<sup>سیاسەتمەداری گەلی کوردستان باس لە گرنگیی پرۆتۆکۆلەکەی نێوان هەولێر و واشنتۆن دەکات و ڕای دەگەیەنێت: "کورد گەرەنتی لە ئەمەریکا وەرگرت".

د.مەحمود عوسمان، سیاسەتمەداری کورد و ئەندامی خولی پێشووی پەرلەمانی عێراق، بە (باسنیوز)ی ڕاگەیاند: “پرۆتۆکۆلەکەی دوێنێ سێشەممە 12\7\2016ی نێوان هەولێر و واشنتۆن، گرنگە، چونکە سەربازییە کە لەم کاتەدا شەڕی داعش هەیە و هێزی پێشمەرگەی کوردستان لەبەرەکانی جەنگ دان، لەهەمان کاتدا پێشمەرگە بە سانایی بەشداری لە ئازادکردنەوەی مووسڵدا ناکات، واتە بەبێ بەرنامە ناچێتە ناو شاری مووسڵەوە، بۆیە ئەمەریکا خراوەتە بەردەم رێککەوتنێکەوە کە هاوکاریی هێزی پێشمەرگەی کوردستان بکات، بۆ ئەوەی بەشدار بێت لە شەڕی مووسڵ”.

ئەوەشی ڕوون کردەوە، ئەم لێکتێگەیشتنە سەرەتایە و لەوە دەچێت لە داهاتوو شتی دیکەی بەدواوە بێت. گوتیشی: “تموحمان هەیە کە ئەو ڕێککەوتنانە لە داهاتوودا بکرێنە ڕێککەوتنی سیاسی کە ئەوە گرنگە و پۆزەتیف و ئەرێنییە". دووپاتیشی کردەوە، خودی ڕێککەوتنەکە گرنگە، چونکە واژووکردنی ڕێککەوتن لەگەڵ ئەمەریکا، قۆناغێکی نوێیە.

مەحمود عوسمان لە لێدوانەکەیدا بۆ (باسنیوز) باسیشی لەوە کرد: “لەناو لێکتێگەیشتنەکەدا باسی چەک و پارە و بودجە کراوە، ئەمەش زۆر گرنگە بۆ قۆناغی ئازادکردنەوەی مووسڵ، چونکە بمانەوێت و نەمانەوێت، هەر دەبێت بەشداریی ئەو شەڕە بکەین، بۆیە ئەوە دوو ساڵە هەوڵی ئەو ڕێککەوتنە دەدرێت، ئێستاش کە کراوە، زۆر گرنگە بۆ ئەم قۆناغە و گەرەنتییە”.</sup>

^13/7/2016

<sup>وەزارەتی بەرگریی ئەمەریکا ڕای گەیاند، بە مەبەستی تاوتوێکردنی هەڵمەتی سەربازی دژی داعش، 20ی ئەم مانگە، وەزیری بەرگریی ئەمەریکا، بە بەشداریی بەرپرسە باڵاکانی 34 وڵات، سەرۆکایەتیی کۆنفرانسێکی بەرفراوانی هاوپەیمانی دژە داعش دەکات، بەڵام ڕووسیا بانگهێشت نەکراوە.

بە گوێرەی زانیارییەکانی کاناڵی (سکای نیوزی عەرەبی)، ئەمڕۆ چوارشەممە (13,7,2016)، پێنتاگۆن بەیاننامەیەکی بڵاو کردووەتەوە؛ تێیدا هاتووە؛ 34 وڵات لەگەڵ هاوپەیمانی ناتۆ بانگهێشت کراون، بۆ ئەوەی 20ی ئەم مانگە لە دووەمین کۆنفرانسی دژ بە داعش بە شێوەیەکی بەرفراوان و لە ئاستی وەزیرانی بەرگریدا چۆنیەتیی بەرەنگاربوونەوەی داعش تاوتوێ بکەن.

پێنتاگۆن ڕای گەیاندووە؛ ئەو دانیشتنە لە بنکەی سەربازیی مریلەند لە نزیک واشنتۆن، پایتەختی ئەمەریکا بەڕێوە دەچێت.

