بەناویی خودای گەۆرە

هاۆنیشتیمانانی بەرێز

خەلکی موسلمانی کوردستان

بزووتنەوەی کۆماریخوازی رۆژهەلاتی کوردستان، زۆر خۆی بە بەختەوەر دەزانێ، تاکوو لە پەیوەندی دەگەل دەستپێکی مانگی پیرۆزی رەمەزان، سلاۆ و پیرۆزبایی گەرمی خۆی، ئاراستەی سەرجەم خەلکی موسلمانی کوردستان بە گشتی و خەلکی رۆژەهەلاتی کوردستان بە تایبەتی، بکات.

مانگی رەمەزان، مانگی لێبوردن، تەبایی، هاۆدەردی، ئاشتی، خۆشەویستی، وە هاۆژینی بەئاشتی دەگەل نێزیکان و دەرودراۆسێ و گشت کۆمەلگای یەکتاپەرستی جیهانە، بۆیە لەم مانگە پیرۆزەدا لەسەر گشت لایەکمان فەرزە، بۆ قەبوولی عیبادەتمان و دەستەبەرکردنی رەزایەتی ئیلاهی، پێویستە وە دەبێ لەگشت بووارگەلی هزرەوانی، گووتاری، کرداری‌ ورەفتاری دا، خۆمان بە ئەسلی:" ئەمر بە مەعروف و نەهی لە منکر" دەنگاۆ و رەنگاۆ، وە رازاوە بکەیین، تابەلکوو ئینشاللا خوودای گەۆرە عیبادەتی گشت لایەک، قەبوول بکات.

هیوادارین مانگێ رەمەزان، مانگێگی پر لە خۆشی، سەلامەتی و خێر و بەرەکەت بێت بۆ گشت لایەک

شوورای هاۆئاهەنگی بزووتنەوەی کۆماریخوازی رۆژهەلاتی کوردستان

روسیا بۆ سێیەم جار دژی پڕۆژە بڕیارێکی ئەنجوومەنی ئاسایشی نەتەوە یەکگرتووەکان وەستاوە و مافی ڤیتۆی بەکار هێنا. چەند کاتژمێرێک پێش ئێستا، سەرەڕای ناڕەزایەتی توندی وڵاتانی رۆژئاوایی، هەر یەک لە روسیا و چین دژی خستنە ناوی سووریا لە بەندی 7ی نەتەوە یەکگرتووەکان وەستانەوە و پڕۆژە بڕیارەکەی ئەنجوومەنی ئاسایشی نەتەوە یەکگرتووەکان دژی سووریایان ڤیتۆ کرد.

نوێنەری بەریتانیا لە ئەنجوومەنی ئاسایشی نەتەوە یەکگرتووەکان سەبارەت به ڤیتۆی روسیا رایگەیاند "بەکارهێنانی ڤیتۆ دەبێتە هۆی بەردەوام بوونی کوشتاری رژێمی ئەسەد دژی خەڵکی بێ تاوانی سووریا". ناوبراو گوتیشی "روسیا بەو کارەی دەرفەتێکی زیاتر به رژێمەکەی ئەسەد دەدات تا خەڵک سەرکوت بکات".

بەپێی ئەو پڕۆژە بڕیارە، ئەگەر رژێمی ئەسەد بەردەوام با لە کوشتنی خەڵکی بێ تاوان و پابەندی بڕیارەکانی نەتەوە یەکگرتووەکان نەبا، ئەنجوومەنی ئاسایشی رێکخراوی نەتەوە یەکگرتووەکان مافی بەکارهێنانی هێز لە دژی سووریای پێدەدرا. نوێنەری فەرەنسا لە ئەنجوومەنی ئاسایشی نەتەوە یەکگرتووەکانیش لەو بارەوە رایگەیاند "مێژوو دەیسەلمێنێ کە روسیا و چین هەڵەیان کردووە و بەو کارە تەنها ماوەیەکی زیاتر لەبەر دەستی رژێمی ئەسەد دادەنێن تا کوشتاری خەڵک بکەن".

