ته‌ورێز- 3 بوومه‌له‌رزه‌ ئێواره‌ی ئه‌مڕۆ چه‌ند ناوچه‌یه‌کی باکووری ڕۆژئاوای ئێران هه‌ڵکه‌وتوو له‌ پارێزگای ئازه‌ربایجانی ڕۆژهه‌ڵاتی هه‌ژاند. به‌پێی هه‌واڵی کوردپرێس: کاژێر 16 و 53 خوله‌ک بوومه‌له‌رزه‌یه‌ک به‌ گوڕی 6.2 پله‌ به‌ پێوه‌ری ڕێشته‌ر و دوو بوومه‌له‌رزه‌ی دیکه‌ له‌ کاژێر 17 و 4 خوله‌ک و 17 و 19 خوله‌ک به‌ گوڕی 6 و 4.7 پله‌ به‌ پێوه‌ری ڕیشته‌ر له‌ شاره‌کانی ئه‌هه‌ر و وه‌رزه‌قان سه‌ر به‌ پارێزگای ئازه‌ربایجانی ڕۆژئاوا ڕوویداوه‌.
هێشتاکه‌ هیچ هه‌واڵێک له‌مه‌ڕ زه‌ره‌ر و زیانی گیانی و ماددی ئه‌م بوومه‌له‌رزانه‌ بڵاو نه‌بۆته‌وه‌ و هێزه‌کانی فریاکه‌وتن و هه‌ڵسه‌نگاندنی زیانه‌کان له‌ ته‌ورێز و شاره‌کانی دیکه‌ له‌وان ئه‌رده‌بێڵ ڕه‌وانه‌ی ناوچه‌ی بوومه‌له‌رزه‌ کراون.
له‌ پارێزگاکانی ئازه‌ربایجانی ڕۆژئاوا، ئه‌رده‌بێڵ، زه‌نجان و گیلان هه‌ست به‌ ئه‌و بوومه‌له‌رزانه‌ کراوه‌. هاوکات هه‌واڵه‌کان باس له‌ پچڕانی کاره‌با و ته‌له‌فۆن له‌ شاری ته‌ورێز و ده‌وروبه‌ری ده‌که‌ن به‌هۆی ئه‌و بوومه‌له‌رزانه‌‌ و هه‌روه‌ها ترس و دڵه‌ڕاوکێی هاووڵاتیان له‌ دووباره‌بوونه‌وه‌ی. به‌پێی ڕاگه‌یێندراوی دامه‌زراوه‌ی ژێئۆفیزیکی زانستگای تاران له‌ یه‌ک حه‌وته‌ی دواییدا 5 بوومه‌له‌رزه‌ له‌و ناوچانه‌‌ تۆمار کراون. وه‌رزه‌قان و ئه‌هه‌ر له‌ 35 کیلۆمه‌تری شاری هه‌ریس و 510 کیلۆمه‌تری تارانی پایته‌خت هه‌ڵکه‌وتوون.

بریكارى وه‌زاره‌تى ناوخۆى حكومه‌تى هه‌رێمى كوردستان رایگه‌یاند، تاوه‌كو ئێستاش پێشمه‌رگه‌و سوپاى عێراقى له‌ زومار له‌یه‌كترى له‌سه‌نگه‌ردان‌و كێشه‌كه‌ كۆتایى نه‌هاتووه‌.

ئه‌نوه‌رى حاجى عوسمان، بریكارى وه‌زاره‌تى پێشمه‌رگه‌ى حكومه‌تى هه‌رێمى كوردستان به‌ (رووداو)ى "تاوه‌كو ئێستاش پێشمه‌رگه‌‌و هێزه‌ عێراقییه‌كان هه‌ر له‌جێگه‌ خۆیان له‌ زوومار‌و فیشخاپوور له‌ سه‌نگه‌ردان به‌رامبه‌ر یه‌كترى‌و هیچ گۆڕانكارییه‌ك له‌ هێزه‌كاندا رووینه‌داوه‌ كه‌ بڕیاربوو هێزه‌كان بكشێنه‌وه‌‌و جادده‌ هه‌ڵكه‌ندراوه‌كان وه‌ك خۆیان لێبكرێته‌وه‌". 27/7/2012 سوپای عێراق به‌ تانك‌و تۆپ‌و چه‌كى قورسه‌وه‌ چوونه‌ ناوچه‌ى زوومار‌و فیشخاپوور له‌ سنوورى هه‌رێمى كوردستان، پێشمه‌رگه‌ش له‌ دوورى 500 مه‌تر دژیان وه‌ستایه‌وه‌ به‌رامبه‌ریه‌ك كه‌وتنه‌ سه‌نگه‌ره‌وه‌، به‌ڵام كرده‌ى سه‌ربازى رووینه‌دا.

