^{وەزارەتی بەرگریی ئەمریکا رایگەیاند، ئەو چەکە ئەمریكیانەی لە ئەفغانستان کەوتوونە دەست داعش، لە ئەنجامی هێرشێکی ئەو گرووپە بووە بۆ سەر هێزێکی ئەمریکی.}

^{دوای بڵاوبوونەوەی چەند وێنەیەک لە تۆڕە کۆمەڵایەتییەکاندا، کە داعش لە ئەفغانستان چەکی ئەمریکی بەکاردەهێنن، وەزارەتی بەرگریی ئەمریکا (پێنتاگۆن) رایگەیاند، ئەو چەکانە کەوتوونە دەست داعش لە ئەنجامی هێرشێکی ئەو گرووپە بووە بۆ سەر هێزێکی ئەمریکی.}

^{جەنەراڵ چارلس کلێڤلاند، گوتەبێژی هێزەکانی هاوپەیمانیی نێودەوڵەتی بە سەرۆکایەتی ئەمریکا بۆ شەڕی دژ بە داعش، رایگەیاند، هێزەکانی ئەمریکا لە رۆژی 25ی تەمموزی ئەمساڵ لە رۆژهەڵاتی ئەفغانستان بە چڕی کەوتوونەتە بەر هێرشی چەکدارانی داعش.}

^{کلێڤلان گوتیشی "داعش بە رۆکێت هێرشیان کردووەتە سەر ئەو هێزە ئەمریکییە و هێزەکەیان ناچاربوونە بەشێک لە چەک و کەلوپەلی سەربازیان بەجێبهێڵن، کە دواتر کەوتوونەتە دەستی داعش".}

^{جەنەراڵ کلێڤلاند راشیگەیاند، هەر لەو هێرشەدا چەند سەربازێکیش برینداربوونە.}

^{لە دوو ساڵی رابردوودا هێزەکانی ئەمریکا و ناتۆ هاوشانی سوپای ئەفغانستان لە شەڕدابوون، ئەو هێرشەی داعش بۆ سەر هێزەکانی ئەمریکا لە ناوچەی نەنگەهاری ئەفغانستان روویداوە، کە داعش ماوەی دوو ساڵە لەو ناوچەیەدا بڵاوبووەتەوە و چالاکی ئەنجامدەدات.}

^10/8/2016

<sup>لەمیانەی کۆبوونەوەیەکی سێ قۆڵیدا لە قەندیل، سەرکردایەتیی PKK پێشنیازی ئەوەی بۆ یەکێتی و گۆڕان کردووە، ئەنجومەنێکی ھاوبەشی سەربازی و سیاسی لەنێوان ھەرسێ لایەن پێک بھێندرێت.

سەرچاوەیەکی ئاگادار بە (باس)ی راگەیاند، لە کۆتایی مانگی تەمووزی رابردوودا، شاندێکی ھاوبەشی یەکێتی و گۆڕان بە سەرکردایەتیی حاکم قادر حەمەجان، ئەندامی دەستەی کارگێڕیی مەکتەبی سیاسیی یەکێتی و د. ئیسماعیل، بەرپرسی ژووری توێژینەوەی یاسایی بزووتنەوەی گۆڕان، سەردانی قەندیلیان کردووە و لەگەڵ بەرپرسانی پەکەکە کۆ بوونەتەوە و باسی ھاوئاھەنگی و بەرەوپێشبردنی پێوەندییەکانی نێوانیان کردووە.

بەپێی زانیارییەکان، سەرکردایەتیی پەکەکە لەو کۆبوونەوەیەدا پێشنیازی دامەزراندنی ئەنجومەنێکی ھاوبەشی سەربازی و سیاسییان کردووە، کە لەنێوان گۆڕان و یەکێتی و پەکەکەدا بێت.

