نیلسۆن ماندێللا، سه‌رۆكی كۆچكردووی ئه‌فریقیای باشوور ماوه‌ی 27 ساڵ ژیانی له گرتووخانه به‌سه‌ر برد و چه‌ندین چیرۆكی نهێنی تۆماركردن، به‌ڵام جگه له كریستۆ براند، پاسه‌وانی ئه‌و ژووره‌ی ماندێللای له ساڵی 1964 تاوەكو ساڵی 1990 تێدا زیندانی كرابوو، كه‌س نایزانێت.
كریستۆ براند له‌هه‌ڤپه‌یڤینێكدا له‌گه‌ڵ تۆڕی هه‌واڵی ABC ئه‌مریكی رایگه‌یاند:"زۆر دڵگران بووه كاتێك هه‌واڵی كۆچی دوایی باوكی ئاشتی، ماندێللای بیستووه".
براند كه به‌م دواییه سه‌ردانی ماندێللای كردبوو ده‌ڵێت، دوو ساڵ پێش ئێستا له‌گه‌ڵ خێزانه‌كه‌ی له‌شاری كیپ تاون سه‌ردانی ماندێللایان كردووه و ماوه‌ی سێ كاژێر له‌گه‌ڵی دانیشتوون و باسی رابردوویان كردووه.
پاسه‌وانی ژووره‌كه‌ی ماندێلا له زیندان له‌درێژه‌ی قسه‌كانیدا باس له‌وه‌ش ده‌كات، ئه‌و كاته‌ی ته‌مه‌نی 18 ساڵ بووه له زیندانی دوورگه‌ی ریبن (زیندانی پێشووی ئه‌فریقیای باشوور) كاری كردووه و ماندێللاش كه له‌ساڵی 1964 زیندانی كراوه، ته‌مه‌نی 46 ساڵ بووه".
ئاماژه به‌وه‌ش ده‌كات، كه په‌یوه‌ندییه‌كی باشی له‌گه‌ڵ ماندێللادا هه‌بووه و ته‌نانه‌ت هه‌ندێكجار شتوومه‌كی وه‌كو باشترین كرێمی قژی بۆ بردووە و جارێكیشیان نه‌وه‌یه‌كی ماندێللای به‌نهێنی بردووه‌ته لای بۆ ئه‌وه‌ی چاوی پێبكه‌وێت".
لای خۆشیه‌وه، ماندێلا هانی براندی داوه كه گرنگی بدات به خێزانه‌كه‌ی.
پاش تێپه‌ربوونی 27 ساڵ كاتێك ماندێللا ئازادكراو بووه سه‌رۆكی ئه‌فریقیای باشوور، ئه‌ویش گرنگیه‌كی زۆر به كریستۆ براند ده‌دات كاتێك كارمه‌ندێكی ئاسایی حكومه‌ت بووه".
براند ده‌ڵێت:" ماندێلا به فڕۆكه‌یه‌كی تایبه‌تی هاته ناو باره‌گای په‌رله‌مان و له‌كاتی چوونه‌ژووره‌وەی ته‌وقه‌ی له‌گه‌ڵ هه‌موو ئه‌وانه كردووه كه له ژووره‌وه بوون و سه‌رقاڵی گفتووگۆكردن بوون له‌سه‌ر نووسینه‌وه‌ی ده‌ستوورێكی نوێ بۆ وڵات".
گوتیشی:" كاتێك ماندێلا منی بینی به‌ڵگه‌نامه‌كان دابه‌ش ده‌كه‌م به‌سه‌ر ئاماده‌بووانی كۆبوونه‌وه‌كه‌دا به‌ده‌نگی به‌رزو به‌به‌رچاوی هه‌موویانه‌وه سوپاسی كردم".
براند ده‌شڵێت، ماندێللا هه‌مووی تووشی سه‌رسوڕمان كردن كاتێك گوتی:"ده‌زانن ئه‌وه كێیه؟ ئه‌وه پاسه‌وانی زیندانه‌كه‌م و هاوڕێم بوو، هه‌ستم به‌شانازییه‌كی زۆر كرد كاتێك ویستیان وێنه‌یه‌كی به‌كۆمه‌ڵ بگرن ماندێلا منی بانگ كردوو گوتتی ده‌بێت له ته‌نیشتمه‌وه بیت".
كریستۆ براند جەختدەكاتەوە كە جارێكی دیکە گه‌ڕاوه‌ته‌وه بۆ دوورگه‌ی روبین كه ماندێللای تێدا زیندانی كرابوو، به‌ڵام ئه‌م جاره زیندان نه‌بووه، به‌ڵكو كرابوویه شوێنێكی گه‌شتیاری گه‌وره.
له‌كۆتایی هه‌ڤپه‌یڤینه‌كه‌یدا براند باسی وەسیەتێ:ی ماندێللا دەكات و ده‌ڵێت، به ماندێلام گوت كاتێك مردیت له دوورگه‌ی روبین بتنێژین، ماندێلاش پێكه‌نی و گوتی بۆچی؟ له‌به‌ر ئه‌وه‌ی شوێنێكی گه‌شتیاری خۆشه؟ ده‌ته‌وێ دوای ناشتنیشم له‌وه‌ی پاره په‌یدا بكه‌یت، ده‌مه‌وێت كاتێك مردم له‌شوێنی له‌دایكبوونم له گوندی كۆنۆ بمنێژن.
ماندیللا له 18ی تەمووزی 1918 لە ئەفریقای باشوور لە دایکبووە، لە تەمەنی ٩٥ ساڵیدا دوای مانەوەی بۆ ماوەیەکی درێژ لە نەخۆشخانە کۆچی دوایی کردو رۆژی 15 مانگ له شوێنی له‌دایكبوونی خۆی له گوندی كۆنۆ له‌سه‌ر وه‌سیه‌تی خۆی له‌رێوره‌سمێكی شایسته‌دا به‌خاكسپێردرا.
rudaw
17/12/2013