دواى چه‌ند رۆژێك له‌و گرژییه‌، 5/8/2012 لیژنه‌یه‌كى هێزى پێشمه‌رگه‌‌و سوپاى عێراقى به‌ ئاگادارى ئه‌مریكییه‌كان كۆبوونه‌وه‌‌و له‌سه‌ر 7 خاڵ رێككه‌وتن‌و بڕیاردرا به‌زووترین كات هێزه‌كان بكشێنه‌وه‌‌و بارودۆخه‌كه‌ وه‌ك خۆى لێبێته‌وه‌، جه‌بار یاوه‌ر، ئه‌مینداری گشتی وه‌زاره‌تی پێشمه‌رگه‌ش ئه‌وكاته‌ له‌ كۆنگره‌یه‌كی رۆژنامه‌وانیدا رایگه‌یاند "هاتنی هێزه‌كانی سوپای عێراقی بۆ ئه‌و ناوچانه‌ بۆ دۆخی ئالۆزی سووریا بوو، به‌ڵام بڕیاره‌ به‌ زووترین كات مالیكى‌و بارزانى واژۆ له‌سه‌ر 7 خاڵه‌كه‌ بكه‌ن‌و هێزه‌كان بگه‌ڕێنه‌وه‌ جێگه‌ى خۆیان". به‌پێى زانیارییه‌كانیش تاوه‌كو ئێستا مالیكى‌و بارزانى واژۆیان له‌سه‌ر 7 خاڵه‌كه‌ نه‌كردووه‌ بۆیه‌ هه‌ردوولا ئێستاش به‌رامبه‌ر یه‌ك له‌ سه‌نگه‌رداتن.

سەرچاوە: رووداۆ

گوتەبێژی هێزەکانی پاراستنی گەل دەڵێ شەمزینان لە ژێر کۆنتڕۆڵی سوپای تورکیا نەماوە و گەریلاکانمان سەرجەم سەربازگەکانی سوپا لە شەمزینانیان گەمارۆ داوە. بەختیار دۆغان، گوتەبێژی هێزەکانی پاراستنی گەل HPGی باڵی سەربازی پارتی کرێکارانی کوردستان PKK، لە هەڤپەیڤنێکدا لەگەڵ (رووداو) سەبارەت به شەڕ و پێکدادانەکانی ناوچەی شەمزینان رایگەیاند "شەمزینان ئێستا لەژێر کۆنتڕۆڵی سوپای تورکیا دەرچووە و لە لایەن گەریلاکانی HPG کۆنتڕۆڵ دەکرێت. زۆربەی سەربازگەکانی سوپای تورکیا لە شەمزینان لە لایەن گەریلاکانەوە گەمارۆ دراوە و ناتوانن لە شوێنی خۆیان بجوڵێن. هەلیکۆپتەر و فڕۆکە جەنگییەکانی تورکیاش چەندین جار ویستوویانە دەربازی ناوچەکە بن بەڵام بەهۆی هێڕشەکانی HPG پاشەکشەیان کردووە و تائێستا نەیانتوانیوە ئەو گەمارۆیە بشکێنن".

بەختیار دۆغان راشیگەیاند "شەڕی شۆڕشگێڕی گەریلاکان لە شەمزینان بەردەوامە و وێڕای هەوڵەکانی سوپای تورکیا، تا ئێستاش کۆنتڕۆڵی چەندین ناوچەی شەمزینان لەدەست HPGدایە. لە شەمزینان داگیرکاری بەرەو نەمان دەڕوات و ئێمە هەم گەلی خۆمان لەو ناوچەیە دەپارێزین و هەمیش خەباتی خۆمان بەدژی داگیرکاری لە کوردستان بەرفراوانتر دەکەین. پێویستە ئێمە ئەو تاکتیکە نوێیە لە زۆر ناوچەی دیکەی کوردستان بەڕێوە ببەین و زیاتر لە هەرکاتێک بەدژی سیاسەتی دژە کوردی حکومەتی تورکیا دەوەستینەوە".

لە 23/07/2012 گەریلاکانی هێزی پاراستنی گەل هێڕشێکی بەربڵاویان بۆسەر سەربازگەکانی ناوچەی شەمزینان دەست پێکرد و لەو رێککەوتەوە تا ئێستا شەڕ و پێکدادان لەو ناوچانە بەردەوامە. بەگوێرەی راگەیەندراوەکانی HPG، لە دەستپێکی شەڕە و پێکدادان لە شەمزینان نزیکەی 200 سەربازی سوپای تورکیا کوژراون، بەڵام وەزیری ناوخۆی تورکیا دەڵێ "8 سەربازی تورکیا و 114 گەریلا لەو هێڕشانەدا کوژراون".

گوتەبێژی هێزەکانی پاراستنی گەل HPG لەو بارەوە دەڵێت "ئێمە وەک HPG ئەنجامی هەموو شەڕ و پێکدادانەکان بۆ رای گشتی بڵاو دەکەینەوە بەڵام حکومەتی تورکیا جگە لە هێڕشی سەربازی، هێڕشێکی بەرفراوانی راگەیاندن بەدژی HPG بەڕێوە دەبات. تورکیا خۆی بە دووەمین هێزی ناتۆ دەزانێ بۆیە ناتوانێ ئاماری راستەقینەی کوژراو و برینداربووەکانی بڵاو بکاتەوە و ناچار ئاماری کوژراو و برینداربووانی HPG چەند بەرابەر دەکات و رای گشتی تورکیا سەبارەت به راستی رووداوەکان دەشێوێنێت".

ناوبراو راشیگەیاند "تورکیا رێژەی کوژراوانی خۆی لەو شەڕ و پێکدادانانەدا تەنها 8 کەس راگەیاندووە کە ئەوە دوورە لە راستی. گەریلاکان دەستیان بەسەر چەکی 20 کوژراوانی سوپای تورکیا داگرتووە و بەپێی ئەو 20 چەکە ناڕاست بوونی ئامارەکانی تورکیا بە باشی دەردەکەوێت. ئێستا 8 سەربازی سوپای تورکیا لەلایەن گەریلاکانەوە بەدیل گیراون".