بە سەرنجدان بە سەردانەکی ئاشتن کارتەر، وەزیری بەرگریی ئەمەریکا بۆ بەغدا ئەو کۆنفرانسە لە کاتێکی گرنگدا بۆ بەرەوڕوو بوونەوەی داعش بەڕێوە دەچێت، چونکە لەو سەردانەیدا، وەزیری بەرگریی ئەمەریکا پاڵپشتی خۆی بۆ عێراق و هەرێمی کوردستان دووپات کردەوە.

ئەوە لە کاتێک دایە کە هەر دوێنێ ئێلیزا سلۆتکین، یاریدەدەری وەزیری بەرگریی ویلایەتە یەکگرتووەکانی ئەمەریکا لە سەڵاحەدین لەلایەن سەرۆکی هەرێمی کوردستانەوە پێشوازیی لێکرا و لەو دانیشتنەدا یاریدەدەری وەزیری بەرگریی ئەمەریکا ستایشی هێزی پێشمەرگەی کرد و ڕایگەیاند؛ ویلایەتە یەکگرتووەکانی ئەمەریکا بەچاوی ڕێزەوە سەیری پێشمەرگە دەکات و وەک هێزێکی شەڕکەری کاریگەر دەیناسێت کە ڕۆڵی زۆر گرینگی بینیوە، هەر بۆیە یادداشتی لێکتێگەیشتن لەگەڵ وەزارەتی پێشمەرگە ئیمزا دەکەین.

کارتەر لەو سەردانەیدا بۆ عێراق گوتی؛ ئەمەریکا بەنیازە 560 سەربازی دیکە ڕەوانەی عێراق بکات.</sup>

^13/7/2016

<sup>گوتەبێژی حکومەتی هەرێمی کوردستان پەیامێکی بڵاوکردەوە و، هاوشێوەی دامودەزگاكانی دیكەی عێراق رۆژێک پشووی بەبۆنەی شۆڕشی 14ی تەمموزی ساڵی 1958 راگەیاند، كە رژێمی پاشایەتی لەسەر دەستی عەبدولكەریم قاسم بۆ كۆماری گۆڕدرا.

سەفین دزەیی، گوتەبێژی حکومەت روونیکردەوە، بەپێی یاسای پەرلەمانی كوردستان لەبارەی پشووە فەرمییەكانەوە، رۆژی پێنجشەممە 2016/7/14 لە دامودەزگاكانی حكومەتی هەرێمی كوردستان پشووی فەرمییە.

رۆژی 14ی تەمموزی 1958، كۆمەڵێك ئەفسەری سوپای عێراق بەسەرۆكایەتی عەبدولكەریم قاسم كودەتایەكی سەربازییان لە دژی رژێمی پادشایەتی لە عێراق ئەنجامدا و سیتسەمی حوكمڕانیان بۆ کۆماری گۆڕی، شۆڕشەكە بە 14ی گەلاوێژ ناسراوە و بۆیەكەمجار لە دەستووری نوێدا كورد و عەرەب وەك دوو پێكهاتەی سەرەكی لە عێراق ئاماژەیان پێكرا.</sup>

^13/7/2016

^{دوای ئەوەی مەسعود بارزانی، سەرۆکی ھەرێمی کوردستان لە ماوەی ڕابردوودا ٩٣ دۆسیەی تایبەت بە چاکسازی دایە دەستەی نەزاھە و داواکاری گشتی، بڕیاردەری لیژنەی نەزاھەی پەرلەمانی کوردستان ئاشکرای دەکات، ھەندێک لەو دۆسیانە لە دادگا یەکلایی بوونەتەوە.}

^{ئەنەس دۆسکی، بڕیاردەری لیژنەی نەزاھە لە پەرلەمانی کوردستان تایبەت بە (باس)ی ڕاگەیاند، شتی باش لەو دۆسیانەی چاکسازی کراوە کە لە لایەن سەرۆکی ھەرێمی کوردستان دراونەتە دەستەی نەزاھە، گوتی: "بە شێوەیەکی باش و ھێمنانە دۆسیەکان لە دەستەی نەزاھە کاریان لەسەر دەکرێت و کاری باشیش لەسەر ئەو دۆسیانە کراون".}

