ئەمڕۆ کونسوڵی نوێی ئەمەریکا لە ھەرێمی کوردستان سەردانی مەکۆی سەرەکی بزوتنەوەی گۆڕانی کرد لە شاری سلێمانی و لەگەڵ نەوشیروان موستەفا، رێکخەری گشتی بزوتنەوەی گۆڕان و ئەندامانی ژوری پەیوەندییەکانی دەرەوەی بزوتنەوەکە کۆبوەوە.
لە کۆبونەوەکەدا ئۆڵ ساتفین، کونسوڵی نوێی ئەمەریکا لە ھەرێمی کوردستان باسی لەوەکرد، کە حکومەتی ئەمەریکا ئامانجیەتی پشتیوانی لە پێشکەوتنی پرۆسەی دیموکراسی و شەفافیەت و بەرەوپێشبردنی ئەزمونی حکومڕانی لە کوردستان بکات، بونی ئۆپۆزسیۆنیشی بە ئیجابی وەسف کرد.
کۆبونەوەکە لە مەکۆی سەرەکی بزوتنەوەی گۆڕان لە شاری سلێمانی بەڕێوەچو، تیایدا گفتوگۆ کرا لەبارەی دۆخی سیاسی عێراق بەگشتی و ھەرێمی کوردستان بە تایبەتی، کونسوڵی گشتی ئەمەریکا بەلایەوە گرنگ بو کە دید و بۆچونی بزوتنەوەی گۆڕان لەمەڕ گۆڕانکاری و ھاوکێشە سیاسییەکانی سەر گۆڕەپانی عێراق و ھەرێمی کوردستان بزانێت، لای خۆشیەوە رێکخەری گشتی بزوتنەوەی گۆڕان بە کورتی مێژوی دامەزراندنی بزوتنەوەکە و ئامانجەکانی بۆ وەفدی میوان خستەڕو.
سبەی

سەرۆکی هەرێمی کوردستان، سەرپەرشتی واژۆکردنی راگەیاندراوی هەولێری کرد لە نێوان ئەنجوومەنی نیشتمانیی کوردی سووریا و ئەنجوومەنی گەلی رۆژئاوای کوردستان(PYD) کە تێیدا لە نێوان هەردوولا دەستەیەکی باڵای هاوبەش پێکهێنرا بە ناوی ( دەستەی باڵای کوردی ).

ئەمڕۆ چوارشەممە ‌11/7/2012 مەسعود بارزانی سەرۆکی هەرێمی کوردستان لە سەڵاحەدین سەرپەرشتی واژۆکردنی راگەیاندراوی هەولێری کرد لە نێوان ئەنجوومەنی نیشتمانیی کوردی سوریا و ئەنجوومەنی گەلی رۆژئاوای کوردستان، کە بە پێی راگەیاندراوەکە دەستەیەکی باڵای هاوبەش لە نێوان هەردوولا پێکهێنرا بە ناوی ( دەستەی باڵای کوردی ) کە ئەرکەکەی دانانی سیاسەتێکی گشتی و سەرکردایەتی کردنی کوردی سوریایە لەم قۆناخە چارەنووسسازەی کە تێیدا تێپەڕ دەبن و تەئکیدیش لە راگرتنی هەموو جۆرە هێرشێکی ئیعلامی کرایەوە لە نێوان هەر دوولادا.

سەرۆکی هەرێمی کوردستان لە وتەیەکیدا پیرۆزبایی لە هەردوولا کرد بۆ ئەو رێککەوتنە مێژووییەو داوای لێکردن کە یەک رەنگ و یەک هەڵوێست بن لە بەرامبەر ئەو گۆڕانکارییانەی کە لەو وڵاتەدا روو دەدەن و پێداگیری تەواو لە مافەکانیان بکەن کە ئەمەیش تەنها بە پاراستنی یەکریزی هێزە کوردستانییەکان و پەیوەندی ستراتیژییان لەگەڵ هێزە دیموکراتیەکانی سەرانسەری سوریا دەبێ.