لە 3/8/2012، موراد قەرەیلان، سه‌رۆکی کۆنسه‌ی به‌ڕێوه‌به‌رایه‌تی کۆما جڤاکێن کوردستان KCKسیاسەتی نوێی گەریلاکانی راگەیاند و گوتی "گه‌ریلاکانمان ده‌یانه‌وێت سه‌نگه‌ری خۆیان له‌ هه‌رێمه‌که‌ به‌رفراوان بکه‌ن. ئێستاکە لە (35) کیلۆمه‌تری ناوه‌وه‌دا هێزه‌کانی گه‌ریلا هه‌ن، به‌م شێوه‌یه‌ چی دی دەره‌وه‌ی سنوور و ناوه‌وه‌ی سنوور مانای نەماوە و بوو به‌ چیرۆک.گه‌ریلاکان له‌ ده‌ڤه‌ره‌کانی نزیکی شه‌مزینان سه‌نگه‌ری خۆیانیان داناوه‌ و هه‌موو هه‌وڵه‌کانی حکومەتی تورکیا بۆ ده‌رخستنی هێزی گه‌ریلا له‌و ناوچانه‌دا بێ ئەنجام بووە".

بەختیار دۆغان لەو بارەوە دەڵێ "حکومەتی تورکیا لە ساڵی 2012شدا درێژە بە سیاسەتی لەناوبردنی گەلی کورد و هێزی گەریلا دەکات. بۆ ئەوەی پرسی کورد هەنگاوێک بۆ پێشەوە ببەین هێڕشێکی نوێمان لەچوارچێوەی شەڕی شۆڕشگێڕی دەستپێکردووە. لە رۆژانی رابردوودا، هێزەکانی HPG سەربازگەکانی چەلی، گردێ، سەرێ سێوی، بلیجان، قاراپاش و ناوەندی 49یان کردە ئامانجی هێڕشەکانی خۆیان و سوپای تورکیا به فڕۆکەی F16 و هەلیکۆپتەری سیکۆرسکی و هاوەن ناوچەکەیان بوردمان کرد. لە ئەنجامی ئەو شەڕ و پێکدادانە 14 گەریلا گیانیان لەدەستدا و نزیکەی 100 سەربازی سوپای تورکیا کوژران".

گوتەبێژی هێزەکانی پاراستنی گەل HPG ئامانجی خۆیان لەو هێڕشانەی کۆتایی هاتن به داگیرکاری کوردستان ناو برد و رایگەیاند "ئێمە دەمانەوێ کۆتایی به داگیرکاری حکومەتی تورکیا لەسەر کوردستان بێنین. داگیرکاری گەلی کورد دەکوژێت و بەرەو لەناوچوونی دەبات. هەر بۆیە ئێمە بۆ سەلماندنی تاکتیکی نوێمان شەڕی شۆڕشگێڕیمان کە کۆنتڕۆڵ کردنی شەمزینانە دەست پێکرد و ئەو شەڕە بەرفراوان دەکەین. من لەسەر ئەو باوەڕەم کە گەلی کورد خاوەندارێتی لە شەڕی شۆڕشگیڕی HPG دەکات".

بەختیار دۆغان راشیگەیاند "جگە لە شەمزینان گەریلاکانی HPG لە دێرسیم، ئامەد، سەرحەد، بۆتان، هەکاری، شێرناخ و زۆر شاری دیکەی باکووری کوردستان بڵاو بوونەتەوە بەڵام رەوشی شەمزینان جیاوازە و ئێمە تاکتیکێکی نوێ لەو ناوچەیە بەڕێوە دەبەین. بۆ ئازادی گەلی کوردستان پێویستە ئێمە ئەو تاکتیکە بەرفراوانتر بکەین".

سەرچاوە: رووداۆ/ ساکار عەبدوللازادە

نێچیرڤان بارزانی له ئەڵمانیايه و لەگەڵ مام جەلال کۆبوونەوە. هاوکات بارزانی بە تاڵەبانی راگەیاندووە کە هیواخوازە بگەڕێتەوە وڵات و لەئێستادا کەسایەتی ئەو بۆ یەکلایی کردنەوەی کێشەکان پێویستە. ماڵپەری (PUKmedia) بڵاوکرەوە کە ئێوارەی دوێنێ 9/8 مام جەلال، سەرۆک کۆمار عێراق لەشوێنی پشوودانی خۆی لەئەڵمانیا پێشوازیکردووە لە نێچیرڤان بارزانی، سەرۆکی حکومەتی هەرێمی کوردستان کە ئازاد بەرواری ئەندامی مەکتەبی سیاسی پارتی دیموکراتی کوردستان، دڵشاد بارزانی نوێنەری حکومەتی هەرێمی کوردستان لەئەڵمانیا هاوڕێیەتیان دەکرد.

هەروەها ئاماژە بەوەکراوە کە لەدیدارێکدا نێچیرڤان بارزانی بەگەرمی لەهەواڵی تەندروستی تاڵەبانی پرسی و خۆشحاڵی خۆی دەربڕی بەسەرکەوتنی ئەو نەشتەرگەرییەی کە بۆ ئەژنۆی چەپی کرا، ئومێدی خۆشی نیشاندا بەهەرچی زوتر کۆتاییهاتنی بەرنامەی راهێنان و چارەسەری سروشتیی کە دوای نەشتەرگەرییەکە بەڕێوەدەچێت، تا سەرۆک کۆماری عێراق بەزوویی بگەڕێتەوە بۆ وڵات بەتایبەتی کەئێستا کەسایەتی ئەو بۆ یەکلاییکردنەوەی کێشەکان پێویستە.