^{ڕۆژی ١٠ی شوباتی ٢٠١٦، مەسعود بارزانی، سەرۆکی ھەرێمی کوردستان، چەند بڕیارێکی بۆ ئەنجامدانی چاکسازی دەرکرد، بەپێی بڕیارەکان دەبێت پێداچوونەوە بە ھەیکەلی کارگێڕی و دارایی و ژمێریاریی حکوومەتدا بکرێت و زێدەڕۆییەکان لەسەر موڵکی حکوومەت لابدرێن و پێداچوونەوە بە داھاتەکانی کوردستان بکرێت و کۆمپانیاکانیش ھاوکاریی حکوومەت بکەن.}

^{دۆسکی ئەوەی ئاشکرا کرد، لەو ٩٣ دۆسیە چاکسازییەی بارزانی کە درابوونە دەستەی نەزاھە، ھەندێک دۆسیە لە دادگا یەکلایی بوونەتەوە، گوتیشی: "بە دیاریکراوی نازانم لەو ٩٣ دۆسیەیە چەندیان یەکلایی بوونەتەوە، بەڵام بەدڵنیاییەوە ھەندێک لەو دۆسیانە یەکلایی بوونەتەوە و شتی دڵخۆشکەر ھەیە".}

^{بڕیاردەری لیژنەی نەزاھە لە پەرلەمانی کوردستان دووپاتی کردەوە، ئەوان چاودێریی دۆسیەکان و بڕیارەکانی چاکسازی دەکەن و لەگەڵ لایەنە پێوەندارەکان لە ھاوئاھەنگیدان.}

^{بەرپرسانی دەستەی نەزاھە دووپاتیان کردووەتەوە کە گەندەڵی لە بەھەدەردانی پارە و خواردن و دەوڵەمەندبوون لەسەر موڵکی گشتی وای کردووە لە ساڵانی ڕابردوودا سامانێکی زۆر لە وڵاتدا بەفیڕۆ بچێت و متمانەی نێوان ھاووڵاتی و دەسەڵات لاواز بێت.}

^{حاکم ھیوا، ئەندامی داواکاریی گشتی و ئەندامی دەستەی مافی گشتی بە (باس)ی راگەیاند: “لەو دۆسیانەی چاکسازیی بارزانی ١٠ دۆسیەی جۆراوجۆر بە ئێمە دراون، کە پێوەستن بە دامودەزگاکانی حکوومەت و ناوی کەسە تۆمەتبارەکانیش لەو دۆسیانەدا ھەیە".}

^{حاکم ھیوا ڕوونیشی کردەوە، ئەوان لەسەر ھەر ١٠ دۆسیەکە بەدواداچوونی پێویست دەکەن و پاشان لەگەڵ دادگا کۆ دەبنەوە و بڕیاریان لەبارەوە دەدرێ.}

^{ئەندامەکەی داواکاری گشتی دووپاتی کردەوە، ھیچ رێگرییەک لەبەردەم کارەکانی ئەواندا نییە و کاری خۆیان بەباشی ئەنجام دەدەن و ھاوئاھەنگیی باشیشیان لەگەڵ سەرۆکایەتیی ھەرێمی کوردستاندا ھەیە.}

^{سەبارەت بە یەکلابوونەوەی ھەندێک لە دۆسیەکان لە دادگا، ئەو دەیگوت: "ئەگەر ئەو کەسانەی دادگا بڕیاری لە دژ دەرکردوون ناڕازی بن دەتوانن بڕیاری دادگا تەمیز بکەن، ئەگەر داواکاری گشتیش بە دڵی نەبێت بۆمان ھەیە تەمیزی بکەینەوە".}