ئەوە بۆ سێیەم جارە روسیا و چین دژی پەسەندکردنی پڕۆژە بڕیارێک دژی رژێمی بەشار ئەسەد دەوەستنەوە.

لێژنەکانی پاڕاستنی گەل کۆنتڕۆڵی شاری کۆبانی رۆژئاوای کوردستانیان بەدەست گرتووە و سەرۆکی پارتێکی رۆژئاوای کوردستانیش هەواڵەکە پشتڕاست دەکاتەوە. ساڵح موسلیم، سەرۆکی پارتی یەکێتی دیموکرات PYD، لە لیدوانێکدا بۆ (رووداو) رزگارکردنی کۆبانی پشتراست کردەوە.

بە گوێرەی راگەیەندراوی یەکێتی هەماهەنگی شۆرشی سووریا "لێژنەکانی پاڕاستنی گەل، بەشێوەیەکی تەواو کۆنتڕۆڵی سەرجەم پێگە و بارەگاکانی رژێمی سووریا لە کۆبان-نیان کردووە". لێژنەکانی پاڕاستنی گەل تا کاتژمێر 2 مۆڵەتیان بە کارمەندانی بارەگا ئەمنییەکانی کۆبانی داوە تا شارەکە بەجێ بهێڵن.

سەرچاوە: رووداۆ

سکرتێری پارتی ئازادی کورد لە سووریا دەڵێ "ئێستاکە زووە بڕیار لەسەر کۆنتڕۆڵکردنی ناوچە کوردییەکان بدرێت، بەڵام ئامادەکاری پێویستی بۆ دەکرێت". ئەمڕۆ چوارشەممە، تەقینەوەکی بەهێز باره‌گای ئاسایشی نه‌ته‌وه‌یی سووریا له‌ دیمه‌شقی هەژاند و بەهۆیەوە داود عەبدوڵڵا راجیحه‌، وه‌زیری به‌رگری سووریا، ئاسف شه‌وكه‌ت، جێگری وه‌زیری به‌رگری و جێگری سه‌رۆك ئه‌ركانی سوپای سووریا و زاوای بەشار ئەسەد و حەسەن تورکمانی، سه‌رۆكی شانه‌ی ئیداره‌كردنی قه‌یرانه‌كان كوژران.

خەیرەدین موراد، سکرتێری پارتی ئازادی کورد لە سووریا لە لێدوانێکی تایبەتدا بۆ (رووداو) رژێمی ئەسەدی لە رووداوەکانی ئەمڕۆی دیمەشق به بەرپرسیار زانی و رایگەیاند "کوژرانی هەر مرۆڤێک لە هەر ئاستێکدابێ و سەر بە هەر لایەنێکی سیاسی بێ جێگای دڵگرانییە و زیانێکی گەورە به خەڵکی سووریا دەگەیەنێت. ئەو کوشتن و بڕینانە بێ سووچ و بێ هۆیە، تەنها رژێمی سووریایە کە سوورە لەسەر بەکارهێنانی رێگاچارەی سەربازی بۆ چارەسەری کێشەکان و هەوڵدەدات لەرێگەی کوشتن و تۆقاندن درێژە به دەسەڵاتی خۆی بدات".

خەیرەدین موراد سەبارەت به رەوشی ناوچە کوردییەکان گوتی "تا ئێستا رەوشی رۆژئاوای کوردستان وەک ناوچەکانی ناوەند و خوارووی سووریا ئاڵۆز نەبووە، بەڵام گرفت و کێشەیەکی زۆر لە ناوچە کوردییەکان هەیە. هەژاری و برسێتی باڵی بەسەر رۆژئاوای کوردستاندا کێشاوە و لەڕووی ئابوورییەوە بارودۆخ زۆر لەبار نییە. بەڵام ئازادی خەڵکی کورد بە بەراورد لەگەڵ رابردوو زیاتر بووە". سکرتێری پارتی ئازادی کورد لە سووریا گوتیشی "چالاکی ئاشتی خوازانە و دیموکراتیانەی گەلی کورد لە رۆژئاوای کوردستان بەردەوامە. سەڕەرای ئەوەی رەوشی کورد لە سووریا بەشێکە لەو رەوشە گشتییەی کە ئێستا باڵی بەسەر ئەو وڵاتەدا کێشاوە بەڵام گرتن و کوشتن لە رۆژئاوای کوردستان بە بەراورد لەگەڵ ناوەند و خوارووی سووریا لە ئاستیکی زۆر کەمدایە".