لای خۆیەوە مام جەلال- سوپاسی نێچیرڤان بارزانی کرد بۆ سەردانەکەی و هەستی برایانەو دڵسۆزانەی، دڵنیای کردەوە لەباشی تەندروستی و بەڕێوەچوونی بەرنامەی چارەسەری سروشتی و راهێنانی پزیشکی.

لەتەوەرێکی دیکەی ئەو دیدارەدا گفتوگۆ کرا دەربارەی پرۆسەی سیاسی لەعێراق و هەرێمی کوردستان و رێوشوێنەکانی چارەسەرکردنی هەموو کێشەکان، لەوبارەیەشەوە تاڵەبانی پێویستی یەکڕیزیی و یەکخستنی هەڵوێستەکانی هەموو لایەنەکانی دووپاتکردەوەو ئاماژەشی کرد بۆ گرنگی بەهێزکردنی زیاتری نێوانی یەکێتیی و پارتی کە بەرژەوەندیی هەموو لایەکی تێدایە.

سەرچاوە: PUKmedia

ئەندامێكی دەستەی باڵای كورد لە رۆژئاوای كوردستان رایگەیاند رووسەكان پێیانڕاگەیاندوون، كە ئەوان لەگەڵ پێدانی مافی گەلی كوردن لەسەر بنەمای هاووڵاتیبوون، نەك لەسەر بنچینەی مافی خۆبەڕێوەبردن لە رۆژئاوای كوردستان. رۆژی 31/7/2012 شاندێكی دەستەی باڵای كورد لە رۆژئاوای كوردستان لەگەڵ جێگری وەزیری دەرەوەی رووسیا گینادی گاتیلۆف، لە كونسولخانەی رووسیا لەشاری هەولێر كۆبوونەوە. جێگری وەزیری دەرەوەی رووسیا بەمەبەستی گفتوگۆكردن لەگەڵ بەرپرسانی هەرێمی كوردستان هاتبووە هەولێر.

شاندە كوردییەكە پێكهاتبوون لە ئیسماعیل حەمە، سەرۆكی ئەنجوومەنی نیشتمانی كورد و ئەندامی دەستەی باڵای كورد، شێح محیەدین ئالی، ساڵح موسلم محەممەد و رووناهی ئەندامانی دەستەی باڵای كورد. لەبارەی ئامانجی كۆبوونەوەكە لەگەڵ شاندە رووسییەكە، ئیسماعیل حەمە لە لێدوانێكدا بۆ (رووداو) گوتی "پێشتر وەزارەتی دەرەوەی رووسیا بانگهێشتی كوردانی رۆژئاوای كردبوو، بەڵام دەرفەت نەبوو بیانبینین. بۆیە كاتێك جێگری وەزیری دەرەوەی رووسیا هاتە هەرێمی كوردستان و ئێمەش لێرەبووین داوایانكرد لەگەڵ یەكتر دابنیشین، ئێمەش لەگەڵیان دانیشتین".

رووسیا یەكێكە لەو وڵاتانەی تائێستا زۆر بە سەختی پشتگیری لە مانەوەی ئەسەد دەكات و لەدژی دەستێوەردانی سەربازییە لە سووریا. هەندێك لە سەرچاوە هەواڵگرییەكانیش باس لە رەوانەكردنی چەكی رووسی بۆ سووریا دەكەن. بۆیە چاودێرانی سیاسی پێیانوایە تاوەكو رووسیا هاوكاری بۆ سووریا رانەگرێت، زۆر زەحمەتە بەشار ئەسەد دەسەڵات بەجێبێڵێ.

بەڵام ئیسماعیل حەمە، كە لە هەمانكاتدا سكرتێری پارتی یەكێتی كورد لە سووریایە، لە دوای دانیشتنەكەیان لەگەڵ جێگری وەزیری دەرەوەی رووسیا بە (رووداو)ی راگەیاند "رووسیا وەك پێشتر پێداگیری لەسەر مانەوەی ئەسەد ناكات. لاری نییە ئەسەد لەسەر كار لاببرێ یان بڕووخێ، بەڵام مەرجی هەیە. پێی گرنگە بزانێ كێ جێگەی ئەسەد دەگرێتەوە، هەروەها دەیەوێ بزانێ ئالیەتی دەستاودەستكردنی دەسەڵات چۆنە. بەكورتی دەیانەوێ هەلێك بۆ بەشار بڕەخسێنن تاوەكو دەسەڵات بەجێبێڵێت".

سەبارەت بەو دەنگۆیەی كە گوایە ئەمریكا و رووسیا لەسەر لابردنی ئەسەد رێككەوتوون، ئەو ئەندامەی دەستەی باڵای كورد دەڵێ "لە دانیشتنی جنێڤ لەسەر ئیدارەكردنی، نەوەكو چارەسەركردنی قەیرانی سووریا رێككەوتن. لەو كاتەی رووسیا، ئەمریكا و وڵاتانی عەرەبی گوتیان پشتگیری لە پلانی كۆفی ئەنان دەكەین و نەیانهێشت دۆسیەی سووریا بچێتە ئەنجوومەنی ئاسایشی نێودەوڵەتی ، مانای وایە كۆمەڵگەی نێودەوڵەتی لەسەر ئیدارەكردنی قەیرانی سووریا نەوەك چارەسەركردنی رێككەوتووە".

