^{بەندکراوێکی سیاسیی کوردی ڕۆژھەڵاتی کوردستان، کە ماوەی ١٣ ساڵە لە گرتووخانەکانی ئێران دەسبەسەرە، دوای داگیرکردنی کەرکووک، داوا لە جەماوەری کوردستان دەکات پشتگیریی ئەنجامی سەربەخۆیی بکەن و خەیانەتکاران بە سزی خۆیان بگەن.}

^{محەمەدئەمین عەبدوڵڵاھی، بەندکراوی سیاسیی خەڵکی بۆکان کە ماوەی 13 ساڵە لە گرتووخانەکانی ورمێ، تەبەس و بیرجەند ڕاگیراوە، پشتیوانیی خۆی لە سەربەخۆیی کوردستان ڕاگەیەندووە و لە پەیامێکی دەنگیدا  ”پشتیوانیی ھەر تاکێکی کورد لە ئامانجەکانی ڕیفراندۆمی سەربەخۆیی کوردستان ئەرکێکی ئیخلاقی و نەتەوەییە و دەبێت ھەموو کۆمەڵانی خەڵکی کوردستان بۆ ئەم پرسە بڕژێنە سەرشەقامەکان و پشتیوانی ویست و مافی ڕەوای کورد بن“.}

^{محەمەدئەمین عەبدوڵا‌ھی لە بەشێکی دیکەی ئەو پەیامەدا دەڵێت: "پێویستە خەڵکی کوردستان ئەو کەسانەی کە خەیانەتیان لە ئامانجەکانی نەتەوەی کورد کردووە، بە توندترین شێوە سزا بدەن، ھەتا ببێتە دەرسێک بۆ کەسانی دیکە".}

^{ئەو بەندکراوە کوردە پاییزی 2005 لە کاتێکدا کە تەنیا 17 ساڵ تەمەنی ھەبوو، لەلایەن ھێزە ئەمنییەکانی ئێرانەوە دەستبەسەر و بە تۆمەتی ”بەرەنگاربوونەوەی خوا“، حوکمی ١٨ ساڵ بەندکرانی بەسەردا سەپێندرا و ساڵی ڕابردوو لە گرتووخانەی (تەبەس)ی سەر بە پارYزگای خۆراسانی باشوورەوە بۆ گرتووخانەی بیرجەند گوازراوەتەوە و ئێستا لەو گرتووخانەیە ماوەی حوکمەکەی تێپەڕ دەکات.}

^{ئەمەش دەقی پەیامەکەیەتی:}

^{من وەکوو بەندکراوێکی سیاسی کورد کە ماوەی ١٣ ساڵە لە گرتووخانەکانی ئێران ڕاگیراوم. ئێستا لە دوورترین شوێنی ئێران و لە نزیک سنووری ئەفغانستان ماوەی حوکمەکەی خۆم تێپەڕ دەکەم. لێرەوە داوا لە ھەموو کوردێک دەکەم لە ھەر کوێی ئەم دونیایە بە ھەر شێوەیەک بۆیان دەکرێت، پشتگیری بە ئەنجام گەیاندنی ڕیفراندۆم بکەن و بێنە سەرشەقامەکان و پشتیوانیی خۆیان لە سەربەخۆیی و مافی ڕەوای کورد دەرببڕن.}

^{ئێمەی کورد دەیان ساڵە بۆ سەربەخۆیی خەبات دەکەین و ئێستا کە ئەو دەرفەتە ھاتووەتە پێشەوە، بەداخەوە بەھۆی خیانەتی چەند کەسێکەوە خەریکە خەونەکانمان لەبار دەبەن و شانبەشانی دوژمنانی کورد بۆ لێدانی پیرۆزییەکانمان ھەوڵ دەدەن و کەلێنیان خستووەتە نیو ماڵی کورد و خاکی کوردستان و کەرکووکیان فرۆشتووە. بۆیە پێویستە خەڵکی کوردستان ئەو کەسانەی کە خەیانەتیان بە ئامانجەکانی نەتەوەی کورد کردووە بە توندترین شێوە سزا بدەن ھەتا ببێتە دەرسێک بۆ کەسانی دیکە.}

^{جارێکی دیکە لێرەوە ڕادەگەیەنم، پێویستە ھەر کەسێک کە خۆی بە کورد دەزانێت، بە ھەر شێوەیەک کە بۆی دەکرێت چ بە ھاتنە سەرشەقام و چ بە ھەڵگرتنی چەک بەرگری لە کەرامەت و بوونی کورد بکات، لە کاتێکدا ھەموو دونیا دەرگاکانی بەڕووماندا داخستووە، ھەنگاونان لەپێناو ئەو ئامانجە پیرۆزانە ئەرکێکی نەتەوەیی و ئیخلاقییە.}

^{ھەروەھا پێویستە ھەموو حیزب و لایەنە سیاسییەکانی ھەر چوار بەشی کوردستان، بە شێوەیەکی یەکگرتوانە پاڵپشتیی ئەو داوا ڕەوایانە بکەن و یکدەنگ و یەک ھەڵوێست پشتگیری و پاڵپشتی مافخوازی کوردستان بن.}

^{محەممەدئەمین عەبدوڵڵاھی}

^{گرتووخانەی بیرجەند لە پارێزگای خوراسانی باشوور}

^1396/7/30

^2017/10/22