یەکەم رۆژی پرسەی مام جەلال، سەرۆککۆماری پێشووی عێراق و سکرتێریی گشتیی یەکێتی نیشتمانی کوردستان ئەمڕۆ لە سلێمانی بەڕێوەدەچێت. مەسعود بارزانی، سەرۆکی هەرێمی کوردستان لەسەر گۆڕەکەی رایگەیاند: کەس هێندەی من هەست بەو بۆشاییە ناکات کە مام جەلال بەجێیهێشت.
مەسعود بارزانی، لەسەر ئارامگەکەی مام جەلال لە لێدوانێکی رۆژنامەڤانیدا رایگەیاند "لەدەستدانی سەرۆک مام جەلال خەمێکی گرانە و زیانێکی گەورەیە، بەڵام ئەمە سوننەتی ژیانە، ئەوەی ئێستا لەسەرمان پێویستە، ئەوەیە برایەتیمان قوڵتر بکەین و یەکڕیزیمان بپارێزین، بەمە رۆحی مام جەلال شادتر دەکەین".
لەبارەی چارەسەرکردنی کێشەکان لەگەڵ بەغدا بارزانی گوتی "ئەوەی پێمان بکرێت دەیکەین بۆ پاراستنی یەکڕیزیی میللـەتی کورد. هەمیشە دەمانەوێت بە گفتوگۆ کێشەکان لەگەڵ بەغدا چارەسەر بکەین".
بارزانی جەختیشی کردەوە لەوەی "کەس هێندەی من هەست بەو بۆشاییە ناکات، کە جەنابی مام جەلال بەجێیهێشت، چونکە زۆرجار هەبوو بە یەک تەلەفۆن کێشەکانی چارەسەر دەکرد".
7/10/2017
