سیمینارێک لەسەر ڕۆژئاوای کوردستان لە مالمۆ

کۆمیتەکەمان سیمینارێک بۆ مامۆستا ئیسماعیل کامیل ئەندامی پەرلەمانی سوید و خەڵکی کوردستانی ڕۆژائاوا لەسەر دۆخی هەنووکەی ڕۆژئاوای کوردستان ساز ئەکات..

ڕۆژی: شەممە 2012.9.15
کات: 14.30 تا 16.30
شوێن: Studiefrämjandet Malmö
ئەدرەس: Ystadsgatan 53

هاتن بۆ هەمووانە و زۆر بەخێر بێن
بەڵام کاتەکە دیاریکراوە و تکایە ڕەچاوی کات بکەن

ڕاگەیاندنی کۆمیتەی هاوکاری کوردستانیانی مالمۆ
سێبتەمبەری 2012

یەکینەی پاراستنی گەل دوو بنکەی مەشق و راهێنان بۆ گەنجانی رۆژئاوای کوردستان دەکاتەوە و داوا لە خەڵک دەکات پەیوەست بەو هێزەکانی بن.

شێرزاد عادل، گوتەبێژی ئەنجوومەنی گەلی رۆژئاوای کوردستان لە لێدوانێکدا بۆ (رووداو) رایگەیاند "کورد لە رۆژئاوای کوردستان شۆڕشی ئاشتیانە بەڕێوە دەبات. ئێمە نامانەوێ ببینە بەشێک لەو توند و تیژیەی لە سووریا بەڕێوە دەچێت، بەڵام کاتێک دەستدرێژی دەکرێتە سەر ئاسایش و ژیانی کورد، یەکینەکانی پاراستنی گەل ناچارن پارێزگاری لە گەڵ و نیشتمان بکەن و وەڵامی هێڕشکەران بدەنەوە".

شێرزاد عادل راشیگەیاند "یەکینەی پاراستنی گەل YPG، بۆ راهێنانی گەنجانی کورد دوو بنکەی سەربازی لە دێرک و عەفرین کردووەتەوە تا گەنجانی کورد بۆ پارێزگاری کردن لە رۆژئاوای کوردستان ئامادە بکات و بۆ ئەو مەبەستە داوا لە هەموو گەلی کورد لە رۆژئاوای کوردستان دەکات پەیوەستی ریزەکانیان بن".

گوتەبێژی ئەنجوومەنی گەلی رۆژئاوای کوردستان سەبارەت بە ئەگەری روودانی شەڕ لە رۆژئاوای کوردستان گوتی "هەندێک لایەن دەخوازن ئەمن و ئاسایشی رۆژئاوای کوردستان تێک بدەن و شەڕ بۆ ئەو ناوچەیەش بگوازنەوە، بەڵام بەهۆی ئەوەی کورد شۆڕشی مەدەنی و ئاشتیانە بەڕێوە دەبات، ئەو مەترسیە نییە کە شەڕ بۆ ناو رۆژئاوای کوردستان بگوازرێتەوە بەڵام ئەگەر شتێکی لەو چەشنەش روو بدات هێزە کوردیەکان بە هەموو شێوەیەک بەدژی دەوەستنەوە و هیچ هێڕشێک بێ وەڵام ناهێڵنەوە".

یەکینەی پاراستنی گەل YPG، کە بە باڵی رۆژئاوای کوردستانی هێزی پاراستنی گەل HPG، دادەندرێت، لە دوای کشانەوەی هێزەکانی رژێمی سووریا لە چەند ناوچەیەکی رۆژئاوای کوردستان، ئەمن و ئاسایشی ئەو ناوچانەی بەدەست گرتووە.

YPG به هەموو شێوەیەک دژی دروست بوونی هەر چەشنە هێزێکی چەکداری کوردیە و خۆی به تەنها لایەنی سەربازی رۆژئاوای کوردستان ناساندووە. 

