سبەی مەسعود بارزانی و رەجەب تەیب ئەرۆدگان کۆدەبنەوە و بارزانی، هاشمی لەگەڵ خۆیدا دێنێتەوە کوردستان. لە چوارچێوەی سەردانەکەیدا بۆ چەند وڵاتێکی جیهانی، مەسعو بارزانی، سەرۆکی هەرێمی کوردستان سبەی دەگاتە تورکیا لەگەڵ رەجەب تەیب ئەردۆگان، سەرۆک وەزیرانی تورکیا و ئەحمەد داود ئۆغلۆ، وەزیری دەرەوەی ئەو وڵاتەکۆدەبێتەوە.

کاژێر 2ی دوای نیوەڕۆ بەکاتی تورکیا، سەرۆکی هەرێمی کوردستان لە کۆشکی دۆڵمە باخچەی نووسینگەی سەرۆک وەزیرانی تورکیا لەگەڵ ئەردۆگان دوایین پێشهاتەکانی رەوشی سیاسی عێراق و ناوچەکە تاوتوێ دەکات. هەروەها بارزانی و ئەردۆگان گفتوگۆ دەکەن لەسەر رەوشی کورد لە سووریا و چەکدانانی پارتی کرێکارانی کوردستان و کۆنگرەی نەتەوەیی و مەسەلەی تارق هاشمی، جێگری سەرۆک کۆماری عێراق.
رۆژنامەکانی تورکیا ئاماژەی بەوەدەکەن، مەسعود بارزانی، سەرۆکی هەرێمی کوردستان تارق هاشمی، جێگری سەرۆک کۆماری عێراق لەگەڵ خۆی دێنێتەوە هەرێمی کوردستان، کە ئێستا بە سەردانێک لە تورکیایە. هاشمی لەلایەن دادگای عێراقیەوە بە تۆمەتی "تیرۆر" داواکراوە و ئەویش پەنای بۆ هەرێمی کوردستان هێناوە و ئەو تۆمەتانە رەتدەکاتەوە و بە "سیاسی" وەسفی دەکات، ماوەیەک بەرلە ئیسَتا سەردانی قەتەر و سعودیە کرد و ئێستاش لە تورکیایە و هاشمی پێشچوونی بۆ دەرەوەی وڵات رایگەیاندبوو کە دەگەڕێتەوە هەرێمی کوردستان.

سەرچاوە: رووداۆ

زانرا کە مەسعوود بارزانی سەردانی تورکیا دەکات و لە دوو دیداری جیاواز دا، لەگەڵ تارق هاشمی و ئەردۆغان کۆدەبێتەوە. "تارق هاشمی"، جێگری سەرکۆماری عێراق بە مێدیاکانی تورکیایی ڕاگەیاند کە هەفتەی داهاتوو، لە شاری ئیستانبووڵ چاوی بە سەرۆکی هەرێمی باشووری کوردستان "مەسعوود بارزانی" دەکەوێ. لە لایەکی ترەوەش باس لەوە دەکرێ کە بارزانی بڕیارە لەگەڵ "ڕەجەب تەیب ئەردغان" سەرۆک وەزیری تورکیا کۆبێتەوە و دوایین ڕەوشی ناوچە، دۆسیەیی هاشمی، مەسەلەکانی پێوەندیدار بە پارتی کرێکارانی کوردستان و پێوەندی ئابووری دوو لایەن تاووتوێ بکەن. تارق هاشمی، جێگری جەلال تاڵەبانی، سەرۆک کۆماری عێراقی فێدراڵ، کە بە تێوەگلان لە تیرۆریسم تاوانبار کراوە، لەم مانگانەی دوایی دا لە کوردستان گیرسابۆوە و پاش سەردانی بۆ قەتەر و عەرەبستانی سعوودی، لە 10ی ئاپریلەوە لە تورکیایە.

7 رێكخراو و كومیتەی خوێندكاری رۆژهەڵاتی كوردستان كۆبوونەوە

حەوت رێكخراو و كومیتەی خوێندكاری رۆژهەڵاتی كوردستان بۆ ئامادەكاری  بە مەبەستی خۆرێكخستن و یەكدەنگبوون   بۆ بەشداریكرن لە كۆنگرەی نەتەوەیی خوێندكاری كورد  پێكەوە كۆبوونەوە.

