^{ناوەندی سەربەخۆیی کوردستان نامەیەکی لەسەر ڕیفراندۆم ئاراستەى نەتەوەیەکگرتووەکان کرد و داوای لێکردوون لە ڕێگەى لیژنەیەکەوە چاودێرى ڕیفراندۆم بکەن.}

^{ناوەندی سەربەخۆیی کوردستان لە نامەکەیدا ڕایگەیاندووە، "ئێمە لە ناوەندی سەربەخۆیی کوردستان، بانگەواز دەکەین بۆ نەتەوە یەکگرتووەکان تا بەرپرسیارێتی ڕاستەوخۆ لە ئەستۆ بگرن بۆ چاودێری کردن و سەرپەرشتی کردنی ڕیفراندۆم کە تیایدا خەڵکی کوردستان ئازادانە بتوانن دەنگ بدەن بەوەی دەیانەوێت لەچوارچێوەی عیراقدا بمێننەوە یان جیاببەوە".}

^{ئەوەش هاتووە ، " داوا دەکەین لە نەتەوە یەکگرتووەکان بە فەرمی ڕایگەیەنێت کە ئامادەن چاودێری و سەرپەرشتی پڕۆسەی ڕیفراندۆمەکە بکەن و لیژنەیەک لە پسپۆڕان پێک بێنن بۆ سەرپەرشتی کردنی پڕۆسەی دەنگدانەکەو ئاشکراکردنی ئەنجامەکەی".}

^{ناوەندی سەربەخۆیی کوردستان داواشی کردووە، نەتەوە یەکگرتووەکان بەرپرسیارێتی پاراستنی خەڵکی کوردستان لە ئەستۆ بگرێت دژی ھەر توندوتیژی و ھەڕەشەیەکی حکومەتی عیراق و دەوڵەتانی دراوسێ.}

^{ئاماژە بەوەشکراوە، ئێمە پێمان وایە کە باشترین بژاردە بۆ ھەرێمی کوردستانی عێراق جیابوونەوەیە لە عێراق، چونکە ئەم حکومەتە ھەمان ناسنامەی باڵادەستی عەرەبی ھەڵگرتووە و ھەڵوێست و کردارەکانیان نەگۆڕاوە و ھەمان ڕەفتاری ڕژێمەکانی پێشوی عێراق دەکەن کە خەڵکی کوردیان دەچەوساندەوە. باشترین ڕێگاچارەی ئەم کێشەیەش بریتییە لە ماف دان بە خەڵکی کوردستان تا ڕیفراندۆم بکەن و ڕێگەیان پێ بدرێت بۆ ئەوەی خواستی خۆیان بخەنە ڕوو ئاخۆ دەیانەوێت سەربەخۆبن یان نا.}

^{ئەوەشیان لە نامەکەدا داواکردووە، نەتەوە یەکگرتووەکان و کۆمەڵگای نێودەوڵەتی کاربکەن لەسەر بڕیاری خەڵکی کوردستان و فشاربخەنە سەر حزبە سیاسیەکان و حکومەتی عێراق تا کار بە بڕیاری خەڵکەکە بکەن.}

^{لە نامەکەدا ئەوەش هاتووە ، "داوا دەکەین نەتەوە یەکگرتووەکان کونگرەیەکی نیودەوڵەتی ببەستێ بۆ گفتوگۆ و سەلماندنی مافی ڕیفراندوم و سەربەخۆیی و کێشەی کورد".}

^{لەکۆتایی نامەکەشدا هاتووە "ھەربۆیە، ئێوە ئەرکێکی سەرەکیتان لە ئەستۆیە بە وەڵام دانەوەی ئەو بارودۆخە ناجێگیرەی کوردستان و ھیوادارین ڕەزامەندی بدەن لەسەر ئەم داواکاریانەی سەرەوە".}

^{ڕۆژی ٧ ی حوزەیران جگە لە گۆڕان و کۆمەڵ، لایەنە سیاسیەکانی دیکەی هەرێم لەگەڵ بارزانیدا کۆبوونەوە و بڕیاریاندا ڕۆژی ٢٥ ی ئەیلول ڕیفراندۆم لە هەرێمی کوردستاندا ئەنجام بدرێت و ئەنجوومەنێکی باڵاش بۆ ئەنجامدانی ڕیفراندۆم پێکهێنرا لە نوێنەری لایەنە سیاسییەکان.}