خەیرەدین موراد سەبارەت بە کۆنتڕۆڵی رۆژئاوای کوردستان لەلایەن هێزە کوردییەکانەوە رایگەیاند "ئێستاکە زووە بڕیار لەسەر کۆنتڕۆڵکردنی ناوچە کوردییەکان بدرێت، بەڵام بەدڵنیاییەوە کورد ئامادەکاری پێویست دەکات تا ئەگەر رژێمی سووریا رووخا ئیدارەیەکی کوردی پێک بێنێت و بەڕێوەبردنی ناوچەکە بەدەست بگرێت".

خەیرەدین موراد لە ساڵی 1949 لە (ترپەسپی) سەر بە قامیشلوی رۆژئاوای كوردستان لەدایكبووە.ساڵی 1966 چۆتە نێو رێكخستنەكانی پارتی چەپی كورد لە سووریا. ئێستا سكرتێری پارتی ئازادی كورد لە سووریا و ئەندام دەستەی جێبەجێكردنی ئەنجوومەنی نیشتمانی كورد لە سووریایە.

سەرچاوە: رووداۆ/ ساکار عەبدوڵڵازادە

دادگای تاوانە قورسەکان لەشاری ئامەد، بڕیاریدا سزا لە سەر پەرلەمانتاری کورد لەیلا زانا هەڵبگرێت. دوێنێ سێ شەممە، جارێكی دیکە دادگای تاوانە قورسەكانی توركیا لەسەر دۆسیەی لەیلا زانا كۆبووەوە و بەپێی پاكێجی سێیەمی چاكسازی لەدادگای توركیا، بڕیارەكەی پێشوویان پوچەڵكردەوە.

لەیلا زانا، پەرلەمانتاری سەربەخۆی شاری ئامەد لە پەرلەمانی توركیا، لە ئاهەنگی نەورۆزی ساڵی 2007 گوتبووی كورد سێ سەرۆكی هەیە، مام جەلال تاڵەبانی، كاك مەسعود بارزانی و عەبدوڵڵا ئۆجەلان. بەهۆی ئەو گوتانە، دادگای تاوانە قورسەكانی توركیا سزای دوو ساڵ زیندانی بەسەر لەیلا زانادا سەپاندبوو.

د. بەرهەم ساڵح چەند کاتژمێرێک پێش ئێستا گەیشتە تاران و لە لایەن وەزارەتی دەرەوەی ئێران پێشوازی لێکرا. د. بەرهەم ساڵح، جێگری سکرتێری گشتی یەکێتی نیشتمانی کوردستان و سەرۆک وەزیرانی پێشووی هەرێمی کوردستان ئەمڕۆ سێ شەممە، گەیشتە تارانی پایتەختی ئیران و لە لایەن شاندێکی وەزارەتی دەرەوەی ئێران و باڵیۆزی عێراق لە ئێران و باڵیۆزی عێراق لە تاران پێشوازی لێکرا.

د. بەرهەم لە بینای وەزارەتی دەرەوەی ئێران، لەگەڵ عەلی ئەکبەر ساڵحی، وەزیری دەرەوەی ئەو وڵاتە کۆبووەوە و کۆبوونەوەکە تا ئێستاش بەردەوامە. تا ئێستا هیچ زانیارییەک لەسەر ناوەڕۆکی کۆبوونەوەکە رانەگەیەندراوە.

پێشتر نازم دەباغ، نوێنەری حکومەتی هەرێمی کوردستان لەو بارەوە به (رووداو)ی راگەیاندبوو "ئەو سەردانە 4 رۆژ دەخایەنێت و بە مەبەستی پتەوکردنی پەیوەندییەکانی نێوان یەکێتی نیشتمانی کوردستان و کۆماری ئیسلامی ئەنجام دەدرێت".

