـی 2015 لە شاری هەولێر مەسعود بارزانی، سەرۆكی هەرێمی كوردستان پێشوازی لە جۆن كۆبینز نوێنەری تایبەتی سكرتێری گشتیی نەتەوە یەكگرتووەكان لە عێراق كرد.}

^{لەم كۆبوونەوەیەدا نوێنەری تایبەتی سكرتێری گشتیی نەتەوە یەكگرتووەكان لە عێراق ڕاوبۆچوونی خۆی لەبارەی بارودۆخی ناوخۆی هەرێم و گرژییەكانی حەفتەی ڕابردوو بۆ سەرۆك بارزانی باس كرد و نیگەرانیی خۆی لەبەرانبەر گرژییەكان نیشاندا بە تایبەت كە توندوتیژی و هێرشكردنە سەر بارەگای لایەنەكان ئاكامی خراپی دەبێت و چارەسەری كێشەكان ناكات. هەروەها ئەوەیشی خستەڕوو كە سەقامگیریی هەرێمی كوردستان زۆر گرنگە بە تایبەت كە تەحەدیاتی ئابووری و شەڕی داعش ڕووبەڕووی هەرێمی كوردستان بووەتەوە.
له‌به‌شێكی هه‌واڵه‌كه‌ی ماڵپه‌ری سه‌رۆكایه‌تی هه‌رێمی كوردستاندا هاتووه‌”نوێنەری تایبەتی سكرتێری گشتیی نەتەوە یەكگرتووەكان لە عێراق ستاییشی بانگەوازی هێزی پێشمەرگەی كوردستانی كرد كە لە سەنگەری شەڕی داعش ئاراستەی لایەنە سیاسییەكان كرا بوو. ئامادەیی ڕێكخراوی نەتەوە یەكگرتووەكانیشی ڕاگەیاند كە هاوكاری لایەنە سیاسییەكان بێت بۆ چارەسەركردنی كێشەكان و داوای دانوساندن و لێكنزیكبوونەوەی لایەنەكانی كرد”.}

^{هەڕەشەی تیرۆریستان و بارودۆخی سیاسیی ناوچەكە و دوا گۆڕانكارییە سیاسی و ئەمنییەكان تەوەرێكی دیكەی كۆبوونەوەكە بوو.
15/10/2015}

^{سكرتێری ڕۆژنامەوانیی سەرۆكوەزیرانی هەرێمی كوردستان ڕایگەیاند، بە مەبەستی بەشداری كردن لە كۆنفرانسێك، “نێچیرڤان بارزانی” سەردانی پایتەختی ئێران دەكات.}

^{ماڵپەڕی فەرمیی حكوومەتی هەرێمی كوردستان، لە زاری “سامی ئەرگۆشی”، سكرتێری ڕۆژنامەوانیی “نێچیرڤان بارزانی”، سەرۆكوەزیرانی هەرێمی كوردستانەوە بڵاوی كردەوە: “بۆ بەشداری كردن لە كۆنفرانسی ئاسایشیی (میونیخ) كە لە شاری تارانی پایتەختی كۆماری ئیسلامیی ئێران دەبەسترێت، نێچیرڤان بارزانی، ڕۆژی 17ی ئەم مانگە، بە داوەتێكی فەرمی سەردانی ئێران دەكات”. ئەوەشی ڕوون كردەوە كە كۆنفرانسەكە بە هەماهەنگی لەگەڵ ئەنیستیتیوتی نێودەوڵەتیی لێكۆڵینەوەی سیاسی لە پایتەختی ئێران ساز دەكرێت و هەر یەكە لە وەزیرانی دەرەوەی (ئەڵمانیا، ئێران، ژمارەیەك لە پەرلەمانتاران، بەرپرسانی حكوومی، ئەكادیمسیەن، لێكۆڵەرەوەی نێودەوڵەتی و ئێرانی) بەشداری تێدا دەكەن و زیاتر پەیوەستە بە دوایین ڕێككەوتنی نێوان كۆماری ئیسلامیی ئێران و وڵاتانی ڕۆژاوا و چەندین بابەت و باس و تەوەری پەیوەست بەم پرسەی تێدا تاوتوێ دەكرێت.}