ئەو ھەوڵە لە کاتێکدایە کەوا ماوەیەکە رێکخستنەکانی پەکەکە لە ناوچەکانی سلێمانی و رانیە و پشدەر چالاکییەکانیان فراوانتر کردووە و بە جۆرێک کار دەکەن، چەندین منداڵ و مێردمنداڵیان لە ناوچەکە بردووە بۆ کاری چەکداری و ھەروەھا لە ھەندێ خاڵی سنووری گومرگ وەردەگرن، جیا لەوەی ھەندێ کێشەشەیان بۆ پێشمەرگەکانی حزبی دیموکراتی کوردستانی ئێران دروست کردووە.

بەپێی سەرچاوە میدیاییەکان، ھەروەکو پێشووتریش (باس) بڵاوی کردووەتەوە، حکوومەتی تورکیا چەند جارێک ھۆشداریی داوە بە یەکێتی، کە وا پێوەندییەکانی یەکێتی و پەکەکە بۆ دژایەتیی تورکیا نەبێت، ھەرچەند ھەندێ لە بەرپرسانی یەکێتی ئەمەیان رەت کردەوە.

پێوەند بەم زانیارییانە، محەمەد عەبدوڵا، ھاوسەرۆکی تەڤگەری ئازادیی کۆمەڵگای کوردستان، کە باڵێکی پەکەکەیە و لە سلێمانی چالاکە، بە (باس)ی راگەیاند، پەکەکە خۆشحاڵە بە نزیکبوونەوە و رێککەوتنی گۆڕان و یەکێتی، گوتی: "یەکێتی و پەکەکە ھێزی سەربازیی جیاوازیان ھەیە و نزیکایەتییان ھەیە و دەکرێت ئەنجومەنی سەربازیی ھاوبەش لەنێوانیاندا ھەبێت و سەرکردایەتیی پەکەکەش زۆر خۆشحاڵە بە رێککەوتنەکەی گۆڕان و یەکێتی".

ئەو ئاماژەی بەوەش دا، ئەوان پێیان باشە ئەنجومەنی سیاسی و سەربازی لەنێوان یەکێتی و گۆڕان و پەکەکەدا ھەبێت، گوتیشی: "ئەوەی بە ئێمە بکرێت بۆ یەکخستنی نێوماڵی کورد و بەدیھێنانی ئەو ئەنجومەنە ھاوبەشە، دەیکەین".

ھاوسەرۆکی تەڤگەری ئازادی جەختی کردەوە، بە پێویستی دەزانن چۆن یەکێتی و گۆڕان رێککەوتنیان کردووە، ھەردوولا بتوانن رێککەوتنی ھاوبەش لەگەڵ پەکەکە ئەنجام بدەن.

گوتیشی: "بۆ کورد گرنگە سەرکردایەتیی ھاوبەش لەنێوان یەکێتی و گۆڕان و پەکەکە دابمەزرێت، بە تایبەت لە رووی سەربازییەوە.

پێشتر چەند جارێک و لە چەند بۆنەیەکدا، بەرپرسانی وەزارەتی پێشمەرگە رایان گەیاندووە، تەنیا ھێزی پێشمەرگە ھێزی سەربازیی کوردستانە و تاکە ھێزی دانپێداندراوە و ھێزەکانی دەرەوەی وەزارەتی پێشمەرگە نایاسایین.

رەھبەری سەید برایم، ئەندامی سەرکردایەتیی یەکێتی ئەوەی خستە ڕوو کە وا ھیچ زانیارییەکی لەبارەی ئەو سەردانە و پێشنیازەکەی سەرکردایەتیی پەکەکە بۆ یەکێتی نییە.

ئەو بەرپرسەی یەکێتی ڕوونی کردەوە، لە قۆناخی ئێستادا بە لای یەکێتی رێکخستنی نێوماڵی کوردستانی و دوورخستنەوەی ململانێکان گرنگیی پێ دەدرێت.

بەڵام عەلی عەونی، ئەندامی سەرکردایەتیی پارتی بە (باس)ی راگەیاند، دژی ھەر ئەنجومەنێکی سەربازیی ھاوبەشین کە دژی ھێزە کوردستانییەکان دروست بکرێت، گوتی: "دامەزراندنی ئەنجومەنێکی ھاوبەشی سەربازی بەرامبەر ھێزە کوردستانییەکان کارێکی زۆر خراپە و دژی دەوەستینەوە“.

