دوای بڵاوبوونەوەی وێنەیەکی سەرۆکی ھەرێمی کورستان، مەسعوود بارزانی، کە درێسی ژمارە ١٠ـی بەرشلۆنەی بەدەستەوەیە، ئەمجارە سایتی سپۆرتی کەتەلۆنیا ھەواڵێک لەسەر پەیوەندی نێوان ھەرێمی کوردستان و ھەرێمی کەتەلۆنیا بڵاو دەکاتەوە و یانەی بەرشلۆنە بە پردی ئەو پەیوەندییە دەزانێت. 

دووشەممە (٢٩-ی تەمووزی ٢٠١٣) سایتی سپۆرتی کەتەلۆنیایی بڵاوی کردووەتەوە پێشتر لەلایەن سەرۆکی یانەی بەرشەلۆن، ساندرۆ رۆسێلیەوە داوەتنامەیەک پێشکەشی سەرۆکی ھەرێمی کوردستان، مەسعود بارزانی کراوە بۆ ئامادەبوون لە یەکێک لە یارییەکانی یانە کەتەلۆنیاییەکە، ھەروەھا درێسێکی یانەکەیشی بۆ ناردووە.

ھەواڵەکە کە لەلایەن تۆنی فریس ڕۆژنامەوانی وەرزشی ئیسپانیاوە ئامادە کراوە ئاماژەیشی داوە کە بەرشەلۆنە تەنھا یانەیەکی ئاسایی نییە و یارییەکی جوان پێشکەش بکات، بەڵکو یانەیەکە بووەتە پردی پەیوەندی لە نێوان ھەرێمی کوردستان و کەتەلۆنیا ھەروەھا بووەتە پردێک بۆ ئاڵوگۆڕی کولتووری و وەرزشی و سیاسی.

ھەروەھا ڕۆژنامە ئیسپانیاییەکە ئاماژەیشی داوە لە ئێستادا بارزانی ھەموو ھەوڵێکی خستووەتە گەڕ بۆ ئەوەی شاری ھەولێر ببێتە نموونە لە ناوچەکەدا لە ھەموو ڕوویەکەوە. سایتەکە ڕایشی دەگەیەنێت مەسعوود بارزانی ئاواتەخوازە یانەی بەرشەلۆنە بێنە کوردستان و لەگەڵ ھەڵبژاردەی ھەرێمدا یارییەک بکەن.

لە ڕۆژنامەی هەولێرەوە

 پاش پەسەندکرانی حوکمی سەرکۆمارێتیی رووحانی لە لایەن خامنەییەوە، چاوەڕوان دەکرێ سەرکۆماری نوێ، لە رۆژانی داهاتووشدا، کابینەی دەوڵەت به پارلەمانی ئەو وڵاتە بناسێنێ.

ئەمڕۆ شەممە[١٢ی گەلاوێژ]، پاش تێپەڕبوونی ٥١ رۆژ بەسەر هەڵبژاردندا، ئایەتوڵا "سەیدعەلی خامنەیی"، رێبەری ئایینی ئێران، لە رێووڕەسمێکدا، حوکمی سەرکۆمارێتیی "حەسەن رووحانی" پەسەند کرد و بەم شێوەسەردەمی ٤ ساڵەی دەسەڵاتداری رووحانی بە شێوەی فەرمی دەستیپێکرد.

رێووڕەسمەکە لە حوسێنییەی ئیمام خومەینی لە تاران و بە بەشداری بەشێکی بەرچاو لە رێبەرانی کۆماری ئیسلامیی، چەند بەربژێری دوا هەڵبژاردنی سەرۆکایەتیی کۆمار و باڵوێزی هەندێک لە وڵاتانی بیانی بەرێوەچوو.

بڕیارە سبەی یەکشەممەش، حەسەن رووحانی، لە رێووڕەسمێکی تر لە پارلەمانی ئێراندا، سوێندی یاسایی بخوات و ئەندامانی کابینەی دەوڵەتەکەی بە پارلەمان بناسێنێ.