^{ئەرگوشی ئاماژەشی بەوە كرد كە چاوەڕوان دەكرێت لەم سەردانەی بۆ تاران، نێچیرڤان بارزانی چاوی بە ژمارەیەك لە بەرپرسانی كۆماری ئیسلامیی ئێرانیش بكەوێت.
15/10/2015}

^{گوتە بێژی كۆشكی سپیی ئەمەریكا ئاشكرای كرد كۆماری ئیسلامیی ئێران بە تاقیكردنەوەی مووشەكی عیماد، جارێكی دیكە بڕیارنەی ئەنجومەنی ئاسایشی پێشێل كردووە.}

^{“جاش ئەرنێست” گوتەبێژی كۆشكی سپی لە كۆنگەرەیكی رۆژنامەنووسیدا گوتی: “چەندین نیشانەی بەهێز هەن كە كە تاقیكردنەوەی ئەمدواییانەی مووشەكی دوورهاوێژی ئێران، پێشێلكاری حاشاهەڵنەگری بڕیارنامەی ئەنجومەنی ئاسایشی سەر بە نەتەوە یەكگرتووەكانە.”}

^{“حوسێن دێهقان” وەزیری بەرگریی حكوومەتی ئێران لە رۆژانی رابردوودا رایگەیاند: “كە تاقیكردنەوەی مووشەكی دوورهاوێژی زەمین بە زەمینی عیماد بە سەركەوتووییەوە ئەنجام دراوە.”}

^{بە گوتەی ئەو بەرپرسە سەربازییەی ئێران كە هەموو قۆناغەكانی دیزاین و دروستكردنی لەلایەن پسپۆڕانی پیشەسازیی ئاسمانی و بەگریی ئێرانەوە جێبەجێ‌ كراوە، یەكەم مووشەكی دوورهاوێژی كۆماری ئیسلامیی ئێرانە كە توانایی كۆنترۆلكردنی هەیە هەتا ئامانجەكەی دەپێكێ‌.}

^{ئەنجومەنی ئاسایشی سەر بە نەتەوە یەكگرتووەكان ئێرانی لە چالاكیی مووشەكی و تاقیكردنەوی مووشەكی بالستیك كە توانایی هەڵگرتنی كڵاوەی ناوكیی هەیە، قەدەغە كردووە.}

^{لێپرسراوانی ئێران ئاشكرایان كردووە بۆ گەشە و پەرەپێدان بە چالاكیی مووشەكی و كاری سەربازی ئیزن لە كەس وەرناگرن.}

^{“عەباس عێراقچی” ئەندامی تیمی دانوستانكاری ناوكیی ئێران بە ئاماژە تاقیكردنەوەی مووشەكی زەمین بە زەمینی عیماد، بە ئاژانسی ئیرنای راگەیاندووە: “هاویشتن و تاقیكردنەوەی مووشەك وەك پێشێلكردنی بڕیارنامەی ئەنجومەنی ئاسایش و رێككەوتنی ناوكی نایەتە ئەژمار.”}

^{دوای هێرشی ئاسمانیی رووسیا بۆ ناو خاكی سووریا، ئێرانیش لە بواری سەربازییەوە كەوتووەتە جموجۆڵ و بڕیارە لە چەند رۆژی داهاتوودا گەوەرترین مانۆڕ و ئۆپەراسیۆنی سوپا (ئەرتش)ی ئێران لەسنوورەكانی پارێزگای كرماشان لە رۆژهەڵاتی كوردستان بەڕێوە بچێت.
14/10/2015}

^{چه‌ند سه‌رچاوه‌یه‌كی ئێرانی هه‌واڵی كوژرانی دوو فه‌رمانده‌ی باڵای سوپای پاسدارانیان له‌ شه‌ڕه‌كانی سوریادا ڕاگه‌یاند.}