ئەو ئەندامەی سەرکردایەتیی پارتی پێیوایە، پاوانخوازیی پەکەکە ھۆکار بووە بۆ پەکخستنی کۆنگرەی نەتەوەیی و کۆکردنەوەی ھێزەکانی کوردستان لە یەک بەرەدا.
ھەروەھا ئەحمەد کانی، بەرپرسی مەکتەبی پەیوەندییەکانی کوردستانی و عێراقیی پارتی، لە چاوپێکەوتنێکی ژمارەکانی پێشووتری (باس) رای گەیاندبوو: ”گۆڕان و PKK خەریکی ئەوەن لە ناوچەی پشدەر و رانیە و قەڵادزێ و گەرمیان شتێک بکەن، پێگەی یەکێتی لەو ناوچانە لاواز بێت“. بەڵام ئەم لێدوانە بەر لە رێککەوتنی سیاسیی نێوان یەکێتی و گۆِران بوو.</sup>

^9/8/2016

^{ئەردۆغان: رووسیا گرنگترین و یەکەمین کاراکتەرە بۆ بەدەستهێنانی ئاشتی لە سووریا}

^{سەرۆککۆماری تورکیا رایدەگەیێنێت دەخوازێت لەگەڵ رووسیا بەرەیەکی نوێ پێکبهێنن بۆ چارەسەرکردنی قەیرانی سووریا و، دەکرێت ئێران، قەتەر و عەرەبستانی سعودیش بهێننە ناو بەرەکەیانەوە.}

^{رەجەب تەییب ئەردۆغان، سەرۆککۆماری تورکیا لە هەڤپەیڤینێکی رۆژنامەڤانیدا ئاماژەی بە پەیوەندییەکانی وڵاتەکەی و رووسیا کرد و رایگەیاند، لە دوای خستنەخوارەوەی فڕۆکەیەکی رووسییەوە لەلایەن تورکیاوە پەیوەندییەکانیان لەگەڵ رووسیا هەربەردەوام بووە، بەڵام بەربەست لەبەردەم ئامانجەکانیاندا دروست بووە.}

^{ئردۆغان گوتی "لەماوەی ئەو 8 مانگەدا، ئەگەرچی زۆر لە پەیوەندییەکانمان بەردەوام بوون، بەڵام وەکو دەزانن لە پەیوەندیمان لەگەڵ رووسیا بەرژەوەندیی 100 ملیار دۆلارمان هەبوو، ئەمەش گرفتی لەبەردەمدا دروست بوو".}

^{ئەردۆغان سەردانەکەی بۆ رووسیا و کۆبوونەوەی لەگەڵ سەرۆکی رووسیا بە هەنگاوێکی ئەرێنی وەسف کرد و گوتی: "ئەم سەردانە، وەک سەرەتای هەڵدانەوەی پەڕەیەکی نوێ لە پەیوەندییەکانمان دەبینم. هەر لە ئێستاوە، بەناوی خۆم و گەلی وڵاتەکەمەوە، سڵاو و رێز دەنێرم بۆ بەڕێز ڤلادیمیر و گەلی رووسیا."}

^{ئەردۆغان بە پێویستیشی زانی لەگەڵ رووسیا بەرەیەکی نوێ پێکبهێنن بۆ چارەسەرکردنی قەیرانی سووریا و گوتی "دەبێت زۆر بە روونی بڵێم کە، رووسیای فیدراڵ گرنگترین و یەکەمین کاراکتەرە بۆ بەدەستهێنانی ئاشتی لە سووریا".}

^{جەختیشی کردەوە لەوەی " دەبێت لەو چوارچێوەیەدا رووسیا و تورکیا بەیەکەوە هەنگاوبنێن بۆ چارەسەری قەیرانی سووریا و، ئەگەر بمانەوێت دەتوانین ئەم بەرە فراوانتریش بکەین، پێشتریش لەگەڵ دۆستی بەڕێزم ڤلادیمێر ئەم بابەتەم باسکرد، ئەگەر پێویست بکات ئێرانیش دێنینە ناو بەرەکەوە، قەتەر و عەرەبستانی سعودیش بەهەمان شێوە".}

^9/8/2016

<sup>به‌ڕێوه‌به‌رى ڕاگه‌یاندنى كاره‌باى سلێمانى ئاشكرای ده‌كات كه‌ بۆ مانگى ته‌مموز پاره‌ى بۆ مۆلیده‌ ئه‌هلییه‌كان بۆ یه‌ك كاتژمێر 42 دینار دیاریكراوه‌.

