^{هۆڵەندا دەڵێت باڵیۆزی خۆی لە تاران بانگهێشت کرد پاش ئەوەی ئێران دوو دیپـلۆماتی هۆڵەندی دەرکرد لە بەرامبەر دەرکردنی دوو دیپـلۆماتی ئێرانی لە چوارچێوەی کەیسی کوشتنی دوو ئێرانی.}

^{ستیف بلۆک وەزیری دەرەوەی هۆڵەندا ئەمڕۆ دووشەممە لە نامەیەکیدا بۆ پەرلەمانی وڵاتەکە گوتی حکومەتی وڵاتەکەیان بڕیاری داوە باڵیۆزیان لە تاران بانگهێشت بکەنەوە.}

^{مانگی شەشی ساڵی ڕابردوو هۆڵەندا دوو دیپـلۆماتی ئێرانی دەرکرد پاش ئەوەی دەزگای هەواڵگری هۆڵەندا کۆمەڵێک زانیاری دەستکەوتبوو کە ئاماژەیان بە تێوەگلانی ڕژێمی ئێران دەکرد لە کوشتنی (عەلی موعتەمەد تەمەن 56 ساڵ) لە ساڵی 2015 لە شاری ئالمیرێ و (ئەحمەد مەلا نیسی تەمەن 52 ساڵ لە ساڵی 2017 لە شاری لاهای.}

^{وەزیری دەرەوەی هۆڵەندا گوتیشی دەرکردنی دیپـلۆماتانی هۆڵەندی جێی قبوڵ نیـیە و کاریگەری نەرێنی لەسەر پەیوەندیـیەکانی هەردوو وڵات دەبێت. ئاماژەی بۆ ئەوە کرد ئێران لە 20 ی مانگی دوو کاربەدەستانی هۆڵەندی لە بڕیاری دەرکردنی ئەو دوو دیپـلۆماتە ئاگادارکردووەتەوە و دوێنێ یەکشەممە ڕەوانەی هۆڵەندایان کردوونەتەوە.}

5/3/2019