^{سایتی” باسیج پرێس” كه‌له‌ هێزه‌كانی “به‌سیج”ی سه‌ربه‌ سوپای پاسدارانه‌وه‌ نزیكه‌، له‌ په‌ڕه‌ی خۆی له‌ “ئینستاگرام” هه‌واڵی كوژرانی” فه‌رشاد حه‌سونی زاده‌”ی فه‌رمانده‌ی فه‌یله‌قی”سابرین”ی سوپای پاسدارانی ڕاگه‌یاند.}

^{فه‌یله‌قی “سابرین” سه‌ربه‌ هێزه‌كانی وشكانی سوپای پاسدارانه‌، له‌سه‌ره‌تای ساڵانی دوو هه‌زاردا دروستكراوه‌، به‌ئامانجی له‌ناوبردنی هێزه كوردییه‌كانی ڕۆژهه‌ڵاتی كوردستان. به‌ڵام دواجار ئه‌ركی كرده‌یی به‌و فه‌یله‌قه‌ سپێردرا له‌ ناوچه‌كانی باشوری ڕۆژهه‌ڵاتی ئێران كه‌ هاوسێی پاكستانه‌.چونكه‌ له‌و ناوچانه‌شدا بلوچه‌كان چه‌ند جموجوڵێك چه‌كدارییان هه‌یه‌.}

^{له‌دوای ئه‌وه‌ی داعش ناوچه‌یه‌كی فراوانی عێراقی داگیركرد، فه‌یله‌قی “سابرین” هاته‌ عێراق و له‌ژێر فه‌رمانده‌یی”قاسم سلێمانی” كاری ده‌كرد.}

^{به‌گوێره‌ی زانیارییه‌كان، ئێران به‌م دواییانه‌ به‌شێك له‌و هێزانه‌ی فه‌یله‌قی “سابرین”ی نارد بۆ سوریا.}

^{ئه‌ركی سه‌ره‌كی ئه‌و فه‌یله‌قه‌ ئه‌وه‌یه‌ له‌ناوچه‌ هه‌ڵدێره‌كان و شاخه‌ سه‌خته‌كاندا شه‌ڕ بكات، به‌یه‌كێك له‌گرووپی ده‌سته‌بژێره‌كانی سوپای پاسداران داده‌نرێت.}

^{هه‌ر ئه‌مڕۆ سایتی كه‌ناڵی” خه‌به‌ر”ی ئێرانی، كوژرانی یه‌كێكی تر له‌سه‌ركرده‌كانی سوپای پاسدارانی ڕاگه‌یاند كه‌بریتی بوو له‌” حه‌مید موختار به‌ند” ناسراو به‌” ئه‌بو زه‌هرا”. ئه‌میش فه‌رمانده‌یه‌كی تری سوپای پاسدارانه‌وه‌، خه‌ڵكی ناوچه‌ی “ئه‌هواز”ی عه‌ره‌ب نشینی ئێرانه. یه‌كێكه‌ له‌ جه‌نگاوه‌ره‌كانی شه‌ڕی عێراق- ئێران.}

^{سه‌رچاوه‌ ئێرانییه‌كان به‌وردی ئه‌و شوێنه‌یان ده‌ست نیشان نه‌كردووه‌ كه‌ ئه‌و دوو فه‌رمانده‌یه‌ تیایدا كوژراون.به‌ڵام ئه‌وه‌ی ڕاگه‌یاندووه‌ كه‌ دووشه‌ممه‌ 12/10/2015 كوژراون.}

^{ئه‌م هه‌واڵانه‌ ته‌نها چه‌ند ڕۆژێك له‌دوای كوژرانی “حسێن هه‌مه‌دانی” گه‌وره‌ فه‌رمانده‌ی سوپای پاسداران دێن، ئه‌و فه‌رمانده‌یه‌ی كه‌به‌كه‌سێكی نزیك له‌ “حه‌سه‌ن ڕۆحانی” سه‌رۆككۆماری ئێران ده‌ژمێردراو، تاكو ئێستاش هۆكاری كوژرانه‌كه‌ی ڕانه‌گه‌یه‌نراوه‌.}

