^{بە بەشداریی جێگری سکرتێری گشتیی نەتەوە یەکگرتووەکان، کۆنفرانسی نێودەوڵەتیی بەرەنگار بوونەوەی ماددە هۆشبەرەکان لە تارانی پایتەختی ئێران بەڕێوەچوو. زۆرترین ماددەی هۆشبەری جیهان لە ئەفغانستان بەرهەم دێت و ئێران وەک یەکەم هێڵی پێشگرتن لە بڵاوبوونەوەی ماددە هۆشبەرەکان گرینگییەکی زۆری بۆ رێکخراوە نێودەوڵەتییەکان هەیە.}

^1/3/2017

^{ئەندامێكی ئەنجوومەنی شارەوانی تاران بە تۆمەتی سیخوڕی بۆ ئەمریكا بە 10 ساڵ زیندان حوكمدرا.}

^{دەسەڵاتی دادوەری ئێران رایگەیاندووە، سەرۆكی لیژنەی كۆمەڵایەتی و راوێژكاری ئەندامێكی ئەنجومەنی شارەوانی شاری تاران بە تۆمەتی سیخوڕیكردن بۆ ئەمریكا و ھەوڵدان دژ بە بەرژەوەندییەكانی كۆماری ئیسلامی ئێران، بە 10 ساڵ زیندانی حوكم دراوە.}

^{عەلی رەزا ئومێده‌وار، ماوەی 6 مانگە لە لایەن ھێزە ئەمنییەكانەوە دەستگیر كراوە و  دەسەڵاتی دادوەری ئێران دەڵێت، ناوبراو ھەوڵی جێبەجێكردنی پرۆژەی گۆڕینی دەسەڵاتی ئێران و دزەكردنە ناو دامودەزگاكانی حكوومەتی داوە. لە ماوەی رابردووشدا بەرپرسانی ئەمنیی ئێران باسیان لە دەستگیركردنی ژمارەیەك بەرپرس لە پۆستە باڵاكانی حكوومەت كردووە، كە سیخوڕییان بۆ وڵاتانی نه‌يارى ئێرانەوە كردووە.}

^28/2/2017

^{لەبارەی سیاسەتەکانی ئیدارەی ترەمپ، جۆرج دەبلیو بوش لە یەکەم لێدوانیدا رایگەیاند، پشتیوانی سیاسەتی پێشوازی لە کۆچبەران دەکات. میدیاش بە کۆڵەگەیەکی گرنگی دیموکراسی ناودەبات.
 
جۆرج بوشی کوڕ، سەرۆکی پێشووتری ئەمریکا لەسەر لیستی کۆمارییەکان، رۆژی دووشەممە 27-2-2017 لە هەڤەپیڤینێکدا لەبارەی بوونی پەیوەندی نێوان دۆناڵد ترەمپ، سەرۆکی ئەمریکا و رووسیا لە کاتی هەڵبژاردنی سەرۆکایەتیدا گوتی "بە بۆچوونی من دەبێت وەڵاممان هەبێت. باشترین رێگاش بۆ وەڵامدانەوە بوونی داواکارێکی تایبەتە، کە لێکۆڵینەوە لە پرسەکە بکات".}

^{بوشی کوڕ دەڵێت "من هەرگیز پارێزەر نەبوومە و نازانم هەنگاوە پێویستەکان چین، بەڵام دڵنیام دەبێت پرسیارەکان وەڵام بدرێنەوە". پێشنیازیش دەکات، ریچارد بەڕ، سیناتۆری کۆمارییەکان و سەرۆکی لیژنەی هەواڵگری لە ئەنجوومەنی پیران لێکۆڵینەوە لە کەیسەکە بکات و وەڵام بۆ پرسیارەکان بدۆزێتەوە.}

^{لەبارەی ئازادی راگەیاندن و راستگۆیی میدیای ئەمریکاش، کە زۆرجار دۆناڵد ترەمپ هێرشی تووندیان دەکاتە سەر و بە میدیای "بڵاوکەرەوەی هەواڵی ساختە" تۆمەتباریان دەکات، بوش جەختدەکاتەوە، میدیا کۆڵەگەیەکی سەرەکی دیموکراسییە.}