سەرچاوە:  رووداو- KRP

ئەندامێکی مەکتەبی سیاسی یەکگرتوی ئیسلامی کوردستان لەجیاتی (ئەی رەقیب) پێشنیازی شیعرێکی دیکەی کردووە بۆ سروودی نیشتیمانی، بەڵام تائێستا حکومەت وەڵامی نەداوەتەوە. سروودی (ئەی رەقیب) کە لە لایەن شاعیری گەورەی کورد، یونس رەئووف ناسراو بە دڵدار (1918-1948) دانراوە، وەک سروودی نیشتیمانی کوردستان مامەڵەی لەگەڵ دەکرێ. لەم دواییانەدا، مێژوونوسان و پیاوانی ئایینی رەخنەیان لێگرد بەوەی هەڵەی مێژوویی و ئایینی تێدایە، پێیان وابوو دەبێ ئەو بڕگەیە (ئێمە رۆڵەی میدیا و کەیخوسرەوین . دینمان، ئایینمان هەر نیشتمان) بگۆڕێ چونکە کورد بەشێک نییە لە میدییەکان و کەیخوسرەو، کورد راستەوخۆ نەوەی ئارییە. بڕگەی دووەمی ئەو بەیتە شیعرەش کە لەلایەن پیاوانی ئایینییەوە قبوڵ نەکراوە، تەنانەت ئەمیری کۆمەڵی ئیسلامی ئامادە نییە لە هیچ بۆنەیەکدا لەبەر سروودی نیشتیمانی هەڵبستێتەوە، لەبەر ئەو بڕگەیە و، بە سروودی نەتەوەیی نازانێ.

ئەبوبەکر عەلی لە لێدوانێکدا بۆ (رووداو) گوتی “لەسەروبەندی بەیاساکردنی سروودی نیشتیمانی لەمانگی 9 و 10 ی 2011، منیش وەک نووسەرێک کە دەستی شیعریم هەیە، ئەو شیعرەی خۆم پێشکەشی پەرلەمان کرد، شیعرەکە ڕەچاوی خواستە نەتەوەیی‌و سیاسی یەکان‌و، پرسی بە یەکەوە ژیان‌و، بیناکردنەوەی گەلی کوردستانی کردووە”. ئەبوبەکر عەلی زیاتر گوتی “شیعرەکە لەپەرلەمان ئیمزای 10 پەرلەمانتاری لەکوتلە جیاوازەکان لەسەرە بۆ ئەوەی بخرێتە پڕۆژەی دەنگدانەوە، پەرلەمانی کوردستانیش لەمانگی 3ی ئەمساڵەوە بۆ حکومەتی هەرێمی ناردووە، بەڵام تاوەکو ئێستا لەلان حکومەتەوە وەڵام نەدراوەتەوە” شاعیری سروودەکە، لە نامەیەکدا کە پێشکەشی پەلەمانی کردووە، داواشی کردووە پەرلەمان خۆی یەکێک لەو ناوانە (نیشتمان، ماڵی نیشتمان یاخود پێکەوە ژیان) هەڵبژێرێت.

لەدرێژەی لێدوانەکەیدا گوتی “ئەو شیعرەی من بەهەمان ئاوازی شیعری ئەی رەقیب دەبێ و، پشنیازدەکەم بکرێتە شیعرێکی نەتەوەیی لەپاڵیدا”. بۆ ئەو بڕگەیەی کە مشتومڕی مێژوویی و سیاسی لەسەرە لەناو شیعری ئەی رەقیب، ئەبوبەکر عەلی دەڵێ ”لەجیاتی بڕگەی (ئێمە رۆڵەی میدیا و کەیخوسرەوین . دینمان، ئایینمان هەر نیشتمان) ئەم بڕگەیەم پێشنیاز کردووە (چارەنوسمان هاوبەشە ئاسۆمان ڕوونە. خەونی لە مێژینەمان سەربەخۆبونە).

ئەمەی خوارەوە دەقی شیعرەکەی ئەبوبەکر عەلی-یە:

ساڵەهای ساڵ لەم خاکەدا برا بووین .

