^{دەستگیرکردنى هاوڵاتییان و چالاکانى رۆژهەڵاتى کوردستان لەلایەن هێزە ئەمنییەکانى ئێرانەوە لە زیادبووندایە و ئامارەکانى پێشێلکردنى مافەکانى مرۆڤ لەو وڵاتە بەرەو مەترسى زیاتر چووە.}

^{لەو چوارچێوەیەدا و رێکخراوى هەنگاو بۆ مافەکانى مرۆڤ بڵاویکردەوە تەنیا لە ماوەى یەک هەفتەى رابردوودا ٩ هاوڵاتى لە ناوچە جیاوازەکانى رۆژهەڵاتى کوردستان لەلایەن هێزە ئەمنییەکانەوە دەستگیرکراون و تائێستا هیچ زانیارییەک لەبارەیانەوە نییە.}

^{ئاماژەى بەوەش کردووە، حەوت لەو کەسانەى دەستگیرکراون دانیشتووی شاری مەریوانن و گواستراونەتەوە بۆ شوێنێکی نادیار، هاوکات دوو هاوڵاتی دیکە لە سنە و ئورمییە دەستگیر کراون کە هەر نۆ کەسەکە تۆمەتى کارى سیاسى و هاوکاریکردنى حزبە کوردییەکانیان خراوەتە پاڵ.}

^{بەپێى ئامارەکان تەنیا لە مانگى ئەیلولى رابردوودا ٨٠ هاوڵاتی کورد لە شارە جیاجیاکانى رۆژهەڵاتى کوردستان دەستگیرکراون و لەکاتێکدا لە مانگى ئابى ئەمساڵ ٥٨ کەس دەستگیرکرابوون، بەوپێیە دەستگیرکردنى هاوڵاتییانى کورد لە مانگى رابردوودا ٣٧% زیادىکردووە بەراورد بە مانگى ئاب.}

^{بەپێی ئامارى رێکخراوەکانى تایبەت بە مافى مرۆڤ لە رۆژهەڵاتى کوردستاندا لە ماوەى نۆ مانگى ٢٠١٨دا نزیکەى ٣٦٠ کەس دەستگیرکراون و تا کۆتایى هەمان ساڵ نزیکەى ١٤٠٠ کەس دەستگیرکراون بەهۆى مانگرتنى شارەکانى رۆژهەڵات و دەربڕینى نیگەرانی لەسەر هێرشەکانى سەر بارەگاکانى حدک و حدکا لە کۆیە.}

^{هەروەها لە هەشت مانگى سەرەتاى ساڵى ٢٠١٧دا نزیکەى ٢٠٠ کەس دەستگیرکرابوون و تا کۆتایى هەمان ساڵیش رێژەکە نزیکەى دوو هەزار کەس زیادىکردووە، ئەوەش بەهۆى خۆپیشاندانى بەشێک لە شارەکانى رۆژهەڵات بۆ دەربڕینى پشتیوانى ریفراندۆمى هەرێمى کوردستان.}

^{لەناو دەستگیرکراوەکانى نۆ مانگى رابردووى ئەمساڵدا ٢٠ چالاکی ژن و ٩ رۆژنامەنوس و ٢٧ خوێندکار هەیە، زۆرینەى ئەو کەسانەى دەستگیرکراون بە تۆمەتى چالاکیی سیاسى و بەشدارى خۆپیشاندان و مانگرتن یان پەیوەندى لەگەڵ حزبەکانى رۆژهەڵاتدا بووە.}

^{لەلایەکى دیکەوە رێکخراوى مافى مرۆڤى سەربە نەتەوە یەکگرتووەکان رایگەیاندووە، ئێران تۆمارێکى نوێى لە دەستگیرکردنى هاوڵاتییانى لە ساڵى ٢٠١٨دا تۆمارکردووە کە زۆرینەى دەستگیرکراوەکانیش بێ بەڵگە و تۆمەتى هەڵبەستراو بوون.}

^{رێکخراوەکە ئاماژەى بەوەش کردووە، ئەو کەسانەى دەستگیرکراون چالاکی سیاسى و مافى مرۆڤ بوون، داواشى لەو وڵاتە کرد رێز لە مافەکانى مرۆڤ بگرێت و چیتر پێشێلى مافە سیاسى و ئاینى و نەتەوەییەکانى ئەو وڵاتە نەکات.}

20/10/2018