ئەمیر حەسەنپوور لە جولای 1943 لە مهاباد لەدایک بووە و دۆینێ شەممە لە تەمەنی 74 ساڵی لە تۆرێنتۆی کەنەدا بەهۆی نەخۆشییەوە گیانی لەدەستدا.
پرۆفیسۆر حەسەنپوور ساڵی 1964 لە زانکۆی تاران بەکالۆریۆسی لە ئەدەبیاتی ئینگلیزی وەرگرتووە و دواتر پلەکانی ماستێر و دکتۆرای زمانناسی هەر لە زانکۆی تاران بەدەستهێنا. لە ساڵی 1989 لە زانکۆی ئیلینیۆی ئەمریکا لەبواری زمانناسی کۆمەڵایەتی و مێژووی هاوچەرخی رۆژهەڵاتی ناوەڕاست دکتۆرای وەرگرتووە. تێزی دکتۆراکەی لەبارەی گەشەکردنی نیشتمانی و بە ستانداردکردنی زمانی کوردی لەنێوان ساڵانی 1918 تاوەکو 1985 بوو.
حەسەنپوور لەساڵی 1986ـەوە نیشتەجێی کەنەدایە و لە زانکۆکانی ویندسوور، کۆنکۆردیا و تۆرێنتۆ وانەی گوتووەتەوە. ئەو ژمارەیەکی زۆر بەرهەمی لە بوارەکانی زمان، میدیا، بزووتنەوە کۆمەڵایەتییەکان، ناسیۆنالیزم، جینۆساید و بابەتی دیکەی لێ بەجێماوە کە بەشێکی کەمیان لە ئینگلیزییەوە کراونەتە کوردی.