^{لەبارەی رێگیرکردنیش لە موسڵمانان و بڕیارەکەی ترەمپ لەبارەی کۆچبەران، جۆرج بوش رایگەیاند "بەردی بناغەی ئازادی ئەمریکا، مافی ئازادی بیروڕا و پەرستشە".}

^{جۆرج بوش پێیوایە، دەبێت میدیا ترەمپ بگەڕێننەوە جیهانی خۆی، بەتایبەتیش کاتێک دەڵێت کە دەیەوێت وڵاتەکەی یەکبخاتەوە.}

^28/2/2017

^{ژنێکی كورد بەناوی زوهەل دەمیر، ده‌بێته‌ وه‌زیر له‌ كابینه‌ی نوێی حكومه‌تی به‌لجیكا، دوای سوێندخواردنی یاسایی له‌ به‌رامبه‌ر پاشای ئه‌و وڵاته‌دا.}

^{پاشنیوه‌ڕۆی رۆژی هه‌ینی 24-02-2017 زوهەل ده‌میر، ته‌مه‌ن 34 ساڵ كه‌ بووه‌ته‌ وه‌زیری كاروباری به‌ره‌نگاربوونه‌وه‌ی هه‌ژاری و په‌ككه‌وته‌یی و ده‌سته‌به‌ركردنی هه‌ل و سیاسه‌تی زانستی و شارسازی، به‌شێوه‌یه‌كی فه‌رمی سوێندی یاسایی له‌ به‌رامبه‌ر پاشای ئه‌م وڵاته‌دا خوارد.}

^{ده‌میر له‌دوای سوێندخواردنه‌كه‌یدا رایگه‌یاند، هه‌ڵبژاردنی بۆ ئه‌م پۆسته‌ بڕیارێكی دروسته‌ و خۆیشی باش ده‌زانێت چۆن كاره‌كانی ئه‌نجام ده‌دات و ئامانجه‌كانی ده‌پێكێت، چونكه‌ پێشتر په‌رله‌مانتار بووه‌ و چاودێری كاره‌كان و سیاسه‌تی به‌ڕێوه‌بردنی چالاكییه‌كانی حكومه‌تی له‌ نزیكه‌وه‌ كردووه‌ و شاره‌زاییه‌كی باشی هه‌یه.}

^{زوهەل دەمیر، هه‌روه‌ها باسی ئه‌وه‌ی كردووه‌ كه‌ رۆڵێكی جیاوازی ده‌بێت له‌ نێو كابینه‌ تازه‌ هه‌ڵبژێردراوه‌كه‌ی به‌لجیكا و هه‌موو تواناكانی ده‌خاته‌گه‌ڕ بۆ بره‌ودان به‌خزمه‌تگوزارییه‌كانی حكومه‌ت.}

^{له‌ نیسانی ساڵی رابردوو ده‌میر، به‌شداری له‌ كه‌مپینی "بگه‌ڕێوه‌ بۆ وڵاتی ره‌سه‌نی خۆت" كرد كه‌ ئامانج لێی گۆشه‌گیركردنی ئه‌و كۆچبه‌ر و په‌نابه‌رانه‌ بوو كه‌ مه‌رجی پێدانی مافی نیشته‌جێبوون و ره‌گه‌زنامه‌یان نییه‌. ئه‌مه‌ش هه‌رای نایه‌وه‌ و رووبه‌ڕووی گوشار و ره‌خنه‌ی زۆر هاته‌وه‌ و ناچاركرا داوای لێبووردن بكات.}

^{زوهەل دەمیر}

^{پارێزەر و سیاسەتمەدارە
یەکەمین کوردە دەبێتە وەزیر لە حکومەتی بەلجیکا
2ی ئاداری 1980 لە بەلجیکا لەدایکبووە
خەڵکی باکووری کوردستانە
6ی تەممووزی 2010 بووەتە پەرلەمانتار
24ی شوباتی 2017 بووە وەزیری بەرەنگاربوونەوەی هەژاری}

^27/2/2017

^{دوازدەیەمین خولی هەڵبژاردنی سەرۆککۆماری ئێران سێ مانگی دیکە بەڕێوەدەچێت. کۆمیسیۆنی هەڵبژاردنەکانی ئێران رایگەیاند، بەربژێرەکان دەتوانن لە 11 تاوەکو 15-4-2017 ناوی خۆیان تۆمار بکەن، بەڵام هەموو کاندیدەکان چاوەڕێی کاتی دیاریکراو ناکەن.}

