وەزارەتی ناوخۆی بەحرێنی دەستگیرکردنی گرووپێکی تیرۆریستی راگەیاند، کە ”لە ئێران و عێراق“ مەشق‌یان کردووە.

گرووپەکە لە 15 کەس پێکهاتووە و بەپێی بەیاننامەی وەزارەتی ناوخۆی بەحرێنی، ”لە سەربازگەکانی سوپای پاسدارانی ئێران لە عێراق و ئێران“ مەشقی سەربازییان کردووە.

هەروەک لە بەیاننامەی وەزارەتی ناوخۆی بەحرێنیدا هاتووە، گرووپەکە، کە وەزارەتی ناوخۆ ئێوارەی رۆژی شەممە 25.3.2017 دەستگیرکردنیانی راگەیاند، خەریکی ئامادەکاریی بوون بۆ کوشتنی ژمارەیەکی زۆری پۆلیس و کارمەندانی هێزە ئەمنییەکان، جگە لە هێرشکردنە سەر چەند دامودەزگایەکی گشتی و تیرۆرکردنی کەسایەتییە باڵاکان.

بەحرێن وڵاتێکی عەرەبییە و دەکەوێتە نیمچە دوورگەی عەرەبی و لەسەر کەنداوی عەرەبییە، حکوومەتی ئەو وڵاتە بەردەوام رایدەگەیەنێت، کە ئێران لە رێی هاووڵاتییە شیعەکانەوە هەوڵ دەدات دەستوەربداتە کاروباری ناوخۆیی بەحرێن و پشتگیریی گرووپە شیعییەکان دەکات.

27/3/2017

^{نەتەوە پەرستانی تورکیا، پەیوەندیی ئەردۆگان و بارزانی، پرسی هەڵکردنی ئاڵای کوردستان و بابەتی کەرکووک تێکەڵ بە ڕۆژەڤی ڕیفراندۆمی وڵاتەکەیان دەکەن.}

^{نەتەوەپەرستانی تورکیا، لە چوارچێوەی کاردانەوەکان بەرامبەر بە دەنگدان بۆ دەستووری تازەی تورکیا، پەیوەندیی نێوان رەجەب تەیب ئەردۆگان، سەرۆک کۆماری تورکیا و مەسعود بارزانی، سەرۆکی هەرێمی کوردستان، وەک ڕەخنەیەک ئاماژە پێدەدەن و بەهۆکارێک بۆ دژایەتیکردنی خۆیان بۆ هەمواری دەستوور لە قەڵەمی دەدەن.}

^{ئەوان هەمیشە باس لەوە دەکەن کە تورکیا لە کاتێکدا چاوی لەوە بووە کەرکووک و مووسڵ بچنەوە باوەشی تورکیا، کەچی ئێستا ”دیاربەکر - ئامەد“یشیان لەدەست داوە وەک خۆیان باسی لێوە دەکەن.}

^{هەر لە چوارچێوەی ڕۆژەڤی ڕیفراندۆم لەبارەی دەستوور لە تورکیا، بابەتی هەڵکردنی ئاڵای کوردستان لە ئەستەنبۆڵ و هەڵکردنی ئاڵای کوردستان لە کەرکووک ئاماژەی بۆ دەکرێت و بەهۆیەوە ڕەخنە لە ئەردۆگان دەگیرێت.}

^{لەمبارەیەوە دوێنێ یەکشەممە 26/3/2017، مەرال ئاکشەنەر کە پێشتر پاڵێوراوی سەرۆکایەتیی پارتی نەتەوەرستی تورکیا (مەهەپە) بووە و ئێستا لەو پارتە دەرکراوە، لە وتارێکیدا لە شاری (ئیزمیر)، دژایەتیی خۆی بۆ پەیوەندیی بەهێزی هەرێمی کوردستان و تورکیا دەربڕی باسی لە دۆخی کەرکووک کرد کە گوایە لەو شارەدا زمانی تورکی قەدەغە کراوە.}

^{ئاکشەنەر پێی وایە کە بەهۆی پەیوەندییەکانی لەگەڵ تورکیا، هەرێمی کوردستان بەهێز تر بووە. بۆیە وتارەکەی ئاراستەی باخچەلی کرد و گوتی: ”ئەی تۆ نەتدەگوت یا من یا بارزانی؟ پێم خۆشە بزانم جەنابت چی دەڵێی؟ ئەوەتا کەرکووکمان لەدەست ڕۆشت، ئەی بڕیار نەبوو نوێژی جەژنت لە کەرکووک بکەیت؟ ئێستا بیر لەوە دەکەیتەوە کە لە شوێنی بارزانی لە کەرکووک نوێژ بکەی؟“.}

