له كۆبوونه‌وه‌ى ئه‌مڕۆى ئه‌نجوومه‌نى نوێنه‌رانى عێراقدا، خولى دووه‌مى هه‌ڵبژاردن بۆ پۆستى سه‌رۆكى كۆمار ئه‌نجامدرا و به‌رهه‌م ساڵح كانديدى يه‌كێتى نيشتمانى كوردستان، به كۆى ده‌نگى 120 په‌رله‌مانتار به سه‌رۆكى كۆمارى عێراق هه‌ڵبژێردرا.
كۆبوونه‌وه‌كه‌ى ئه‌مڕۆى ئه‌نجوومه‌نى نوێنه‌ران دواى ئه‌وه هات، به هۆى بوونى چه‌ند كانديدێكى كورده‌وه، ئێواره‌ى رابردوو، رێژه‌ى دانيشتنى ئه‌نجوومه‌نى نوێنه‌ران ته‌واو نه‌بوو و به‌و هۆيه‌وه كۆبوونه‌وه‌كه دواخرا بۆ ئه‌مڕۆ.
له دوێنێوه شاندێكى پارتى ديموكراتى كوردستان و شاندێكى يه‌كێتى نيشتيمانى كوردستان بۆ گفتوگۆكردن له‌گه‌ڵ لايه‌ن و كوتله په‌رله‌مانييه‌كان له به‌غدان.
دواى 24 كاتژمێر گفتوگۆى چڕى نێوان هه‌ردوو شاندى پارتى و يه‌كێتى له به‌غدا، هه‌ردوولا له‌سه‌ر ئه‌وه رێككه‌وتن، يه‌كێتى كانديدى خۆى بۆ پۆستى سه‌رۆكى كۆمار بكێشێته‌وه و له به‌رامبه‌ردا كورد به يه‌ك كانديد بچێته هۆڵى په‌رله‌مانه‌وه.
سه‌رچاوه‌يه‌كى ئاگادار له ئه‌نجوومه‌نى نوێنه‌رانى عێراق تايبه‌ت به كوردستان24 رايگه‌ياند، به گوێره‌ى رێككه‌وتنى هه‌ردوولا فوئاد حوسێن وه‌ك كانديدى كورد ده‌چووه هۆڵى په‌رله‌مان و به‌رهه‌م ساڵح له كێبڕكێى وه‌رگرتنى پۆستى سه‌رۆكى كۆمار ده‌كشايه‌وه.
به گوێره‌ى زانيارييه‌كان پارتى رازى بوو، به‌شێكى به‌رچاوى ئيستحقاقى هه‌ڵبژاردنى خۆى و پۆسته سيادييه‌كانى ديكه‌ى حكومه‌ت بداته يه‌كێتى له به‌رامبه‌ر كشانه‌وه‌ى به‌رهه‌م ساڵح له كێبڕكێى پۆستى سه‌رۆكى كۆمار.
دواى رێككه‌وتنه‌كه، زانيارى ئه‌وه به‌رده‌ست كه‌وتوون، كه يه‌كێتى پاشگه‌ز بووه‌ته‌وه له رێككه‌وتنه‌كه و داوايكردووه، پۆستى سه‌رۆكى كۆمار په‌نجا به په‌نجا دابه‌ش بكرێت و دوو ساڵ بۆ پارتى و دوو ساڵ بۆ يه‌كێتى بێت.
په‌شيمانبوونه‌وه‌ى يه‌كێتى له كاتێكدا بوو، كه پرۆسه‌ى ده‌نگدان بۆ پۆستى سه‌رۆكى كۆمارى عێراق ده‌ستيپێكردووه.
له سه‌روبه‌ندى ده‌ستپێكى پرۆسه‌ى ده‌نگداندا كانديده‌كانى پۆستى سه‌رۆكى كۆمار ره‌خنه‌يان له ئاليه‌تى هه‌ڵبژاردنى سه‌رۆك كۆمار گرت.
سه‌ردار عه‌بدوڵڵا كانديدى سه‌ربه‌خۆ، رايگه‌ياند، ئه‌وه‌ى له هۆڵى په‌رله‌مان ده‌گوزه‌رێت ناده‌ستوورييه.