^{یەکەم بەربژێری جیدی کە ئامادەیی خۆی راگەیاندووە، حەمید بەقاییە و سەربەخۆ خۆی کاندید دەکات. حەمید بەقایی ئەزموونی کارکردنی لە وەزارەتی ئیتلاعات، رێکخراو، رادیۆ و تەلەڤزیۆن و رێکخراوی میراتی کولتووری هەیە. بەقایی یەکێکە لە کەسە نزیکەکانی ئیسفەندیار رەحیم مەشایی و محەممەد ئەحمەدی نەژاد، سەرۆککۆماری پێشووی ئێران.}

^{لەماوەی دوو ساڵی کۆتایی کابینەکەی ئەحمەدی نەژاد، بەقایی جێگری جێبەجێکاری ئەحمەدی نەژاد و سەرپەرشتیاری دیوانی سەرۆکایەتیی کۆمار بوو. ئەو لە ساڵی 94ـی هەتاوی بە بێ راگەیاندنی هۆکار، چەند مانگێک دەستگیرکرا و دواتر ئازاد کراوە.}

^{دۆستانی دیکەی ئەحمەدی نەژاد هەنگاویان بەرەو هەڵبژاردن ناوە. گوتەبێژی بەرەی یەکتا، رۆژی یەکشەممە، ناوی حەمید رەزا حاجی بابایی و، رۆستەم قاسمی وەکو دوو کاندیدی کۆتایی ئەو بەرەیە راگەیاند.}

^{یەکتا، بەرەیەکی سیاسی بناژۆخوازانە، لە ژمارەیەک بەرپرسی کابینەی ئەحمەدی نەژاد پێکهاتووە. حاجی بابایی، سیاسەتڤانی بناژۆخوازە و پێنج خول ئەندامی پەرلەمان بووە. لە کابینەی ئەحمەدی نەژاد، وەزیری پەروەردە بووە. هەروەها پێشتر ئەندامی حیزبی میانڕەوی و گەشە بووە، بەڵام پێش 10 ساڵ بەهۆی ناڕەزایەتی لە نزیکبوونەوەی میانڕەوەکان لە ریفۆرمخوازان، لەو حیزبە جیابووەتەوە.}

^{رۆستەم قاسمی، لە کابینەی دووەمی ئەحمەدی نەژاد، وەزیری نەوت بوو. لەنێو سوپای پاسدارانەوە پێی بۆ ناو حکومەت ناوە. قاسمی فەرماندەی قەرارگای ئابووری سوپا (خاتەمول ئەنبیا) بووە. ساڵی 2013 رۆستەم قاسمی وەکو وەزیری نەوتی ئێران لەلایەن گۆڤاری فۆرن پۆلەسی، وەکو یەکێک لە 500 کەسی دەسەڵاتداری جیهان ناسێنرا، ئێستاش راوێژکاری باڵای وەزیری بەرگری ئێرانە.}

^{پێشتر حیزبی بناژۆخوازی موئتەلفەی ئیسلامی، مستەفا میر سەلیم، سەرۆکی ئەنجوومەنی ناوەندیی ئەو حیزبەی وەکو بەربژێر راگەیاندووە. میرسەلیم لە کابینەی یەکەمی هاشمی رەفسەنجانی، راوێژکاری سەرۆککۆمار و، لەکابینەی دووەمیش وەزیری کولتوور بووە، ماوەی پێنج ساڵیشە ئەندامی کۆڕی دەستنیشانکردنی بەرژەوەندییەکانە.}

^{رەزا تەقەوی، قایمقامی ئەنجوومەنی ناوەندی کۆمەڵەی مامۆستایانی ئایینی خەباتگێڕیش رایگەیاندووە، ئەگەر بەرەی خەڵکی هێزەکانی شۆڕشی ئیسلامی ئێران لەسەری رێکبکەون، ئامادەیە ببێتە بەربژێر. ئەو بەرەیە ئەمساڵ بە مەبەستی یەکڕیزی بناژۆخوازان پێکهاتووە. تەقەوی پێشتر لە سێ خولی پەرلەمان ئەندام بووە و ئێستا سەرۆکی ئەنجوومەنی سیاسەتداڕێژی پێشنوێژانی هەیینییە.}