^{ئاشكرایه‌ ده‌یان كه‌س له‌چه‌كدارو جه‌نگاوه‌ره‌كانی به‌سیج و پاسداران له‌سه‌ره‌تای قه‌یرانی سوریاوه‌ تاكو ئێستا كوژراون. به‌ڵام ماوه‌یه‌كه‌ كوژرانی فه‌رمانده‌ باڵاكانی پاسداران له‌سوریادا زۆر به‌ڕوونی زیادی كردووه‌.}

^{به‌م دواییانه‌ش سه‌دان چه‌كداری پاسداران بۆ به‌شداری كردن له‌ هێرشی فراوان بۆسه‌ر ئۆپۆزسیۆنی سوریا گه‌یشتنه‌ ئه‌و وڵاته‌.}

^{به‌گوته‌ی سه‌رچاوه‌یه‌كی ئاگادار: ” به‌كرده‌وه‌ هێزه‌كانی ئێران گه‌یشتوونه‌ته‌ سوریا. پێكهاتوون له‌سه‌رباز و ئه‌فسه‌ر و فه‌رمانده‌، ته‌نها ڕاوێژكارنین. به‌چه‌ك و تفاقی ته‌واوه‌وه‌ هاتوون و، هێزی تریش به‌م زوانه‌ ده‌گه‌نه‌ ئه‌و وڵاته‌”.
14/10/2015}

^{کەسوکاری پێشمەرگە بەدیلگیراوەکانی دەستی داعش، لەگردبوونەوەیەکدا ناڕەزایی بەرانبەرڕەوشی کوردستان دەردەبڕن و پێیان وایە دەبێت سەرۆک بارزانی لەگەڵ لایەنەکان بێتە سەرخەت.}

^{لەگردبوونەوەیەکدا لەکەرکووک ئەمرۆ (13102015)، بنەماڵەی پێشمەرگە بەدیلگیراوەکانی لای داعش داوادەکەن، ئارامی کوردستان بپارێزرێت، بۆ ئەوەی هەرێمی کوردستان تووشی قەیرانێکی دیکە نەبێت و داوادەکەن لایەنەکان بگەنە ئەنجامی کۆتایی هاوکات، دەشلێن: “داوا لە سەرۆک بارزانی دەکەن کە هەوڵ بدات ئەو دۆخەی هەیە لەگەڵ لایەنەکان چارەسەری بکات، چونکە بارزانی سەرۆکمانە دەبێت بە خەممانەوە بێت”.
داواش دەکەن ئەو گرفتانەی لە شارەکانی دیکەوە هەیە نەهێنرێتە کەرکووک و باری دەروونی خەڵک تێک نەدرێت.
بەهۆی دواکەوتنی مووچەکانیانەوە ماوەی چەند ڕۆژیکە شەپۆلێکی نارەزای دروست بووە دواجار نارەزاییەکان گرژی لێکەوتەوە و بارەگاکانی پارتی لە سلێمانی کرانە ئامانج.
13/10/2015}

^{بارزانی دووپات كردەوە كە ئەگەر هەماهەنگی و كاری هاوبەشی ڕووسیا و وڵاتانی هاوپەیمان لە لێدانی تیرۆریستانی داعش هەبێت و لە هەمانكاتیشدا چارەسەری سیاسی بۆ ئاییندەی سووریا لەبەرچاو بگیرێت ئەوە ئەنجامی باشتری لێدەكەوێتەوە. باڵیۆزی نوێی سوید لەبارەی بارودۆخی ناوخۆی هەرێمی كوردستان و گرژییەكانی ئەم دواییەی پارێزگای سلێمانی داوای كرد، گرژییەكان گەشە نەكات بۆ ئەوەی كاریگەری لەسەر شەڕی دژی تیرۆریستانی داعش نەبێت.}

^{بەپێی راگەیاندراوێکی سەرۆکایەتی هەرێمی کوردستان، ڕۆژی سێشەممە 13ـی 10ـی 2015 لە سەلاحەدین مەسعود بارزانی سەرۆكی هەرێمی كوردستان پێشوازی لە خاتوو ئانیكا مولین لە عێراقی فیدڕاڵ كرد.}

