(2).jpeg)
مایک پۆمپیۆ، وەزیری دەرەوەی ئەمریکا لە کۆبوونەوەکانی لەگەڵ سێرگی لاڤرۆڤ، وەزیری دەرەوە و ڤلادیمیر پووتین، سەرۆکی رووسیا قەیرانەکانی سووریا، ئۆکراینا و ڤەنزێلا و پرسی ئێرانی تاوتوێکرد.
پۆمیپۆ و لاڤرۆڤ لە کۆبوونەوەکەیاندا قسەیان لەسەر دۆخی سووریا کردووە، "هەردوولا هاوڕابوون لەسەر پرۆسەیەکی سیاسی کە کۆتایی بە مەینەتییەکانی خەڵکی سووریا بهێنێت".
لە کۆنفرانسی رۆژنامەڤانی هاوبەشدا لەگەڵ سێرگی لاڤرۆڤ، مایک پۆمپیۆ رایگەیاند، لەسەر دۆخی ئیدلب و باکووری رۆژهەڵاتی سووریا قسەیان کردووە و جەختیان لە کۆتاییهاتنی گرژییەکان لەو ناوچانە کردووەتەوە.
مایک پۆمپیۆ گوتیشی "گفتوگۆمان لەبارەی سووریا کرد، هەردوولا هاوڕابووین لەسەر بەڕێوەچوونی پرۆسەی سیاسی بۆ کۆتایهاتنی مەینەتییەکانی خەڵک. دەمانەوێت ئەم پرۆسەیە بەشێوازێک بەڕێوەچێت کە سووریا چیدیکە نەبێتەوە گۆڕەپانی گرووپە ئیسلامییە تیرۆرستییەکان، هۆشداریشمان لە بەرامبەر دۆخی ئیدلب و باکووری رۆژهەڵاتی سووریا دا".
هەر لە سۆچی سەرۆکی رووسیا و وەزیری دەرەوەی ئەمریکا کۆبوونەوە و هەردوولا قسەیان لەسەر ئەو دەرفەت و زەمینە هاوبەشانە کرد کە دوو وڵاتەکەیان دەتوانن کاری تێدا بکەن.
ڤلادیمیر پووتین باسی لە ناکۆکییەکانی نێوان ئەمریکا و رووسیا کرد، بەڵام هیوایەکی نیشاندا کە هەردوولا دەتوانن بەسەر جیاوازییەکانیاندا زاڵبن. پۆمپیۆش جەختیکردەوە، هاوئاهەنگی لەنێوان واشنتن و مۆسکۆ لە بەرژەوەندی هەردوو وڵاتەکە و خەڵکەکەیەتی.
١٦/٥/٢٠١٩