ئیسماعیل حەمە پێیوایە رووسیا لە سیاسەتی توركیا بەرامبەر بە سووریا نیگەرانە بۆیە زۆر بە زەحمەت هەڵوێستی لەبارەی قەیرانی ئەم وڵاتە دەگۆڕێ "دەڵێن توركیا پشتگیری لە سەلەفی و رەوتە تووندڕەوەكان دەكات. بەكورتی رووسیا لە گۆڕانكاری سووریا دەترسێ، بۆیە رووسیا پێیوایە ئەگەر رێككەوتنێك لەبارەی سووریاوە بكرێ ، پێویستە ئێران تێیدا بەشداربێ. رووسیا پێیوایە ئەگەر توركیا ببێتە خاوەن هەژموون و بڕیار لەناو سووریا، ئەوە رۆڵی ئێران لاوازدەبێت، لە رۆژهەڵات و وڵاتانی سۆڤیەتی پێشوو، بە كردەوە هاوسەنگی لە رۆڵی توركیا و رووسیا هەیە، كاتێك ئێران لاواز دەبێ توركیا بەهێزدەبێ، هەروەها لەبەرئەوەی توركیا ئەندامی ناتۆیە، ئەو هاوپەیمانێتییە نزیكی سنووری رووسیا دەبێ، ئەمەش بۆ رووسیا هەستیارە".

بە بڕوای ساڵح موسلیم، هاوسەرۆكی پارتی یەكێتی دیموكراتی PYD، كە ئەندامێكی شاندی كوردی بوو لەو دانیشتنەدا، رووسیا لەبارەی رووخانی بەشار ئەسەد نەرم بووە " نەرمبوونێك لە هەڵوێستی رووسیا لەبارەی رووخانی ئەسەد بەدیدەكرێ ، بەڵام هێشتا پێناچێ خۆی یەكلایی كردبێتەوە".

سەرەڕای پێگەی رووسیا لە ئاستی نێودەوڵەتی و رۆڵی لە هەڵگیرسان و چارەسەری قەیرانەكان وەك ئەندامێكی هەمیشەیی ئەنجوومەنی ئاسایشی نێودەوڵەتی كە مافی ڤیتۆكردنی بڕیارەكانی هەیە ، هێشتا هەڵوێستی ئەم وڵاتە لەبارەی كێشەی كورد بەگشتی و لە سووریا بەتایبەتی دیار نییە. بەڵام ئیسماعیل حەمە، گوتی لە كۆبوونەوەكەی هەولێر رووسیا هەڵوێستی خۆی لەبارەی كێشەی كورد باسكردووە "بۆ كورد رووسیا پێداگیری لە مافی هاووڵاتیبوون دەكات. دەڵێ مافی خۆتانە لە دەستووری سووریا دان بە ناوی كورد دابنرێ و پشتگیری كورد دەكەن لەو بارەوە، بەڵام هێشتا لەبارەی ئەوەی كورد خۆی بەڕێوەببات هەڵوێستی رووسیا روون نییە".

هەروەها گوتی "لەو كۆبوونەوەیە بە رووسەكانمان گوت نەك كورد تەنیا داوای مافی خۆ بەڕێوەبردن لە سووریای نوێ دەكات، بەڵكو هەموو پێكهاتەكانی سووریا، دوای ئەسەد ئەو داواكارییەیان هەیە". بەڵام سەرۆكی PYD پێیوایە رووسیا هەڵوێستی روونی لەوبارەوە نییە و نابێ "رووسیا لەسەر بنەمای بەرژەوەندی خۆی هەڵوێست لەسەر مەسەلەكان دەنوێنێ. ئەگەر كورد كارتەكانی بە دیپلۆماسیانە بەكاربێنێ و باڵانسی نێوان زلهێزەكان رابگرێ، دەتوانێ رووسیا ناچاربكات پشتگیری لێبكات".

سەرچاوە: رووداۆ

لە سییەمین ساڵڕۆژی گیانبەختکردنی عەوڵای مەلا عوسمان دا, بۆ بەرزڕاگرتنی خەبات و تێکۆشانی ئەم شەهیدە فیداکارەی سەربەخۆیی و یەکسانیی نەتەوەی کورد، کۆڕێکی ڕێزلێنان لەلایەن دۆستان و بنەماڵەی عەبدوڵڵا زەکی، لە شاری ڤێسترۆسی سوئێد بەڕێوەدەچێت.

عەبدوڵڵا زەکی ناسراو بە مامۆستا قەندیل، ئەندام و پێشمەرگەی دێرینی حیزبی دێموکرات و ئەندامی سەرکردایەتی کۆمەڵەی یەکسانی کوردستان بوو. ناوبراو وێڕای ئەوەیکە پێشمەرگەیەکی ڕاستەقینەی سەربەخۆیی کوردستان و تێکۆشەرێکی ماندویینەناسی ڕێبازی یەکسانیی و دادپەروەریی و مرۆڤدۆستیی بوو، هاوکات قارەمانی خۆڕاگریی بەرەکانی شەڕی ئاربابا، سەقز، پیرانشار، هەندرێن، سەنگەسەر و کێوەڕەش بوو کە پاش ساڵانێکی زۆر خەبات و تێکۆشان، لە شەڕی بەرگریی لە کوردستان، لە ڕێکەوتی ٦/٦/١٣٦١ی هەتاوی، لە ناوچەی پیرانشار شەهید کرا.