^{لە سەرەتای دروستبوونی پەیوەندیی نێوان هەولێر و ئەنقەرەوە تاوەکوو ئێستا، بەشێوەیەکی بەردەوام، نەتەوە پەرستانی تورکیا لە هەوڵی گەڕاندنەوەی پەیوەندییەکەن بۆ ئەو کاتانەی کە تورکیا وەک نەیارێکی ئاشکرا سەیری هەرێمی کوردستانی دەکرد، تەنانەت لە ڕاگەیاندراوەکەی کودەتا شکستخواردووەکەی 15ی تەمووزی 2016ی تورکیا، یەکەمین خاڵ ڕەخنەگرتن بوو لە سیاسەتەکانی ئەردۆگان و ئیدارەکەی لە بەرامبەر پرسی کورد.}

^27/3/2017

^{ئەمشەو ئاینى یەڵدرم خوشکى عەبدوڵا ئۆجەلان بەهۆى نەخۆشییەوە لە گوندى ئاماراى پارێزگاى ڕحا کۆچى دوایى کرد.}

^{ئاژانسى هەواڵى فوارت ئەمشەو ٢٥ى ئازاری ٢٠١٧ بڵاویکردەوە، ئاینى یەڵدرم خوشکى عەبدوڵا ئۆجەلان لە ئێوارەى ئەمڕۆدا لە ماڵى خۆیدا لە گوندى ئامارا بارى تەندروستیى تێکچووە و براوەتە نەخۆشخانەى شارى خەلەفەتى.}

^{ئاماژە بەوەشکراوە، سەربارى هەوڵى پزیشکەکان ئاینى یەڵدرم لە نەخۆشخانەى کۆچى دوایى کردووە و تەرمەکەى براوەتە پزیشکى داد.}

^{ئەوەش خراوەتەڕوو، هۆکارى گیان لە دەستدانى ئاینى یەڵدرم جەڵتەى دڵ بووە.}

^{بڕیاریشە لە دواى تەواوکردنى کاروبارە یاساییەکان، تەرمەکەى ببرێتەوە بۆ گوندى ئامارا و لەوێ بە خاک بسپێردرێت.}

^26/3/2017

^{رۆژی هەینی 24-3-2017، لە کۆتایی کۆبوونەوەی ساڵانەی ئەنجوومەنی مافی مرۆڤ لە جنێڤ، پرسی درێژکردنەوەی ماوەی کارکردنی ئەسما جەهانگیر، ریپۆرتەری نەتەوە یەکگرتووەکان بۆ چاودێریکردنی مافەکانی مرۆڤ لە ئێران خرایە دەنگدان و ماوەی کارکردنی بۆ ساڵێكی دیکە درێژکرایەوە.}

^{ئەمریکا، سوێد، مەگدۆنیا و مەڵدۆڤیا رەشنووسی درێژکردنەوەی ماوەی کارکردنی ئەسما جەهانگیریان ئامادەکردبوو. لە کۆبوونەوەی گشتیی ئەنجوومەنی مافی مرۆڤیش بە 22 دەنگی بەڵێ لەبەرامبەر 12 دەنگی نەخێر پەسەندکرا.}

^{یەکێتی ئەوروپا، ئەڵمانیا و بەریتانیا پشتیوانییان لە درێژکردنەوەی ماوەی کارکردنی ئەسما جەهانگیر کرد، لەبەرامبەردا ڤەنزوێلا، کوبا و عێراق دژی رەشنووسەکە قسەیان کرد. 13 وڵاتیش بێلایەنانە دەنگیاندا.}

^{نوێنەری بەرازیل لە کۆبوونەوەکەدا رایگەیاند، سەرەڕای ئەوەی لە ئێران هەروا مافەکانی مرۆڤ پێشێلدەکرێن، بەڵام بەهۆی جێبەجێکردنی جاڕنامەی مافی هاووڵاتیبوون لەلایەن سەرۆککۆماری ئێران و هەوڵەکان لەو وڵاتە بۆ گۆڕینی سزای لەسێدارەدان، بێلایەن دەنگدەدات.}

^{هەروەها نوێنەری ئێران لە کۆبوونەوەکەدا بڕیاری درێژکردنەوەی ماوەی کاركردنی ریپۆرتەری نەتەوە یەکگرتووەکانی بە سیاسی و لایەنگرانە لەقەڵەمدا.}