^{رۆژی ٩ی ٦ی ٢٠١٦ مەسعود بارزانی، سەرۆکی ھەرێمی کوردستان لە راگەیاندراوێکدا ئاشکرای کرد لەسەر دۆسیەی دەرمان و وەبەرھێنان و نەوت و بانکەکان ڕێوشوێنی پێویست دیاری کراون بۆ چاکسازی و ڕووبەڕووبوونەوەی گەندەڵی لەو سێکتەرە گرنگانە.}

^{بارزانی دڵنیایی دایە خەڵکی کوردستان کە ھیچ کەسێک لەم پڕۆسەیە پارێزبەندیی نییە ‌و ھەموو سێکتەر و دامەزراوەکان دەگرێتەوە و ھیچ بەربەستێکیش نابێت ڕێگر بێت لەبەردەم دامەزراوەکانی وڵات بۆ جێبەجێکردنی بەرنامە و پلانەکانی ڕیفۆرم و ڕووبەڕووبوونەوەی گەندەڵی.}

^{حاکم ھیوا ڕوونی دەکاتەوە، ھەنگاوەکانی چاکسازی باش دەڕۆن: "نییەت و جدییەت و لە ئیشکردندا ھەیە و پەنا بەخوا بەرھەمی دەبێت".}

^12/7/2016

<sup>سەعات 3ی سەرلە بەیانی ئەمڕۆ سێشەممە بە کاتی ئێران، لە شاری سنە لەلایەن چەند چەکدارێکی نەناسراوەوە هیرش کرایە سەر بنکەیەکی پۆلیس و سەربازێک بریندار بووە.

بەپێی هەواڵی مالپەڕی ڕۆژی کورد لە شاری سنە، سەعات 3ی بەرەبەیانی ئەمڕۆ سێشەممە 2016 -7 -12لەلایەن پێنج چەکداری نەناسراوەوە لە گەڕەکی بەهاران هێرش کراوەتە سەر بنکەی ژمارە 1ی پۆلیسی هێزی ئینتزامی ئەو شارە و دەستڕێژیان لێ کردووە و دەگوترێ سەربازێک بریندارە.

کەڵانتەری 14ـی سنە له گەڕەکی بەهاران، نزيك زانكۆی زانستی - کاربوردی سنە، هەڵکەوتووە.

بەپێی زانیارییەکان لەو هێرشەدا سەربازێکی حکوومەت بریندار بووە و ئێستا ئەو بنکەیە لە ئامادەباشی دایە.

دەنگی تەقەکان لە ئاستێکدا بووە کە خەڵکانیکی زۆر لە سنە گوێیان لێ بووە بەڵام رێگە نەدراوە خەڵک لەو شوێنە کۆببنەوە.</sup>

^12/7/2016

^{بەچاودێری و ئامادەبوونی سەرۆکی هەرێمی کوردستان، رۆژی سێشەممە 12-7-2016 لە نێوان هەرێمی کوردستان و ئەمریکا پرۆتۆکۆلێکی سەربازی واژۆدەکرێت، بەپێی پرۆتۆکۆلەکەش ئەمریکا هاوکاریی سەربازی و دارایی پێشکەشی هێزەکانی پێشمەرگە دەکات.}

^{سەنگەر عەبدولڕەحمان، پەیامنێری رووداو لە هەولێر رایگەیاند " بڕیارە رۆژی سێشەممە لە شاری هەولێر پرۆتۆکۆلێکی سەربازیی و سیاسیی فەرمی لە نێوان هەرێمی کوردستان و ئەمریکا واژۆ بکرێت".}

^{پەیامنێری رووداو هەروەها گوتی "وەکو بەرپرسانی حکومەتی هەرێمی کوردستان ئاماژەیان پێداوە، ئەمە یەکەمجارە پرۆتۆکۆلێکی هاوشێوە بەشێوەیەکی فەرمی واژۆ دەکرێت و کاری پێدەکرێت".}

