^{نوێنەرێکی کۆمارییەکان لە ئەنجوومەنی نوێنەرانی ئەمریکا (کۆنگرێس) پرۆژە بڕیارێک بۆ پشتیوانیکردن لە گشتپرسیی سەربەخۆیی کوردستان پێشکەشی کۆنگرێس دەکات.}

^{ترێنت فرانکس، کۆنگرێسمانی کۆمارییەکان بەمەبەستی پشتیوانیکردن لە گشتپرسیی سەربەخۆیی کوردستان و جاڕدانی مافی سەربەخۆیی، پرۆژەیەکی پێشکەشی لیژنەی پەیوەندییەکانی دەرەوەی ئەنجوومەنی نوێنەرانی ئەمریکا کردووە.}

^{ئامانج لە پێشنیازەکەی فرانکس، پشتیوانیکردنی کۆنگرێسی ئەمریکایە لە درووستبوونی دەوڵەتی کوردستان لە عێراق، ئەمەش لەسەر بنچینەی ئەو گشتپرسییەی 25ی ئەیلوولی 2017 لە باشووری کوردستان ئەنجامدرا و زۆرینەی کوردستانیان بە بەڵێ دەنگیان بە جیابوونەوە لە عێراق دا.}

^{فرانکس نووسیویەتی: "جاڕنامەی مافەکانی مرۆڤ لەبارەی مافە سیاسی و مەدەنییەکان و هەروەها پەیماننامەی نێودەوڵەتی لەبارەی مافە کولتووری و کۆمەڵایەتی و ئابوورییەکان ئاماژەیان بەوە داوە، هەموو کەسێک مافی بڕیاردانی لەبارەی چارەنووسی خۆی هەیە، بە پشتبەستن بەو مافە ئەوان بە ئازادانە پێگەی سیاسی خۆیان دیاریکرد و، ئازادانە شوێن پەرەپێدانی ئابووری و کۆمەڵایەتی و کولتووری خۆیان کەوتوون".}

^{لە پرۆژەکەدا فرانکس ئاماژەی بەوە داوە، هەرێمی کوردستان هەموو ئەو مەرجانەی تێدان کە بۆ جاڕدانی مافی سەربەخۆیی پێویستن، وەک: زمان، ئایین، باکگراوندی رەگەزی، مێژوو و کولتوور.}

^{هاوکات فرانکس تیشکی خستووەتە سەر قوربانییەکانی پێشمەرگە و نووسیوویەتی: 2000 پێشمەرگە لە شەڕی دژی داعش گیانیان لەدەستداوە، 9000 پێشمەرگەی دیکە لەم شەڕەدا برینداربوونە و 60 پێشمەرگەش لەماوەی ئۆپەراسیۆنەکادا بێسەروشوێن بوون.}

^{ئەو سیناتۆرە ئەمریکییە ئاماژەی بە هاوکارییەکانی حکومەتی هەرێمی کوردستان بۆ نزیکەی 2 ملیۆن ئاوارە و پەنابەر کردووە کە بەهۆی شەڕی دژ بە داعش و شەڕی نێوخۆیی سووریا روویان لە هەرێمی کوردستان کردووە.}

^{هاوکات تیشکی خستووەتە سەر تووندوتیژییەکانی حکومەتی پێشووی عێراق بەرامبەر بە کورد و ئاماژەی بەوە داوە کە نزیکەی 182 هەزار کورد بەدەستی رژێمی سەددام حوسێن کوژراون.}

^{سەرەڕای هۆشداری و هەڕەشەی وڵاتان و کاردانەوەی ئەمریکا، رۆژی 25 ی ئەیلوولی 2017 باشووری کوردستان گشتپرسی بۆ سەربەخۆیی ئەنجامدا و زۆرینەی کوردستانیان بە بەڵێ دەنگیان بۆ جیابوونەوە لە عێراق دا.}

^{دوای ئەنجامدانی پرۆسەکەش وەزارەتی دەرەوەی ئەمریکا رایگەیاند: "بەهۆی گشتپرسییە ناپابەند(نامولزیم)ەکەوە پەیوەندییە مێژووییەکانی ویلایەتە یەکگرتووەکانی ئەمریکا لەگەڵ خەڵکی کوردستانی عێراق گۆڕانکارییان بەسەردا نایەت، هەرچەندە پێمانوایە ئەم هەنگاوە ناسەقامگیری و ناڕەحەتی بۆ هەرێمی کوردستان و خەڵکەکەی زیاد دەکات".}

^{هاوکات راشیگەیاند: "ویلایەتە یەکگرتووەکانی ئەمریکا دژایەتی تووندوتیژی و هەنگاوی تاکلایەنە دەکات لە هەر لایەنێکەوە بێت کە مەبەست لێی گۆڕینی سنوورەکان بێت و، ئەمریکا پشتیوانی عێراقێکی یەکگرتوو، فیدراڵ، دیموکرات و خۆشگوزەران دەکات و بەردەوام دەبێت لە گەڕان بەشوێن دەرفەت بۆ یارمەتیدانی عێراقییەکان تاوەکو لەچوارچێوەی دەستووردا بە خواستەکانیان بگەن"}

27/9/2017