سەرچاوە/ ساکار عەبدوللازادە

سەرۆکی هەرێمی کوردستان دەڵێ "سەردەمی هێڕش کردن بەسەر چووە و کورد لە هەر چوارپارچەی کوردستان دەبێ ئامادەی بەرگری کردن بێت". دوێنێ دوو شەممە، مەسعود بارزانی، سەرۆکی هەرێمی کوردستان لە رێورەسمی یادکردنەوەی 51 ساڵەی شۆرشی ئەیلول، لە بەشێکی وتارەکەیدا پاڵپشتی خۆی بۆ کوردانی پارچەکانی دیکە بەتایبەت کوردانی رۆژئاوای کوردستان دەربڕی. سەرۆکی هەرێمی کوردستان لەو بارەوە گوتی "بۆ ئێمە وەکو کورد لە هەموو پارچەیەک، زەمانی ئەوە بەسەر چووە هیڕش ببەین یان بیر لە شەڕ بکەینەوە، بەڵام ئێمە دەبێ ئامادە بین بۆ ئەوەی بەرگری لە خۆمان بکەین".

بارزانی گوتیشی "زه‌مانی شه‌ڕ نه‌ماوه‌ و زه‌مانی دیالۆگه‌، زه‌مانی مه‌نتیقه‌، زه‌مانی لێتێگه‌یشتنه‌، زه‌مانی رێز له‌یه‌كتر گرتنه‌، ئێمه‌ ئومێده‌وارین هه‌م له‌ كوردستانی عێراق و له‌ هه‌موو پارچه‌كانی دیكه‌یش هه‌موو گرفته‌كانی گه‌لی كورد له‌گه‌ڵ ئه‌و برایانه‌ی كه‌ پێكه‌وه‌ ده‌ژین له‌ نه‌ته‌وه‌كانی تر چ عه‌ره‌ب چ تورك چ فارس به‌ڕێزله‌یه‌كتر گرتن به‌دیالۆگ ئێمه‌ بگه‌ین به‌ چاره‌سه‌ر بۆ ئه‌و هه‌موو گرفتانه‌".

سەرۆکی هەرێمی کوردستان سەبارەت به کوردانی رۆژئاوای کوردستان رایگەیاند " ئه‌مڕۆش بابه‌تی گه‌رم، بابه‌تی ره‌وشی سوریایه‌. ئێمه‌ له‌گه‌ڵ ئه‌وه‌ین کە میلله‌تی سوریا بڕیاری لێده‌دات، خۆیان مافی ئه‌وه‌یان هه‌یه‌ بڕیار بده‌ن ئاینده‌یان چۆن ده‌بێ، به‌ڵام بۆ ئێمه‌یش زۆر گرنگه‌، ئێمه‌یش بزانین ئاینده‌ی گه‌لی كورد له‌ سوریا چۆن ده‌بێ. تا ئێستا مه‌حروم بوون له‌ مافی هاووڵاتیبوون، مه‌حاڵه‌ نه‌ كوردی سوریا ئه‌مه‌ قبوڵ بكات نه‌ هیچ خاوه‌ن ویژدانێك ئه‌مه‌ قبوڵ بكات، ئه‌گه‌ر هه‌ر گۆڕانكارییه‌ك به‌سه‌ر ره‌وشی سوریادا بێت كورد له‌ هه‌مان ره‌وشدا بمێنێته‌وه‌، خۆیان بڕیاری خۆیان ده‌ده‌ن، نه‌ ئێمه‌ ئه‌و مافه‌مان هه‌یه‌، نه‌ كه‌سی تر ئه‌و مافه‌ی هه‌یه‌ ته‌ده‌خول له‌ ڕه‌وشی ئه‌وان بكات، ته‌نیا ئه‌وه‌یه‌ ئێمه‌ یارمه‌تیان ده‌ده‌ین بۆ ئه‌وه‌ی به‌ مافه‌كانی خۆیان بگه‌ن، به‌ دیالۆگ به‌ لێتێگه‌یشتن، ئێمه‌ سه‌ربه‌رزین له‌وه‌ی توانیمان تاڕاده‌یه‌كی زۆر كێشه‌ی ناوخۆیان یارمه‌تیان بده‌ین و كێشی ناوخۆیان چاره‌سه‌ركه‌ن و ئامۆژگاری ئێمه‌ بۆ ئه‌وان ئه‌وه‌یه‌ كه‌ بگه‌نه‌ لێكگه‌یشتنێك بۆ ئاینده‌ی خۆیان له‌گه‌ڵ میلله‌تی سوریا و له‌گه‌ڵ خه‌ڵكی سوریا و له‌گه‌ڵ هێزه‌كانی سوریا".

