^{بەھمەن قوبادی، سینەماکاری ناوداری کورد، کە ناوی چووەتە ناو ٢٥ دەرهێنەری ناسراوی سەدەی ٢١، خەڵاتەکەی خۆی پێشکەش بە سەربەخۆیی هەرێمی کوردستانی باشوور کرد.}

^{بەهمەن قوبادی، دوای ئەوەی کە حەوتووی ڕابردوو، وەک یەکێک لە ٢٥ دەرهێنەری ناسراو و چالاکی سەدەی ٢١ لە ئاستی جیهاندا دەست نیشان و خەڵات کرا، ئەم خەڵاتەی پێشکەش بە نەتەوەی کورد لە هەرێمی کوردستانی باشوور و داوای سەربەخۆیی کوردستان کرد.}

^{بەھمەن قوبادی، سینەماکاری ناسراوی کورد، لە کاتی نمایش کرانی یەکێک لە بەرھەمەکانی لە وڵاتی فەڕانسە، وێڕای پێشکەش کردنی خەڵاتەکەی بە سەربەخۆیی هەرێمی کوردستانی باشوور رایگەیاند: “ئەم شانازییە کە وەک ڕۆڵەیەکی کورد بە من بەخشراوە، کە وەک یەکێک لە 25 دەرھێنەری بەرچاوی سەدەی 21 لە ئاستی جیهان ھەڵبژێردراوم، پێشکەش بە نەتەوەی زۆرلێکراو، ڕەنجکێشاو و خەباتکاری ھەرێمی کوردستان دەکەم کە ئەمڕۆ بۆ ئەنجامدانی پڕۆسەی گشتپرسی ھەنگاو دەنێن و بەرەو سەربەخۆیی دەڕۆن. منیش ئەو شانازییەم پێشکەش بەو بزاڤە گرنگە دەکەم”.}

^{قوبادی، هەروەها ڕەخنەی لە نەنووسرانی ناوی کوردستان لە پێش ناوەکەی گرت و گوتیشی: “ئاواتم ئەوە بوو لە ناو لیستی 25 دەرھێنەری بەرچاوی سەدەی 21ی جیھان، لە پێش ناوەکەم نووسرابا، بەھمەن قوبادی، خەڵکی کوردستان و منیش بەناوی کوردستان ئەو شانازییەم وەدەست هێنابایە، ئاواتم ئەوەیە کە بە زووترین کات ئەوە ڕوو بدات و بە ناوی کوردستانەوە فیلمەکانمان لە ئۆسکار بەشداری بکات، نەک بەناوی وڵاتانێکی وەک تورکیە یان عێراق، یان ئێران و سووریە”.}

^{سینەماکاری ناسراوی کورد و جیهان، بە ئاماژە بە زۆرلێکراوی و ئازارەکانی گەلی کورد لە درێژایی مێژوودا گوتی: “ئەوە مافی نەتەوەکەمە، ھەر بەم بۆنەیەشەوە ئەو شانازییەم پێشکەش بە نەتەوەی زۆر لێکراو، چەوساوە، پاک، ئەنفالکراو و لێقەماوی ھەرێمی کوردستان دەکەم، ئەو شانازییە ھی من نییە و لەڕاستیدا ھی ئەوانە کە ئێستاکە سەرقاڵی خەباتێکی گرنگن و بە زوویی داوای سەربەخۆیی دەکەن کە مافی بێ ئەملاوئەولای ئەو نەتەوەیە”.}