سیروان محه‌مه‌د، به‌ڕێوه‌به‌رى ڕاگه‌یاندنى كاره‌باى سلێمانى به‌ (باسنیوز)ى ڕاگه‌یاند: "به‌ڕێوه‌به‌رایه‌تى كاره‌باى سلێمانى له‌گه‌ڵ لایه‌نى په‌یوه‌ندیدار پاره‌ى كاره‌باى مانگى ته‌مموزى مۆلیده‌ ئه‌هلییه‌كانیان دیارى كردووه‌".

ئاماژه‌ى بۆ ئه‌وه‌ش كرد بۆ یه‌ك كاتژمێر كاره‌باى مۆلیده‌ى ئه‌هلى بڕى 42 دینار دانراوه‌، واته‌ ئه‌گه‌ر مۆلیده‌یه‌كى ئه‌هلى له‌و مانگه‌دا 100 كاتژمێر كاره‌باى دابێت ئه‌وا بۆ یه‌ك ئه‌مپێر 4 هه‌زار و 200 دینار ده‌كات.

گوتیشى: "پێویسته‌ خاوه‌ن مۆلیده‌ ئه‌هلییه‌كان له‌ كاتژمێر 8ى به‌یانى بۆ 4ى شه‌و هه‌ركات كاره‌با بڕا كاره‌با بده‌نه‌ هاووڵاتیان و پێویستیشه‌ له‌ ماوه‌ى 15 خوله‌ك زیاتر تێنه‌په‌ڕێت به‌سه‌ر بڕانى كاره‌باى نیشتیمانى مۆلیده‌ هه‌ڵبكرێت، به‌ پێچه‌وانه‌ى سزاده‌درێن".</sup>

^8/8/2016

<sup>له‌ باشووری ڕۆژئاوای شاری كه‌ركوك هێزه‌كانی پێشمه‌رگه‌ هێرشێكی چه‌كدارانی ڕێكخراوی تیرۆریستی داعش تێكده‌شكێنن و فه‌رمانده‌یه‌كی پێشمه‌رگه‌ش ده‌ڵێت داعش زیانی زۆری به‌ركه‌وتووه‌.

وه‌ستا ڕه‌سول، یه‌كێك له‌ فه‌رمانده‌كانی پێشمه‌رگه‌ له‌ میحوه‌ری كه‌ركوك بۆ(باسنیوز) گوتی: "ئه‌مشه‌و یه‌كشه‌ممه‌(7-8-2016) هێزه‌كانی پێشمه‌رگه‌ هێرشێكی تیرۆریستانی داعشیان له‌ میحوه‌ری باشووری ڕۆژئاوای كه‌ركوك له‌ نزیك گوندی (یه‌رموك) تێكشكاند و داعش زیانی زۆر به‌ركه‌وت".

گوتیشی: "تیرۆریستانی داعش له‌ سه‌نگه‌ره‌كانی پێشمه‌رگه‌ نزیك بوونه‌ته‌وه‌ و دواتر شه‌ڕی ده‌سته‌ویه‌خه‌ له‌نێوان پێشمه‌رگه‌ و داعش ڕوویداوه‌ و چه‌كدارانی داعش تێكشكاون و زیانی زۆریان به‌ركه‌وت و كوژراو و برینداریان هه‌یه‌".

