^{سینەماكارێكی كوردستانی ڕۆژهەڵات ڕایدەگەیەنێت “ساڵانە چەندین فێستیڤاڵی جۆراوجۆری سینەمایی بە هەزینە و تێچوویەكی زۆرەوە لە چەند شارێكی كوردستانی باشوور بەڕێوە دەچێت، بەڵام نە دەسەڵات ویستوویەتی پشتی سینەماكارانی كورد بگرێ و نە فێستیڤاڵەكان بوونەتە هۆكار بۆ بەرهەم هێنانی فیلمی كوردی و خۆماڵی”.}

^{لەیلا مەجیدی سینەماكار و شانۆكاری كوردستانی ڕۆژهەڵات لە نوسراوێكدا كە لە پەڕەی خۆی لە تۆڕی كۆمەڵایەتی فەیسبوك بڵاویكردووەتەوە، ئاماژە بەوە دەكات “زۆر و بۆر قازانجی نییە، یەك فێستیڤاڵی ساڵانە لە یەك شاری كوردستان بەسە بۆ ئەوەی سینەماكاران و هونەرمەندان هان بدا كار و ئیشی سینەمایی كوردی بكەن، فێستیڤاڵێكی بەهێز لە چەشنی (كانی فەڕانسە، هالیوودی ئەمریكا یا لانی كەم ڤێنیزی ئیتالیا)”.}

^{دەشڵێت “بایەخ دان بە فیلمی بیانی و ئەكتەری غەیرە كورد بە داخەوە ڕۆژ بە ڕۆژ پەرە دەستێنێت و بەڕێوەبەرانی فێستیڤاڵەكان پێیان وایە ئەگەر فەڕشی سووریان بۆ ئەكتەرێكی ئێرانی و فارس یا تورك و عەڕەب ڕاخست، ئەوە نیشانەی پێشكەوتنی سینەمای كوردییە”.
ئاماژە بەوەش دەكات “ئەركی دڵسۆزانی سینەمای كوردییە كە ئەو چەشنە فێستیڤاڵانە كە زیاتر وەك پێشانگای ئەكتەرە غەیرە كوردەكان دەچێت، بایكۆت بكەن”.}

^{هەروەها دەڵێت “ئایا بۆ كەس ناپرسێتەوە فێستیڤاڵی فیلمی كوردی چەندین ساڵە لە كوردستان بەڕێوە دەچێ، ئەدی كوا فیلم و سینەمای كوردی گەیشتۆتە كوێ؟ كوا چەند كورتە فیلم و فیلمی سینەماییتان بەرهەم هێناوە كە بتوانێ لە فێستیڤاڵە جیهانیەكان دا بەشداری بكا و دەنگ و ڕەنگی كورد بە دونیا بناسێنێ؟ دەرهێنەرانی سینەمای كوردی ، كوا چەند ئەستێرەی سینەمایی كوردیتان دروست كردووە؟ تەنانەت ئەوانەی هەشن خەریكن دەیان ڕووخێنن. كەڵك وەرگرتن لە ئەكتەری سینەمای فارس و تورك و عەڕەب خزمەت بە سینەمای كوردی نییە”.}

^{رونیشیكردەوە “فێستیڤاڵی فیلمی سلێمانی دەبوو بایەخی بە فیلمسازانی كوردی چوار پارچەی كوردستان دابایە ، ئەو جار بە سینەماكارانی بیانی. بە داخەوە ئێمە فێستیڤاڵی سینەماییمان نییە، پێشانگای نمایش كردنی ئەكتەری غەیرە كوردە و ناوی فێستیڤاڵی خراوەتە سەر”.}

18/10/2018