د. بەرهەم ساڵح، سەرۆک وەزیری پێشووی هەرێمی کوردستان لە کابینەی شەشەمدا دوو جار بە فەرمی سەردانی کۆماری ئیسلامی ئێرانی کردووە و لەگەڵ گەورە بەرپرسانی ئەو وڵاتە کۆبووەتەوە. سەردانەکەی د. بەرهەم دوای سەردانێكی چوار رۆژەی نەوشیروان مستەفا، رێكخەری گشتی بزووتنەوەی گۆڕان دێت بۆ كۆماری ئیسلامی ئێران کە لە 29/6/2012 ئەنجام درا.

سەرچاوە: رووداۆ

تا ئێستا خوێندنەوەی دووەم بۆ سروودی نیشتمانی "ئەی رەقیب" نەکراوە وچەند لایەنێکی ناو پەرلەمانی کوردستان دژی بەیاسایی کردنی ئەو سروودە دەوەستنەوە.

گۆران ئازاد، ئەندامی لێژنەی یاسایی پەرلەمانی کوردستان لەو بارەیەوە به (رووداو)ی راگەیاند "یەکەمین هۆکار حیزبە ئیسلامییەکانن کە تێبینیان لەسەر ئەو سروودە هەیە و دەتوانم بڵێم کە هەندێک لە گرووپە ئیسلامییەکان ناڕەزایەتی توندیشیان لە بەرامبەر رەستەیەکی ناو سروودی ئەی رەقیب هەیە". ئەو بەشەی سروودی ئەی رەقیب کە دەڵێت (دینمان، ئایینمان ھەر نیشتمان) بووەتە جێگەی رەخنەی لایەنە ئیسلامییەکان و تەنانەت بە کوفری دادەنێن.

عەلی باپیر، ئەمیری کۆمەڵی ئیسلامی لە یەکەم دانیشتنی پەرلەمانی کوردستاندا لە ساڵی 2005، لەکاتی گوتنی سروودی ئەی رەقیب هەڵنەستایەوە و لە وەڵامی هۆکارەکەیدا ئەی رەقیبی به کوفر و هەڵەی مێژوویی نێوبرد و گوتی "من ناتوانم رێز لە سروودێک بگرم کە پێچەوانەی عەقیدە و دینی خەڵکی کوردستانە".

لە لایەکی دیکەوە، هێزە سکۆلارەکانیش تێبینیان لەسەر ئەی رەقیب هەیە و پێیان وایە ئەو سروودە لەگەڵ قۆناخی نوێ و سەردەم ناگونجێت. گۆران ئازاد لەو بارەوە دەڵێت "هێزە سکۆلارەکانی ناو پەرلەمانی کوردستان تێبینیان لەسەر سروودی ئەی رەقیب هەیە و پێیان وایە ئەو سروودە دەکرێ وەک سروودێکی نەتەوەیی بناسێنرێت بەڵام ناکرێ وەک سروودێکی نیشتمانی پەسەند بکرێت . هەروەها دەقی شێعرەکە کۆنە و لەگەڵ سەردەمی نوێ ناگونجێ و رۆحێکی سەربازی و شۆرشگێڕی بەسەردا زاڵە و کەمتر رۆحی تەبایی و پێکەوە ژیانی تێدایە. بۆیە بەپێویستی دەزانن شیعرێکی نوێ پێشکەش بکرێ و بەشێک لە رۆشنبیرانیش پشتیوانیان لەو رایە کردووە ".

جگە لە تێبینی لایەنە ئیسلامی و سکۆلارەکان، نەتەوەکانی هەرێمی کوردستانیش تێبینیان لەسەر ئەی رەقیب و تەنانەت ئاڵای کوردستان هەیە و دەڵێن هێمای خۆیان لە سروود و ئاڵای کوردستاندا نابیننەوە. بە گوتەی گۆران ئازاد "نەتەوەکانی دی دەڵێن ئەگەر هەرێمی کوردستان پێگەی پێکەوە ژیانی ئاشتیانەی نەتەوەکانە و تەنها کورد تێیدا ناژیت پێویستە سروودی نیشتمانی هەرێمی کوردستان رەنگدانەوەی سەرجەم نەتەوەکانی ناو هەرێمی کوردستان بێت".