له هه‌ڵوێستێكيشدا سه‌رۆك مه‌سعود بارزانى رايگه‌ياند، بەڕێوەچوونی ئێستای هەڵبژاردنی سەرۆك كۆماری عێراق پێچەوانەی ئەو نەریتەیە كە بۆ هەڵبژاردنی سەرۆككۆمار لە گەڕەكانی ڕابردوو پەیڕەو كراوە. یان دەبوایە كاندیدێكی كورد لەنێو گەورەترین كوتلە بەربژێر كرابا یانیش فڕاكسیۆنە كوردییەكان یەكلاییان كردبا.
سه‌رۆك بارزانى له په‌يامێكدا كه له‌و باره‌يه‌وه بڵاويكرده‌وه، راشيگه‌ياند، ئەو ئالیەتەی ئێستا بە هیچ شێوەیەك قابیلی قبوڵ نیە و لە داهاتوویەكی نزیكدا هەڵوێستی خۆمان دەبێت.
فراكسيۆنى پارتى ديموكراتى كوردستان له په‌رله‌مانى عێراق به‌ياننامه‌يه‌كى بڵاوكرده‌وه.
له به‌ياننامه‌كه‌دا هاتووه: "له‌وكاته‌دا دووپاتی ده‌كه‌ینه‌وه، كه باوه‌ڕمان به میكانیزمی دیموكراتیه‌ت و بنه‌ما ده‌ستوورییه‌كان هه‌یه، به‌ڵام ئه‌وه‌ی ئێستا له ئه‌نجوومه‌نی نوێنه‌رانی عێراق ده‌یبینین و له‌باره‌ی هه‌ڵبژاردنی سه‌رۆك كۆماری عێراق تێبینی ده‌كه‌ین، به‌هیچ شێوه‌یه‌ك له‌گه‌ڵ بنه‌ماكانی رێككه‌وتنی نێوان كوتله كوردستانییه‌كان ناگونجێت".
هه‌روه‌ها هاتووه: "ئه‌وه‌ی رێككه‌وتنی له‌سه‌ر كراوه ئه‌وه‌یه كه سه‌رجه‌م لایه‌نه كوردستانییه‌كان له‌سه‌ر یه‌ك كاندید رێك بكه‌ون بۆ سه‌رۆكایه‌تی كۆمار، یانیش به هه‌ڵبژاردن له‌نێوان كوتله كوردستانییه‌كان یه‌كلایی بكرێته‌وه، كه هه‌رگیز ئه‌مه رووینه‌دا!!!".
له‌به‌شێكی دیكه‌ی به‌یاننامه‌كه‌دا هاتووه: "هه‌ر بۆیه لێره‌وه راده‌گه‌یه‌نین، كه ئه‌و میكانیزمه له‌لایه‌ی ئێمه‌وه هه‌رگیز قابیلی قبووڵ نییه و له داهاتوودا هه‌ڵویستێكی روونمان له‌وباره‌یه‌وه ده‌بێت و ئه‌و لایه‌نانه‌ی رێككه‌وتنه‌كانیان پێشێلكردووه به‌رپرسیارێتی ئه‌و كاره‌یان له‌ئه‌ستۆ ده‌گرن".
جه‌ختیش كراوه‌ته‌وه، "له‌به‌ر ئه‌و هۆكارانه كشاندنه‌وه‌ی كاندیدی خۆمان له‌و پرۆسه‌یه راده‌گه‌یه‌نین".
دواى پاشگه‌زبوونه‌وه‌ى يه‌كێتى له رێككه‌وتنى له‌گه‌ڵ پارتى ديموكراتى كوردستان و به‌ڕێوه‌چوونى خولى يه‌كه‌مى پرۆسه‌ى ده‌نگدانى نهێنى، كانديدى پارتى ديموكراتى كوردستان بۆ پۆستى سه‌رۆكى كۆمار، فوئاد حوسێن كشانه‌وه‌ى خۆى راگه‌ياند.