مەسعود بارزانی گوتیشی "ئێمه‌ له‌و بڕوایه‌داین له‌ ناوچه‌ی رۆژهه‌ڵاتی ناوه‌ڕاست هه‌موو ره‌وشه‌كان به‌ره‌و گۆڕانێكی گه‌وره‌ ده‌چن، رۆژ، رۆژی گه‌لانه‌ بۆ ئه‌وه‌ی بڕیاری خۆیان بده‌ن، هه‌رچی گه‌لانی ئه‌م ناوچه‌یه‌ بڕیاری لێبده‌ن، ئێمه‌یش به‌شێكین له‌وان و پشتیوانیان لێده‌كه‌ین".

ەپێی ئەو زانیاریانەی دەست (رووداو) كەوتوون، حكومەتی توركیا بەفەرمی نەوشیروان مستەفا، رێكخەری گشتی بزووتنەوەی گۆڕانی بانگهێشتكردووە سەردانی ئەنقەرە بكات. بەرپرسێكی باڵای بزووتنەوەی گۆڕان لەوبارەوە گوتی رەنگە ئەو سەردانە پێش سەری ساڵ ئەنجامبدرێت. محەممەد تۆفیق رەحیم، بەرپرسی پەیوەندییەكانی دەرەوەی بزووتنەوەی گۆڕان، لە درێژەی لێدوانەكەیدا گوتی "وەزارەتی دەرەوەی توركیا داوایكرد نەوشیروان مستەفا، سەردانی توركیا بكات". دەربارەی وەڵامی بزووتنەوەی گۆڕانیش بۆ توركیا، ناوبراو گوتی "بە توركیامان گوت: كێشە نییە، بەسەرچاو سەردانەكە دەكەین، بەڵام هەركاتێك دەرفەت هەبوو. واتە بانگهێشتەكەمان رەتنەكردووەتەوە".

وەرزشکارێکی کەم ئەندامی کورد لە پارائۆلەمپی لەندەن، میدالیای زێر بەدەست هێنا و ریکۆردێکی نوێی جیهانی تۆمار کرد. دوێنێ شەممە، لە لەندەن  محەممەد خاڵوەندی، وەرزشکاری کورد لە بەشی هاویشتنی رەم ریکۆردێکی پێوانیەیی نوێی تۆمار کرد و مەدالیای زێڕی ئەو پاڵەوانێتییەی بەدەست هێنا.

خاڵوەندی کە خەڵکی کرماشانی رۆژهەڵاتی کوردستانە توانی به هاویشتنی رەم بە مەودای 50 مەتر و 98 سانتی مەتر، پێوانەیەکی نوێ تۆمار بکات و 1044 خاڵ بەدەست بێنێت. هەروەها چوارشەممەی هەفتەی رابردوو، سیامەند رەحمان، وەرزشکاری کەم ئەندامی خەڵکی شنۆی رۆژهەڵاتی کوردستان لە میانەی کێبەڕکێیەکانی بەرزکردنەوەی قورسایی لە پارائۆلەمپی (ئۆلەمپی کەم ئەندامان)ی لەندەن توانی میدالی زێڕ بەدەست بێنێت.

سیامەند رەحمان به بەرزکردنەوەی 280 کیلۆگرام ژمارەی پێوانەی پێشووی شکاند و ریکۆردێکی نوێی جیهانی تۆمار کرد.

سوپای عێراق ئەو پەنابەرانەی رۆژئاوای کوردستان ئازاد دەکات کە بە هەڵە دەربازی سنوورەکانی عێراق ببوون. بەرزان بەهرام، ئەندامی کۆمیتەی بەڕێوەبەری کەمپی دۆمیز (کەمپی پەنابەرانی رۆژئاوای کوردستان لە دهۆک) بە (رووداو)ی راگەیاند "دوای هەوڵ و بەدواداچونی حکومەتی هەرێمی کوردستان، سوپای عێراق پەنابەرەکانی رۆژئاوای کوردستانی ئازاد کرد".