ناوبراو ئاماژه‌ی بۆ ئه‌وه‌ش كرد كه‌ به‌هۆی نزیكی هێزه‌كانی پێشمه‌رگه‌ و چه‌كدارانی داعش له‌یه‌كه‌وه‌ فڕۆكه‌ جه‌نگییه‌كانی هاوپه‌یمانان به‌شداری شه‌ڕه‌كه‌یان نه‌كردووه‌ و ئێستا چه‌ند ته‌رمێكی چه‌كدارانی داعش له‌ژێر ده‌ستی هێزه‌كانی پێشمه‌رگه‌ن.</sup>

^8/8/2016

^{پارتی دیموکراتی کوردستان پێشنیازێکی نوێ بۆ کاراکردنەوەی پەرلەمانی کوردستان دەخاتە بەردەم لایەنەکان، پێشنیازەکەش گۆڕینی دەستەی سەرۆکایەتی پەرلەمانە بەجۆرێك پارتی، یەکێتی و گۆڕانی تێدانەبن.}

^{ئومێد خۆشناو، سەرۆکی فراکسیۆنی پارتی دیموكراتی كوردستان لە پەرلەمانی کوردستان ئاشکرایدەکات، پارتی سوورە لەسەر ئەوەی جارێکی دیکە د. یوسف محەممەد، نەگەڕێتەوە سەر كورسی سەرۆكی پەرلەمانی كوردستان، بەڵام بۆ ئەوەی پەرلەمان کارابکەنەوە، ئەو پیشنیازە تازە دەخەنە بەردەم لایەنەکان.}

^{ئومێد خۆشناو بۆ رووداو گوتی "پارتی دیموكراتی كوردستان زۆر بەروونی رایگەیاندووە، كە ئەو رێككەوتنەی لە رابردوو هەمانبووە لەگەڵ دابەشكردنی پۆستەكانی سەرۆكایەتی پەرلەمان سەركەوتوو نەبووە، بۆیە دەبێت رێككەوتنی نوێ‌ هەبێت و دەستەیەكی نوێی سەرۆكایەتی پەرلەمان هەڵبژێرین، بەجۆرێك پۆستەكانی دەستەی سەرۆكایەتی پەرلەمان دوور لە پارتی و گۆڕان و یەكێتی بدرێت بە لایەنەكانی دیكە".}

^{بەپێی پێشنیازەكەی پارتی، ئەگەر بزووتنەوەی گۆڕان رازی بێت، ئەوا جێگرێكی نوێ‌ بۆ سەرۆكی حكومەتی هەرێمی كوردستان زیاددەكرێت و دەدرێتە گۆڕان.}

^{پیشنیارەکە لە جانتاکەی د. فوئاد حسێن، سەرۆکی دیوانی سەرۆکایەتی هەرێمی کوردستاندایە، بۆ ئەوەی لە گەڕمی دووەمی دانووستاندنەكانی بیخاتە بەردەم لایەنەکان.}

^{فوئاد حوسێن، کە بە نوێنەرایەتی بارزانی ئێستا لە گەڕی دووەمی سەردانەکانیدایە، رۆژی یەكشەممە 7-8-2016 لەگەڵ ئەمیندای گشتی یەکگرتووی ئیسلامی باسی گۆڕینی دەستەی سەرۆکایەتی پەرلەمانی کردووە، پێشنیازێکیش خراوەتە بەردەم یەکگرتوو بۆ ئەوەی یەکێک لە سێ سەرۆکایەتییەکە وەربگرێت.}

^{سەڵاحەدین بابەكر، ئەندامی سەركردایەتی یەكگرتووی ئیسلامی كوردستان بە رووداوی راگەیاند "هەموو ئەو ئەفكارانە هەن، بەڵام دوای ئەوەی لەگەڵ لایەنەكانی دیكە باسدەكرێت، پێویستە لەچوارچێوەی كۆبوونەوەی هەر پێنج لایەنەكە بڕیاری لەسەر بدرێت و دواتریش وەك یەكگرتوو بە فەرمی وەڵامی ئەو پێشنیازانە دەدەینەوە".}