هاوخەبات و بۆ یەک پشت و پەنا بوین .

مێژوو دەڵێ لـە مێژە ئــەم وڵاتـــە .

کـانگای خێـرو بۆ یـەک بون و ئاواتە .

ئاشتی ڕێگاو ئامانجمـان دادپەروەری .

لێبوردەین ودەڕۆین بـەرەو ســەروەری .

لە ژێر یەک ئاڵای هاوبەشدا یەکسانین .

پێش هەرشتێ هاووڵاتـی کـوردستانین .

نیشتمانە ماڵی گەورەی هەموومـــــان .

هەرچی یەک بێت دین و زمان وبۆ چونمان .

مل کەچ ناکەیـن بۆ ستــەم و نــادادی .

قەت لانادەین لـەشـا ڕێگــای ئازادی .

هاوچارەنووس، ئایندەمان هاوبـەشـە .

باوەریشـمـان وەکو چیای سـەرکـەشە .

سەرچاوە: رووداۆ

ئەندامی کۆنسەی بەڕێوەبەرایەتی KCK جەمیل بایک دەستنیشانی کرد کە تاوەکو دان بە ھەبوونی نەتەوەیی کورداندا نەنرێت و ئازادییەکانیان بەرقەرار نەکرێت، بەھیچ شێوەیەک دەست لە چەک بەردانی گەریلا پەسەند ناکرێت و وتی:"گەریلا ھێزی پاراستنی گەلانە، ھیچ کەسێک ناتوانێ خیانەت لە ھیوا و ئاواتی ئەو کەسانە بکات کە ژیانیان لەپێناودا بەخت کردووە."

لە وتارێکیدا بۆ رۆژنامەکانی ئازادیا وەلات و یەنی ئۆزگیور پۆلیتیکا، ئەندامی کۆنسەی بەڕێوەبەرایەتی KCK جەمیل بایک، مژاری (ھۆکاری پێداگیری لەسەر دەست لە چەکبەردانی PKK)ی ھەڵسەنگاند بەتایبەتی لەم ماوەیەی دواییدا بەردەوام دەخرێتە رۆژەڤەوە.

بایک "ھەواڵەکانی لەچەکداماڵین" وەکو "کاری سەرەکی میدیاکان و ناوەندەکانی شەڕی دەروونی تورک لەم ساڵانەی دواییدا" لەقەڵەمدا و دەستنیشانی کرد کە AKP ھەندێک دەستەواژە و ھەروەھا کوردی بەکرێگیراو لەپێناو ئەو ئامانجەدا بەکاردەھێنێت و وتی:"دەیانەوێ بەمانە کەشێکی وەھا دروست بکەن کە بگوترێ گەریلا دەست لە چەک بەربدات، دەوڵەت کێشەی کورد چارەسەر دەکات."

بایک ئاماژە بەوە دەکات کە دەوڵەتی تورک لەم سیاسەتی لەچەک داماڵینەدا، ھێزە سیاسییەکانی باشووری کوردستانیش بەکاردێنێت و وتیشی:"لەبەر پێویستی پەیوەندییە سیاسی، دیبلۆماسی و ئابورییەکانیان لەگەڵ تورکیا، ناوبەناو لێدوانی وەکو (چیتر سەردەمی چەک بەسەر چووە) بەکاردێنن. بەھۆی ئەو پەیوەندییانە ھیچ کەسێکیش چاوەڕێی ئەوەیان لێناکات کە بڵێن بەرخۆدانی گەریلا مافی پاراستنی رەوایە"