^{پێکهاتە جیاوازەکانی بناژۆخوازان خەریکە خۆیان بۆ هەڵبژاردن یەکلایی دەکەنەوە، بەڵام ریفۆرمخوازان هێشتا نەگەیشتوونەتە بڕیاری کۆتایی. عەلی سۆفی، ئەندامی ئەنجوومەنی ناوەندی حیزبی ئیتحادی میللـەت دەڵێت، زۆربەی ریفۆرمخوازان دەیانەوێ لەگەڵ پشتیوانیکردن لە حەسەن رۆحانی، خۆشیان کاندیدێکیان هەبێت، بەڵام هێشتا ساخ نەبوونەتەوە ئەو کاندیدە کێ بێت.}

^27/2/2017

^{حەسەن روحانی، سەرۆککۆماری ئێران هۆشداریدا لەبارەی هەوڵەکانی ئیسرائیل بۆ دۆزینەوەی هاوپەیمانی عەرەبی لە وڵاتانی ناوچەکەدا.}

^{لە شەشەمین کۆنفرانسی نێودەوڵەتیی بۆ پاڵپشتیکردنی راپەڕینی فەڵەستینییەکان، کە لە تاران بەڕێوەدەچێت، سەرۆککۆماری ئێران هۆشداریدا لەبارەی هەوڵەکانی تەلئەبیب بۆ ئاساییکردنەوەی پەیوەندییەکانی لەگەڵ وڵاتانی عەرەبی ناوچەکە.}

^{لەوبارەیەوە روحانی گوتی "رژێمی داگیرکاری ئیسرائیل لە هەوڵێک بۆ ئاساییکردنەوەی رەوشەکە، بۆ یەکەمجار وەک هاوپەیمان باسی لە چەند وڵاتێکی عەرەبی ناوچەکە کرد لەدژی بەرەی بەرهەڵستکاریی، لەبری ناوبردنیان وەک دوژمنی خۆی".}

^{سەرۆککۆماری ئێران باسی لەوەکرد، تەلئەبیب دەڵێت زۆرینەی وڵاتە عەرەبییەکان لە دژی زایۆنیزم نین یاخود چیدیکە دژی داگیرکاری نین، گوتیشی: "بەڵام هەمان فۆبیای هاوبەشیان هەیە لەبارەی بەرهەڵستکارییەوە".}

^{روحانی داوای لە وڵاتانی ناوچەکە کرد "بەهۆشیاری بمێننەوە لەڕووی پیلانەکانی ئیسرائیل"، ئاماژەی بەوەشکرد، دەبێت جیهانی ئیسلامیی هەڵوێستی خۆی روونبکاتەوە سەبارەت بە هەوڵەکانی ئیسرائیل بۆ ئاساییکردنەوەی پەیوەندییەکانی لەگەڵ وڵاتانی عەرەبیدا.}

^{روحانی گوتیشی "ئایا کاتی ئەوە نەهاتووە بۆ جارێک دراوسێکان هەمووان پێکەوە بڵێن نەخێر بۆ جەنگ و براکوژی؟". هاوکات داوای هەوڵی گشتگیری کرد بۆ چارەسەرکردنی پرسی فەڵەستین، کە وەک "سەرەکیترین کێشەی جیهانی ئیسلامیی" ناوزەندی کرد.}

^{حەسەن روحانی هۆشداری لەبارەی ئەوەدا کە ئاساییبوونەوەی پەیوەندییەکانی ئیسرائیل لەگەڵ چەند وڵاتێکی عەرەبیدا "چاو کوێرکردنە بەرامبەر بە تاوانەکانی رژێم دژ بە فەڵەستین و وڵاتانی دیکەی ئیسلامی".}

^{ئەو قسانەی سەرۆککۆماری ئێران دوای ئەوە دێت، کە سەرۆکوەزیرانی ئیسرائیل بنیامین نەتانیاهو رایگەیاند، وڵاتانی عەرەبی چیدیکە ئیسرائیل وەک دوژمنی خۆیان نابینن.}

^{نەتانیاهو گوتی "زۆر وڵاتی عەرەبی لەوە تێدەگەن کە ئیسرائیل دوژمنیان نییە، بەڵکو هاوپەیمانی بەنرخی ئەوانە لە شەڕی ئەو بەربەرییەی چواردەورەی هەموومانی داوە".}

^26/2/2017

مەسعود بارزانی، سەرۆكی هەرێمی كوردستان پرسەنامەیەك ئاراستەی تۆڕی میدیایی رووداو، بنەماڵە و كەسوكاری شەهید شیفا گەردی و سەرجەم رۆژنامەنووسانی كوردستان دەكات.

