^{دوای دیاریکردنی رۆژی ئەنجامدانی گشتپرسی لە باشووری کوردستان و، پێکهێنانی ئەنجوومەنی باڵای ریفراندۆم، ئێستا ئەو ئەنجوومەنە لە پلانیدایە سەردانێک بۆ وڵاتانی جیهان رێکبخات، بەمەبەستی کۆکردنەوەی پاڵپشتیی نێودەوڵەتی.}

^{ئەندامێکی ئەنجوومەنی باڵای ریفراندۆم بە تۆڕی میدیایی رووداوی راگەیاند "بڕیاربوو دوای سەردانی بارزانی و شاندی یاوەری بۆ بەلجیكا، چەند كۆبوونەوەک بەمەبەستی دانانی نەخشەڕێگەی پێویست سەبارەت بە پرۆسەی گشتپرسی ئەنجامبدرێت".}

^{عەبدوڵڵا وەرتی، هەروەها گوتی" مژارەکانی دانووستاندنی شاندەکان لەگەڵ وڵاتان بۆ پشتیوانی و پاڵپشتی پەیداکردنە بۆ پرۆسەی گشتپرسی و، پێدانی روونكردنەوەی پێویستە،كە گشتپرسی مایەی مەترسی نییە بۆ سەر بەرژەوەندیی وڵاتان، بەڵكو مایەی ئاشتی و سەقامگیرییە".}

^{لەبارەی بەردەوامبوونی کۆبوونەوەی ئەنجوومەنی باڵای ریفراندۆم، محەممەد ئیلخانی، سەرۆکی پارتی گەشەپێدانی تورکمانی، کە هاوکات ئەندامی ئەنجوومەنی باڵای ریفراندۆمە، بە رووداوی راگەیاند "لەم هەفتەیەدا بەرنامەی سەردانیکردنی وڵاتانی هەرێمی، عەرەبی و ئەندامانی ئەنجوومەنی ئاسایش و بەغداش دادەنێین. وڵاتان و بەغداش دڵنیادەکرێنەوە کە گشتپرسی بۆ تێکدانی بارودۆخی ناوچەکە نییە و، تێیاندەگەیێنین کە گشتپرسی لە ناوچە کوردستانییەکانی دەرەوەی ئیدارەی هەرێمی کوردستانیش ئەنجام دەدرێت".}

^{رۆژی 7-6-2017 مەسعود بارزانی سەرۆكی هەرێمی كوردستان لەگەڵ لایەنەكانی بەشدار لە حكومەت و پەرلەمان (جگە لە گۆڕان و كۆمەڵ) كۆبووەوە. رۆژی 25-9-2017 بە وادەی ئەنجامدانی گشتپرسی دیاریكرا و، کۆمسیۆنی باڵای هەڵبژاردن و راپرسی بۆ راییکردنی کارە پێویستەکان راسپێردراوە.}

^22/7/2017