 كاتژمێر 3ی دوای نیوەڕۆی رۆژی شەممە،26 خاكە لێوەی 1391 ، حەوت رێكخراو و كومیتەی خوێندكاری رۆژهەڵاتی كوردستان، لە شاری كۆیە و بە میوانداری یەكیەتی خوێندكاری دێموكراتی كوردستانی ئێران پێكەوە كۆبوونەوە. لەم كۆبوونەوەدا ئەم حەوت رێكخراوە لە سەر كۆمەڵێك باس و بابەتی هاوبەش بە مەبەستی ئامادەكاری بۆ گرتنی كونگرەی نەتەوەیی چوار پارچەی كوردستان، ساغ بوونەوە. هەورەها لەم كۆبوونەوەدا باس و بابەتی پێكهێنانی فیدراسیۆنێكی نەتەوەیی بۆ رێكخراوە خوێندكارییەكانی رۆژهەڵاتی كوردستان بە مەبەستی دروستكردنی هاودەنگی و هاوپێوەندی هەرچی زیاتری خوێندكاران لە  رۆژهەڵاتی كوردستان خرایە بەرباس و تاوتوێ كردن و  بڕیار درا لە داهاتوویەكی نزیكدا ، ئەم فیدراسیۆنە پێك بێت و بوونی خۆی رابگەنێت.

رێكخراو و كومیتەی خوێندكارییەكانی بەشدار لەم كۆبوونەوەدا بریتی بوون لە :

1ـ كۆمەڵەی خوێندەوارانی رۆژهەڵات

2ـ یەكیەتیی خوێندكارانی  دێموكراتی كوردستانی ئێران

3ـ كومیتەی خوێندكاری “سازمانی خەباتی كوردستانی ئێران”

4ـ كومیتەی خوێندكاری “حیزبی دێموكراتی كوردستان”

5ـ كومیتەی خوێندكارانی” كۆمەڵەی زەحمەتكێشانی كوردستان”

6ـ كومیتەی خوێندكاری “یەكیەتی شۆڕشگێڕانی كوردستان”

7ـ كومیتەی خوێندكاری “یەكیەتی دێموكراتیكی كوردستان”

فەرهاد جەهانگیری جێگری دووەمی سەرۆکی پارتی سەربەستیی کوردستان کۆچی دواییکرد. سەرکردایەتی پارتی سەربەستیی کوردستان. 