کەچی عەمید هاشم سیتەیی، فەرماندەی لیوای 8ی هێزی پێشمەرگە لە لێدوانێکدا بۆ (رووداو) رایگەیاند "شەوی رابردوو، بەرپرسان لە سنووری رەبیعە پەیوەندییان پێوە کردین و رایگەیاند ژمارەیەک پەنابەر لە سنوورەکەیانەوە هاتوونەتە ناو عێراق و دەیانەوێ بێنە دهۆک و دوای رەزامەندی ئێمە، بڕیار بوو ئەو ژمارە پەنابەرە بەرەو دهۆک بەڕێ بکەون بەڵام هیچ زانیارییەکمان لەسەر ئەوە پێ رانەگەیشتووە کە دەستگیر کرابن". هەر لەو بارەوە بەرزان بەهرام، ئەندامی کۆمیتەی بەڕێوەبەری کەمپی دۆمیز رایگەیاند "دوای ئازادکردنی ئەو پەنابەرانە، ژمارەیەکیان بەرەو سنووری هەرێمی کوردستان بەڕێکەوتن و ژمارەیەکیشیان گەڕاونەتەوە رۆژئاوای کوردستان".

شەوی رابردوو، هێزە سنوورییەکانی عێراق 500 پەنابەری رۆژئاوای کوردستانیان دەستگیر کرد کە دەیانەویست لە سنووری رەبیعە دەربازی هەرێمی کوردستان بن. پێشتر مەحمود محەممەد، نوێنەری پارتی یەکێتی دیموکراتی کورد لە سووریا لە لێدوانێکدا بۆ (رووداو) وێڕای پشت راستکردنەوەی ئەو هەواڵە رایگەیاند "زۆربەی گیراوان ژن و منداڵن و خەڵکی قامشلۆی رۆژئاوای کوردستانن".

مەحمود محەممەد گوتیشی "ئێمە پەیوەندی بە حکومەتی هەرێمی کوردستان دەکەین  تا هەوڵی ئازاد کردنی ئەو پەنابەرانە بدات". ئەو پەنابەرانە لە نزیک سنووری زومار- رەبیعە و لەو شوێنەی کە هێزی پیشمەرگەی کوردستان و سوپای عێراق جێگربوونە، لە لایەن هێزەکانی عێراقەوە دەستگیر کراون.

سەرچاوە: رووداۆ/ ساکار عەبدوللازادە

کچە وەرزشکارێکی رۆژهەڵاتی کوردستان لە خولی پاڵەوانێتی کاراتێی ئێران، پلەی یەکەمی بەدەست هێنا. بێریوان مەلایی،  خەڵکی شاری سەردەشتی رۆژهەڵاتی کوردستان لە هەژدەهەمین خولی پاڵەوانییەتی کاراتەی کن شین کان لە ئێران توانی پلەی یەکەم بە دەست بێنێت و مەدالیای زێڕی پێ بەخشرا. بێریوان مەلایی لە ئاستی مێرمنداڵان و لە کێشی سەرووی 50 کیلۆگرام توانی ئەو سەرکەوتنە بەدەست بێنێت.

هەروەها چوارشەممەی هەفتەی رابردوو، سیامەند رەحمان، وەرزشکاری کەم ئەندامی خەڵکی شنۆی رۆژهەڵاتی کوردستان لە میانەی کێبەڕکێیەکانی بەرزکردنەوەی قورسایی لە پارائۆلەمپی (ئۆلەمپی کەم ئەندامان)ی لەندەن توانی میدالی زێڕ بەدەست بێنێت. سیامەند رەحمان به بەرزکردنەوەی 280 کیلۆگرام ژمارەی پێوانەی پێشووی شکاند و ریکۆردێکی نوێی جیهانی تۆمار کرد.

کەنەدا پەیوەندییەکانی خۆی لەگەڵ ئێران هەڵپەسارد و باڵیۆزخانەی وڵاتەکەی لە تاران داخست. ئەمڕۆ هەینی، جان بێرد، وەزیری دەرەوەی کەنەدا رایگەیاند "حکومەتی کەنەدا پەیوەندییەکانی خۆی لەگەڵ کۆماری ئیسلامی ئێران بۆ ماوەیەکی نادیار هەڵدەپەسێرێت و سەرجەم کارمەندانی باڵیۆزخانەی کەنەدا لە ئێران ئەو وڵاتەیان بەجێ هێشتووە و بەرەو کەنەدا گەڕاونەتەوە".

