سەرکردەی ئۆپۆزیسیۆنی ڤەنزوێلا خۆی خستە شوێنی نیکۆلاس مادوورۆ، سەرۆکی وڵات و دەڵێت "ئەرک و کارەکانی سەرۆک بەڕێدەکات".
خوان گوایدۆ، کە هاوکات سەرۆکی پەرلەمانی ڤەنزوێلایە بە میدیاکانی وڵاتەکەی راگەیاند، هەڵدەستێت بە ئەنجامدانی ئەرک و بەرپرسیارێتییەکانی نیکۆلاس مادوورۆ وەک سەرۆکی کاتی وڵات.
دوای ئەو گۆڕانکارییانە، سەرۆکی ئەمریکا و حکومەتی کەنەدا راستەوخۆ خوان گوایدۆیان وەکو سەرۆکی کاربەڕێکەری ڤەنزوێلا ناساند.
ترەمپ داوا لە وڵاتانی رۆژئاوا دەکات هەمان هەنگاو بگرنەبەر و دان بە سەرۆکایەتی خوان گوایدۆدا بنێن و ئاماژەی بەوەشکرد، لەپێناو سەقامگیری ڤەنزوێلادا دیبلۆماسی و بازرگانی ئەمریکا لەگەڵیدا بەهێز دەکاتەوە.
هاوکات سەتان هەزار کەس لە کاراکاس و شارەکانی دیکەی ڤەنزوێلا رژاونەتە سەر شەقامەکان و بەو بۆنەوە ئاهەنگ دەگێڕن.
لە تۆڕە کۆمەڵاتییەکانیش خەڵک دەڵێن "ئازادی بۆ ڤەنزوێلا".
لە خۆپیشاندانەکانی چەند رۆژی رابردوودا دژی نیکۆلاس مادوورۆ، چوار 4 کەس گیانیان لەدەستدا. مادوورۆ دەڵێت، دەستی هێزە ئەمنییەکانی تێدانییە.
مادوورۆ لە 1962 لەدایکبووە. 46ـەمین سەرۆکی ڤەنزوێلایە و لە 2013ـەوە لە دەسەڵاتە، سەرکردەی پارتی سۆشیالیستی ڤەنزوێلایە.
25/1/2019
