^{هاووڵاتییەکی کورد، بانگهێشتی ئیدارەی ئیتلاعاتی شاری سنە کرا و لێکۆڵینەوەیان لەگەڵ کردووە.}

^{بەپێی هەواڵی  ئاژانسی هەواڵدەریی کوردپا، ڕۆژی سێشەممە ڕێکەوتی ٢٧ی خەرمانان، هاووڵاتییەکی کورد، بە ناوی "دلێر نەسروڵڵاهی" بانگهێشتی ئیدارەی ئیتلاعاتی شاری سنە کراوە و لێکۆڵینەوەیان لەگەڵ کردووە.}

^{هێزەکانی ئیتلاعات ئەم هاووڵاتییە کوردەیان بە هۆی بەشداریی لە ڕێوڕەسمی یادکردنەوە لە چوار چالاکی ژینگەپارێزی مەریوانی لە شاخی ئاویەر بانگهێشت کردووە.}

^{ئەم هاووڵاتییە کوردە، دوای چەند کاتژمێر لێکۆڵینەوە لە لایەن هێزە ئیتلاعاتییەکانەوە ئازاد کراوە.}

^{دوای بەڕێوەبردنی ڕێوڕەسمی یادکردنەوە لە چوار چالاکی ژینگەپارێزی مەریوانی لە شاخی ئاویەر لە سنە، لە ڕۆژی هەینی ڕێکەوتی ٩ی خەرمانان، هێزە ئیتلاعاتییەکان دەستیان بە بانگهێشتکردنی زیاتر لە ١٠ چالاکی کرێکاریی و ژینگەپارێزی کردووە.}

^{ڕۆژی شەممە ٣ی خەرمانان، چوار چالاکی ژینگەپارێزی خەڵکی مەریوان، بە ناوەکانی "شەریف باجوەر، ئومید کۆنەپۆشی، ڕەحمەت حەکیمی‌نیا و محەممەد پژوهی" لە کاتی کوژاندنەوەی ئاگری دارستانەکانی دەوروبەری شاری مەریوان گیانیان لەدەست دا.}

24/9/2018