جان بێرد هەروەها راشیگەیاند "کارمەندانی باڵیۆزخانەی ئێران لە کەنەدا کەسانێکی ناپەسەندن و بەدژی ئاسایشی جیهانی کار دەکەن. سەرجەم کارمەندانی باڵیۆزخانەی ئێران پێویستە لە ماوەی 5 رۆژ کەنەدا بەجێ بێڵن".

وەزیری دەرەوەی کەنەدا راشیگەیاند "کەنەدا ئێران به گەورەترین مەترسی بۆسەر ئەمن و ئاسایشی جیهانی دەزانێت. ئێران رۆژ لەگەڵ رۆژ زیاتر یارمەتی سەربازی و دارایی پێشکەش به رژێمی ئەسەد دەکات، بەشێوەیەکی بەردەوام هەڕەشە لە ئیسرائیل دەکات، وتاری شۆڤینیزمانە و دژ بە رەگەزی سامی دەدات و هانی ژینۆساید و کۆمەڵکوژی دەدات".

وەزیری دەرەوەی کەنەدا به ئاماژەکردن بە رێککەوتننامەی ڤیێنا بۆ پاراستنی دیپلۆماتکاران گوتی "کۆماری ئیسلامی ئێران بۆ جێ بەجێ کردنی ئەو رێککەوتننامەیە سستی دەنوێنێت و لەو هەلومەرجەدا کەنەدا ناتوانێت درێژە بە بوونی دیپلۆماسیانەی خۆی لە ئێران بدات". حکومەتی کەنەدا هەروەها داوای لە هاوڵاتیانی خۆی کردووە خۆیان لە سەردانکردنی ئێران بپارێزن. کۆماری ئیسلامی ئێران تا ئێستا بە فەرمی کاردانەوەی نیشان نەداوە بەڵام ئاژانسە فەرمییەکانی ئێران ئەو بڕیارەی حکومەتی کەنەدایان بە توندی ئیدانە کردووە.

 کاتژمێر ١١ی سەرلەبەیانی رۆژی سێشەممە ٢٧ی ئەگۆست ٢٠١٢، شاندێکی بزووتنەوەی کۆماریخوازی رۆژهەلاتی کوردستان بە سەرپەرشتی دوکتۆر مستەفا شەمامی بەرپرسی شوورای هاۆئاهەنگی بزووتنەوەی کۆماریخوازان، هاۆرێ دەگەل چالاکوانی هێژا و ئەندامی رێبەری و نوێنەری بزووتنەوە لە وەلاتانی بریتانیا و ئیرلەند کاک ئیبراهیم بایەزیدی، لەگەل بەرێز و هێژا هەڤال ئاکیف وان نوێنەری کۆنگرەی نەتەوەیی کوردستان و شاندی هاۆرێ، لە شاری لەندەنی پایتەختی وەلاتی بریتانیا کۆبوونەوە. 

لەم ‌دیدارەدا دوولایەن دەگەل تاوتوێکردنی زۆر بابەتی پەیوەندیدار بە بارودۆخی‌ سیاسی هەرچوارپارچەی كوردستان و هه‌لومه‌رجی ئالۆزی ناۆچەکە‌ ، سەبارەت بە چۆنیەتی رەۆتی گۆرانکاریەکانی جیهانی، ناۆچەیی و .ناۆخۆیی، وە ئاستی کارگەریان لەسەر چارەنووسی نەتەوەی کورد، بیرورایان گۆریەوە
لەتەوەرێکی دیکەی دیدارەکەدا باس لە پێویستی یەکریزی و یەکیەتی نەتەوەیی کرا، کە لەم پەێوەندیەدا بزووتنەوەی کۆماریخوازی رۆژهەلاتی کوردستان، بەفەرمی لەلایەن هەڤال ئاکیف وان، بۆ بەشداربوون لە کۆنگرەی نەتەوەیی، بۆ بروکسل دەعوەت کرا. 
له‌ کۆتاییدا هه‌ردوولایەن دەگەل دەربرینی خۆشحالیان بۆ دیدارەکە، تەکیدیان لە سەر بەهێزکردن و پەرەپێدانی ئاستی پێوەندییەکان و بەردەوامی دیدار و چاۆپێکەوتنەکان، کردەوە.