^{لەبارەی ناوەڕۆکی پرۆتۆکۆلەکەش، سەنگەر عەبدولرەحمان گوتی" پرۆتۆکۆلەکە سەربازی و سیاسییە و بە ئامادەبونی مەسعود بارزانی، سەرۆکی هەرێمی کوردستان لە نێوان رۆب وۆرک، جێگری وەزیری بەرگری ئەمریکا و کەریم شنگالی، وەزیری ناوخۆ و پێشمەرگە بەوەکالەت واژۆدەکرێت".}

^{پەیامنێری رووداو ئاماژەی بەوەشکرد، ئەو پرۆرتۆکۆلە لە نێوان هەرێمی کوردستان و ئەمریکا تاوەکو تەواوبوونی شەڕی داعش کاری پێدەکرێت، بەپێی پرۆتۆکۆلەکەش ئەمریکا هاوکاری سیاسی و سەربازی و دارایی هێزەکانی پێشمەرگە دەکات لەشەڕی دژی داعش.}

^{بەپێی راگەیاندنی سەرۆکایەتیی هەرێمی کوردستان رۆژی دووشەممە 11-7-2016 "ئاشتن کارتەر، وەزیری بەرگری ئەمریكا و مەسعود بارزانی، سەرۆکی هەرێمی کوردستان پەیوەندییەکی تەلەفۆنییان ئەنجامداوە، کارتەر جەختی لە بەردەوامیی و پابەندبوونی وڵاتەكەی بۆ هاوكاریكردنی هێزی پێشمەرگەی كوردستان دەربڕیوە و خۆشحاڵیی خۆیشی لە هەماهەنگی و هاوكاریی نێوان هێزی پێشمەرگە و هێزەكانی عێراق نیشانداوە".}

^12/7/2016

<sup>گوتەبێژی وەزارەتی دەرەوەی کۆماری ئیسلامیی ئێران وێڕای ڕەخنەگرتن لە بەیاننامەیەکی ناتۆ لەبارەی بەرنامەی مووشەکیی ئێران، ئەو زانیارییانەی بە دووپاتکردنەوە و بێ بنەما وەسف کرد.

بەپێی ڕاپۆرتی ئاژانسی ئیرنا، بەهرام قاسمی، گوتەبێژی وەزارەتی دەرەوەی ئێران جەختی کردووەتەوە "توانایی مووشەکیی ئێران، تەنیا لەڕاستای بەرنامەی ڕەوای بەرگریی ئێران دایە و بە گوتەی ئەو "بە هیچ شێوەیەک بۆ هەڵگرتنی کڵاوی ناوکی نییە."

ئاماژەی بەوەش داوە "بەرنامەی مووشەکیی ئێران، هیچ پەیوەندییەکی بە بەرجامەوە نییە و وەک پێشێلکاری بڕیارنامەی 2231 نایەتە ئەژمار.

لە بەیاننامەی کۆتایی دانیشتنی بەرپرسانی وڵاتانی ئەندامی "پەیمانی ئاتلانتیکی باکوور" (ناتۆ)دا، سەرەڕای ڕاگەیاندنی بە کردەئیی کردنی قەڵغانی مووشەکیی لە ڕۆژهەڵاتی ئەورووپا، جەخت کراوەتەوە کە ئەم سەکۆ مووشەکییە، لەدژی ڕووسیا نییە، بەڵکوو لە بەرانبەر مووشەکە بالستیکەکانی ئێراندا دانراوە."

ئەنجێلا مێرکێل، ڕاوێژکاری باڵای ئەڵمانیاش لە ڕۆژانی ڕابردوودا ڕایگەیاند "تاقیکردنەوە مووشەکییەکانی ئێران لەگەڵ ڕێکەووتننامەی ئەنجومەنی ئاسایش ناتەبایە و دژی ڕێککەوتنی ناوکیی وڵاتانی پێنج کۆ یەکە لەگەڵ ئێران.</sup>

^11/7/2016

<sup>حزبی دیموكراتی كوردستانی ئێران لە یادی تیرۆركردنی د. عەبدولرەحمان قاسملوو رابەری پێشووتری ئەو حزبە و بەمەبەستی ڕاگرتنی دەستدرێژییەكانی كۆماری ئیسلامی ئێران بۆ سەر هاووڵاتیانی سڤیلی كورد لە كوردستانی ڕۆژهەڵات، داوا دەكات سبەی 22 پووشپەر مانگرتنی سەرتاسەریی كوردانی ڕۆژهەڵاتی كوردستان بەڕێوە بچێت.

