^{ڕێژەیەکی زۆر لە دەرچووانی زانکۆوەکان و خاوەن بڕوانامە باڵاکان لە ئێراندا بێکارن.}

^{بەپێی ئامارە بڵاوکراوەکانی ناوەندی ئاماری ڕێژیمی ئێران، لە ماوەی ۱۰ ساڵی ڕابردوودا، زیاتر لە ٣٨ لەسەدی دەرچووانی زانکۆوەکان و خاوەن بڕوانامە باڵاکان لە ئێراندا بێکار بوونە و ئەم ئامارەش ڕۆژبەڕۆژ ڕوو لە زیادی کردووە.}

^{ناوەندی ئاماری ڕێژیم، لە نوێترین ئاماری بڵاوکراوەی خۆیدا ڕایگەیاندووە، کە لە ئێستادا بەپێی بەراورد، زیاتر لە ٤١ لەسەد، لە دەرچووانی زانکۆوەکان و خاوەن بڕوانامە باڵاکان لە سەرجەم شار و ناوچەکانی سەرتاسەری ئێراندا بێکارن و ئەم ئامارەش ڕۆژ لە دوای ڕۆژ ڕووی لە زیادبوونە و بەرپرسانی ڕێژیمیش هیچ بایەخێک بە بێکاری و بەتایبەت بێکاری خاوەن بڕوانامەکان لە ئێراندا نادەن.}

^{ئەو ئامارانەی کە لەم بارەوە بڵاو کراونەتەوە، دەرخەری ئەو ڕاستییەن کە ڕێژیمی ئێران جیا لەوەی هیچ هەوڵێکی بۆ چارەسەری دیاردەی بێکاری لە کۆمەڵگای ئێراندا نەداوە، بەڵکوو بێکاری بە دەرفەت و هەلێکی گونجاو دەزانێت تاکوو خەڵکی ئێران بەرەو سیاسەتە نەگریسەکانی خۆی ڕابکێشێت و بۆ ئامانجە نامرۆڤانەکانی خۆی کەڵکیان لێ وەر بگرێت.}

^{بەپێی هەواڵی هەواڵدەرییەکانی خودی ڕێژیم، زۆربەی ئەو کەسانەی کە لە بەشە جیاوازەکانی ناوەند و داموەزگاکانی ڕێژیم و بەتایبەتی شوێنە هەستیارەکاندا لە لایەن ڕێژیمەوە دانراون، شارەزایەتی پسپۆڕانە و ئاکادیمیکیان لەو بوارانەدا نییە و دەورەیەکی سەرەتایی کردەوەیی کەمتر لە یەک/دوو مانگەیان بینیوە و ئەمەش بووەتە هۆکارێکی سەرەکی بۆ زیادبوونی ئاماری بێکاری لە ئاستی دەرچووانی زانکۆوەکان و بەتایبەت خاوەن بڕوانامە باڵاکان لە سەرتاسەری ئێراندا.}

^{بێکاری یەکێک لە دیاردە سەرەکییەکان و ڕیشەی دیاردەکانی تر کۆمەڵگا وەکوو: دزی، چوونەسەرەوەی ئاماری تەڵاق، تووشبوون بە مادە هۆشبەرەکان و هتدە، کە بەرپرسانی ڕێژیم و ناوەند و دەزگا پەیوەندیدارەکانی ڕێژیمی ئیسلامیی ئێران جیا لە قسە و دروشمی پێش کامێراکان، هیچ هەنگاوێکی کردەوەیان بۆ چارەسەرکردنی ئەو دیاردە سەرەکییەیان هەڵ نەگرتووە.}

^{نەبوونی کار و بایەخ نەدان بە خوێندکاران، دەرچووانی زانکۆوەکان و خاوەن بڕوانامە باڵاکان لە ئێران و بەتایبەتی لە ڕۆژهەڵاتی کوردستاندا، جیا لەوەی کە بووەتە هۆی بێهیوابوونی لاوان لە خوێندن و پەنابردن بۆ پیشەگەلێکی مەترسیدار وەکوو: کۆڵبەری لە نێوان سنوورەکان، قاچاخچیەتی و ... ، بووەتەوە هۆکارێکیش بۆ بەجێهێشتنی هەزاران و میلیۆنان لاوی ئەو وڵاتە و پەنابەریی لە وڵاتانی ئورووپا و ئامریکا و کانادادا.}

٢٠/٤/٢٠١٩