خەڵکی وڵاتداگیرکراوی کوردستان، هاوبیران و ئەندامان و لاینگرانی پارتیمان. بەداخ و کەسەرەوە پێتان ڕادەگەیەنین، کە لە ڕێکەوتی ٢٤ی خاکەلێوەی ٢٧١٢ی کوردی. هاوڕێی تێکۆشەرمان کاک فەرهاد جەهانگیری ناسراو بە فەرهادە رەش بە هۆی ڕاوەستانی دڵەوە گیانی لە دەستداو ماڵئاوایی لێکردین.
شەهید فەرهاد لە ساڵی ١٩٦٧ لە سنە لە دایکبووە، هەر لە تەمەنی مناڵیوە بووەتەپێشمەرگەی حدکا، لەو حیزبەدا چەندین بەرپرسایەتی و تا پلەی کادرێتی بریوە. 
کاک فەرهاد بە مەبەستی درێژەدان بە خەبات لە پێناو کوردستانێکی سەربەخۆدا، له ٢ی ڕێبه‌ندانی ٢٧٠٨ی کوردی، کە ڕۆژی سەربەخۆیی کوردستانە، بڕیاریدا سه‌نگه‌ری خه‌باتی بگوێزێته‌و‌ه‌ بۆ نێو ڕیزه‌کانی پارتی سه‌ربه‌ستیی کوردستان. هەر لەو رۆژەشدا لە لایەن سەرکردایەتییەوە پێشوازی لێکرا.
شەهید فەرهاد جەهانگیری لە کۆنگرەی یەکەمی پارتی سەربەستیی کوردستان کەلە١٣/١١/٢٠٠٩ لە ئۆسڵۆی پایتەختی نۆرویژ بە ڕێوە چوو وەک ئەندامی سەرکردایەتی هەڵبژێردرا. لەیەکەم کۆبوونەوەی سەرکردایەتی تازە هەڵبژێردراوی کۆنگرەی یەکەم، وەک جێگری دووەمی سەرۆکی پارتی سەربەستیی کوردستان هەڵبژێردرا.
بەداخەوە لەم چەند مانگەی ئاخردا تووشی نەخۆشی دڵەیەشە دەبێت، و تا سەر ئەنجام دۆێنێ شەو واتە ٢٥ی خاکەلێوەی ٢٧١٢ی کوردی، ١٤/٤/٢٠١٢ ی زاینی لە ماڵەکەی خۆی لە شاری لینشۆپینگی سوید بە هۆی ڕاوەستانی دڵەوە گیانی لە دەستداوە.
بە ناوی سەرکردایەتی پارتی سەربەستیی کوردستان سەرەخۆشی و خەم و پەژارەی خۆمان ئاراستەی بنەماڵەی هاوبیرمان کاک فەرهاد لە شاری سنەی قارەمان و هەروەها لە گشت ئەندامانی پارتی سەربەستیی کوردستان و خۆمان دەکەین. 
هەزاران سڵاو لە گیانی پاکی یەکەم شەهیدی پارتەکەمان 
ڕۆکی شاد و ڕێگای پر ڕێبوار بێت.
سەرکردایەتی پارتی سەربەستیی کوردستان 
٢٦ی خاکەلێوەی ٢٧١٢ی کوردی، ١٥/٤/٢٠١٢ ی زاینی

تێبینی لە نزکترین کاتدا لە ڕێگەی مالپەرەکەمانەوە ئاگاداری لە شۆینی سەرەخۆشی و کاتی بە خاکسپاردنی بڵاودەکەینەوە.
www.psk2006.org 

بۆ دیتنی چەند وێنەیەکی شەهید فەرهاد تکایە تەماشای ئەم لینکە بکەن . https://www.facebook.com/media/set/?set=a.434190913263287.121506.100000171455211&;type=1¬if_t=like
سەرکردایەتی پ س ک


2012-04-15 10:35:49

به گوتەی عەبدولڕەزا ئەکبەرزاده، بەرێوەبەری گشتی پاڵاوتگەی غازی پارێزگای ئیلام، رۆژانه زیاتر لە 6 ملیۆن و 800 هەزار پێی سێجا، غازی سروشتی لە پاڵاوتگەی ئیلام بەرهەم دێت. بڕیار وایه، لە ماوەیەکی نزیکدا ئەو رێژەیە بۆ 10 ملیۆن پێی سێجا بەرز بکرێتەوە. پاڵاوتگەی غازی سروشتی ئیلام ، جگە لەدابین کردنی پێداویستییەکانی غازی سروشتی پارێزگای ئیلام و ناوچەکانی دەورووبەری، رۆژانه بڕێکی زۆر بەنزین و گوگردیش بەرهەم دێنێت. ئیلام یەکێک لە گەورەترین پارێزگاکانی بەرهەم هێنەری نەوت و غازی ئێرانه و 11% یەدەگی غازی سروشتی ئێران لەو پارێزگایه هەڵکەوتووە.

ئێران لە رێگەی کێڵگە نەوتییەکانی دانان، سەرکان، چەشمە خۆش، ماڵه کێو و دێلۆران له پارێزگای ئیلام، رۆژانه بە دەیان هەزار بەرمیل نەوت هەناردەی دەرەوە دەکات. رۆژهەڵاتی کوردستان لە رووی دەوڵەمەندی کانزاکانی ژێرزەوی گرنگیەکی زۆری هەیه و به دەیان ساڵه له پارێزگاکانی کرماشان و ئیلام نەوت و غازی سروشتی بەرهەم دەهێندرێت. جگە لەوەی لە سەرجەم شار و گوندەکانی رۆژهەڵاتی کوردستان، دەیان کانزای ژێرزەوی وەک زێڕ، مس، ڕووی و سورب، جیوە، سیلیس و کانزای بەردە بەهادارەکان دۆزراونەتەوە. بەپێی ئەو رێژە زێرەی لە کانزاکانی سەقز، قوروە، تکاب و سەردەشت دۆزراوەتەوە، رۆژهەڵاتی کوردستان گەورەترین کانزای زێری رۆژهەڵاتی ناوەڕاسته.

