جۆن مه‌كه‌ین، سیناتۆری ئه‌مه‌ریكا ئه‌مڕۆ (سێشه‌ممه) له دیبه‌یتێكی ته‌له‌فزیۆنیدا، ته‌ئكیدی له‌وه كردوه‌ته‌وه كه حكومه‌ته‌كه‌ی نوری مالیكی ده‌ڕوخێت و عێراق بۆ سێ وڵاتی جیا له یه‌ك هه‌ڵده‌وه‌شێت.
... ناوبراو ئه‌وه‌شی وتوه، كه بڵاوبونه‌وه‌ی هێزه‌كانی میلیشیا له عێراقداو گرژی له ناوچه كوردیه‌كان و سه‌رجه‌م ناوچه‌كان و "هه‌ڵاتنی تاریق هاشمی بۆ هه‌ولێر"، به‌ڵگه‌یه له‌سه‌ر هه‌ڵوه‌شانی عێراق.
له‌و دیبه‌یته ته‌له‌فزیۆنیه‌دا جۆن مه‌كه‌ین رایگه‌یاندوه: له ئێستادا هه‌ڵوه‌شانی عێراق به چاوی خۆمان ده‌بینین و دواجاریش له‌ناوخۆدا ده‌بێت به سێ وڵاته‌وه.
مه‌كه‌ین، كه له هه‌ڵبژاردنی پێشوی ئه‌مه‌ریكادا له‌لایه‌ن پارتی كۆماریه‌وه بۆ سه‌رۆكایه‌تی ئه‌مه‌ریكا خۆی پاڵاوتبو، باسی له‌وه‌شكردوه، كه ئه‌و 15 هه‌زار ئه‌مه‌ریكیه‌ی ئێستا له عێراقدان، گیانیان پارێزراو نیه‌و ئه‌مه‌ریكا ناچار ده‌بێت پاشه‌كشه‌یان پێبكات، ئه‌گه‌ر بارودۆخی ئه‌منی عێراق به‌ره‌و داڕمان رۆشت و پشێوی تێیدا زاڵ بو.
ئه‌و سیناتۆره‌ی ئه‌مه‌ریكا ته‌ئكیدی له‌وه‌شكردوه‌ته‌وه كه "حكومه‌تی ئێستای عێراق له لێواری روخاندایه"، ئه‌وه‌شی وتوه كه "پشێوی له ناوچه كوردیه‌كان و سه‌رجه‌م ناوچه‌كانی تری عێراق له به‌رزبونه‌وه‌دایه".
جۆن مه‌كه‌ین، خراپبونی ره‌وشی بارودۆخی عێراقی خستوه‌ته ئه‌ستۆی باراك ئۆباما و وتویه‌تی: پێناچێت وه‌زیری به‌رگری ئه‌مه‌ریكا له‌وه تێگه‌یشتبێت كه دۆخی عێراق به‌ره‌و له‌به‌ر یه‌كهه‌ڵوه‌شان ده‌چێت
ناوەندی هەواڵ- دانمارک: بە مەبەستی پێکهێنانی کۆدەنگییەک لە نێوان لاوانی کوردی ڕۆژهەڵات لە وڵاتی دانمارک و بە مەبەستی لیک نزیکبوونەوەی زیاتر و هاریکاری لە پێناو دابین کردنی داهاتوویەکی گەش ڕووناک و زەمینە خۆشکردن بۆ تێکەڵاوی و پێکەوە هەڵکردن، یەکێتی لاوانی دیموکراتی ڕۆژهەڵاتی کوردستان لە ناوچەی " یولەند،ی دانمارک، لە ژێر دروشمی " مادام کە حیزبەکان لە ناوەندی بڕیار نەگەشتوونە قەناعەتی پێکەوە کارکردن، ڕۆلە دڵسۆزەکانی گەل لە خوارەوە دەبێ قۆڵی لێ هەماڵن" میوانداری ئەندام و لایانگری سەر بە ٤ حیزب و ڕێکخراوەی ڕۆژهەڵاتی کوردستانیان کرد. ئەو کۆبوونەوەی ڕۆژی ٣١/١٢/٢٠١١ لە کەش و هەوایەکی تەواو دۆستانە و دوور لە هەر چەشنە دمارگرژێیەکی حیزبی پێک هات و بەشداران باسیان لە داڕشتنی گەڵاڵەیەکی هاوبەش بە مەبەستی هاریکاری، سەرەتا لە وڵاتی دانمارک و پاشان کاراکردنی هەنگاوەکان بۆ پەرەپێدانی ئەو هاوکاریانە بۆ وڵاتانی دیکە و سەرئەنجام کوردستان کرد و هەموو لە سەر ئەو خاڵە هاورا بوون کە ئەگەر سەرکردە و بەڕێوەبەرایەتی حیزبەکان ئامادە نین لە نزیکەوە بۆ چارەسەری ناکۆکییەکان و زەمینە خۆشکردن بۆ کاری هاوبەش پیکەوە دانیشن، دەبا ئەندام و لایانگران و بەتایبەت لاوان لای خۆیانەوە، هەر چەندە لە پلەکانی خوارەوەش بێ دەست بدەنە ئەو کارە و هەوڵی پێکهێنانی بەرەیەکی هاوبەش لە نێوان دۆستان و لایانگرانی هەر ٥ حیزبەکە بدەن و لەو ڕێگەیەوە بە گژ پیلان و بەرنامەی ڕژیمی کۆنەپەرست و دژی گەلی ئیسلامی ئێراندا بچنەوە.
