^{نەمر (مەلا مستەفا) کوڕی (شێخ محەمەد بارزانی)، لە ساڵی 1903 لە گوندی بارزان هاتووەتە دونیا، و لە ساڵی 1976ی زاینیدا بە مەبەستی چارەسەرکردنی نەخۆشیەکەی و هەروەها دەستەبەرکردنی پشتیوانی و کۆمەگی دونیای دەرەوە، لەپێناو درێژەدان بە شۆرشی کورد، بەرەو وڵاتە یەکگرتووەکانی ئەمەریکا سەفەر دەکات و لە واشینگتۆن نیشتەجێ دەبێت، سەرئەنجام لە 1ی مارسی ساڵی 1979ی زایینی لە ئەنجامی تووش هاتن بە نەخۆشی شێرپەنجە، بەداخەوە کۆچی دوایی دەکات.}

^{بزووتنەی کۆماریخوازانی رۆژهەلاتی کوردستان بە ئەرکی نیشتمانی گشت خەڵکی کوردستانی دەزانێ، کە لە ساڵیادی کۆچی دووایی گەورە پیاویی کورد نەمر مەلا مستەفا بارزانی، یاد و یادمانی بەرز و پیرۆز رابگیردرێت و دەسکەوتە بەنرخەکانی لە رەوتی خەباتی رزگاریخوازی نەتەوایەتیدا گرینگ و پر بایەخ بنرخێندرێن.}

^{مەلا مستەفا بارزانی دەگەل ئەوەش کە لەلایەن گشت نیشتیمانپەروەرانی کورد وەک باوکی رۆحی نەتەوەیی کورد و کوردستان ناسراوە، بەڵکوو ئاشکراشە کە رێگا و رێبازی ئەم نەمرە دەگەڵ بنەما فیکری و فەلسەفیەکانی سەردەمی کۆمار و پێشەوا قازی، وەک سەرچاوە و قووتابخانەی بیر و هزری نەتەوەیی و نەتەوەخوازی، بوونەتە دەستمایەی ساغکردنەوەی ئیستێراتیژی تاک و کۆ و حیزبەکانی خاوەن ئاجێندەی نەتەوەخوازی. بۆیە هەڵدەگرێ رۆڵی ئەم گەورە پیاوە لە قۆناغگەلی جۆراوجۆری مێژووی مۆدێرن و هاوچەرخی بزاوتی نەتەوایەتیمان‌دا بەرز بنرخێندرێ و لە ئازموونەکانی خەباتی بە نرخ و پر بەهای، سوودی فەلسفی و روانگەییان لێ وەربگیردرێت.}

^{مەلا مستەفا بارزانی یەکێک لەو کەسایەتییانە بوو کە رۆڵی گەورەی بۆ کورد و کوردستانی گەورە، بە تایبەت لەدامەزراندن و بەرگریکردن لە کۆماری کوردستان لە مەهاباد دا گێرا، و ژیان و ماڵی لەپێناو ئازادی و بەختەوەری نەوەی نوێ، قوربانی رێگای خەبات کرد. هەر بۆیە لەسەرمان ئەرکە بە وەبیرهێنانەوەی ڕێگا و ڕەوشتی ئەم گەورە پیاوە، ئەرکی نیشتیمانپەروەری و سەرۆک خۆشەویستیمان بەجێ بگەیەنین و خۆمان و یارانی کورد دڵخۆش بکەین کە نەوەی کێین و رێبواری چ رێبازێکین.}

^{بزووتنەوەی کۆماریخوازانی ڕۆژهەڵاتی کوردستان دەگەڵ بەرز و پیرۆز راگرتنی یاد و یادمانی ئەم گەورە پیاوەی مێژوویی خەباتی رزگاریخوازی نەیەوایەتیمان، ئومێد دەخوازێ بەڵکوو بە هیمەتی گشت لایەک، بتوانرێ ٤٦هەمین ساڵیادی کۆچی دوایی بارزانی نەمر، بکرێتە سەرەتایەک بۆ دەستپێکی چەسپاندنی ئەسلی تەبایی و یەکانگیری نەتەوەیی لە کوردستان بەگشتی، و هەروەها دەستەبەرکردنی سازانی نیشتیمانی لەپێناو دەربازبوون لە قەیرانگەلی سیاسی، ئابووری و ساغکردنەوەی پرسی سەربەخۆیی، و راگەیاندنی دەولەت/نەتەوە لە باشووری کوردستان بەتایبەتی.}

^{یادی ژێنەڕاڵی کۆماری کوردستان مستەفا بارزانی نەمر هەرمان و بۆ هەتا هەتایی لە ئاسمانی بزووتنەوەی مافخوازی و شوناسخوازی و ئاستیخوازی کورد و کوردستان دا هەردەم بە درەوشاوەیی دەمێنێتەوە.}

^{لە کۆتاییدا سەری ڕێز و نەوازش دادەنوێنین بۆ تەواوی شەهیدانی کوردستان}

^{بژی کورد و کوردستان}

^{شورای هەماهەنگی/ بزوتنەوەی کۆماریخوازانی رۆژهەلاتی کوردستان}

^{١/٣/٢٠۲٥}