به گوێرەی یاسای بنەڕەتی ئێران، سەرەتا رێبەری ئایینی ئەو وڵاتە دەبێ حوکمی سەرکۆمارێتی براوەی هەڵبژاردن پەسەند بکات و پاشان پارلەمانی ئەو وڵاتە، لە خشتەیەکی دیاریکراوی زەمانییدا، دەنگی متمانە بە تاک تاکی وەزیرانی کابینەی سەرکۆمار بدات.

"حەسەن رووحانی"، لە هەڵبژاردنی رۆژی ٢٤ی جۆزەردانی ئەمساڵدا، بە دەنگی زۆرینەی بەشداربووانی هەڵبژاردندا، وەک سەرکۆماری نوێی ئێران هەڵبژێرا.

ناوبراو لە سەردەمی پڕۆپاگەندەی هەڵبژاردندا هەندێک لێدوانی ئەرێنی سەبارەت بە کەمایەتییە نەتەوەیی و ئایینییەکانی ئێران دابوو و بەم شێوە دەنگی زۆرینەی کورد و سوننەکانی ئێرانی مسۆگەر کردبوو.

بەرەی یەکگرتووی کورد و رێفۆرمخوازانی کورد لە رۆژهەڵاتی کوردستان بەم هیوایە کە رووحانی گۆڕانکاری پۆزەتیڤ لە ئێران لە بەرژەوەندی ئەو کەمایەتییە نەتەوەییە پەراوێزخراوە پێکبهێنێ، بە پێچەوانەی حیزب و لایەنە سیاسییەکانی کورد لە دەرەوەی وڵات، داوای لە هاوڵاتییان کردبوو کە بەشداری هەڵبژاردن بن.

nnsroj

3/08/2013

رووبه‌رنێت – پێنوسەکان / بەرەی نەسرای جیهادی، کە گروپێکی ئیسلامیی جیهادیی تیرۆرستییە، لەژێر سایەی فەتوایەکدا (ماڵ و نامووسی کوردەکانتان لێ حه‌ڵاڵه‌) لەلایەن ئه‌بو عه‌بدولڵا به‌قاری، که‌ مه‌لایه‌کی ئاینیی عەرەبی سوننە مەزهەبە‌، له‌ مزگه‌وته‌کانی تلعه‌ران و تلحاسڵه‌وه‌ به‌شێوه‌یه‌کی به‌رده‌وام، بانگەشەی بۆ دەکات، نزیکەی ١٨٠ کچ و ژنی کورد کەتەمەنیان لە نێوان ١٢ بۆ ٤٠ ساڵیدایە، وەك غەنیمە، ڕفاندووە.

بەپێی زانیاریی ووردی پێنوسەکان، کەلەڕۆژئاوای کوردستانەوە، بەدەستمان گەیشتووە، تاکو ئێستا، تەنها ١٣ کەس لەو کچ و ژنانە، دۆزراونەتەوە و لەلایەن هێزەکانی یەپەگەوە، لەدەستی گروپە جیهادییەکان، ڕزگار کراون.

وێڕای ڕفاندنی ژنانی کورد، وەك غەنیمە، گرووپه‌ تیرۆرستییه‌کانی ئه‌لقاعیده‌، که‌ له‌به‌رامبه‌ر به‌ شه‌ڕڤانانی کورد توشی شکستی قورس بوون، په‌نا بۆ رێ و رێبازی هۆڤانه‌ و دژه‌ مرۆییانه‌ ده‌به‌ن، لەو بارەیەشەوە، هێرشیان کردۆتە سه‌ر شارۆچکه‌ی تلعه‌ران و تلحاسڵی سه‌ر به‌ شاری حه‌له‌ب و له‌ ئه‌نجامدا به‌لانی که‌مه‌وه‌ ٥٠ کوردیان کوشت و ٣٥٠ ی تریشیان رفاند .

