ئه‌و هێزه‌ی ڕاگه‌یاندنه جیهانییه‌كان باسی ده‌كه‌ن كه كۆماری ئیسلامیی ئێران له‌سه‌ر سنووری هه‌رێمی كوردستان بڵاوه‌ی پێ كردووه، بریتییه ته‌نیا له 10 تانك و هیچ هێزێكی تر جێگیر نه‌كراون.
ئاژانسی "ڕۆیته‌رز" بڵاوی كرده‌وه، ئه‌و هێزه‌ی ئه‌مڕۆ دووشه‌م كۆماری ئیسلامیی ئێران له‌سه‌ر سنووری هه‌رێمی كوردستان دایناوه، بریتییه ته‌نیا له 10 تانكه و هیچ هێزێكی سوپای گه‌وره‌ی له‌گه‌ڵدا نییه.
دوای ڕیفراندۆمی 25ی ئه‌یلوول بۆ سه‌ربه‌خۆیی كوردستان كه نزیكی 93%ی خه‌ڵكی كوردستان ده‌نگیان به جیابوونه‌وه دا، حكوومه‌تی عێراق و ئه‌نجوومه‌نی نوێنه‌ران چه‌ندان ڕێكاریان گرته به‌ر بۆ ئه‌وه‌ی هه‌رێمی كوردستان له ڕیفراندۆمه‌كه بكشێته‌وه، به‌ڵام دوای ئه‌وه‌ی له‌لایه‌ن په‌رله‌مانی كوردستان و حكوومه‌ت و سه‌ركردایه‌تیی سیاسییه‌وه ڕه‌ت كرایه‌وه، زمانه‌كه‌یان گۆڕی و ئێسته ورده ورده ده‌یانه‌وێ داواكانیان بگه‌یه‌نن.
ئه‌و ئاژانسه به‌ریتانییه، ئاماژه به‌وه ده‌كات كه تانكه‌كان به ته‌واوی له‌سه‌ر سنوور نزیكن و به ته‌واوی ده‌توانی جووڵه‌یان ببینی و بیانژمێری، ئه‌مه‌ش هه‌نگاوێكی هاوبه‌شه له‌گه‌ڵ حكوومه‌تی عێراق كه وه‌ك به‌شێك له هه‌ڕه‌شه‌كانیان له‌سه‌ر كوردستان خستوویانه‌ته ڕوو.
پێشتر ته‌له‌ڤزیۆنی ئێران له زمانی به‌رپرسێكی باڵای سه‌ربازییه‌وه بڵاوی كردبووه‌وه، ئێران و عێراق ڕێك كه‌وتوون بۆ ئه‌وه‌ی له‌و سنوورانه‌ی ئێران كه به هه‌رێمی كوردستانه‌وه‌یه، ڕێ بده‌ن له دیوی ئێرانه‌وه سوپای عێراقی نزیك ببێته‌وه و بكه‌وێته به‌رامبه‌ر هێزه‌كانی پێشمه‌رگه.
2/10/2017