بارزانی لە پەیامەكەیدا دەڵێت "شەهیدبوونی شیفا دووپاتكردنەوەی رۆڵ و پێگە و قوربانیدانی ئافرەت و گەنجانی سەربەرزی وڵاتەكەمانە لە كاروانی خەبات و خۆڕاگری و رۆشنگەریی گەلی كوردستان".

دەقی پەیامەكەی بارزانی

بەناوی خودای بەخشندە و میهرەبان

بۆ بنەماڵە و كەسوكاری ڕۆژنامەنووسی شەهید شیفا گەردی

بەداخێكی زۆرەوە هەواڵی شەهیدبوونی ڕۆژنامەنووس (شیفا گەردی)ـم پێ گەییشت كە ڕۆژی شەممە 25ـی 2ـی 2017 لە كاتی ئەنجامدانی ئەركی ڕۆژنامەنووسی لە شاری موسڵ شەهید بوو.

شەهیدبوونی شیفا دووپاتكردنەوەی ڕۆڵ و پێگە و قوربانیدانی ئافرەت و گەنجانی سەربەرزی وڵاتەكەمانە لە كاروانی خەبات و خۆڕاگری و ڕۆشنگەریی گەلی كوردستان.

بەم بۆنە خەمناكەوە پرسە و سەرەخۆشیی خۆم ئاراستەی ئێوە و هاوكارەكانی لە تۆڕی میدیایی ڕووداو و هەموو ڕۆژنامەنووسانی كوردستان دەكەم.

لە خودای مەزن داواكارم گیانی پاكی شەهید شیفا بە بەهەشتی بەرین شاد بكات و سەبر و ئارامیش ببەخشێتە هەموو لایەك.

انا لله و انا الیه راجعون

مسعود بارزانی

25ـی 2ـی

^ 

^{کۆتایی هەفتەی رابردوو جۆن مەککەین، سیناتۆری ئەمریکی بەنهێنی سەردانی شاری کۆبانێی لە رۆژئاوای کوردستان کردووە.}

^{نووسینگەی سیناتۆر جۆن مەککەین، لە بەیاننامەیەکدا سەردانکردنی سووریای پشتڕاستکردووەتەوە و ئاماژەی بەوەکردووە، سەردانەکەی مەککەین بۆ چاوپێکەوتن بووە لەگەڵ ئەو هێزە ئەمریکییانەی لەوێ بڵاوەیان پێکراوە بۆ رووبەڕووبوونەوەی داعش. هەروەها بەمەبەستی تاوتوێکردنی ئۆپەراسیۆنەکانی کۆنترۆڵکردنەوەی شاری رەققە.}

^{رۆژنامەی وۆڵ ستریت جۆرناڵ ئاشکرایکردووە، سەردانەکەی مەککەین بۆ کۆبانێ بە هاوکاری هێزەکانی ئەمریکا رێکخراوە و تێیدا چاوی بە بەرپرسانی سەربازیی ئەمریکی و شەڕڤانانی کورد کەوتووە.}

^{ئەو سەردانەی مەککەین، کە سەرۆکی لیژنەی خزمەتگوزارییە چەکدارییەکانە لە ئەنجوومەنی پیرانی ئەمریکا، لەکاتێکدایە ئیدارەی ترەمپ تاوتوێی پلانێک دەکات بۆ ئۆپەراسیۆنێکی سەربازیی خێرا لە دژی رێکخراوی داعش لە سووریا.}

^{سەردانەکەی مەککەین بۆ رۆژئاوای کوردستان دووەم سەردانییەتی، دوای ئەوەی لە ساڵی 2013ش چووە رۆژئاوای کوردستان کرد و تێیدا چاوی بە فەرماندەی سوپای ئازادی سووریا کەوت.}

^{ئەو سەردانەی مەککەین لە میانی گەشتێکی ناوبراو دێت بۆ رۆژهەڵاتی نێوەڕاست، کە تێیدا سەردانی سعودیە و تورکیای کرد و، لەگەڵ بەرپرسانی ئەو دوو وڵاتە کۆبووەوە و تاوتوێی پلانەکانی رووبەڕووبوونەوەی داعشی لە ناوچەکە کرد.}

