^{سەرەڕای بەدواداچوونە بەردەوامەكانی بنەماڵەی رامین حسێن‌پەناهی، و سەردانی ناوەندە ئەمنیەتیی و قەزاییەكان، تا ئێستا لە چارەنووسی ئەم چالاكە سیاسییە كوردە هیچ هەواڵیك لە بەر دەستدا نییە.}

^{رامین حسێن‌پەناهی رۆژی ٢ی پووشپەڕ لە كاتێكداكە بە سێ فیشەك بریندار كرا لە لایەن هێزەكانی سپای پاسدارانەوە دەستبەسەر و بۆ شوینێكی نادیار گواسترایەوە. سەرەڕای بەداداچوونە بەردەوامەكانی بنەماڵەی ناوبراو و سەردانی ناوەند ئەمنیەتییەكان، ناوەندە بەرپرسیارەكان تا ئێستا هیچ وڵامێكیان لە سەر چارەنووسی رامین بە بنەماڵەكەی نەداوەتەوە.}

^{جێی وەبیرهێنانەوەیە كە دایك و باوكی رامین لەو ماوەیەدا دەیان جار سەردانی ئیدارەی ئیتلاعات و سپای پاسدارانیان كردووە بەڵام تا ئێستا ئەم دوو ناوەندە ئەمنیەتییە ئامادە نەبوون لەمبارەیەوە وڵامی دایك و باوكی رامین بدەنەوە.}

^{بە وتەی بنەماڵەی رامین، رامین لەو كاتەوەی كە گیراوە تا ئێستا چارەنووسی نادیارە و لە دۆخی تەندروستیشی هیچ زانیارییەكمان پێ نەگەیشتووە، ئەوان دەڵێن سەرەڕای هەوڵە بەردەوامەكانمان هیچ كام لە ناوەندە ئەمنیەتییەكان ئامادە نەبوون وڵامێكی راست و یەكلاكەرەوەمان پێ بدەنەوە.}

^{رامین حسێن‌پەناهی چالاكی سیاسی و ئەندامی كۆمەڵەیە كە رێكەوتی ٢ی پووشپەڕی ئەمساڵ لە لایەن هێزەكانی سپای پاسدارانەوە بە برینداری دەستبەسەر كرا.}

^{هەر لە درێژەی گوشاری ناوەندە ئەمنیەتییەكان بۆ سەر بنەماڵەی ناوبراو چەند ئەندامیتری ئەم بنەماڵەیە دەستبەسەر كراون.}

^{سەرەتا هێزە ئەمنیەتییەكان ژمارەیەك لە ئەندامانی بنەماڵەی حسێن‌پەناهییان دەستبەسەر كردووە؛ هەر هەمان رۆژی دەستبەسەركردنی رامین واتە ٢ی پووشپەڕ ئەفشین حسێن‌پەناهی برای رامین لە ماڵەكەی خۆی دەستبەسەر كراوە و دواتر ئەنوەر حسێن‌پەناهی برایەكی دیكەی رامین رێكەوتی ٤ی پووشپەڕ لە لایەن ناوەندە ئەمنیەتییەكانەوە دەستبەسەر و پاشان سێ ئەندامیتری ئەم بنەماڵەیە رێكەوتی ٥ی پووشپەڕ بە ناوەكانی زوبەیر، ئەحمەد و كەیوان حسێن‌‌پەناهی دەستبەسەر كراون.}

^{جێگای ئاماژەیە، هێزە ئەمنیەتییەكان پاش تێپەڕینی دوو رۆژ لە دەستبەسەركردنی ئەنوەر حسێن‌پەناهی ناوبرایان بۆ تاران گواستەوە و بە مەرجی ئەوەی كە نەگەڕێتەوە كوردستان ئازادیان كرد ؛ هەروەها زوبەیر، ئەحمەد و كەیوان حسێن‌پەناهیش بە شێوەی كاتی لە زیندان ئازاد كران بەڵام تا ئێستا ئەفشین و عەباس حسێن‌پەناهی لە گرتووخانەكانی ئیدارەی ئیتلاعات دا بە سەر دەبەن.}

^{هەر ئێستاش پاش تێپەڕینی دوو مانگ لە چارەنووسی رامین و دەستبەسەركراوەكانی دیكە هیچ هەواڵێك لە بەر دەست دانییە تا ئەو جێیەی كە بنەماڵەی حسێن‌پەناهی لە بێ دەرەتانی خۆیان نامەیان بۆ رێپۆرتێری تایبەتی مافی مرۆڤی نەتەوە یەكگرتووەكان "ئاسمە جەهانگیر" نووسیوە.}

^{بەڕێز خانمی ئاسمە جەهانگیر ، ماوەی دە ساڵە بنەماڵەی ئێمە لە لایەن كۆماری ئیسلامیەوە لە ژێر شەپۆلی دەستگیری، ئیعدام، درووخستنەوە و جۆرەها گوشاری جەستەیی و دەروونی دان و لەم ماوەیەدا ناخۆشی و نەهامەتی زۆرمان بە سەر هاتووە، بیرەوەری تاڵی لە دەستدانی یەك لە دوای یەكی ئەندامانی بنەماڵەكەمان "ئەشرەف، سەباح و مەسعود حسێن‌پەناهی" و گوشاری جەستەیی و دەروونی ئەنوەر حسێن‌پەناهی لە ماوەی حەوت ساڵ راگیران لە ژوورە تاكەكەسییەكانی ئیتلاعات و زیندان هەرگیز لە یادمان ناچێت.}

^{ئەوان لە نامەكەی خۆیان روو لە ئاسمە جەهانگیر نووسیویانە: بە پێی ئەو ئەشكەنجە و ئەزیەت و ئازارانەی كە لە ناوەندە ئەمنیەتییەكان هەیە و ئەزموونی كۆماری ئیسلامیش بۆ هەڵسووكەوت لە گەڵ زیندانیانی سیاسی؛ دۆخی تەندروستی رامین بۆ ئێمە بنەماڵەی حسێن‌پەناهی جێگای نیگەرانییە و رامین لە ژێر هەڕەشەی جیددی دایە. هەر بۆیە ئێمە وەك بنەماڵەی حسێن‌پەناهی داوا لە سەرجەم ناوەندە مافی مرۆڤییەكان و كۆمەڵگای نێونەتەوەیی و هەروەها ئێوەش دەكەین كە هەڵوێستی جیددی لەمبارەیەوە بگرن و رێگری بكەن لە روودانی هەر رووداوێكی نەخوازراوی دیكە بۆ بنەماڵەكەمان.}

^{هەروەها رۆژی ٩ی پووشپەڕیش رێكخراوی لێبووردنی نێونەتەوەیی كە بنكە سەرەكییەكەی لە لەندەنە بە بڵاوكردنەوەی راگەیەندراوێك دەستبەسەركردنی ئەندامانی بنەماڵەی حسێن‌پەناهی مەحكوم دەكات و خوازیاری روونكردنەوەی دۆسیەی گیراوەكان، شوێنی راگیرانی ئەم كەسانە و روونكردنەوەی پێویست لە سەر چارەنووس و دۆخی رامین حسێن‌پەناهی كە بە برینداری دەستبەسەر كراوە بوون.}

^{ئەم رێكخراوەیە داوای لە بەرپرسانی كۆماری ئیسلامی كردووە كە چی زووتر ئەندامانی بنەماڵەی حسێن‌پەناهی كە تەنیا لە پەیوەند لە گەڵ دەستگیر كردنی رامین دەستبەسەر كراون ئازاد بكات.}