د.بورهان غەلیون، سەرۆكی ئەنجوومەنی نیشتمانی سووریا رایدەگەیێنێ، كە لە سووریا شتێك نییە بە ناوی "كوردستانی سوریا"، هەروەها فیدراڵی بە "وەهم" دەزانێ و دەشڵێ "ئۆتۆنۆمی"یش بۆ گەلی كورد قبوڵ ناكەن. د.بورهان غەلیون، كە یەكەمجارە قسە بۆ دەزگایەكی راگەیاندنی كوردی دەكات، لە هەڤپەیڤینێكی تەلەفۆنیدا لەگەڵ (رووداو) لە پاریسەوە، بەهەموو شێوەیەك ئەوە رەتدەكاتەوە دان بە بوونی ناو و خاكی كوردستان دابنێ لە چوارچێوەی دەوڵەتی سووریادا.

بورهان غەلیون، سەبارەت بە داواكردنی فیدرالی لەلایەن هەندێ حیزبی رۆژئاوای كوردستانەوە گوتی " كورد نابێ وابەستەی وەهمی فیدراڵی بێ، چونكە سوودی نییە و، وا پیشاندەدات كە كورد داوای جیابوونەوە دەكات". هەروەها دەڵێ ئەوان ئامادەنین دوای رووخانی رژێمی بەشاری ئەسەد ئۆتۆنۆمیش بدەنە كورد "ئێمە ئۆتۆنۆمی قبوڵ ناكەین، چونكە هیچ هەرێمێك نییە لە سووریا كە رێژەی 100%ی دانیشتووانی كوردبن". غەلیون، كە پێش بوونی بە سەرۆكی ئەو ئەنجوومەنە، لە زانكۆی سۆربۆن لەپاریس مامۆستای زانستی كۆمەڵناسی و سەرۆكی سەنتەری لێكۆڵینەوەكانی رۆژهەڵات بوو، دەستەواژەو و ناوی (كوردستانی سووریا)ی قبوڵ نییەو دەڵێ "شتێك نییە بەناوی كوردستانی سووریا، ئەمە گواستنەوەی نموونەی عێراقە. لە سووریا ناوچەیەك هەیە زۆربەی دانیشتووانی كوردە، لە هەندێك شار كورد زۆرینەیە، بەڵام هیچ هەرێم و ناوچەیەك نییە بەناوی "كوردستان"، سووریا هەر سووریایە".

بە بڕوای بورهان غەلیون بەشداری فراوانی كورد لە شۆڕشدا و هەماهەنگیكردن لەگەڵ لایەنەكانی ئۆپۆزیسیۆن، پێگەی كورد لە دواڕۆژدا بەهێز دەكات بۆ داواكردنی ماف و رۆڵی زیاتر لە سووریادا، نەك تەنیا لەو ناوچانەی تێیدا زۆرینەن، بەڵكو لە هەموو سووریادا.

دكتۆر عەبدولحەكیم بەشار، ئەندامی كۆمیتەی پەیوەندییەكانی دەرەوەی (ئەنجوومەنی نیشتمانی كورد لە سووریا) لە بەرامبەر لێدوانەكانی غەلیون، بە (رووداو)ی راگەیاند "تاوەكو ئەوان خۆیان لە عەقڵییەتی بەعس و رەگەزپەرستی رزگارنەكەن، ناتوانین لەگەڵیان رێكبكەوین"، دكتۆر عەبدولحەكیم، كە لە هەمانكاتدا سكرتێری پارتی دیموكراتی كورد لە سووریاشە، گوتی "كوردستانی سووریا، واقیعێكی جوگرافی مێژووییە و هەیە، بەڵام ئەوە خاڵی گفتوگۆ نییە، لێرەدا ئەوەی گرنگبێ ئەوەیە، ئەگەر ئەوان بەردەوامبن لە پشتگوێخستنی داواكانی كورد، بەوشێوەیە زیان بە شۆڕش دەگەیێنن و تەمەنی رژێمی ئێستای سووریا درێژدەكەن".