ھەموو زیندەوەرێک مافی پاراستنی رەوای خۆی ھەیە

بایک لە بەردەوامی وتارەکەیدا ئاماژەی بەوە کردووە کە ھەموو زیندەوەرێک مافی پاراستنی رەوای خۆی ھەیە و دەستنیشانی دەکات کە پێویست بە بەرخۆدانە لەپێناو پاراستنی ئەو کۆمەڵگایەی ژیانی مرۆڤ واتادار دەکات و وتی:" ئاشکرایە کاتێک زیندەوەران رووبەڕووی پرسی مان و نەمان دەبنەوە، ھەموو جۆرە بەرخۆدانییەک دەکەن، مرۆڤیش چ لەپێناو ھەبوونی کەسێتی خۆیدا بێت یاخود ھەبوونی کۆمەڵگا بێت کە ھەبوونی خودی مرۆڤ دەستەبەر و واتادار دەکات، پەنا بۆ ھەموو جۆرە ھەل و دەرفەتێکی پاراستن دەبات. ئەمە مافی خۆپاراستنی رەوایە کە لەڕووی گەردونیشەوە دانی پێدا نراوە، کە تا ئێستاش تەنانەت بە بەرخۆدانی چەکداریشەوە ھەموو جۆرە بەرخۆدانییەک بۆ سەرکوتکراوان رەوایە و رەوایەتی پێدراوە بە مەرجێک زیان بە مەدەنییەکانی دەرەوەی شەڕەکە نەکەوێت. "

بایک وەبیری دێنێتەوە کە PKK لە ساڵی ١٩٩٤ دا سەبارەت بە جێبەجێکردن و مامەڵەکردن لەچوارچێوەی رێکەوتنی جنێفدا، راپۆرتێکی تایبەتی رادەستی لایەنی پەیوەندیدار لە نەتەوە یەکگرتووەکان کردووە و بەرخۆدانی PKKشی بەمشێوەیە پێناسە کرد:"ئەمڕۆ بەرخۆدانی چەکداری PKK بەتەواوی لەچوارچێوەی ھێڵی پاراستنی رەوادایە. PKK لەرۆژگاری ئەمڕۆی جیھاندا لایەنگری چارەسەری پرسەکانە بە رێگەی سیاسی و لەناو سیاسەتی دیموکراتییانەدا. بەڵام ئاماژەکردن بەمە بەواتای بەھیچ شێوەیەک نەبوونی بەرخۆدانی چەکداری نایەت. ئەگەر زیھنییەت و پرۆژەی چارەسەری سیاسی و دیموکراتییانە نەبێت و ھەبوونی کۆمەڵگایەک لەژێر ھەڕەشەدا بێت، ئەوا ئەو کۆمەڵگایە مافی رەوای خۆیەتی بە ھەموو شێوەیەک بەرخۆدانی بکات، تەنانەت بە بەرخۆدانی چەکداریشەوە. بە کورتییەکەی لەدنیادا کۆتایی بە گرنگی بەرخۆدانی چەکداری نەھاتووە، ئەگەر دەرفەت و ھەل و مەرجی چارەسەری دیموکراتییانە ھەبێت، ئەوا تاکە رێگا و بژارەک کە ھەبێت ھەڵبژاردنی رێبازی سیاسی دیموکراتییە."

AKP لە سوریا ھێزەکانی ئۆپۆزسیۆن پڕچەک دەکات

ئەندامی کۆنسەی بەڕێوەبەرایەتی KCK سەرنجی بۆسەر ناکۆکییەکانی ناوخۆی دەسەڵاتی AKP لەمەڕ پرسی سوریا راکێشا و نموونەیەکیشی بۆ روونکردنەوەی مەبەستەی ھێنایەوە و وتی:"AKP لەکاتێکدا کە دەیەوێت چەک بە گەریلا دابنێت، ھەر خودی خۆی سەرەکیترین ھێزە کە بەرھەڵستکارانی رژێم پڕچەک دەکات. ھەر خودی دەوڵەتی تورکە کە فڕۆکەخانە و ناوچەی ئاسمانی بۆ بەرھەڵستکارانی سوریا دەستەبەر کردووە. AKP لە سوریا بەدەستی بەرھەڵستکاران ھەموو جۆرە گێرەشێوێنییەک دەکات، ھەنووکە گەل ھەم لەژێردەستی زوڵمی دەوڵەتی سوریادا دەژی و ھەم لەژێر زوڵمی بەرھەڵستکارانی سوریادا کە AKP ھاوکاری و پشتیوانیان دەکات. حکومەتی AKP کاتێک کەسێکی مەدەنی بەھەڵە لەلایەن گەریلاوە دەپێکرێ، قیامەت ھەڵدەگرێ، کەچی ھەمان ئەو ھێزە بەرھەڵستکارە چەکدارانەی AKP ھاوکاری و پشتیوانیان دەکات لە چەندین شوێنی سوریادا بەچالاکییەکانیان بوونەتە ھۆکاری کوژرانی بەسەدان مەدەنی."

