^{دوو لاوی کوردی خەڵکی شاری مەریوان، پاش تێپەڕاندنی ماوەی حوکمەکەیان لە زیندانی ناوەندیی ئەو شارە ئازاد کران.}

^{بەپێی هەواڵی گەیشتوو بە ئاژانسی هەواڵدەریی کوردپا، ئەمڕۆ دووشەممە ١٨ی پووشپەڕ، دوو لاوی خەڵکی گوندی "نێـ"ـی مەریوان بە ناوەکانی "زانیار مینویی"، کوڕی فاتێح و "هادی ڕاستی" کوڕی فایەق، پاش تێپەڕاندنی ماوەی حوکمەکەیان لە زیندان ئازاد کران.}

^{نەورۆزی ساڵی ٩٥، ئەم دوو لاوە "نێـ"ـییە، بە تۆمەتی "بێڕێزیکردن بە ئاڵای کۆماری ئیسلامی، لە ڕێوڕەسمی نەورۆز"، لە لایەن هێزە ئیتلاعاتییەکانی سەر بە ئیدارەی ئیتلاعاتی شاری مەریوانەوە دەسبەسەر کران.}

^{ئەم دوو لاوە کوردە، لە لایەن دەزگای قەزاییی حکوومەتی ئێرانەوە لە شاری مەریوان، بە تۆمەتی "هەوڵدان دژی تەناهیی نەتەوەیی و هاوکاریی لەگەڵ حیزبە کوردییەکانی ئۆپوزسیۆنی حکوومەتی ئێران" هەر کام بە دوو ساڵ و دوو مانگ زیندانی تەعزیری مەحکووم کران.}

^{لە لایەکی دیکەوە، موختار ئەسەدی، یەکێک لە چالاکانی سێنفی مامۆستایان پاش تێپەڕاندنی ماوەی زیندانییەکەی لە زیندانی ئێڤین ئازاد کرا.}

^{ئەو چالاکە سێنفییەی مامۆستایان، لە مانگی ڕەشەمەی ساڵی ڕابردووەوە، بە هۆی ڕێگری لە پێدانی مورەخەسی نەورۆزی دەستی دابووە مانگرتنەوە.}

^{ڕۆژی دووشەممە ڕێكەوتی ٢٧ی خەرمانان، "موختار ئەسەدی" مامۆستای زمانی ئینگلیزی و ئەندامی کانوونی سێنفی مامۆستایانی کوردستان، لە دادسەرای تاران دەسبەسەر کرا و بۆ تێپەڕاندنی ساڵێک زیندانی تەعزیری بۆ زیندانی ئێڤین گوازرایەوە.
9/7/2018}