سالە کوردە
رووداو-سوێد
قەشەی بەنێوبانگی ئەفریقای باشوور و هەڵگری خەڵاتی ئاشتی نۆبڵ،  دیسمۆند توتو لە نامەیەکدا کە ئاراستەی سکرتێری یەکێتی ئەوروپا تۆربیۆرن یاگلاندی کردووە، داوادەکات کە گۆشەگیری سەر عەبدوڵڵا ئۆجەلان رێبەری  پارتی کرێکارانی کوردستان هەڵبگیرێت. 
توتو لە نامەکەیدا ئاگاداری تۆربیۆرن یاگلاندی کردووەتەوە کە ژمارەیەک کورد مانگرتنێکی بەردەوامیان دەستپێکردووە، بەهۆی نیگەرانیان لە رەوشی ژیانی ئۆجەلان. لە نامەکەیدا توتو داوادەکات کە هەنگاو بۆ چارەسەری کیشەی کورد بەشێوەیەکی دیموکراتیانە و ئاشتیانە بنرێت.
توتو روونیدەکاتەوە کە ئەو وەک هەڵگری خەڵاتی ئاشتی نۆبڵ دژی شەڕە و خەبات بۆ ئاشتی دەکات و بەهیوایە کە مرۆڤەکان لە دۆخێکی ئاشتیانەدا بژین. هەروەها دەڵێ "چەندین ساڵە ئێمە شایەتی شەڕێکی دژوارین لە تورکیا بەهۆی کێشەی کوردەوە، کە بەداخەوە سەدان کورد و تورک بوونە قوربانی، کە زۆربەیان ژن و منداڵن. ئێمە هیواخوازین کە داوودەزگا نێودەوڵەتییەکان  و ئەو ئینیستیشوونەی کە ئێوە نوێنەرایەتی دەکەن، خۆیان ماندوو بکەن بۆ کۆتایی هێنان بەو کێشەیە و لایەنەکان لەیەکتر کۆبکەنەوە. دیالۆگ لەنێوان ئەو دوولایەنە زۆر گرنگە. دەبێ بەڕێز ئوجەلان کە لەلایەن کوردەوە وەک ئیرادەیەکی سیاسی قبوڵکراوە، ببێتە لایەنێکی گفتوگۆ. ماوەی هەشت مانگە هیچ پەیوەندییەک لەگەڵ ئۆجەلان نەکراوەو رێگە بە پارێزەران و بنەماڵەکەی نادرێت بیبینن، ئەوەش بووەتە هۆی ئەوەی کە کورد بە جیدی نیگەران ببن. داوا لە بەڕێزتان دەکەین کە کەمێک لەکاتی بەهاداری خۆتان بۆ ئەم کێشەیە تەرخانبکەن کە کێشەیەکی مرۆڤانەیە و پێویستە بایەخی پێبدرێت."

ئەمڕۆ 14ئابریل 2012، رۆژی ئەنفال، واتە 24هەمین ساڵرۆژی دەستپێکی شێوەیەک لە وەحشیانە وبگرە ترسناکترین چەشنی سرینەوەی نەتەوەیەکی بێ‌دەسەلات و بندەستە کە تاکوو هەنووکە، مێژوویی کۆمەلگای مرۆفایەتی متەمەدین وەها کارەسات و تراژدیایەکی سامناکی بەخۆیەوە نەدیووە. ئەم کارەساتە لەدرێژەی سیاسەتی تەعقیب و ئەشکەنجە و کووشتن و برین، تەبعید، تەخریب، تەعریب،،،، وەک گەلالەیەکی دارێژراۆ بۆ سرینەوەی نەتەوەیەک بەئەژمار دێت کە لە راستای تەکمیلی سیاسەتی ژینۆسایدی نەتەوەی کوردی بندەست و بێدەسەلات، وە لەبەرچاوویی دوونیای مووتەمەدین و موودەعی ئاشتی و ئازادی، مافی مرۆف و دێمۆکراسی، لە چەندین قۆناغی یەک لەدوای یەک ئەنجام دەدرا.