ئەمڕۆ دووشەممە 11/7 لە شاری هەولێر و لە مەكتەبی پەیوەندییەكانیانی حدکا لە هەولێر، تەیمور مستەفایی، ئەندامی مەکتەبی سیاسیی حدکا لە پرێس کۆنفرانسێکدا گوتی: "لە یادی 27 ساڵەی تیرۆركردنی د. عەبدولڕەحمان قاسملوو پەیامی شار و شاخمان هەیە و دەمانەوێت هەوڵێكی مەدەنی بدەین بۆ ڕاگرتنی دەستدرێژییەكانی كۆماری ئیسلامی بۆ سەر كوردستان، بۆیە داوا دەكەین كە هاووڵاتیان سبەی لە ماڵەكانی خۆیان دەرنەچن و دووكان و بازاڕەكانیان نەكەنەوە و گوندنشینەكانیش نەچنە شار و هەموو چالاكییەكانی ئەو ڕۆژەیان ڕابگرن، ئەوە وەك چالاكییەكی مەدەنی، لە ڕابردووشدا چالاكییەكانی شاخمان بینیوە و ئێستاش خەڵكی كوردستان دەیانەوێت وەڵامی سیاسەتی كۆماری ئیسلامی بدەنەوە".

هەروەها گوتیشی: "ئێمە داوامان كردووە كە هەموو چالاكییەكانی شار و دێهاتەكان رابگیرێن و پێمان باشە كوردستانیان وەڵامی بانگەوازی ئێمە (حزبی دیموكراتی كوردستانی ئێران) بدەنەوە تاكوو سنوورێك بۆ دەستدرێژییەكانی كۆماری ئیسلامی دابنرێت و هەر كاتێكیش چالاكییەكان ئەنجام بدرێت، لەدژی كۆماری ئیسلامی ئەو ڕژێمە ناتوانێت هیچ بكات، هەروەك لە ماوەی ڕابردوودا كراوە."

لەبارەی رەوشی ئەمنیی ناوچەی كوردستانی ڕۆژهەڵات لە ئێراندا مستەفایی گوتی: نزیكەی 200 هەزار سەربازی ئەمنییەتی لە ناوچەكانی كوردستان مۆڵ دراون بۆ دابینكردنی ئەمنییەت، بەڵام ناتوانێت هیچ بكات، چونكە ئەمنیەتی رۆژهەڵات بە هێزی چەكداری ناكرێت، بەڵكوو بە ئاشتی و ڕێككەوتن و گفتگۆ و گوێگرتن لە یەكتری دەكرێت."

لە وەڵامی پرسیاری پەیامنێراندا ئەو ئەندامەی مەکتەبی سیاسی حزبی دیموكرات ئاماژەی بۆ ئەوە كرد كەلە ماوەی رابردوودا هێزە ئەمنییەكانی كۆماری ئیسلامی هەڵمەتی دەستگیركردنی هاووڵاتیانی دەست پێكردووە و تاكوو ئێستا 50 كەس زیاتر دەستگیر كراون، بەڵام دیار نییە كە ئێمە ئەندامەكانمان دەستگیر كراون، یان نا."

لە كۆتایی قسەكانیدا مستەفایی باسی ئەوەی كرد كە لە ساڵی 1979وە تا ئێستا لە ئەنجامی ڕووبەڕوو بوونەوەی سیاسەتی كۆماری ئیسلامیی ئێران 5 هەزار پێشمەرگەمان شەهید بووونە و 23 هەزار پاسداریش كوژراون و 17 هەزار چالاكیمان نواندووە.</sup>