لە 14/6/2011 پەرلەمانی کوردستان یەکەم خوێندنەوەی بۆ بەیاسایی کردنی سروودی ئەی رەقیب کرد بەڵام بەهۆی تێبینی هەندێک لایەن و جیاوازی روانگەکان، نەخرایە دەنگدانەوە.

بە گوتەی گۆران ئازاد، ئەندامی لێژنەی یاسایی پەرلەمان "ئەو کۆسپانە بەردەوامە و یان دەبێ گوێ بەو تێبینیانە نەدرێت و سروودی ئەی رەقیب وەک سروودی نیشتمانی پەسەند بکرێت یان خود سەرنج و تێبینییەکان بەهەند وەربگیرێت و سروودێکی دی هەڵبژێردرێت". ناوبراو گوتیشی "بۆ ئەو مەبەستە چەند سروودێک پێشکەش کراوە و خوێندنەوە و لێکۆڵینەوەیان بۆ دەکرێت".

سروودی ئەی رەقیب لەساڵی 1934 لەلایەن دڵداری شاعیر نووسراوە و لە لایەن حیزبی هیواوە لەساڵی 1943 لە شاری كەركووك گوتراوەتەوە . دواتر لە ساڵی 1945 لە مەهاباد، لەلایەن کۆماری کوردستانەوە وەک سروودی نیشتمانی کۆمار هەڵبژێردرا و لەدوای هاتنەسەر کاری یەکەم کابینەی حکومەتی هەرێمی کوردستان تا ئێستا لە بۆنە و رێورەسمە فەرمییەکان دەگوترێتەوە.

سروودی ئەی رەقیب یەکێک لە دەگمەن هێما نیشتمانییەکانی هاوبەشی کوردە کە لە لایەن خەڵک و پارتە سیاسیەکانی هەرچوار پارچەوە قبوڵ کراوە و لە سەرجەم بۆنە نەتەوەییەکاندا دەگوترێتەوە. هەوڵدان بۆ گۆڕینی سروودی ئەی رەقیب لە کاتێکدایە کە سەرکردایەتی سیاسی کورد لە هەرێمی کوردستان هەوڵ بۆ دروست کردنی گوتارێکی نەتەوەیی لەنێوان کوردی هەر چوار پارچە دەدات.

سەرچاوە: 

ساکار عەبدوڵڵازادە

رووداو- هەولێر

درێژترین پیاوی جیهان، كە كوردێكی دانیشتووی شاری ماردینی باكووری كوردستانە، حەزدەكات سەردانی هەرێمی كوردستان بكات، بەڵام دەڵێ "لەبەر هەژاری و دەستكورتی ناتوانم".
سوڵتان كۆسەن، كە وەك درێژترین پیاوی جیهان ناوی چووەتە نێو كتێبی گینس بۆ ژمارە پێوانەییەكان، لەلایەن كەناڵەكانی راگەیاندنی توركیاوە بە تورك ناودەبرێت، بەڵام ئەو رەتیدەكاتەوە تورك بێت و دەڵێت "دڵگران نابم كاتێك رۆژنامەكان دەنووسن درێژترین پیاوی جیهان توركە، بەڵام پێمخۆشە بڵێن كوردە". سوڵتان لە هەڤپەیڤینێكدا لەگەڵ (رووداو) دەڵێ كێشەی هەرە گەورەی دەستنەكەوتنی كچێكە تاوەكو بیكاتە هاوسەری خۆی، هەر لەبەر باڵاكەشی ناتوانێ هیچ كارێك بكات.