^{لە ساڵی 2011 ـەوە نەتەوە یەکگرتووەکان ریپۆرتەری تایبەتی بۆ چاودێریکردنی پێشێلکاری مافی مرۆڤ لە ئێران دەستنیشانکردووە. ئەحمەد شەهید بۆ ماوەی شەش ساڵ و، لە ساڵی رابردووشەوە ئەسما جەهانگیر وەکو ریپۆرتەر دەستنیشانکراوە.}

^25/3/2017

^{سەرۆککۆماری ئێران بەیانی ئەمڕۆ شەممە 25-3-2017 بۆ کردنەوەی چەندین پرۆژەی وەبەرهێنان و پیشەسازی ، گەیشتە شاری سنەی ناوەندی پارێزگای سنە لە رۆژهەڵاتی کوردستان.}

^{بەپێی ئاژانسی هەواڵی فەرمی ئێران، سەرۆککۆماری ئێران لەو سەردانەیدا چەندین پرۆژە بەبەهای 2 هەزار و 750 ملیار تمەنی ئێرانی دەکاتەوە ، کە هەلی کار بەشێوەی راستەوخۆ بۆ 6 هەزار کەس دابین دەکات. پرۆژەکان بریتین لە کارگەی پێترۆکیمیایی کوردستان ، کارگەی تایەی بارزی کوردستان ، کردنەوەی دوو بەنداوی چرا وەیسی سەقز و زیویەی کامیاران ، بەرهەمهێنانی کۆنستانترەی ئاسنی سەبانوور ، کیمیا کانزاکانی سپاهان و کیمیا چاندنی ئەتیببا.}

^25/3/2017

^{بەفری دوای نەورۆز و ساردبوونی کەشوهەوا کێشەی بۆ گەشتیاران لە کرماشان دروستکردووە و سەفەری زۆربەی گەشتیارانی بەرەوڕووی کێشە کردووەتەوە. رەنگە ئەمە خراپترین حاڵەتێک بێت کە گەشتیارێک بیری لێ دەکاتەوە. لەگەڵ ئەوەشدا هاتنی گەشتیاران بۆ رۆژهەڵاتی کوردستان بەڕێژەیەکی بەرچاو زیادیکردووە.}

^{لە نەورۆزەکاندا زۆربەی گەشتیارەکان لە خێوەتەکاندا دەمێننەوە. بەڵام لەم بەفر و بارانەدا ئیدی مانەوە لە خێوەتدا دژوارە. بەڵام لەگەڵ ئەوەشدا بەپێی راپۆرتی بەڕێوەبەرایەتی میراتی کولتووری و گەشتیاری کرماشان، لە 6 رۆژی رابردوودا زیاتر لە 45 هەزار کەس لە شوێنەکانی تایبەت بە مانەوەی گەشتیارەکان جێگیر کراون، کە ئەمەش بەگوێرەی ساڵی رابردوو لەسەدا 142 بەرزتر بووەتەوە.}

^{بەپێی ئەو راپۆرتە سەرجەم ئەو کەسانەی هاتوون و بە شێوەی کاتی لە کرماشان ماونەتەوە نزیک بە 324 هەزار کەسە. واتە لەسەدا 11 لە ساڵی پار زیاتر بووە.}

^{بەپێی راپۆرتی پۆلیسی ئیلام، رێژەی هاتنی گەشتیار بۆ ئەم پارێزگایەش بە گوێرەی ساڵی رابردوو لەسەدا 20 زیاتر بووە. لە پارێزگای ئیلام بەپێچەوانەی بەرزبوونەوەی ژمارەی گەشتیار، بەرێژەی 100% لە رووداوەکانی هاتووچۆ کەم بووەتەوە. بەڵام لە پارێزگای کرماشان لە ماوەی چەند رۆژی رابردووی نەورۆزدا رێژەی مردن بەهۆی رووداوەکانی هاتووچۆوە 33% بەرز بووەتەوە.}

^{لە پارێزگای سنەش لە چوار رۆژی یەکەمی نەورۆزدا نزیک بە 50 هەزار کەس سەردانی ئەو پارێزگایەیان کردبوو. زۆرترین ژمارەی ئەم گەشتیارانە روویان لە شاری مەریوان کردووە. بەپێی ئامارەکان زیاتر لە 33 هەزار کەسیان روویان لە مەریوان کردووە.}

^{چالاکانی مەریوانی چەند رۆژ پیش کەمپەینێکیان بۆ راکێشانی گەشتیار بەڕێوە برد. رەنگە بەشێکی هاتنی ژمارەی زۆری گەشتیاران بۆ مەریوان، ئەمان هۆکار بووبن.}

