^{ئێران بەڵێنیدا کە لایەنی یەکەم نەبێت لە پێشێلکردنی ڕێکەوتنە ناوەکییەکە و وتی پێی وانیە ئەمەریکا لە ڕێکەوتنە ناوەکییەکە بکشێتەوە سەرەڕای ڕەخنە توندەکانی سەرۆک ترامپ لە ڕێکەوتنەکە.}

^{سەرۆک ترامپ وتی بڕیاریداوە سەبارەت بەوەی کە ئەمەریکا لە ڕێکەوتنەکەدا دەمێنێتەوە یان نا، بەڵام بڕیارەکەی ڕانەگەیاند.}

^{لە وتەیەکیدا لەبەردەم کۆمەڵەی گشتی نەتەوە یەکگرتووەکان سەرۆکی ئێران حەسەن ڕۆحانی بەتوندی وەڵامی وتارەکەی سەرۆک ترامپی دایەوە.}

^{ڕۆحانی وتی ئێران دەیەوێت ڕێکەوتنە ناوەکیەکە بپارێزێت لەنێوان وڵاتەکەیی و شەش وڵاتە زلهێزەکەی جیهاندا کە بەپێی ڕێکەوتنەکە دەبێت بۆ دە ساڵ ئێران سنورێک دانێت بۆ چالاکییە ناوەکییەکانی و لەبەرامبەردا سزا داراییەکانی سەری کەم دەکرێتەوە.}

^{ڕۆحانی وتی " لەبەردەمتانە ڕایدەگەیەنم ئێران یەکەمین وڵات نابێت کە ڕێکەوتنەکە پێشێل بکات" وتیشی " ئێران بە توندی وەڵامی هەر پێشێلکارییەک دەداتەوە لە ڕێکەوتنەکەدا لەلایەن هەر لایەنێکەوە بکرێت.}

^{وە لە گفتوگۆیەکیشدا لەگەڵ ڕۆژنامەنووسان ڕۆحانی وتی پێی وانیە ئەمەریکا لە ڕێکەوتنەکە بکشێتەوە سەرەڕای وتارەکەی سەرۆک ترامپ و وتیشی هەر وڵاتێک لە ڕێکەوتنەکە بێتە دەرەوە ئەوا شەرمەزاریی و گۆشەگیری بۆ خۆی دەهێنێت.}

^{ڕۆحانی وتی " سەرەڕای لێدوانەکان پێم وانیە ترامپ لە ڕێکەوتنەکە بکشێتەوە."}

^{وتیشی " ئەگەر بەرپرسانی ئەمەریکا پێیان وابێت دەتوانن بەهۆی کشانەوە لە ڕێکەوتنەکە فشار بخەنە سەر ئێران ئەوا هەڵەیەکی گەورە دەکەن.. یان ئەوەتا ڕێکەوتنە ناوەکییەکە وەکوو خۆی بمێنێتەوە یان تێکدەچێت."}

^{نوێنەری ئەمەریکا لە نەتەوە یەکگرتووەکان نیکی هەیڵی وتی سەرۆک ترامپ دڵخۆش نیە بە ڕێکەوتنەکە بەڵام وتارەکەی لەبەردەم نەتەوە یەکگرتووەکاندا مانای ئەوە نیە کە ئەمەریکا لە ڕێکەوتنەکە دەکشێتەوە.}

^{سەرچاوە/ ڕۆیتەرز}