دروست ٢٤ ساڵ لەمەۆپێش بوو، کە رژێمی بەعسی ئەفلەقی عێڕاق، بە پێی بڕیاری١٦٠ی "شوورای سەرکردایەتی شۆڕش" پرۆسەی سرینەوەی نەتەوەکەمانی لە چەند قۆناغدا دەست پێکرد و بەم چەشنە بێباکانە دەستی کرد بە کۆمەلکووژی وسرینەوەی نەتەوەکەمان لە باشووری کوردستان. ئیراقی ئەفلەقی ئەم پرۆسەی بە کۆمەل کووشتن و تالان کردنی سەرومال و سەروەتی سەر عەرز و بن عەرزی کورد و کوردستانی، لەژێر ناویی ئەنفال و بە پێ ئایەی ئەنفالی قورئانی پیرۆز، بەحەلال دەقبلاند و بەم چەشنە پێاۆکووژەکانی ئەفلەقی لەئاست ئازار ویژدانی و قەهر و غەزەبی ئیلاهی ئازاد و دەرباز دەکرد، بۆیە جەلادانی بەعسی لە زنجیرە چالاکیگەلێکی سەربازی دا، بێرحمانە دەستیان دایە خاپوورکردن‌و سوتاندنی خاک و سروشتی رازاوەی کوردستان و سرینەوەی کەلەپوور و کوولتوری کوردی و لەوەش وەحشیانەتر زیندەبەچالکردنی بەکۆمەلی ژن و مندال و لاۆ و پیر و پەککەۆتەی کوردی.

رژیمی داگیرکەری ئێراقی ئەفلەقی، لە راستای سیاسەتی ژینۆسایدی نەتەوەی کورد و بۆ تەکمیل و بەیەکجاری سرینەوەی نەتەوەکەمان لەم بەشە لە خاکی داگیرکراوەکەمان دا، تاوانی ئەنفالی کوردی بە ٨ قۆناغی جێواز بەلام زنجیرەیی و یەک لەدوای یەک دا دەست پێکرد، کە تیدا ٦ لشکری عێراقی بەشدار بوون. لەم زنجیرە چالاکیە پرتاوانەیەدا، سەرای وێران و خاپوورکردنی گووندەکانی کوردستان و تەقاندنەوەی کانیەکان و سووتاندنی باغ و رەز و بێستانەکان،هەموو دانیشتوانی ئەم گووندانەیان بە چووک و گەۆرە و ژن و پیاوەوە راپێچی بیابانەکانی خوواروی عێراق دەکرد و بەخری زیندەبەچال دەکران. بەپێ ئامار و ئەرقامی جێگای باوەر لەم تاوانە دژە ئینسانیەدا هاۆرێ دەگەل ٨٠٠٠ بارزانی کە لەسالی ١٩٨٣ بەکۆمەل کوژرابوون، بەگستی نێزیک بە ٢٠٠٠٠٠ مرۆفی بێتاوان بە جوورمی کورد بوون لە ناۆچوون.

بزووتنەوەی کۆماریخوازی رۆژهەلاتی کوردستان، سەرەرای دەربرینی غەم و پژارەی دەگەل بنەمالەی شەهیدانی کارەساتی ئەنفال، ئەم تراژدیە سامناکەی ئەنفالی کوردی، مەحکووم دەکات و هێوادارە لەدوونیای گلۆبالی هەنووکەییدا، کە بە جیهانی فرەکولتووری و فرە شووناسی و دوونیای پر لە تەعاموول و لێکتێگەیستن و ژیانی بە ئاشتی پێناسەکراوە، نەک کورد بگرە هیچ نەتەوەیەکی دیکەی سەرتۆپی ئەم زەویە، تووشی وەها کارەساتێکی سامناکی وینەی ئەنفالی کوردی نەبێتەوە.