^{ئامارێک لە هاتنی ژمارەی گەشتیاران بۆ ورمێ بڵاو نەبووەتەوە، بەڵام شەپۆلێکی بەفر و باران ئەو پارێزگایەشی گرتووەتەوە. ئەم نەورۆزە رەنگە تاوەکو ئێستا یەکێک لە ناخۆشترین نەورۆزەکان بۆ گەشتیاران بووبێت.}

^24/3/2017

^{لە چەند شارێکی باکووری کوردستان ئاهەنگی نەورۆز بەڕێوەچوو و هاونیشتمانیان روویان لەسەیرانگە و دەشتەکان کرد بۆ گەشت.}

^{لە شاری وانی باکووری کوردستان بە گردبوونەوەیەکی فراوان پێشوازی لە نەورۆز کرا، بەرپرس و پەرلەمانتارانی هەدەپە و دەبەپە، هەروەها کۆمەڵێک هونەرمەند و کەسایەتییەکان بەشداری یادی نەورۆزیان کرد.}

^{لە گردبوونەوەی خەڵك بۆ نەورۆز لە شاری وان سری سوورەیا ئۆندەر، پەرلەمانتاری هەدەپە رایگەیاند:" سەد ساڵی داهاتوو سەردەمی کورد دەبێت لە ناوچەکەدا".
24/3/2017}

^{بەهۆی رنووی بەفر، لە ناوچەی کوتول یان قوتوری سەر بە شاری خۆی لە باکووری پارێزگای ورمێ، چوار کۆڵبەری کورد کە سێیان خەڵکی گوندی ترساباد و یەکیان خەڵکی گوندی گیورانە، گیانیان لەدەستدا و کەسێکی دیکەش بە سەختی برینداربووە.}

^{بەڕێوەبەری مانگی سووری خۆی رایگەیاند، ئەو کەسانە نزیکەی نیوە شەو، پەیوەندییان بە ناوەندەکانی فریاکەوتن کردووە و ئەوان هەوڵی رزگارکردنیان داون، بەڵام سەرچاوە خۆجێیەکان باس لەوە دەکەن، گەیشتنی هێزەکانی فریاکەوتن بۆ شوێنی رووداوەکە زۆری خایاندووە و تاوەکو کاژێر حەوت و نیوی بەیانی تەرمی هەر چوار هاونیشتمانییەکە لەژێر بەفر دەرهێندراوەتەوە.}

^{گیان لەدەستدانی ئەو کۆڵبەرانە لەکاتێکدایە کە هێزەکانی سوپای پاسداران و پاسەوانی سنووری ئێران، زۆربەی ناوچە سنوورییەکانیان کۆنترۆڵکردووە و رێگەی هاتووچۆکردن بە کۆڵبەران نادەن.ئەوانیش ناچارن بە رێگەی دژوار کەلوپەلەکانیان بگوازنەوە.}

^{بەپێی دوایین ئامار، خۆی کە دووەم گەورەشاری پارێزگای ورمێیە، 348 هەزار کەس دانیشتووی هەیە.}

^{بەپێی ئامارێکی مەیدانی 63%ی دانیشتووانەکەی ئازەری و 37%ی کوردن. لە ناوەندی شار، بەخشی ئەیواغ ئۆغڵی و 116 گوند ئازەری زۆرینەن. 87 گوندی شارەکە بەتەواوی کوردن و لە 18 گوندیش کورد و ئازەری پێکەوە دەژین.}

^{خۆی 90 کیلۆمەتر سنووری هاوبەشی لەگەڵ پارێزگای وانی باکووری کوردستان هەیە. دانیشتووانی گوندە سنوورییەکان کوردن. ئەو شارە دەروازەیەکی سنووری نێودەوڵەتی بەناوی رازی هەیە و هێڵی ئاسنی ئێران بۆ ئەوروپا بە ناوچەی کوتولی خۆی تێدەپەڕێت کە زۆرینەی دانیشتووانی کوردن.}

^24/3/201

^{چوونی پەنابەران بۆ ئەوروپا، دیاردەیەکە هەرگیز کۆتایی نایەت. دەریای ناوەڕاستیش کە ڕێڕەوی ئاوى پەڕینەوەی پەنابەرانە بۆ ئەو کیشوەرە، بێ بەزەییە لە ڕۆح کێشانی ئەوانەی بە قاچاغ پیایدا تێپەڕدەبن.}

