"سەرهەڵدانی کوردستانی گەورە"، ئەمە ناونیشانی بابەتێکی گۆڤاری ناشناڵ ئینترێستـە، کە سەنتەری ناشناڵ ئینتێرستی ئەمریکی مانگانە دەریدەکات و گرنگی بە بیرۆکە سیاسی و کولتوورییەکانی سیاسەتی دەرەوەی ئەمریکا دەدات، لەلایەن نووسەری بەناوبانگی گۆڤارەکە تێد گالین کارپێنتەر نووسراوە و باس لە دەرکەوتنەی ئاماژە سەرەتاییەکانی ئەگەری هاتنە ئارای کوردستانی گەورە دەکات.
لە گوتارەکەدا باس لە پەیکەری کوردستان دەکات، کە گەورەترین نەتەوەی بێ دەوڵەتی جیهانە و لەنێو چوار وڵاتدا دابەشکراوە، کە ئەمڕۆ خاوەنی کۆمەڵێک سەرچاوەی مەعنەوی و ماددی وەهایە، ئەگەری ئەوەی لێدەکرێ بەرەو دروستکردنی دەوڵەتێکی مەزن بڕوات.
نووسەری گوتارەکە تێد گالەن کارپێنتەر، بەڕێوەبەری کاروباری خوێندنەوەی سیاسەتی دەرەوە و بەرگری پەیمانگای کاتۆیە لە ئەمریکا، ئەو نووسیویەتی "لەگەڵ سەرەتاکانی دەستپێکی شەڕی ناوخۆی سووریا، شانۆیەکی نوێی سیاسی بۆ کوردەکان پەردەی لەسەر لادراوە، بە تایبەت کە لەماوەی چەند مانگی رابردوودا کوردەکان توانیان رووبەڕووی گرووپە ئیسلامییەکان لە سووریا بوەستنەوە و سەرکەوتنێکی بەرچاویان بەدەستهێنا، ئەوان توانیان لە زۆربەی ناوچەکاندا چەکدارانی جەبهەتولنوسرە و گرووپەکانی دیکەی گرێدراو بە رێکخراوی قاعیدە لەناوچە کوردییەکان دەربکەن".
هەروەها ئاماژە بەوەش دەکات "کوردەکان ئێستا خاوەنی دەسەڵاتێکن بۆ خۆیان و توانیان بەم دواییانە دەسەڵاتێکی خۆجێیی رابگەیەنن"، بە بۆچوونی کارپێنتەر "ئەمە یەکێکە لەو خاڵانەی وامان لێدەکات بیر لە کوردستانی گەورە بکەینەوە".
یەکێکی دیکە لەو خاڵانەی کارپێنتەر تیشکی دەخاتە سەر، کرانەوەی حکومەتی تورکیایە بەڕووی کوردەکانی باکووردا، ئەو پێیوایە "ساڵانێکە تورکیا لە ململانێدا بوو لەگەڵ پەکەکە، هەروەها یەکێک بوو لەو وڵاتانەی نیگەران بوون لە بڕیارەکەی ئەمریکا لەساڵی ١٩٩٠ سەبارەت بە دەستنیشانکردنی ناوچەی دژەفڕین بۆ هەرێمی کوردستانی عێراق، بەڵام ئەمڕۆ حکومەتەکەی رەجەب تەیب ئەردۆغان، زنجیرەیەک هەوڵی دەستپێکردووە بۆ ئەوەی چارەسەرێک بۆ کێشە سیاسییەکانی کوردەکان بدۆزێتەوە و چیدی پەنا بۆ کردەی سەربازی نەبات.
جگە لەوانەش، پێشکەوتنی پەیوەندییەکانی ئەنقەرە و هەولێر یەکێکی دیکەیە لە خاڵە دیارەکانی گوتارەکەی کارپێنتەر، ئەو پێی وایە پێشکەوتنە ئابوورییەکانی حکومەتی هەرێمی کوردستان و درووستبوونی گرێبەستە بازرگانییەکان لەنێوان ئەنقەرە و هەولێر، وادەکەن سیاسەتی ئەنقەرە لەبەرامبەر کوردەکاندا بچێتە قۆناخێکی دیکەوە، بەڵام لەگەڵ هەموو ئەمانەشدا پرسی کورد بۆ تورکیا سەرەکیترین پرسەکانی رۆژهەڵاتی ناوەڕاستە.
لە کۆتایی گوتارەکەیدا کارپێنتەر دەنووسێت "حکومەتی هەرێمی کوردستان کە سەرەتاکان وەک هەرێمێکی سەر بە عێراقێکی یەکگرتووە دانی پێدانراوە، ئیدارەی ئۆباماش بەردەوامە لە هاوکاریکردنی عێراق بۆ ئەوەی بە یەکگرتوویی بمێنێتەوە"، ئەو دەشنووسێت "ئەمریکا سەبارەت بە سووریاش هەر هەمان بۆچوونی هەیە، بەڵام دروستبوونی هەرێمێکی بەهێزی وەک کوردستانی عێراق لە سووریا، دەتوانێت رێگە بەرەو کوردستانێکی سەربەخۆ بگرێتە بەر. بۆیە ئێستا کاتی ئەوە هاتووە بەرپرسانی ئەمریکا بە جددی بیر لەم بابەتە بکەنەوە و پرسیار لەو بکەن کە ئایا وادەی ئەم پرسەی کورد سەبارەت بە سەربەخۆبوون هاتووەتە پێشەوە، چونکە دروستبوونی کوردستانێکی سەربەخۆ بێگومان وڵاتانی عێراق، ئێران، تورکیا و سووریا بێزار دەکات".
28/11/2013