شایانی باسە کە لەو کۆڕەدا، وێڕای کورتەیەک لە بیۆگرافی و ژیانی سیاسی شەهید قەندیل، چەندین کەس لەو کەسایەتیانەی لە نزیکەوە عەوڵای مەلاعوسمان دەناسن و هاوڕێ و هاوخەباتی بوونە، باسی خەبات و کەسایەتیی ئەو دەکەن و هاوکات چەند سروودێکش لەلایەن هونەرمەندانی بەشداربووی کۆڕەکەوە پێشکەش دەکرێت کە لە میانەی کۆڕەکەدا بە پێشکەشکردنی خواردن و خوادنەوەی چایی و قاوە، پێشوازی لە میوانە بەڕێزەکان دەکرێت.

هەر لێرەوە بۆ دەوڵەمەنترکردنی ئەم کۆڕیادە، داواکارین لەو ئازیزانەی کە وێنە و بەڵگەنامەی تری عەبدوڵڵا زەکی،یان لایە، بە ئیمەیلی خوارەوە بۆمانی بنێرن. بەشداریی بۆ هەمووان ئازادە و ئامادەبوونتان جێگەی شانازیمانە.

دۆستان و بنەماڵەی شەهید عەبدوڵڵا زەکی

کات: شەممە، ٢٥/٠٨/٢٠١٢ ، کاتژمێر ١٢ تا ١٨

شوێن:

.(Råby Centrum, 724 70 Västerås (Konferensen, bredvid biblioteket

ئیمەیل: This e-mail address is being protected from spambots. You need JavaScript enabled to view it.

تەلەفوون: 0046734270002

سوپای ئەسەد دەستبەسەر گەڕەکێکی حەلەب دادەگرێتەوە و سوپای سووریای ئازاد دەڵێ "کشانەوەمان تەکتیکیە". هاوکات ئەسەد سەرۆک وەزیرانی نوێی دەستنیشان کرد. ئاژانسەکان ئاماژە بەوە دەکەن سوپای سووریای ئازاد بەهۆی کەمی چەک و کەرەستەی سەربازیەوە لەو گەڕەکە کشاونەتەوە بەتایبەتی چەکی دژە تانک. هەروەها هەلیکۆپتەر و فڕۆکە جەنگیەکانی رژێمەکەی ئەسەد بە چڕی گەڕەکەکانی سەلاحەددین و ساخور و هنانۆ بۆردومان دەکەن.

نەقیب حوسام ئەبو محەممەد فەرماندەی کەتیبەی (درع الشبهاء) لە سوپای سووریا ئازاد بە (فرانس پرێس)ی راگەیاندووە شۆڕشگێڕان و سوپای سووریای ئازاد بە "تاکتیک" کشاونەتەوە و سوپای سووریا چووتە نێو ئەو گەڕەکەوە. راشیگەیاند دواتر دژە هێرشیان دەکەینە سەر.

هاوکات چالاکوانان رایدەگەیێنین ئەمڕۆ لایەنی کەم 50 کەس کوژران لەلایەن هێزەکانی ئەسەد کە زۆربەیان لە حەلەب و ریفی دیمەشق-ن. هەر ئەمڕۆ بەشار ئەسەد کەسێکی دیکەی لە شوێنی ریاز حیجاب، سەرۆک وەزیرانی جیابووە دانا کە ناوی وائیل حەقی-ە کە پێشتر وەزیری تەندروستی بووە و خەڵکی شاری درعایە.

