^{ئیمڕۆ فرە لە دڵسۆزەیل و نیشتمانپەروەرەیل کورد جۆر ئەزیز مردێگ ئەڕا بێ کەسی داڵگ نیشتمان و ژانی خیانەت گیرسن.ئێ ڕۆژ ڕەشە لە هویر وەچ و وەچەرزایل کورد لە بانانیش نیە چوودو جۆر زامێگ قویل و بێ ساڕێژ ڕۆحیان ئازار دەێدو لە خۆیانیش بێزار بوون و هەزار خۆزگە توان ئێ ڕۆژڕەشە لە تاریخ نەتەوەگەیان نەواتیاد.
کە چاو گریان و شکۆی شکیای پێشمەرگە دیم منیش جۆر ئەزیز مردە گریام وهەرچەن هیچ وشەێگ نەیما کە قورسی بار خەمم وەلێ بەیان کەم ئەما چەن بەیت هاتنە فریام تا ئاوێنەێ تۆزێگ لە خەم دڵم بوون.
چمان لە ئەزەڵ خەم دانە بەشم
تف لە تاڵەێ شۆم هەم چارەێ ڕەشم
بەشم لەێ دنیا شینەو ئازیەتی
بنۆڕ زۆرداری حەشد پاپەتی
لە سەر زێد خوەم مەرگە خڵاتم
جۆرسپاێ مەغۆڵ هاتنە وڵاتم
پێشمەرگە شێرە لە مەیدان کارزار
ماڵی خیانەت بڕمێ هەزار جار
هێزی پێشمەرگە ڕوستەم تەرز بینە
کەێ لە ترس دژمن دڵ پڕ لەرزبینە؟}

^{پێشمەرگە ئەوسا سەنگین بی سامێ
دژمن جۆر ڤێ لەرزیا وە نامێ
داخمە ئیمڕۆ شکۆمان شکیا
شرەف ووژدان هەردگێ کوشیا}

^{پێشمەرگە کەێ داشت ترس لە جەنگ جریان؟
تەنیا وە ژانی خیانەت گریان
تف لە خائن و نیشتمان فرۆش
لاێ خەڵک قورپ نەێرن هەرگز چەن قرۆش
بەردەیلێ پویل و بەندەیل حزب بازی
هەر دڵ ئەربابەیل توان بوو لە ڕازی
شکانن شکۆی سەمبۆڵ یەێ ملەت
پێشمەرگە ئیجۆر هەرگز نەیو زلەت}

^{پێشمەرگە شێربیە لەمەیدان جەنگ
کەێ هەر گز ژیاس وە زلەت و نەنگ؟
لە ڕیو تانک وسیاد وە کڵاشینکۆف
گیانفدا بیە و لە کەس نیاشت خۆف
شکۆمان شکیا وە فەن فێڵ بڕێگ
ڕۆژمان بیە شەو لە ئان وگڕێگ
هەور تاهەمیشە نیەگرێ نواێ خوەر
ڕۆژ خوەشی ئیمەیش لەێ زوو تێدەوەر
دونیا نیەمینێ تاسەر لەێ وە زا
شادی دوشمنەیل کەیمن وە عەزا
ڕۆڵەیل شێخ مەحموود،سمکۆو قازی
نویسن لە تاریخ باز سەر فرازی
دوای شەوە زەنگ هڵاێدن شەفەق
کوردی بەش خوریایش ڕەسێدن وە حەق.}

^{شکس کورد لە کەرکووک یە ێ شکس سیاسی بی نە نزامی.
ئمێدەوارم سەرکردەیل سیاسی کورد لە باشوور هەرچێ زووتر بتوەنن یەکڕێزی و یەکیەتی و هاو دەنگی وهاو کاری لە ناو خوەێان زیاتر بکەن و نەیلن خوێن شەهیدەیل کورد وە هەدەر بچوود کە گیان خوەێان فداێ ئازادی وڕزگاری خاک وخەڵکەگەیان کردن و ئڕا هەمیشە لە خوێن خوەیان نا وتن لە ژێر دەستی ئمزا کردن و تەسلیم زۆردارەیل نەوین.
ئمێدەوارم خەوەرەیل سەرکەفتن وپیرۆزی کوردلە بانان وداهاتوو بتوانێ لە قورسایی بارخەم و خوسەێ ئێ ڕۆژ ڕەشە لەدڵمان کە م بکە ێدوبەڵکم هەست زامدار دڵسۆزەیل وڵاتمان و جەرگ سزیاێ داڵگ شەهیدەیل کەمێگ تەسکین بەێریەد.}

سەردار زەنگنە