^{بڕیارە فوئاد حوسێن جارێکی دیکە بچیێتەوە سلێمانی و لەگەڵ نەوشیروان مستەفا و سەرکردەکانی یەکێتی کۆببێتەوە، گۆڕینی دەستەی سەرۆکایەتی پەرلەمانیش لەسەرەوەی ئەو پرسانەیە کە نوێنەرەکەی بارزانی لەگەڵ گۆڕان و یەکێتی باسیدەکات.}

^8/8/2016

^{شاندێکی یەکێتیی نیشتمانیی کوردستان لەگەڵ سەرۆکی هەرێمی کوردستان لە کۆبوونەوەدان و بڕیارە چەند داواکارییەکی پێشکەش بکەن.
بەپێی زانیارییەکانی (باسنیوز)، ئەمڕۆ یەکشەممە (7\8\2016)، شاندێکی یەکێتیی نیشتمانیی کوردستان بە سەرۆکایەتیی جەمیل هەورامی، ئەندامی سەرکردایەتیی ئەو حزبە، سەردانی مەسعود بارزانی، سەرۆکی هەرێمی کوردستانیان کردووە.}

^{لەمبارەیەوە سەرچاوەیەکی بەرپرس لەنێو یەکێتی بە (باسنیوز)ی ڕاگەیاند: “جەمیل هەورامی و چەند بەرپرسێکی سەربازیی یەکێتی، سەردانی بارزانییان کردووە، یەکێک لە داواکارییەکانیان گەیاندنی پەیامی کۆمەڵەی پێشمەرگە دێرینەکانی یەکێتی بووە”.
هاوکات بڕیارە لەبارەی رەوشی پێشمەرگە و بەرەکانی جەنگ، شاندەکەی یەکێتی ڕوونکردنەوە بە بارزانی بدەن و لە دوایین گۆڕانکارییەکان ئاگاداری بکەنەوە.}

^7/8/2016

^{فوئاد حوسێن رای لایەنەکانی لە گەڕی یەکەمی سەردانەکانیدا بردووەتەوە بۆ مەسعود بارزانی، سەرۆکی هەرێمی کوردستان و، ئێستا لە گەڕی دووەمی سەردانەکەیدا بۆ لای لایەنەکان، بۆچوونی بارزانی دەباتەوە و گفتوگۆی لەسەر دەکرێت.}

^{گۆڕینی دەستەی سەرۆکایەتی پەرلەمان وەک یەکەم هەنگاو بو کاراکردنەوەی پەرلەمان پرۆژەی پێشنیازکراوی بارزانییە بۆ لایەنە سیاسییەکان، کە بە نوێنەرەکەی خۆیدا دەیگەیێنێتە کەسی یەکەمی حیزبەکانی باشووری کوردستان.}

^{بەپێی زانیارییەکانی رووداو، پرۆژەکە بریتییە لە: دەستەی سەرۆکایەتی پەرلەمان ئاڵوگۆڕ بکرێت، بەجۆرێك سەرۆکی پەرلەمان بۆ یەکێتی، جێگر و سکرتێر لەنێوان پارتی و یەکگرتوو بێت، پارتی لاری نییە لەسەر ئەوەی جێگری سەرۆکی پەرلەمان وەربگرێت یان سکرتێری پەرلەمان.}

^{بەڵام تاوەکو ئێستا نە یەکێتی و نە یەکگرتوو بەو داواکارییە رازی نەبوون بۆ گۆڕینی دەستەی سەرۆکایەتی پەرلەمان و دەیانەوێت دەستەی سەرۆکایەتی بە رەزامەندی هەر پێنج لایەنەکە ئاڵوگۆڕ بکرێت.}

^{لە کۆبوونەوەی ئەمڕۆ یەکشەممە 7-8-2016 -ی نێوان فوئاد حوسێن و سەڵاحەدین بەهائەدین ئەو پێشنیازە خراوەتە بەردەست یەکگرتوو، وەڵامی یەکگرتوویش ئەوە بووە گۆڕینی دەستەی سەرۆکایەتی پەرلەمان دەبێت بە هەماهەنگی هەموو لایەنەکان بێت و دواتریش لە کۆبوونەوەی ئەنجوومەنی سەرکردایەتی ئەو حیزبە تاووتوێی دەکەن و رای خۆیانی لەسەر دەدەن.}