شوورای هاۆئاهەنگی بزووتنەوەی کۆماریخوازی رۆژهەلاتی کوردستان

١٤ی ئابریلی ٢٠١٢ بەرامبەر بە ٢٦ی خاکەلێوەی ٢٧١٢ی کوردی

ساکار عەبدوڵڵازاده

رووداو- باکوووری خوراسان

ئێستاکه بازاری کتێب و بلاڤۆکی کوردی لە باکووری خوراسان گەرمییەکی بەرچاوی پێوە دیارە و سەرەڕای ئەوەی زۆربەیان چەندین جار به چاپ گەیشتوون، رێژەیەکی کەمیان لە بازارەکاندا ماوەتەوە. هەر لەو ماوەیەدا، کتێبی چیکسای، لە نووسینی حەسەن رۆشان، شاعیری کوردی باکووری خوراسان بۆ جاری دووەم به چاپ گەیشت و بەپێی پێشوازی بێ وێنەی کوردان، پێش بینی دەکرێت ئەو کتێبە لە ماوەیەکی کەمدا بچێتە ژێر چاپی سێهەمەوە.

مێهدی جەعفەرزاده، نووسەر و چالاکی مەدەنی باکووری خوراسان لە لێدوانێکدا بۆ (رووداو) پێشوازی کوردانی خوراسان لە کتێب و بلاڤۆکه کوردییەکانی پشتڕاست کردەوە و راشیگەیاند "لەم دوو ساڵەدا زیاتر لە 5 هەزار بەرگ لە کتێبی چیکسای فرۆشراوە". به گوتەی ناوبراو، چیکسای بە مانای شەوێکی ساماڵی پڕ ئەستێرەی ساردی زستان دێت که به زاراوەی کورمانجی خوراسان و بە هەردوو پیتی ئارامی و لاتینی نووسراوە. سەرەڕای پێشوازی گەرمی کورمانجەکانی خوراسان له بەرهەمه کوردیەکان، بەڵام شاعیران و نووسەرانی کورد لە خوراسان رووبەڕووی ئاستەنگ و کێشە دەبنەوە و له بڵاوکردنەوەی بەرهەمەکانیان ئازاد نین.

مێهدی جەعفەرزاده لە بارەوە رایگەیاند "هەندێک ئاستەنگ و لەمپەر لە بەردەم بڵاڤۆکی کوردی لە خوراسان دانراوە و نووسەرانی کورد ناتوانن ئازادانه بابەتەکانیان بنووسن و بڵاو بکەنەوە، بۆ نمونه تا ئێستا رێگە نەدراوە بەرهەمە کوردییەکانی عەلیڕەزا سپاهی لایین، نووسەری كوردی باكووری خوراسان بڵاو بکرێتەوە". جەعفەرزاده ئاماژە بە رەوشی ئەو نووسەرە کرد و گوتی "عەلیرەزا سپاهی لایین بەهۆی نووسین و لێکۆڵینەوەکانی لەسەر کوردستان، ماوەیەکی زۆر لە گرتووخانەی مەشهەد دەستبەسەر کرا و ئێستا بە دانانی بارمەتە و بەشێوەیەکی کاتی ئازاد کراوە".

مێهدی جەعفەرزادە، نووسەر و چالاکوانی مەدەنی کورد لە خوراسان ئاشکراشی کرد "لە خوراسان سیاسەتی جوداکردن و دابڕاندنی کورمانج لە کورد بەڕیوە دەچێت، بەشێوەیەک ئەگە لە خوراسان بڵێیت من کورمانجم هیچ کێشەیەکت بۆ ناخولقێت، بەڵام ئەگە بڵێیت کوردم و نیشتمانی دایکیم کوردستانه، ئەوە رووبەرووی ئاستەنگ و کێشە و تەنانەت گرتن و ئەشکەنجەش دەبییەوە" بەپێی ئامارە نافەرمییەکان، نزیکەی 2 ملیۆن کورد لە خوراسان دەژین که زۆربەیان به  زاراوەی کورمانجی دەدوێن و مسوڵمانی شیعەن. ئەو کوردانە لە سەردەمی ئیمپڕاتۆری سەفەوی، بە زۆرە ملی بۆ باکووری خوراسان کۆچیان پێکرا، تا هەم سنوورێکی مرۆیی لەبەردەم هێڕشی ئۆزبەک و تاتار و تورکان بن و هەمیش ببنە پەند بۆ ئەو کوردانەی بەدژی دەسەڵات هەڵدەستنەوە.