^{لە دیدارەكەدا باڵیۆزی نوێی سوید لە عێراق خۆشحاڵیی خۆی نیشاندا بۆ ئەو پەیوەندی و دیالۆگە نموونەییەی كە لەنێوان وڵاتەكەی و هەرێمی كوردستاندا هەیە و تۆڕێكی مێژوویی و مرۆڤی بەیەكەوەیان دەبەستێتەوە. وێڕای ئاماژەدان بە هاوكارییە سەربازییەكانی سوید بۆ هێزی پێشمەرگە جەختی لەوە كردەوە كە سوید بە بایەخەوە سەیری خۆڕاگری و قوربانیدانی پێشمەرگە لە بەرانبەر تیرۆریستان دەكات و لە ساتەوەختە مێژووییەكاندا لەگەڵ گەلی كوردستان دەبێت. باڵیۆزی سوید لە عێراق باسی شەڕی تیرۆریستان و هەڕەشەكانی تیرۆریستان بۆ سەر ئاساییشی ناوچەكەی كرد و بۆچوونی وڵاتەكەی لەبارەی دوا گۆڕانكارییە سیاسییەكانی ناوچەكە بە تایبەتی دەستێوەردانی سەربازی ڕووسیا لە سووریا خستەڕوو و هیوایشی خواست وڵاتەكەی بتوانێ ڕۆڵی هەبێ لە چارەكردنی كێشەكانی پێكهاتەكانی عێراق لە دوای شكستدانی تیرۆریستان.}

^{لەبەرانبەردا سەرۆك بارزانی سوپاسی باڵیۆزی تازەی سویدی كرد و هیوای سەركەوتنی لە ئەرك و كارەكانی بۆ خواست و وێڕای ئاماژەدان بە پەیوەندیی مێژوویی نێوان گەلی كوردستان و گەلی سوید پێزانینیشی بۆ گەل و حكوومەتی سوید هەبوو كە لە ڕۆژانی تەنگانەدا پاڵپشتی كوردستانی كردووە و هەزاران هاووڵاتیی كوردی وەخۆ گرتووە. هەروەها سوپاسی هاوكارییە سەربازییەكانی سویدی كرد كە پێشكەشی هێزی پێشمەرگە كراوە.}

^{لە درێژەی قسەكانیدا سەرۆك بارزانی باسی لە هۆكارەكانی سەرهەڵدان و گەشەی تیرۆر كرد لە ناوچەكە و باسی لە بارودۆخی مەیدانیی بەرەكانی شەڕ و هەروەها قۆناغی دوای ئازادكردنی موسڵ كرد و ئاماژەی بە باری دیموگرافی و فرەیی پارێزگای نەینەوا دا و جەختی لەوە كردەوە كە پێویستە گەرەنتی و ڕێوشوێنی ئیداری و سیاسی وا بگیرێتە بەر كە دڵنیایی تەواو بدرێتە پێكهاتەكان كە كارەساتەكان دووبارە نەبنەوە. سەرۆك بارزانی هێمای بە دۆخی ئاڵۆزی سووریایش دا و ئەوەی دووپات كردەوە كە ئەگەر هەماهەنگی و كاری هاوبەشی ڕووسیا و وڵاتانی هاوپەیمان لە لێدانی تیرۆریستانی داعش هەبێت و لە هەمانكاتیشدا چارەسەری سیاسی بۆ ئاییندەی سووریا لەبەرچاو بگیرێت ئەوە ئەنجامی باشتری لێدەكەوێتەوە.}

^{بارودۆخی ناوخۆی هەرێمی كوردستان و گرژییەكانی ئەم دواییەی پارێزگای سلێمانی تەوەرێكی دیكەی كۆبوونەوەكە بوو. پەیوەست بەم بابەتەوە باڵیۆزی نوێی سوید داوای كرد گرژییەكان گەشە نەكات بۆ ئەوەی كاریگەری لەسەر شەڕی دژی تیرۆریستانی داعش نەبێت.
13/10/2015}