^{لە کاتێکدا سەرکردەکانی ئەوروپا لەهەوڵی ئەوەدان هاوکاریی دارایی لیبیا بکەن تا چالاکیی قاچاخچیەکان کەم بکاتەوە کە هۆکاری سەرەکیی چوونی پەنابەرانن بۆ ئەوروپا، جۆیل میلمانی، وتەبێژی ڕێکخراوی کۆچی نێودەوڵەتی پێشبینی کرد کە لەگەڵ باش بوونی کەش و هەوا و بەرزبوونەوەی پلەکانی گەرما، ژمارەیەکی زیاتر لە پەنابەران لەڕێگەی دەریاوە ڕوو لە ئەوروپا بکەن.}

^{ڕێژەی چوونی پەنابەران لە ڕێگەی یۆنان و دوورگەکانیەوە بۆ ئەوروپا وەک ساڵانی پێشووتر نەماوە و کەمی کردووە و ئێستا ئیتاڵیا جێگەی گرتووەتەوە، کە بەوتەی ڕێکخراوی کۆچى نێودەوڵەتی تەنیا لەمساڵدا زیاتر لە ٢٠ هەزار پەنابەر ڕوویان تێکردووە.}

^{دیمتریس ئەفراموپۆلس، کۆمسیاری کۆچی نێودەوڵەتی لە یەکێتی ئەوروپا داوایکردووە وڵاتانی ئەندام لە یەکێتییەکە کەمتەرخەمی لە وەرگرتنی پەنابەران نەکەن و کار بۆ سوککردنی فشارەکانی سەر یۆنان و ئیتاڵیا بکەن کە زۆرترین پەنابەر لە ڕێگەی دەریای ناوەڕاستەوە ڕوویان تێکردوون.}

^{بەڵام پێناچێت زۆرێک لە وڵاتانی یەکێتیەکە  بەدەم ئەو داوایەوە بچن و وڵاتێکی وەک پۆڵەندا کە بەپێی ڕێککەوتنێکی لەگەڵ سەرکردەکانی یەکێتی ئەوروپا لەساڵی ٢٠١٥ دا پێویست بوو  ٦ هەزار و ٢٠٠ پەنابەر وەربگرێت، یەک پەنابەری وەرنەگرتووە. هەرچی ڕێککەوتنەکەی نێوان یەکێتی ئەوروپا و تورکیاشە سەبارەت بە پەنابەران، زۆربەی خاڵەکانی جێبەجێنەکراون.}

^{لە کاتێکدا هەریەک لە یۆنان و ئیتاڵیا بەپێی ڕێککەوتنەکەی سەرکردەکانی یەکێتی ئەوروپا لانی کەم ١٤ هەزار و ٥٠٠ پەنابەریان لە کۆی ١٦ هەزار پەنابەر کە بۆیان دیاریکراوە وەرگرتووە کە زۆربەیان لە ناوچەکانی ڕۆژهەڵاتی ناوەڕاست و ئەفریقاوە لە ڕێگەی دەریای ناوەڕاستەوە ڕوویان لەو وڵاتانە کردووە.}

^{لەلایەکی ترەوە چیرۆکە دڵتەزێنەکانی حاڵەتەکانی خنکانی پەنابەران لە دەریای ناوەڕستدا درێژەیان هەیە کە پێشبینی دەکرێت لە سەرەتاى ئەمساڵەوە نزیکەی ٥٠٠ پەنابەر تیایدا خنکابن.}

^{لەچەند ڕۆژی ڕابردووشدا زیاتر لە ٦ هەزار پەنابەر لەدەریای ناوەڕاست لەنێوان لیبیا و ئیتاڵیا لەلایەن تیمە فریاگوزارییەکانەوە ڕزگارکراون، کە ٧٥٨ یان تەنیا لەڕۆژی هەینی ڕابردوودا بووە.}

^{لەماوەی نێوان ساڵانی ٢٠١٤ تا ٢٠١٦ نزیکەی ملیۆنێک و ٦٠٠ هەزار پەنابەر ڕوویان لە وڵاتانی یەکێتی ئەوروپا کردووە، بەڵام چۆنێتی مامەڵەکردن لەگەڵ ئەو پەنابەرانە و دابەشکردنیان بووە خاڵێکی ناکۆکی لەنێوان وڵاتانی ئەندام لە یەکێتییەکە.}

^{ئەگەرچیش کۆمسیۆنی ئەوروپا کە باڵی جێبەجێکاری یەکێتیی ئەوروپایە، لە توانایدایە سزای ئەو وڵاتانە بدات کە پابەندی بەڵێنەکانیان نەبوون، بەڵام لەگەڵ ئەوەشدا ڕێوشوێنی بەرانبەر هیچ وڵاتێک سەبارەت بە دۆسێی پەنابەران نەگرتووەتەبەر.}

^23/3/2017