^{زیاتر لە ٣٥ هاووڵاتیی خەڵکی گوندی "نێ" بانگهێشتی ئیتلاعاتی شاری مەریوان کران و لێپرسینەوەیان لەگەڵ کرا.}

 ^{هەواڵدەریی کوردپا، لە ماوەی ڕۆژانی ڕابردوودا، زیاتر لە ٣٥ لاوی خەڵکی گوندی "نێ"، بانگهێشتی ئیدارەی ئیتلاعاتی شاری مەریوان کران و هێزە ئیتلاعاتییەکان هەڕەشەیان لێکردوون لە بەشداری کردن لە کردنەوەی ئاگری نەورۆز خۆببوێرن.}

^{بە وتەی سەرچاوەیەکی ئاگادار، بانگهێشتی کردنی لاوانی گوندی نێ بۆ ئیدارەی ئیتلاعات و هەڕەشە کردن لەوان لە بەشداری نەکردن لە ڕێوەڕەسمی نەورۆز لە کاتێکدایە کە، تەواوی ئامادەکاری بۆ بەڕێوەچوونی ڕێوڕەسمێکی بەشکۆ بە بۆنەی سەر ساڵی نوێی و جێژنی نەورۆز، لەو گوندە کراوە.}

^{لەو پەیوەندییەدا، ئێوارەی ڕۆژی سێشەممە ٢٩ی ڕەشەمە، هێزە نیزامی و ئینتزامییەکانی حکوومەتی ئیسلامیی ئێران، هێرشیان کردە سەر گوندی "نێـ"ـی مەریوان و پێشیان بە بەڕێوەچوونی جێژنی نەورۆز لەو گوندە گرت.}

^{لە ئەنجامی هێرشی هێزە حکوومەتییەکان بۆ سەر گوندی نێ، شەڕ و تێکەڵچوون لە نێوان هێزە حکوومەتییەکان و خەڵکی ئەو گوندە هاتە ئاراوە و لەو پەیوەندییەدا، چەندین هاووڵاتیی خەڵکی ئەو گوندە دەسبەسەر کران.}