سەرچاوە: رووداۆ ماردین

دایکی ئەو گەنجەی کە بووە هۆی هەڵگیرسانی شۆڕش لە تونس و وڵاتانی عەرەبی، له‌ ڕۆژی هه‌ینیـیه‌وه‌ ده‌سـتگیرکراوه‌. مونزر بلزیافی گوته‌بێژێـکی وه‌زاره‌تی دادی تونس لەو بارەوە رایگەیاند "مه‌نوبـیه‌ بۆ زیندانی قه‌فسه‌ ڕه‌وانه‌ کراوه‌ و چاوه‌ڕوان‌ ده‌کرێت ئەمڕۆ دووشه‌ممه‌‌ له‌ به‌ره‌م دادگا ئاماده‌بێت تاوه‌کو له‌ باره‌ی ڕووداوه‌که‌وه‌ لێـکۆڵینه‌وه‌ی له‌گه‌ڵدا بکرێت".

مه‌نوبـیه‌ی ته‌مه‌ن 60 سـاڵ، دایکی محه‌ممه‌د بوعەزیزی کاتێـک سه‌ردانی دادگای سیدی ئه‌بوزێدی کردووه‌ بۆ ته‌واوکردنی مامه‌ڵه‌ی شه‌هیدیی کوڕه‌که‌ی دووچاری شه‌ڕه‌ قسه‌ بووه‌ له‌گه‌ڵ فه‌رمانبه‌رێـکدا و به‌پـێـی یاسا ده‌سـتگیرکراوه‌. سـالم که‌ کوڕێـکی دیکه‌ی مه‌نوبـیه‌یه‌، گوتوویه‌تی دایکی له‌گه‌ڵ فه‌رمانبه‌رێـک نه‌ک دادوه‌رێـک تووشی شه‌ڕه‌ قسه‌ بووه‌ "له‌ سه‌ره‌تادا فه‌رمانبه‌ره‌که‌ سووکایه‌تی به‌ دایکم کردووه‌ و دواتر پاڵی پـێوه‌ناوه‌".

شاهێتحاڵان و فه‌رمانبه‌رانی دادگاکه‌ش ده‌ڵێن دایکی محه‌ممه‌د بوعەزیزی له‌ سه‌ره‌تادا له‌گه‌ڵ فه‌رمانبه‌رێـکدا ده‌مه‌ قاڵێی بووه‌ و پاشـان توڕه‌ بووه‌ و هاتووه‌ته‌ ده‌رێ و ڕێـگه‌ی له‌ دادوه‌رێـک گرتووه‌ بچێته‌ ژوری سه‌رۆکی دادگاوه‌ و ده‌ستی به‌ جنێودانی کردووه‌ و هه‌روه‌ها قسه‌ی ناشیرینی کردووه‌ و هه‌ڕه‌شه‌ی سووتاندنی دادگاکه‌ی کردووه‌. نوره‌دین ئه‌لبحێری، وه‌زیری دادی تونس گوتوویه‌تی ده‌سـتگیرکردنی دایکی بوعەزیزی په‌یوه‌ندی به‌ سیسته‌می دادی وڵاته‌که‌وه‌ هه‌یه‌ و هیچ که‌سێـک له‌ سه‌روو یاساوه‌ نیـیه‌ و ته‌نانه‌ت ئه‌گه‌ر ئه‌و که‌سه‌ سه‌رۆکی ده‌وڵه‌ت بێت یان خودی وه‌زیری داد بێت.

محەممەد بوعەزیزی، فرۆشیارێکی گه‌ڕۆکی تونسی بوو کە لە 17/12/2010دا ئاگری له‌ خۆی به‌ردا و بووه‌ هۆی هه‌ڵـگیرسـاندنی شۆرش له‌ وڵاته‌که‌ی و وڵاتانی دیکه‌ی عه‌ره‌بی.

سەرچاوە: VOA

بانگه‌وازێکی به‌ په‌له‌ (گیانی که‌بوودوه‌ند له‌ مه‌ترسی دایه‌، ده‌بێ به‌ په‌له‌ فریای بکه‌وین(

بۆ:

سکرتیری گشتیی رێکخراوی نه‌ته‌وه‌ یه‌کگرتووه‌کان، به‌ڕیز بانکی مۆن!