گەلی کورد تا ئازاد نەبێت دەست لە بەرخۆدان بەرنادا

بایک لە کۆتایی وتارەکەیدا سەرنج رادەکێشێتە سەر ئەو راستیینەیەی کە گەلی کورد ئێستاکە لە چەقبەستی بنبڕبووندایە و جەختیش لەسەر ئەوە دەکاتەوە کە بەر لە ھەموو شتێک گەلی کورد پەسەندی ناکات کە لە ھەلومەرجێکی وەک ئێستادا دەست لە چەک بەربدرێت و وتی:"تا دان بە ھەبوونی نەتەوەیی کورد دا نەنرێت و ئازادی بەرقەرار نەبێت، بەر لە ھەموو شتێک گەل پەسەند ناکات گەریلا دەست لە چەک بەربدات. تەنانەت لە ھەلومەرجێکدا کە کێشەی کورد تێیدا چارەسەر نەکرابێت، ئەمە وەکو تەسلیمییەت و خیانەت لەقەڵەم دەدات. رۆڵەکانی ئەم گەلە تا ئێستا لەپێناو ھەبوون و ئازادی گەلدا ژیانی خۆیاندا، ھیچ کەسێک ناتوانێ خیانەت لە ھیوا و ئاواتەکانی ئەو ژیانبەختکردووانە بکات."

دوای 20ی مانگ مام جەلال دەگەڕێتەوە هەرێمی کوردستان و لەئێستاشدا خەریکی بەهێزکردنی ماسوولکەکانیەتی. ئەمڕۆ سەعدی ئەحمەد پیرە، ئەندامی مەکتەبی سیاسی یەکێتی نیشتیمانی کوردستان بە (رووداو)ی راگەیاند"دوای 20ی ئەم مانگە مام جەلال، سەرۆک کۆماری عێراق و سکرتێری گشتی یەکێتی نیشتمانی کوردستان دەگەڕێتەوە هەرێمی کوردستان". سەعدی ئەحمەد پیرە کە هاوکات بەرپرسی مەڵبەندی سێی یەکێتی نیشتیمانی کوردستانە لە هەولێر زیاتر روونیکردەوە "مام جەلال 20 تا 22ی مانگ دەگەڕێتەوە شاری سلێمانی".

ئەمە لەکاتێکدایە رۆژی 2/7/2012 عادل موراد، سەرۆکی ئەنجوومەنی ناوەندی یەکێتی نیشتمانی کوردستان و یەکێک لە کەسە نزیکەکانی تاڵەبانی دەربـارەی کاتی گەڕانەوەی سەرۆک کۆماری عێراق، بە (رووداو)ی راگەیاندبوو "لەو بڕوایەدام تاوەکو 10 رۆژی دیکە مام جەلال بگەڕێتەوە". هەروەها مستەفا چاوڕەش، ئەندامی سەرکردایەتی یەکێتی نیشتمانی کوردستان، بەهەمان شێوە بە (رووداو)ی راگەیاند بوو کە "چاوەڕواندەکرێ مام جەلال لەماوەی دوو هەفتەی دیکەدا نەخۆشخانەکەی ئەڵمانیا بەجێبهێڵێت و بگەڕێتەوە هەرێمی کوردستان".

سەعدی ئەحمەد پیرە، ئەندامی مەکتەبی سیاسی یەکێتی نیشتیمانی کوردستان ئاماژە بەوەدەکات "نەشتەرگەرییەکەی مام جەلال سەرکەوتوو بووە و تەندروستیشی زۆرباشە، لەئێستادا راهێنان دەکات تاوەکو ماسوولکەکانی و ئەژنۆی بەهێز بکات".