وەک ئاگادارن هەمووسالێ کێبەرکێ نێونەتەوەیی فوتبالی لاوان لە ئووسلوو پێتەختی نٶروێژ بەرێوە دەچێ. ئەم ساڵ تیمی فوتبالی لاوانی کوردستان لەم کێبەرکێیانە کە ٤٠ مین ساڵی بوو (1972-2012) بەشداربوو. هەموو سالێ لاوان جیهان ،نزیک بە ٤٠ وڵات زۆر چالاکانە لە ماوەی یەک حەوتوودا (29جولای هەتا 4 ئاگووست) بە چاڵاکی جۆراوجۆر لە گۆرەپانی وەرزشدا لە نۆورێژ روبروی یەکتر دەبنەوە.
بەشداران کێبەرکیکانی کە ١٤٠٠- ١٦٠٠ کەس دەبن و لە چەند ناوچەی ئووسلوو کە هەرکامیان زۆر مەیدانی فوتبال لە خۆوە دەگرێ بە ئالای وڵاتی خۆیان ماوەیەکی پر لە خۆشی و هاورەیەتی بەیکەوە تێ پەردەکەن و لەگەڵ سەدان کٶر وکچی لاوی یاریزانی وڵاتانی دیکەی جیهان ئاشنا دەبن.
ئەمساڵ بۆئەوەڵ جار تیمی کوردستان بەشداری لە نۆروەی کۆپدا کرد ، ئەوان رۆژی پنج‌شەمە گەیشتنە نۆروێژ و رۆژی هەینی 27.07.12 سەردانی پارلەمانی نٶرویژیان کردو چاویان بە سیاسەتمدارنی حیزبی سوسیالیستی چەپی نۆروێژ کەوت .کێبەرکێی ئەوەلی تیمی کوردستان رۆژی یەکەم ، یەکشەمە29.07.12 لەگەڵ تیمێکی نۆرویژبوو کە بەلێدانی ٣ گۆل سەرکەوتنێکیان بە دەست هێنا کە بووبە هۆی خۆشحاڵی کوردانی دانیشتوانی وڵاتی نۆروێژ ، بەڵام ئەوەی بۆ یاریزانی لاوی کورد و بەرپرسان و کوردانی نۆروێژ جێگەی پرسیار و ناراحەتی بوو هەڵ نەکردنی ئاڵای پێرۆزی کوردستان بوو،دیارە جگە لە ئاڵای زۆربەی وڵاتانی جیهان ،فەلەستین و سامیەکانیش مافی هەڵکردنی ئالای خۆیان هەبوو. پاش هەوڵ وکارێکی زۆر شلگیرانە کوردانی نوروێژ، بە خۆشێوە لە سیهەمین رۆژ واتە لە روژی سیشەمە 31.07.12 ئاڵای پێرۆزی کوردستان روبە ئاسمانی نورویژ بەرزکرایەوە و لە تەنیشت ئالای نورویژ و ولاتانی دیکە شەکایەوە و هەزارانی کوردی جیگر لە نورویژ ووڵاتانی دیکەی زۆر خۆشحاڵ کرد.
تیمی فوتباڵی کوردستان لە ماوەی سێ رۆژدا سێ یاری ئەنجامدا کە سەرکەوتنێک و بەرامبەریک و دوڕانێکی هەبوو و توانی بچنە قۆناغی دووهەمی کێبەرکی کان. رۆژی چوارشەمە تیمی کوردستان روبروی تیمێکی دێکەی نۆروێژی دەبێتەوە کە 3 بەر 3 بەرامبەر دەبن ولە کاتی ئێزافیش دا هەر بەرامبەر دەمێنەوە، بەڵام بە لێدانی پێناڵتی ٤بە ٢ تیمی نٶرویژ سەرکەوتنی بەدەست دێنێ و بە داخەوە تیمی کوردستان حەزف دەکرێ.
رۆژی هەینی03.08.12 لە ئێکەبەرگ بە ئیبتکاری ریکخراوی کوردی نۆروێژی (ئەر، کۆ. ئەر) رێورسمێک بۆ رێزگرتن لە یاریزانی کوردستان بە بشداری لە نوێنەری حیزبی سوسیالیستی چەپی نورویژ و کوردانی نورویژ پێک هات. ئاختر چاودێری جێگری سەرۆک پارلەمانی نورویژ لە ئیس ڤی و چەند کەسی دیکە لەسەر گرینگی بەشداری تیمی کورستان و هاوکاری و پشتیوانی کوردکانی جێگر لە نوروێژ بابەتێکیان پێشکەشکرد و لەلایەن چاودێری لەوحەی ریزلێنانن بە سەر یاریزانان وسەرپەرستان تیمی کوردستان دابەش کرا وهەروەها لە لایەن بەرپرسی تیمی فوتباڵی جەوانانی کورستان بەرێز سەفین کانەبی لۆحەی ریزلێنانن ئاراستەی نوێنەری ئیس ،ڤ و چەند کوردێک کرا کە یارمەتی دەر وهاوکاری نزیکی تیمی کوردستان بوون. پاش رێزلینان و دوای نانخواردن دەستکرا بە هەڵپەرکی و شادی و خۆشی و دوای سێ کاتژمێر بەرنامەکە کۆتایی پێ هات.
ئەوەی بەڵای منەوە زۆر گرینگ بوو بە پێویستی دەزانم کە لێرەدا ئاماژە بە چەند شتێک بکەم.
1- بە هەوڵ وهاوکاری جیدی کوردانی نۆروێژ کە توانیان کارێک بکەن کە ئالای کورستان لە تەنیشت ئالای وڵانی دیکەی جیهان بەرزبێتەوە و بشەکێتەوە. و بشداری چالاکانەی کوردان بۆ تەشویقی تەیمی کوردستان لە ئاستیکی زۆر سەرەوە دا بوو کە لە سیهەم رۆژ دا گەیشتە نزیک بە 800-700 کەس .پێوستە بگۆتری کە کوردی هەرچوار پارچە بشداری کێبەرکێ کان بوون کە کوردکانی باشور ورۆژهەلاتی وکوردستان بەرچاوتر بوون وهەروەها نابێ نە‌قش وچالاکی یەکیەتی لاوانی رۆژهەڵاتی کورستان لەبەرچاونەگێرێ.
2- عشق وعەلاقەی یاریزانی کورد و سەپەرست و راهێنەری تیمی فوتباڵی کوردستان بە هەڵکردنی ئاڵای کوردستان بۆ بەرزکردنەوەی ئاڵا، وەک هیمایەکی نەتەوەیی و هەوڵ دان بۆ دەستەبەرکردنی سەرکەوتن بۆ کوردستان کە ناوی کوردستان هەتا بکرێ باشتر مەترح بکرێ.
3- هاوکاری ریکخراویەکی کورد نورویژی( ئەر، کۆ، ئەر ) بۆ هاوکاری تیمی کوردستان و پشتیوانی حیزبی سوسیالیستی چەپی نوروێژ لە هەموو بۆاریک دا لە کورد.
4- لە ماوەی سێ رۆژ دا ناوی کورد وکوردستان لە دوو روزنامەی بە ناوبانگی ئافتن پوستن و داگ بلادە و مەسەلەی ئالای کوردستان جێگەی باس بوو کە بۆبە هۆی زیاتر ناساندنی کێشەی کورد و خەڵکێکی زۆر زیاتر شارەزای مەسەلە کوردبوون.و هەروەها کانالی تلوویزونی (ئن ، ئەر، کۆ) کە بەشێکی لە کێ بەر کێ و عشق و علاقەی وکوردان لە پشتیوانی لەتیمی کوردستان نیشان دا.
لە کۆتاییدا پێوستە بگۆترێ بە هاوکاری و یەکیەتی و برایەتی کوردان دەکرێ زۆرهەنگاوی گرینگ بهاوویشترێ کە نمونەی بەرچاو ئەو هاوکاریە، شکانەوەی ئالای پێروزی کوردستان لە تەنیشت ئالای وڵاتانی دیکە جیهان بوو لەم کیبەرکێیەی نێونەتەویی لاوان لە نوروێژ.