شووڕای مافی مرۆڤی رێکخراوی نه‌ته‌وه‌ یه‌کگرتووه‌کان و لێکۆله‌ری تایبه‌تیی ئه‌و شووڕایه‌ بۆ بارودۆخی مافی مرۆڤ له‌ ئێران، به‌ڕێز ئه‌حمه‌د شه‌هید!

رێکخراوی نێونه‌ته‌وه‌یی لێخۆشبوون!

رێکخراوی چاوه‌دێری مافی مرۆڤ له‌ رۆژهه‌ڵاتی نێوه‌ڕاست!

سه‌رجه‌م ناوه‌ند و دامه‌زراوه‌ و که‌سایه‌تییه‌ نێوده‌وڵه‌تی و ناوچه‌ییه‌کانی داکۆکیکاری مافی مرۆڤ!

به‌ڕێزان!

زیاتر له‌ 50 رۆژ به‌ سه‌ر مانگرتنی محه‌ممه‌د سه‌دیق که‌بوودوه‌ند، دامه‌زرێنه‌ر و سه‌رۆکی رێکخراوی داکۆکی له‌ مافی مرۆڤ له‌ کوردستان، له‌ به‌ندیخانه‌ دا رابردوه‌. ئه‌و که‌سایه‌تییه‌ مرۆڤدۆسته‌ که‌ به‌ تاوانی داکۆکی له‌ مافی مرۆڤ و پێکهێنانی رێکخراوی مه‌ده‌نی بۆ ئه‌و ئه‌رکه‌ پیرۆزه‌، زیاتر له‌ 5 ساڵه‌ له‌ به‌ندیخانه‌ دایه‌، له‌ رۆژی 6ی جۆزه‌ردان)( 26ی مای)ه‌وه‌ وه‌ک ناره‌زایه‌تی ده‌ربڕین له ‌بارودۆخی خۆی له‌ به‌ندیخانه‌ دا، مانی له‌ خواردن گرتوه‌. جگه‌ له‌وه‌ی کاربه‌ده‌ستانی کۆماری ئیسلامی رێگای ئه‌وه‌یان پێنه‌داوه‌ بۆ چاره‌سه‌ری نه‌خۆشییه‌کانی خۆی بچێته‌ ده‌ره‌وه‌ی زیندان، ته‌نانه‌ت بۆ راگه‌یشتن به‌ نه‌خۆشیی لاعیلاجی کوڕه‌که‌ی، په‌ژمان، نه‌یانهێشتوه‌ وه‌ک مه‌ره‌خه‌سی له‌ زیندان بچێته‌ ده‌ر. به‌ڕێز که‌بوودوه‌ند ئه‌مڕۆ یه‌کشه‌مه‌ له‌ چاوپێکه‌وتنێک له‌ گه‌ڵ هاوسه‌ره‌که‌ی له‌ به‌ندیخانه‌ی ئێویندا، رای گه‌یاندوه‌ که‌ له‌کاتژمێر 22ی شه‌وی رابردووه‌، مانی له‌ خواردنی وشکیش گرتوه‌ و جیاوازیدانان له‌ نێوان به‌ندییه‌کانی سه‌ربه‌که‌مایه‌تییه‌کان و به‌ندییه‌کانی دیکه‌ی وه‌ک هۆی مانگرتن له‌ خواردنی وشک ناوبردوه‌.
به‌ گوێره‌ی زانیارییه‌کان و به‌ سه‌رنجدان به‌ مانگرتنی 50 رۆژه‌ی، باودۆخی جه‌سته‌یی و ده‌روونیی ئه‌و به‌ندییه‌، له‌و په‌ڕی خراپی دایه‌ و ئه‌گه‌ر هه‌نگاوی به‌ په‌له‌ بۆ ده‌رهێنانی له‌م بارودۆخه‌ هه‌ڵ نه‌گیرێ،مه‌ترسیی له‌ نێوچوونی هه‌یه‌.