بێجگە لەوەش، چه‌ته‌ و هێزە مسوڵمانە عەرەبە جیهادییەکانی سەربە ئه‌لقاعیده‌، بارهه‌ڵگرێکیان به‌ دۆشکه‌ گولــله‌ باران کرد، که‌ ٢٠ ژن و منداڵی تێدابوو و له‌ تلعه‌رانی حه‌له‌ب رایانده‌کرد، گروپەکە، بارهه‌ڵگه‌ره‌کەیان‌، بە ئاربیجی، پارچه‌ پارچه‌ کردوە و هیچ که‌سێک به‌ ساخی نه‌ماوه‌ته‌وه‌، له‌لایه‌کی تره‌وه‌ ئه‌و گرووپه‌ چه‌کدارانه،‌ هه‌ر چییه‌ک به‌ناوی کورده‌وه‌ هه‌بێت هێرشی ده‌که‌نه‌سه‌ر. له‌ مزگه‌وته‌کانه‌وه‌ بانگه‌وازی کوشتنی کورد ده‌که‌ن و خه‌ڵکی ناوچه‌که‌ش بۆ خۆڕزگارکردن به‌ره‌و بیابانه‌کان راده‌که‌ن .

3/08/2013

وەزیری کاروباری دەرەوەی ئەمریکا، جۆن کێری، کە سەردانی پاکستانی کردووە، لە وتووێژ لەگەڵ تەلەفزیۆنی جیئۆی پاکسستاندا لە بارەی لەسەرکار لادانی محەممەد مورسی، گوتی: سوپای میسر بە داخوازی هاووڵاتیان دەستی لە کاروباری سیاسی وەرداوە و لە هەوڵی ئەوە دایە دیموکراسی بۆ ئەم وڵاتە بگەڕێنێتەوە. 

بە پێی راپۆرتی بی.بی.سی، پەیامنێری تەلەفزیۆنی جیئۆ لە وەزیری دەرەوەی ئەمریکای پرسی: لەکاتێکدا ئەمریکا باوەڕی بە دیموکراسی هەیە و خۆی وەک قارەمانی پشتگیری لە دیموکراسی  لە جیهاندا دەناسێنێت، چۆن بوو لەم هەل ومەرجەدا دژی دەست تێوەردانی سوپای میسر نەوەستایەوە کە بە زۆر سەرۆکكۆماری هەڵبژێردراوی ئەم وڵاتەی لەسەر کار لادا؟

وەزیری دەرەوەی ئەمریکا، لە وەڵامدا گوتی: هاووڵاتیان میسر کە نیگەرانی تێکشکانی وڵاتەکەیان بوون،  داوای دەست‌تێوردانی سوپیان کردوە.

لە کاتێکدا لایەنگرانی مۆرسی ئەم هەنگاوەی سوپا بۆ لەسەرکار لادانی سەرۆک‌کۆماری هەڵبژێردراو بە کودەتا دەشوبهێنن، جۆن کێری گوتی: ئەوەندەی من تێی بگەم تا ئیستا سوپای میسر دەستەڵاتی ئەم وڵاتەی نەگرتووەتە دەست، بەڵکو بەڕێوەبردنی وڵات بە دەست کابینەیەکی ناسەربازییە.

کێری گوتی: لەبنەڕەتدا سوپا هەولی گەڕانەوەی دیموکراسیی داوە.

وەزیری دەرەوەی ئەمریکا، هەروەها گوتی: خۆی و بەرپرسانی دیکەی ئەمریکا، بەردەوام لەگەڵ سەرۆک ‌کۆماری کاتی، محەممەد بەرادەعی جێگری سەرۆک کۆمار، ژەنەڕاڵ عەبدولفەتاح ئەلسیسی فەرماندەی سوپا و وەزیری بەرگری لە پێوەندی دان و ئەمریکاش دژایەتیی توندی و تیژیی هەموو لایەنەکان دەکات، ئەمریکا دژایەتیی لەگەڵدا دەکات لەگەڵ یەکیەتیی ئەورپا و وڵاتانی دیکەدا هەوڵ دەدات رێگەچارەیەکی گونجاو بدۆزێتەوە.

م.ش