^11/7/2016

^{لە باکووری کوردستان شەڕ و پێکدادانی نێوان پەكەكە و سوپای توركیا فراوان بووە و لە چەند ناوچەیەك بەیەكەوە شەڕە، لە هەندێك ناوچەش پێكدادان زیادیكردووە، بەهۆی پێكدادانەكانی ئەمدواییە 5 سەربازی سوپای تورکیا لە شەمزینان کوژراون، لە پارێزگاكانی مێردین و رووهاش چەند پۆلیسێک کوژراون و برینداربوونە.}

^{ماشەڵڵا دەکاک، پەیامنێری رووداو لە ئامەد رایگەیاند، لەماوەی چەند رۆژی رابردوودا شەڕ و پێکدادان لە چەند شوێنێکی باکووری کوردستان روویداوە، لە سنووری پارێزگای جۆڵەمێرگیش شەڕ و پێکدادان زیادیکردووە.}

^{پەیامنێری رووداو گوتیشی "دەستپێکردنەوە و زیادبوونی شەڕ و پێکدادان لە باکووری کوردستان دوای ئەوەهات، لە ناوچەی شەمزینان ‌هێرشکرایە سەر سوپای تورکیا و 5 سەرباز کوژران، دوای ئەو هێرشانە شەڕ و پێکدادانەکان بە فراوانی دەستیانپێکردەوە".}

^{ماشەڵڵا دەکاک ئاماژەی بەوەش کرد، لە شەمزینان گەریلاکانی پەکەکە لە دوو لاوە هێرشیان کردووەتە سەر ئاسایش و سوپای تورکیا، هەروەها لە سنووری مێردین شەڕ و پێکدادان هەبووە و کوژراو و برینداری لێکەوتووەتەوە، بەهۆیەوە ژمارەیەک پۆلیس کوژراون و برینداربوونە.}

^11/7/2016

^{هەمزە بن لادن، کوڕی رابەری پێشووی رێکخراوی قاعیدە هەڕەشەی تۆڵەسەندنەوەی خوێنی باوکی دەکات.}

^{لە تۆمارێكی دەنگیدا کە 21 خولەک دەبێت، هەمزە بن لادن هەڕەشە لە ئەمریکا دەکات و دەڵێت: " هەموومان ئوسامەین، پێوستە رێکخراوی قاعیدە بەردەوامبێت لە هێرشکردنە سەر ئەمریکا و هاوپەیمانەکانی".}

^{هەمزە بن لادن ئاماژە بەوە دەکات، تۆڵەسەندنەوەی لە ئەمریکا واتایەکی کەسی نییە، بەڵکو بەرگریکردنە لە "پیرۆزییەکان ئیسلام".}

^{ئەو کوڕەی بن لادن جەختدەكاتەوە، ئەو لەسەر رێچکەی باوکی دەڕوات و ئاواتەکانی لە نێوخۆی وڵات بەدیدێنێت، بەگوتەی خۆی، رووبەڕووی ئەو ستەمانە دەبێتەوە کە لە فەڵەستین، عێراق و سۆماڵ و وڵاتانی دیکە ئەنجامدەدرێن.}

^{لە مانگی ئایاری 2011، هێزێکی تایبەتی ئەمریکا لە نێوجەرگەی پاکستان ئوسامە بن لادن، رابەری رێکخراوی قاعیدەیان کوشت، دواتر ئەیمەن زەواهیری شوێنی بن لادنی گرتەوە. لە ساڵی 2015 ئەیمەن زەواهیری لە تۆمارێکی دەنگیدا هەمزەی کوڕی ئوسامە بن لادنی ناساند.}

^{هەمزە کەمترین زانیاری لەسەر کۆکراوەتەوە، بەڵام دەزگای هەواڵگریی ئەمریکا ئاماژە بەوە دەکات، هەمزە تەمەنی زۆرتر لە 25 ساڵ دەبێت و لە نەوەدەکانی سەدەی رابردوودا لەگەڵ باوکی بووە لە ئەفغانستان، لەدوای هێرشی ئەمریکا بۆ سەر ئەفغانستان هەمزە رووی لە ئێران کردووە و لەژێر چاودێری تووندی دەزگای هەواڵگریی ئێراندا بووە.}

^11/7/2016