هه‌ر بۆیه‌ داوا له‌ ئیوه‌ رێکخراو و که‌سایه‌تییه‌ مرۆڤدۆسته‌کان و هه‌موو ناوه‌ند ولایه‌نێکی خاوه‌ن نفووز ده‌که‌م هه‌نگاوی به‌ په‌له‌ هه‌ڵ بگرن و هه‌موو هه‌وڵی خۆتان بۆ گوشارهێنان بۆ سه‌رکۆماری ئیسلامیی ئێران به‌ کار بێنن، بۆ ئه‌وه‌ی رێز له‌ داواکانی که‌بوودوه‌ند بگرێ و نه‌ک هه‌ر هه‌لومه‌رجێکی باشتر بۆ راگرتنی له‌ به‌ندیخانه‌ دا پێک بێنێ، به‌ڵکوو له‌ زیندان ئازادی بکا و له‌مه‌ش زیاتر چاو به‌ سه‌رجه‌م سزا وبڕیاره‌کانی خۆی له‌ پێوه‌ندی له‌ گه‌ڵ چالاکانی سیاسی و مه‌ده‌نیی به‌ندکراو دا، بخشێنێته‌وه‌.
هه‌ر له‌م ده‌رفه‌ته‌ که‌لک وه‌رده‌گرم و له‌ رێگای بنه‌ماڵه‌ و هه‌ر که‌سێک پێوه‌ندیی به‌ به‌ڕێز که‌بوودوه‌نده‌وه‌ هه‌یه‌ ئه‌م په‌یامه‌ی خۆم و حیزبی دیموکراتی کوردستان به‌ به‌ڕیزیان راده‌گه‌یه‌نم که‌ بۆ ئه‌وه‌ی ویستی کۆماری ئیسلامیی ئێران نه‌یه‌ته‌ دی و بۆ ئه‌وه‌ی خه‌ڵکی کوردستان و ئێران ئه‌و رۆڵه‌ تێکۆشه‌ر و مرۆڤدۆسته‌ی خۆیان به‌ هاسانی له‌ ده‌ست نه‌ده‌ن، مانگرتنه‌که‌ی بشکێنێ.چونکه‌ به‌ دڵنیاییه‌وه‌ په‌یامی مانگرتنه‌که‌ی که‌ ناره‌زایه‌تیده‌ربڕین له‌ سته‌م و بێدادی کۆماری ئیسلامییه‌، به‌ گوێی بیروڕای گشتیی گه‌یشتوه‌. ئێستا ده‌مێنێته‌وه‌ سه‌ر خه‌ڵکی کوردستان و ئێران و ویژدانه‌ زیندووه‌کان له‌ راده‌ی جیهانی دا، ئه‌رکی خۆیان له‌ پێوه‌ندی له‌ گه‌ڵ بارودۆخی که‌بوودوه‌ند و داوا ڕه‌واکانی دا جێبه‌جێ بکه‌ن.
من به‌ ده‌رفه‌تی ده‌زانم بۆ ئه‌وه‌ی داوا له‌ هه‌موو حیزب و رێکخراوه‌ سیاسییه‌کان و دامه‌زراوه‌ مه‌ده‌نییه‌کانی کوردستان و ئێران بکه‌م هه‌ر چی زووتر پێکه‌وه‌ به‌ هاوده‌نگی وهاوهه‌نگاوی حه‌ره‌که‌تێکی گشتی و سه‌راسه‌ری له‌ راده‌ی کوردستان، ئێران و ده‌ره‌وه‌ی وڵات دا‌، به‌ پشتیوانی له‌ به‌ڕێز که‌بوود وه‌ند و به‌ مه‌به‌ستی گوشارهێنان بۆ سه‌رکۆماری ئیسلامی وه‌ڕێ بخه‌ین.
جارێکی دیکه‌ سه‌رنجی هه‌موو لایه‌کتان بۆ لای پێویستیی هه‌ڵگرتنی هه‌نگاوی به‌ په‌له‌ به‌ مه‌به‌ستی نه‌جاتدانی گیانی به‌ڕێز که‌بوودوه‌ند راده‌کێشم.

خالید عه‌زیزی
سکرتێری گشتیی
حیزبی دیموکراتی کوردستان
دوانیوه‌ڕۆی یه‌کشه‌مه‌
25ی پووشپه‌ڕی 1391
15ی جولای 2012