دوای ئەوەی نەشتەرگەری ئەژنۆی چەپی بۆ کرا، جەلال تاڵەبانی، سەرۆک کۆماری عێراق، بە وەرزشکردن 15 کیلۆی لە کێشی لەشی دابەزاندووە. ئەمە وەک عادل موراد ئاماژەی بۆکرد. جەلال تاڵەبانی، لەدایکبووی ساڵی 1933یەو، لە رۆژی 17/6/2012 لە سلێمانییەوە بۆ چارەسەر بەرەو ئەڵمانیا بەڕێکەوت و لەوێ نەشتەرگەری ئەژنۆی بۆکرا.

سەرچاوە: رووداۆ

كۆفی ئه‌نان له‌ به‌غدایه‌ و هاتووه‌ له‌گه‌ڵ مالیكی باسی پرسی سووریا بكات ئه‌مڕۆ كۆفی ئه‌نان، نێردراوی نه‌ته‌وه‌ یه‌كگرتووه‌كان و كۆمكاری عه‌ره‌بی بۆ پرسی سووریا به‌مه‌به‌ستی گفتوگۆكردنی دۆسیه‌ی سووریا له‌گه‌ڵ به‌رپرسانی عێراقدا، گه‌یشته‌ شاری به‌غدا.

پاش كۆبوونه‌وه‌كه‌ی له‌گه‌ڵ به‌رپرسانی ئێرانیدا كه‌ دوێنێ به‌ سه‌ردانێك گه‌یشته‌ تاران، كۆفی ئه‌نان كۆمه‌ڵێك خاڵ و میكانیزمی بۆ كۆتاییهێنان به‌ قه‌یرانی سووریا گه‌ڵاڵه‌ كردووه‌ و، له‌گه‌ڵ سه‌رۆك وه‌زیرانی عێراقدا تاوتوێی ده‌كات.

بەئامادەبوونی مەسعود بارزانی سەرۆکی ھەرێمی کوردستان و کۆسرەت رەسول عەلی جێگری سەرۆکی ھەرێم و سەرۆکی حکومەتی ھەرێم و راوێژکار و سەرۆکی ئەنجومەنی ئاسایشی ھەرێمی کوردستان، لەرێورەسمێکدا بەشێوەیەکی رەسمی ئەنجومەنی ئاسایشی ھەرێم راگەیەنرا. لەو ڕێوڕەسمەدا سەرۆکی ھەرێمی کوردستان لەوتەیەکدا خۆشحاڵی خۆی دەربڕی بەدامەزراندنی ئەم ئەنجومەنەو ستایشی خۆیشی ئاراستەی سەرجەم دەزگاو دامەزراوە ئاسایش پارێزەکانی ھەرێمی کوردستان کرد لەھەمبەر شەونخونی و ھەوڵە بەردەوامەکانیان بۆ بەرقەرارکردنی ئارامی لەھەرێمی کوردستاندا، ھەروەھا داواکاربوو کە ھەوڵی زیاتر بدەن لەپێناو چەسپاندنی دڵنیایی لەنێو دڵی ھەر تاکێکی ھەرێمی کوردستان.
دواتر لەوتارێکدا مەسرور بارزانی ڕاوێژکاری ئەنجومەنی ئاسایشی ھەرێمی کوردستان ئاماژەی بە کار و چالاکیەکانی رابردووی دامەزراوە ئەمنییەکانی کوردستان کرد و وتی: "لەپێناو بەرقەرار کردنی ئاسایشی ھەرێمی کوردستاندا ھەوڵ و کۆشش و باجی زۆرمانداوە و لەو کاروانەش بەردەوام دەبین" وتیشی: "ھەر ئەو کۆششانەش بووەتە ھۆکاری ئەوەی ھەرێمی کوردستان وەک ناوچەیەکی ئارام لەعێراقدا دەربکەوێت". لەلایەن خۆشیەوە دکتۆر خەسرەو گوڵ محەمەد سەرۆکی ئەنجومەنی ئاسایشی ھەرێمی کوردستان و جێگری ڕاوێژکاری ئەنجومەنی ئاسایشی ھەرێمی کوردستان لە وتارێکدا، وتی: "دەستکەوتێکی مەزنە کە بۆ یەکەمجارە لەمێژووی کورددا ئەنجوومەنێکی لەم چەشنە دادەمەزرێت و دەبێتە چەترێکی فراوان بۆ کۆکردنەوەی تواناکانی بواری ئەمنی و ھەواڵگری لەھەرێمی کوردستاندا".
k.tv