كۆبوونەوەی ئۆپۆزیسیۆنی سووریا لە قاهیرە كە لە 24ی ئابی رابردوو سازكرا، بڕیاریدا لیژنەیەك لە پسپۆڕانی نێونەتەوەیی و سووری بۆ چارەسەركردنی كێشەی كورد دروستبكات. سیاسەتمەدارێكی رۆژئاوایی پێیوایە ئەو لیژنەیە دەتوانێ رێگاچارەی دادپەروەرانە بۆ كێشەی كورد دەستنیشان بكات. بەڵام مامۆستایەكی زانكۆ پێیوایە دامەزراندنی ئەو لیژنەیە دەیسەلمێنێ كە ئۆپۆزیسیۆنی كوردی دەستپێشخەری لەدەستداوە.

لە رۆژانی 24 - 26/8/2012 لە قاهیرە ئۆپۆزیسیۆنی سووریا كۆبوونەوەیەكی بەرفراوانی بە ئامادەبوونی نوێنەری ئەنجوومەنی نیشتمانی كورد سازكرد. محەممەد موسا، سەرۆكی پارتی چەپی كورد لە سووریا كە یەكێكبوو لەو 2 نوێنەرە كوردەی بەشداری كۆبوونەوەكە بوون، گوتی كە ئەو كۆبوونەوەیە تەواوكەری كۆبوونەوەی 31ی تەمموزی رابردوو بوو لە قاهیرە. لەوبارەوە بە (رووداو)ی راگەیاند "لە كۆبوونەوەی ئەمجارەدا لەسەر دوو تەوەر گفتوگۆكرا. یەكەم دانانی میكانیزمێك بۆ پەیوەندیكردن بەتەواوی ئۆپۆزیسیۆنی سووری، خەڵكی سووریا، وڵاتانی جیهان و دەزگا نێودەوڵەییەكان. تەوەرەی دووەمیش تایبەت بوو بە كێشەی كورد لە سووریا". 

محەممەد موسا لە درێژەی قسەكانیدا گوتی كە كۆبوونەوەی قاهیرە لەبارەی كێشەی كورد بڕیاری باشیدا "بڕیاری دامەزراندنی لیژنەی پسپۆڕانی نێونەتەوەیی و سووری درا كە نوێنەری كۆمكاری عەرەبی و كوردیش لەخۆ دەگرێت. پێویستە تاوەكو كۆتایی ئەم مانگە لیژنەكە توێژینەوە لە كێشەی كورد بكات و رێگە و چۆنیەتی چارەسەركردنی دیاری بكات". محەممەد موسا ئاماژە بەوە دەكات كە رۆڵی ئەو لیژنەیە راوێژكارییە "تاوەكو كۆتایی مانگی ئەیلول بۆ چارەسەری كێشەی كورد كۆنگرەیەكی بچووكی ئۆپۆزیسیۆنی سووریا دەكرێت كە تێیدا لیژنەی ناوبراویش ئامادە دەبێ"، ئەو سیاسەتكارەی كورد دەڵێ "گەشبینم بەوەی لەگەڵ ئۆپۆزیسیۆنی سووریا لەبارەی چارەسەری كێشەی كورد بگەینە رێككەوتنێك". 

سەرۆكی پارتی چەپی كورد لە سووریا گوتیشی كە ئەوان لە قاهیرە بەجیا لەگەڵ نەبیل عەرەبی، ئەمینداری گشتی كۆمكاری عەرەبی و هەردوو جێگرەكەی دانیشتن "پێمانگوتن ئەگەر ئێوە سوورن لەسەر یەكێتی خاكی سووریا، ئەوا كورد گرەنتی ئەو یەكێتیەیە. بەڵام ئەوە بە واتای ئەوە نییە كێشەی میللەتێك كە لەسەر خاكی خۆی دەژی چارەسەر نەكرێ". لەبارەی ئەوەی ئایا گۆڕانێك بەسەر هەڵوێستی ئۆپۆزیسیۆنی عەرەبی و ئیسلامی سووریادا لەبارەی كێشەی كورد هاتووە؟ محەممەد موسا گوتی"ناتوانم ناوی لێبنێم گۆڕانكاری، بەڵام بارودۆخێكی ئەرێنی لەئارادایە. پێموایە كشانەوەی شاندی كوردی لە كۆبوونەوەی 31ی تەمموزی رابردوو وایكرد ئۆپۆزیسیۆنی سووریا بەخۆیدا بچێتەوە".