^26/2/2017

^{حزبەکانی کوردستانی ڕۆژهەڵات، بەتوندی ڕووبەڕووی پڕۆژەکەی نووری مالیکی، سەرۆکی ئیئتیلافی دەوڵەتی یاسا دەبنەوە کە بۆ دەرکردنی ئەو حزبانە لە هەرێمی کوردستان هەوڵی بۆ دەدات.}

^{دوای ئەوەی هەفتەنامەی (باس) ڕاپۆرتێکی لەبارەی پڕۆژەیەکی دەوڵەتی یاسا بە سەرۆکایەتیی نووری مالیکی، بۆ چەککردن و دەرکردنی سەرجەم حزبەکانی کوردستانی ڕۆژهەڵات لە هەرێمی کوردستان و عێراق ئاشکرا کرد. محەمەدنەزیف قادری، ئەندامی دەفتەری سیاسیی حزبی دیموکراتیی کوردستانی ئێران (حدکا)، بە (باسنیوز)ی ڕاگەیاند: “دوای ڕاپۆرتەکەی (باس)، جووڵانەوەیەک لە شەقامی هەرێمی کوردستان هەیە، چونکە نیازێکی زۆر خراپ لەدژی هێزەکانی کوردستانی ڕۆژهەڵات هەیە، بەتایبەت کۆماری ئیسلامیی ئێران کە دەیەوێت لە ڕێگای میلیشا و حەشدی شەعبییەوە مەترسیی بخاتە سەر حزبەکانی ڕۆژهەڵات و بەگژیاندا بدات”.}

^{ئەوەشی ڕوون کردەوە: “ئێمە لە زووێکەوە هەستمان بە مەترسیی دەسەڵاتی ئێستای عێراق کردووە کە دەیەوێت پیلانێک لە دژمان بگێڕێت، هاوشێوەی موجاهدینی خەڵق سیناریۆمان بەسەردا دووبارە بکاتەوە".}

^{ئەوەشی ڕوون کردەوە کە لە ئەگەری بەئاکامگەیشتنی پڕۆژەکەی مالیکی و ناردنی بۆ پەرلەمانی عێراق، “کاردانەوەی توندمان دەبێت و ئەگەری خۆپشاندانی فراوانیش هەیە”.}

^25/2/2017

^{دەیان دیپلۆماتکاری تورک داوای مافی پەنابەریی لە ئەڵمانیا دەکەن، کە تۆمەتبارن بە تێوەگڵان لە کودەتا شکستخواردووەکەی سوپای تورکیا.}

^{میدیا ئەڵمانییەکان بڵاویان کردووەتەوە، کە لە مانگی 8ـی 2016 تاوەکو 1ـی 2017، 136 هاووڵاتی تورکیا، کە خاوەنی پاسپۆرتی دیپلۆماسین، داوای مافی پەنابەرییان لە ئەڵمانیا کردووە.}

^{وەزارەتی ناوخۆی ئەڵمانیا ژمارەی پەناخوازەکانی پشتڕاست کردووەتەوە و رەتی کردووەتەوە ناوەکانیان ئاشکرا بکات.}

^{حکوومەتی تورکیا داوا لە ئەڵمانیا دەکات ئەو پەناخوازانە رادەستی وڵاتەکەی بکاتەوە، کە ژمارەیەکیان فەرماندەی سوپای تورکیا بوون و بەشداربوون لە هەوڵی کودەتاکە.}

^{لە 15ـی 7ـی 2016، ژمارەیەک فەرماندەی سوپای تورکیا هەوڵیان کودەتایەکی سەربازیی ئەنجام بدەن و رەجەب تەییب ئەردۆغان، سەرۆک کۆماری تورکیا لەسەر کار لابدەن، بەڵام بە هەوڵی هاووڵاتییان و هێزەکانی پۆلیس و ئاسایش، هەوڵەکە شکستی هێنا.}

^{رەجەب تەییب ئەردۆغان و پارتی داد و گەشەپێدان (ئاکەپە)ی دەسەڵاتدار فەتحوڵڵا گیولەن، رێبەری گیولەنییەکانیان بە پلاندانان بۆ کودەتاکە تۆمەتبار کرد.}

^25/2/2017