رەنگی ئاوی دەریاچەی ورمێی رۆژهەڵاتی کوردستان سوور بووە و لایەنگرانی ژینگەپارێزی سووربوونی رەنگی ئاوی دەریاچە به دەستپێکی لەناوچوونی دەزانن. چەند ساڵێکە لە وەرزی هاویندا بۆ ماوەیەک رەنگی ئاوی دەریاچەی ورمێ سوور دەبێت. دەریاچەی ورمێ گەورەترین دەریاچەی کوردستان و دووەمین دەریاچەی ئاوی سوێری جیهانه که له باکووری رۆژهەڵاتی کوردستان هەڵکەوتووە.

ئەو دەریاچەیە به 120 دووڕگەی گەورە و بچووک، ژینگەیەکی هێمن بۆ جۆرەها ئاژەڵ و پەلەوەری نایابه و ساڵانە سەدان گەشتیاری بیانی و ناوخۆیی بۆلای خۆی رادەکێشێت. بەڵام لە 15 ساڵی رابردوو بەهۆی هەندێک سیاسەتی نادروستی بەرپرسان و کەم بوونەوەی رێژەی باران بارین، چوونە سەرەوەی پلەی گەرما، زیاتربوونی ئاستی بە هەڵم بوونی ئاوی دەریاچه و کەم بوونەوەی ئاوی ئەو رووبارانەی دەڕژێنه ناوی، دەریاچەی ورمێ لە مەترسی وشکبووندایە.

مەسعوود بارزانی و وەفدێک لە کوردانی ڕۆژئاوا کە سەرۆکی پەیەدەشیان لەگەڵ دابوو، چاویان پێککەوت و چۆنیەتی پتەوترکردنی ڕیزەکانی کورد لە ڕۆژئاوای کوردستانیان تاووتوێ کرد. ئەمڕۆ شەممە، ٧ی جولای ٢٠١٢ی زایینی، "مەسعود بارزانی"، سەرۆکی هەرێمی باشووری کوردستان، لە سەلاحەدین دیداری لەگەڵ وەفدێکی پێکهاتوو لە "سالح موسلیم"، سەرۆکی پارتی یەکێتی دێمۆکراتیک[PYD] وئەندامانی ئه‌نجوومه‌نی گه‌لی رۆژئاوا، "سینه‌م محه‌مه‌د" و "عه‌بدولسه‌لام ئه‌حمه‌د" کرد.
دیدارەکە نزیک بە سێ کاتژمێری خایاندووە و بە گوێرەی ئاژانسەکانی هەواڵ لە باشووری کوردستان، ڕۆژەڤی سەرەکی گفتگۆی نێوان دوو لایەن، ڕەوشی سووریا و پێوەندی هێزە کوردییەکانی ئەو پارچە بووە. هەر ئەمڕۆ، وەفدی کوردانی ڕۆژئاوا، سەردانی گۆڕی "مەلا مستەفای بارزانی"یان کرد و دەگوترێ سبەی یەکشەممەش، چاویان بە "فواد حوسێن" سەرۆکی دیوانی سەرۆکایەتی هەرێمی کوردستان دەکەوێ.
کوردانی ڕۆژئاوای کوردستان، دوو ڕوانگەی جیاوازیان بەرانبەر بە شۆڕشی سووریا و چۆنیەتی مامەڵەکردن لەگەڵ ئەو دۆخەی ئێستای ئەو وڵاتە هەیە و هەر بۆیەش دوو ڕێکخراوی چەترئاسایان دامەزراندووە کە هەر یەک پێداگری لە سەر شێوازێک لە چارەسەری و ئاراستەی سیاسی لەم پارچە دەکەن. پەیەدە، کە بە ڕێکخراوەیەکی نزیک لە پارتی کرێکارانی کوردستان دەناسرێ، لەگەڵ چەند لایەنی تری کوردی "مەجلیسی گەلی ڕۆژئاوا"یان سازکردووە و لایەنەکانی تر کە نزیک لە پارتی دێمۆکراتی کوردستان و یەکێتی نیشتمانین, "ئەنجومەنی نیشتمانی کورد لە سووریا"یان دامەزراندووە. لە مانگەکانی ڕابردوودا، کۆمەڵێک ئاڵۆزی لە نێوان ئەو دوو لایەنە دا، ڕاپۆرت کراوە.