کەریم ئەڵڵاوەیسی

وه‌زیری ده‌ره‌وه‌ی تورکیا، ئێران ئاگادارده‌كاته‌وه‌ له‌وه‌ی چیدیكه‌ ئه‌نقه‌ره‌ له‌ توندوتیژیـیه‌کانی ناو سووریا به‌رپـرسیار نه‌کات. ئه‌حمه‌د داود ئۆغڵو، وه‌زیرى ده‌ره‌وه‌ى توركیا له‌ فڕۆکه‌خانه‌ی ئه‌نقه‌ره‌ به‌رله‌وه‌ی به‌ره‌و وڵاتی بۆرما ده‌ربچێت رایگه‌یاند "نابێت چیدیكه‌ ئێران، توركیا به‌ توندوتیژییه‌كانى سووریا تاوانبار بكات"، گوتیشى "هه‌رچه‌نده‌ ئه‌و جۆره‌ لێدوانانه‌ له‌لایه‌ن به‌رپـرسـانی باڵای ئێرانه‌وه‌ نه‌دراون‌، به‌ڵام که‌سـانێک که‌ له‌ پـۆستی فه‌رمییدان توركیا به‌ توندوتیژییه‌كانى سووریا تۆمه‌تبار ده‌كه‌ن".

ئۆغڵو گوتى "ئه‌و لێده‌انانه‌ له‌وانه‌یه‌ زیان به‌ ئێرانیش بگه‌یه‌نێت، بۆیه‌ چاوه‌ڕوانین کاربه‌ده‌سـتان چ له‌ تورکیا و چ له‌ ئێران چه‌ند جارێك بارودۆخه‌كه‌ هه‌ڵبسه‌نگێنن ئینجا لێدوان بده‌ن، چونكه‌ تاوانبارکردنی تورکیا ‌و هه‌ر وڵاتێکی دیکه‌ به‌ قازانجی هیچ وڵاتێک ناکه‌وێته‌وه‌". دوو رۆژ له‌مه‌وپێش جه‌نه‌ڕاڵ حه‌سه‌ن فه‌یرووز ئابادی، فه‌رمانده‌ی گشـتی هێزه‌ چه‌کداره‌کانی ئێران ئۆباڵی توندوتیژیـیه‌کانی ناو سووریای خسته‌ ئه‌ستۆی تورکیاو، تورکیا و سعودیه‌ و قه‌ته‌ری تاوانبارکرد به‌وه‌ی یارمه‌تی ئه‌مریکا ده‌ده‌ن بۆ گه‌یشـتن به‌ ئامانجه‌کانی له‌ ناوچه‌که‌دا.

پۆلیسى كه‌ركوك رایگه‌یاند، چه‌ند كه‌سێكى نادیار هێرش ده‌كه‌نه‌ سه‌ر خاوه‌ن نووسینگه‌یه‌كى گۆرینى دراو له‌ شارى كه‌ركووك و له‌ئه‌نجامدا 53 ملیۆن دینار و ده‌مانچه‌یكى لێ ده‌ده‌زن.

هۆبه‌ى راگه‌یاندنى پۆلیسى قه‌زاوناحییه‌كان له‌ كه‌ركووك به‌ (رووداو)ى راگه‌یاند "شه‌وى رابردوو كاژێر 12:00 له‌ گه‌ره‌كى غه‌رناته‌ى شارى كه‌ركووك خاوه‌ن نووسینگه‌یه‌كى گۆڕینى دراو ده‌چێته‌وه‌ بۆ ماڵه‌وه‌ له‌ رێكه‌ چه‌ند كه‌سانیكى نه‌ناسراو به‌ ئۆتۆمبیلێكى جۆرى نیسان پترۆلى بێ ژماره‌ هێرش ده‌كه‌نه‌ سه‌رى و 53 ملێۆن دینار و ده‌مانچه‌یه‌كى جۆرى تاریق لێ ده‌رفێنن دواى ئاگاداركردنه‌وه‌ى هێزه‌كانى پۆلیس له‌ رووداوه‌كه‌ سه‌رجه‌م خاڵه‌كانى پشكنینى شار ئاگادارده‌كرێته‌وه‌ به‌ڵام نه‌توانرا ئه‌نجامده‌رانى ئه‌و كاره‌ ده‌ستگیربكرێن".

سەرچاوە: رووداۆ