^{بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە وەفدی ئیمراڵی بە سەرۆکایەتیی خاتوو پەروین بوڵدان و سری سورەییا ئوندەر کرد.}

^{لە دیدارەکەدا کە قوباد تاڵەبانی، ئەندامی مەکتەبی سیاسی ئامادەبوو، وەفدی ئیمراڵی سڵاو رێز و پەیامی بەڕێز (عەبدوڵا ئۆجەلان)یان گەیاندە سەرۆک بافڵ جەلال تاڵەبانی و بڕیار و سیاسەت و بژاردەکانی خۆشیان لەسەر رووداوە سیاسییەکانی ناوچەکە، پرسی ئاشتی لە تورکیا و گفتوگۆکانیان لەگەڵ بەڕێز عەبدوڵا ئۆجەلان روونکردەوە.}

^{لەبەرامبەردا سەرۆک بافڵ وێڕای بەگەرمی بەخێرهێنانیان بیروبۆچوونی خۆی و ستراتیژیی یەکێتی لەبارەی قۆناغی نوێی ئاشتی لە تورکیا بە راشکاوانە خستەڕوو و رایگەیاند، پشتگیری و پشتیوانی لەهەر دەستپێشخەرییەک دەکەین کە مافی گەلەکەمان لە تورکیا دەپارێزێت و وەک یەکێتیش هاریکاریی سەرخستنی ئەم هەوڵە مێژووییە دەبین کە بەردی بناغەکەی لە ساڵی (1993) سەرۆک مام جەلال داینا.}

^{هەر لە دیدارەکەدا سەرۆکی یەکێتیی نیشتمانیی کوردستان روونیکردەوە، تاوەکو پرسی کورد چارەسەر نەکرێت ناوچەکە ئاشتی و ئارامی سەرتاسەری بەخۆیەوە نابینێت، وەک وتوشمانە پرسی کورد بە چەک و شەڕ نە چارەسەر دەبێت، نە ئەنجامی دەبێت، چونکە تاکە بژاردە گەڕانەوەیە بۆ گفتوگۆ و دیالۆگی جدی. هیوادارین هەموومان دەربەست و پەرۆشانە کار بۆ سەرخستنی ئەم دەرفەتە مێژووییە بکەین لەسەر بنەمای هاوبەشی و برایەتی و پەرۆشی بۆ بەدیهێنانی ئاشتی و ئارامی.}

^{سەرۆک بافڵ جەلال تاڵەبانی لە بەشێکی تری وتەکانیدا ئاماژەی بۆ ئەوەشکرد، باوەڕمان بە برایەتی و پێکەوەژیانی ئاشتییانە هەیە، هەرگیزیش نابینە هەڕەشە بۆ هیچ وڵاتێکی دراوسێمان و پەرۆشی ئەوەین هەموومان بە برایەتی و ئاشتی بژین، ئەمڕۆش دەستپێشخەر دەبین تاوەکو لەبری هەڕەشە زمانی دیالۆگ زاڵبکەین، دەستی برایەتی بۆ هەموولایەک درێژدەکەین، هیوادارین نیەتێکی جدی هەبێت بۆ پتەوکردنی برایەتی کورد و تورک و سەرخستنی ئەم هەوڵە نیشتمانییە.}

^{قوباد تاڵەبانی: یەکێتی هەر ئەرکێکی نەتەوەیی بکەوێتە سەرشان بە شانازییەوە جێبەجێی دەکات}

^{قوباد تاڵەبانی سەبارەت بە سەردانی وەفدی ئیمڕاڵی بۆ دەباان دەڵێت: یەکێتیی نیشتمانیی کوردستان لە بەر رۆشنایی رێبازی سەرۆک مام جەلال روانگەیەکی روون و چەسپاوی هەیە بۆ چۆنییەتی چارەسەرکردنی پرسی کورد لە تورکیا. وەک هەمیشە بە هەموو توانایەوە پشتگیری لە چارەسەری ئاشتییانەی پرسی کورد دەکات و لەم چوارچێوەیەدا هەر ئەرکێکی نەتەوەیی بکەوێتە سەرشانی بە شانازییەوە جێبەجێی دەکات.
ئەمڕۆ لە کۆبوونەوە لەگەڵ وەفدی ئیمراڵی بە سەرۆکایەتی بەڕێزان پەروین بوڵدان و سری سورەیا ئوندەر، سەرۆک بافڵ جەلال تاڵەبانی، سەرۆکی یەکێتیی نیشتمانیی کوردستان پابەندیی یەکێتی بە سیاسەت و روانگەی سەرۆک مام جەلال بۆ پشتیوانیکردن لە چارەسەری ئاشتییانەی پرسی کورد لە تورکیا دووپات کردەوە و ئامادەیی یەکێتی بۆ هەموو جۆرە هاوکاری و پشتیوانییەک لەپێناو چەسپاندنی ئاشتی و دابینکردنی مافەکانی گەلی کورد لە تورکیا دەربڕی.
وەفدی ئیمڕاڵی سەردانی مەزاری سەرۆک مام جەلال -یانکرد
وەفدی ئیمڕاڵی بە سەرۆکایەتیی پەروین بوڵدان و سری سورەییا ئوندەر سەردانی مەزاری سەرۆک مام جەلال -یانکرد و لەلایەن مەکتەبی سکرتارییەتەوە بە گەرمی پێشوازیان لێکرا .}

^{دوای دانانی تاجەگوڵینە لەلایەن وەفدی ئیمڕاڵییەوە ، پەروین بوڵدان لە دەفتەری یادەوەرییەکاندا ئاماژەی بە رۆڵی گەورەی سەرۆک مام جەلال دا لە پرۆسەی ئاشتی و بە دیهێنانی ئازادی بۆ گەلەکەمان کەمەش دەقی نوسینەکەیەتی :}

^{بەبیر هێنانەوەی مام جەلال خۆی لەوەدا دەبینێت کە خەون و هیواکانی بۆ ئازادی و ئاشتی، بۆ کورد بە دی بهێنین، ئێمەش، بەڵێن ئەدەین کە لە کاتێکی زۆر کورتدا خەونەکانت بەدی بهێنین.}

^{بەڕێز عەب.د.وڵا ئ.ۆ.جـ.ەلان رایسپاردین بە کورەکانی مام جەلال بڵێن، پەیوەندییەکی زۆر بەهێزم لەگەڵ مام جەلال هەبوو، ئێمەش شانازی دەکەین کە هەڵگری ئەم نامەیەین.}

^{بەڕێز و پێزانینەوە یادی ئێوە دەکەینەوە.}