سەبارەت بە 33 ساڵ دەسەڵاتی کۆماری ئیسلامی و گوتاری هێز و لایەنە سیاسییەکانی رۆژهەڵات و چەمکی فیدڕالیزم و هۆکاری ئینشعاب و لێکترازان و پێکنەهاتنی بەرەیەکی کوردستانی لە نێوان حیزبەکان و روانگەی HDKI سەبارەت بە راگەیاندنی دەوڵەتی کوردی و دامەزراندنی دەوڵەتێکی سەربەخۆی کوردی لە باشووری کوردستان، رۆژنامه‌ی هاووڵاتی له‌ ژماره‌ی 824، وتووێژێکی له‌گه‌ڵ مسته‌فا هیجری سکرتێری گشتیی حیزبی دێموکراتی کوردستان پێکهێناوه‌.
 سکرتێری حیزبی دیموکڕاتی کوردستانی ئێران بەشێک لە راپەڕین و سەرهەڵدانەکانی وڵاتانی عەرەبی بە راپەڕینی نەتەوەکانی ئێران لە زەمانی شا دەشوبهێنێ و دەڵێ: " به‌شێک له‌وان خه‌ریکن به‌و رێچکه‌یه‌دا ده‌روون که‌ پێشتر خه‌ڵکی‌ ئێران به‌ هه‌ڵه‌ هه‌ڵیان بژارد ‌و ناکام بوون.
 سکرتێری گشتی HDKI روانگەی حیزبەکەی سەبارەت بە ئێرانی دوای کۆماری ئیسلامی روون دەکاتەوە کە مافی‌ نه‌ته‌وه‌یی‌ کورد له‌ ئێرانێکی‌ دێمۆکراتێکی‌ فیدراڵدا ده‌بینن. ناوبراو هەروەها هۆکاری و بەربەست لە بەردەم چێ نەبوونی بەرەیەکی کوردستانی لە نێوان ‌حیزبەکانی رۆژهەڵاتی کوردستان بۆ، دابه‌شبوونی‌ حیزبه‌کان، به‌رژه‌وه‌ندی‌ حیزبی‌ به‌ هه‌ڵه‌ له‌ سه‌رووی‌ به‌رژه‌وه‌ندی‌ نه‌ته‌وه‌یی، پیلانی‌ لاوه‌کیی‌ نه‌یارانی هێزەکانی رۆژهەڵات دەگەرێنێتەوە.
 مستەفا هیجری لە وڵامی پرسیاری ئەوەی کە ‌ئه‌و بارودۆخه‌ی‌ ئێستا باشووری‌ کوردستان تاچه‌ند توانای‌ ده‌وڵه‌تداریی‌ تێدایه‌ دەڵێ: "ئه‌گه‌ر مه‌به‌ستتان له‌ ده‌وڵه‌تداری توانای به‌ڕێوه‌بردنی ده‌وڵه‌تی سه‌ربه‌خۆیه‌، وڵامی من ئه‌وه‌یه‌ که‌ به‌ هۆی هه‌ڵه ‌و که‌موکورتییه‌کان، نه‌ له‌ ناوخۆ و نه‌ له‌ ناوچه ‌‌و نه‌ له‌ راده‌ی نێونه‌ته‌وه‌ییدا زه‌مینه‌ی پێکهاتنی ده‌وڵه‌تی سه‌ربه‌خۆ بۆ کوردستانی باشوور پێک نه‌هاتووه‌ تا قسه‌ له‌ توانای ده‌وڵه‌تدارییه‌که‌ی بکه‌ین".