رووداو- KRG

بەپێی گرێبەستێک، حکومەتی هەرێمی کوردستان زەوی دەبەخشێتە کونسوڵخانەی گشتی ئەمەریکا لە هەرێمی کوردستان. ئه‌مڕۆ شه‌ممه‌، فه‌لاح مسته‌فا، به‌رپرسی په‌یوه‌ندییه‌كانی ده‌ره‌وه‌ی حكومه‌تی هه‌رێمی كوردستان له‌ رێوره‌سمێكی تایبه‌تدا گرێبه‌ستێكی سه‌باره‌ت به‌ به‌خشینی زه‌وی بۆ دروستكردنی باڵه‌خانه‌ی كونسوڵگه‌ری گشتی ئه‌مه‌ریكا له‌هه‌رێمی کوردستان له‌گه‌ڵ ئه‌لیكس لاسكاریس، كونسوڵی گشتی ویلایه‌ته‌ یه‌كگرتووه‌كانی ئه‌مریكا له‌ هه‌رێمی کوردستان و ژماره‌یه‌ك له‌ به‌رپرسانی كونسوڵگه‌ری ئه‌م وڵاته‌ واژۆ كرد.

ئه‌لیكس لاسكریس كه‌ ئه‌مڕۆ وه‌ك كونسوڵی گشتی ویلایه‌ته‌ یه‌كگرتووه‌كانی ئه‌مه‌ریكا له‌ هه‌رێمی کوردستان كۆتایی به‌ كاره‌كانی دێت، له‌ كاتی واژۆكردنی ئه‌م گرێبه‌سته‌ له‌ گوته‌یه‌كدا وێڕای سوپاسی سه‌ركردایه‌تی سیاسی و حكومه‌تی هه‌رێمی كوردستانی كرد بۆ هاوكاری و پشگیرییان، رایگەیاند "دابینكردنی زه‌وی به‌مه‌به‌ستی بیناكردنی باره‌گای كونسوڵگه‌ری ئه‌مه‌ریكا له‌ هه‌رێمی کوردستان و واژۆكردنی ئه‌م گرێبه‌سته‌ هه‌نگاوێكی دیكه‌یه‌ بۆ په‌ره‌پێدانی په‌یوه‌ندی دیپلۆماسی نێوان ئه‌مریكا و هه‌رێمی كوردستان و ته‌واوی عیراق".

فه‌لاح مسته‌فا ،به‌رپرسی په‌یه‌وه‌ندییه‌كانی ده‌ره‌وه‌ی حکومەتی هەرێمی کوردستان رۆڵی ئه‌لیكس لاسكاریسی وه‌كو یه‌كه‌مین كونسوڵی گشتی ئه‌مه‌ریكا له‌ هه‌رێمی كوردستان له‌ به‌ره‌وپێشبردنی په‌وه‌ندییه‌كانی نێوان هه‌ردوولا به‌رز نرخاند و هیوای سه‌ركه‌وتنی له‌ ئه‌رك و كاری داهاتوویدا بۆخواست.