هەر لەوبارەوە شەلال گەدۆ، ئەندامی ئەنجوومەنی نیشتمانی كورد لە سووریا گوتی كە ئەو لیژنەیە دەتوانێ بەشێوەیەكی راست تێڕوانین بۆ چارەسەری كێشەی كورد بخاتەڕوو. هەروەها گوتی "جاری یەكەمە لیژنەیەك بۆ كێشەی كورد لەسەر ئاستی عەرەبی و نێونەتەوەیی دروستدەبێ. دامەزراندنی ئەو لیژنەیە نیشانیدەدات كە كێشەی كورد لە رۆژئاوای كوردستان رۆژ بە رۆژ زیاتر بەنێونەتەوەیی دەبێت". شەلال گەدۆ دامەزراندنی لیژنەی پسپۆڕانی نێونەتەوەیی بە لەمپەر لەبەردەم خۆدزینەوەی ئۆپۆزیسیۆنی سووری لە چارەسەری كێشەی كورد دادەنێ و گوتی "لیژنەكە پسپۆڕی نێودەوڵەتی لەخۆدەگرێت، هەروەها پسپۆڕی سووری بە كورد و عەرەبەوە تێیدا بەشدار دەبن. ئەو لیژنەیە دەتوانێ تێڕوانینی دیاریكراو بۆ كێشەی كورد دیاری بكات كە دەبێتە هەوێنی چارەسەری كێشەی كورد". لەبارەی ئەوەش كە ئایا راسپاردەی ئەو لیژنەیە بۆ چارەسەری كێشەی كورد چی دەبێت؟ گەدۆ گوتی"بەتەواوی نازانم ئەو كۆمیتەیە لەسەر چ بنەمایەك كاردەكات، بەڵام پێموایە چارەسەری دادپەروەرانە پێشكەش دەكات. بەداخەوە تائێستا زۆر لایەنی ئۆپۆزیسیۆنی سووری بە لۆژیكی رژێم سەیری مەسەلەی كورد دەكەن، بەڵام دڵنیام ئەو كۆمیتەیە بەوجۆرە بیرناكاتەوە. لەوانەیە وەك ئۆپۆزیسیۆنی كوردیش بیرنەكاتەوە، بەڵام هەر چۆنێك بێ تێڕوانینی بۆ مەسەلەی كورد لە تێڕوانینی ئۆپۆزیسیۆنی عەرەبی سووریا باشتر دەبێ".

 د.رەزوان بادینی مامۆستای زانكۆی سەڵاحەدین، دامەزراندنی لیژنەی پسپۆڕان بە باش دەزانێ، بەڵام پێیوایە لەڕووی سیاسییەوە دامەزراندنی ئەو لیژنەیە بەمانای لاوازی سیاسەتی كورد دێت. لەوبارەوە دەڵێ "دامەزراندنی ئەو لیژنەیە نیشانماندەدات كە كورد تائێستا نەیتوانیوە لەسەر ئاستی نێونەتەوەیی، ناوچەیی و سووری خۆی وەك موخاتەب بسەپێنێ". لە درێژەی قسەكانیدا گوتی كە كورد دەستپێشخەری لەدەستداوە و تەنیا ئیستیهلاكی هەواڵ دەكەن "لەو كۆنگرانەی لەبارەی سووریاوە دەكرێن كورد وەك میوان دەردەكەون. وەك كورد دەبێ بزانین چەند مافمان لە رۆژئاوای كوردستان هەیە. دامەزراندنی ئەو لیژنەیە خراپ نییە، بەڵام وەك دیاردە نیشانەی بێ توانایی سیاسەتی كوردە". د. رەزوان بادینی لە درێژەی قسەكانیدا رووی رەخنەی لە سیاسەتی كوردی دەكات و بە "نەزان" لە قەڵەمی دەدات "نوێنەرانی كورد چ لەڕووی زمانزانییەوە، چ لەلایەنی رۆشنبیری و چ لەلایەنی ئەزموونی سیاسی خاوەنی باكگراوندێكی دەوڵەمەند نین. زۆرجار سیاسییەكی عەرەب لە كۆنگرەیەكدا بەیەك وشە دەتوانێ چەند سیاسییەكی كورد ئیستیفزاز بكات. ئەگەر ئەوان لە ماوەی رابردوو كارەكانیان بە پیشەیی كردبا، پێموایە كورد زۆر شتی بەدەستدەهێنا".