^{چاوەڕێ دەکرێت لەم هەفتەیەدا، فوئاد حوسێن بگەڕێتەوە بۆ سلێمانی و لەگەڵ نەوشیروان مستەفا کۆببێتەوە، هەروەها کۆبوونەوە لەگەڵ بەرپرسانی یەکێتی لە ئەجێندای سەردانەکەی دەبێت بۆ سلێمانی.}

^7/8/2016

^{شەهرام ئەمیری لەگەڵ كوڕ و هاوژینەكەی}

^{زانایەکی ئەتۆمی كوردی رۆژهەڵاتی کوردستان کە پێشتر لە ئاژانسی وزەی ئەتۆمی ئێران کاریکردووە، لەلایەن حکومەتی ئێرانەوە لەسێدارەدرا.}

^{شەهرام ئەمیری لە مانگی ئایاری ساڵی 2009 لەکاتی سەفەری حەج لە سعودیە بێسەروشوێن بوو و، لە حوزەیرانی ساڵی 2010 خۆی بە نووسینگەی پاراستنی بەرژەوەندییەکانی ئێران لە ئەمریکا ناساند، دواتر گەڕێندرایەوە ئێران.}

^{لەکاتی گەڕانەوەدا ژمارەیەک لە بەرپرسانی ئێران لە فڕۆکەخانە پێشوازییان لێکرد، بەڵام دوای ماوەیەک دەستگیرکرا و دوای 20 مانگ بەندکردن لە دادگا، بە 10 ساڵ بەندکردن و دوورخرانەوە بۆ پارێزگای بەلوچستان سزادرا.}

^{بنەماڵەکەی دەڵێن رۆژی چوارشەممەی رابردوو 3-8-2016، لە شوێنێکی نادیار لەسێدارەدراوە. دایکی شەهرام ئەمیری هەواڵی لەسێدارەدانی پشتڕاست کردووەتەوە و رایگەیاندووە، تەرمەکەی لە کرماشان بەخاک سپێردراوە. دەشڵێت پێش لە سێدارەدانی چاویان پێیکەوتووە.}

^{شەهرام ئەمیری کارناسی فیزیای ئەتۆمی، لەدایکبووی شاری کرماشانی رۆژهەڵاتی کوردستان بوو.
تاوەکو ئێستا دەزگای دادی ئێران لەبارەی ئەو هەواڵە هیچ کاردانەوەیەکی نەبووە.}

^{بڵاوبوونەوەی ئەم هەواڵە لەكاتێكدایە رۆژی سێشەممە 2-8-2016 ، 20 چالاکی سوننە مەزهەب کە هەموویان کورد بوون و سێان لەوەنە خەڵکی باشووری کوردستان بوون، لە زیندانی رەجایی شەهری کەرەج لەسێدارەدران.}

^{شەهرام ئەمیری}

<sup>- زانای ئەتۆمی بوو
- 1978 لە دایکبووە
- خەڵکی کرماشانە
- دانیشتووی ئەسفەهان بووە
- لێکۆڵەربوو لە زانکۆی مالک ئەشتەر
- 2009 لە سعودیە بێسەروشوێن بوو
- ئێران ئەمریکای بە رفاندنی تۆمەتبارکرد
- دوای ساڵێک لە ئەمریکا ڤیدیۆیەکی بڵاوکردەوە
- دواتر چەند پەیامێکی ڤیدیۆیی ناکۆک بەیەکدی بڵاوکردنەوە
- ناوەڕاستی 2010 گەڕایەوە ئێران
- لەکاتی گەڕانەوەدا وەک قارەمانێک پێشوازی لێکرا
- دوای گەڕانەوە بەتۆمەتی سیخوڕی دەستبەسەرکرا
- 2012 حوکمی 10 ساڵ زیندان و 5 ساڵ دوورخستنەوەی بەسەردا سەپێندرا
3- ی ئابی 2016 لە شوێنێکی نادیار لەسێدارە درا</sup>

^7/8/2016