^{بە پێی میدیای فەرمیی حیزبی دێموکراتی کوردستانی ئێران لە ئاکامی دەرگیری و تێکهەڵچوونێکی قورسی نێوان هێزەکانی سپای پاسداران و، پۆلێک پێشمەرگەی حدکا لە ناوچەی شنۆ، ٦ پێشمەرگەی ئەو حیزبە شەهید کراون .
شەوی ١٩ لەسەر ٢٠ی گەلاوێژ، کاتژمێر ١ی سەرلەبەیانی پۆلێکی پێشمەرگەی حدکا لە ناوچە شاخوییەکانی شنۆ کەوتوونەتە کەمینی هێزەکانی سەر بە سپای پاسداران و، دوای دەرگیری و تێکهەڵچوون چوار پێشمەرگە بەناوەکانی عەبدولسەلام عەبدی، سلێمان محەممەدزادە، عەبدولواحید سوهرابی و ئیسماعیل ئێران مەنش ، گیانیان لە دەست داوەو هەروەها دوو پێشمەرگەی دیکەش بەناوەکانی عوسمان رەحمانی و مێهران تەهاپوور، پێوەست‌بوون بە کاروانی شەهیدانی کوردستانەوە.
هەر بەپێی سەرچاوە هەواڵدەرییەکانی حدکا ، دەگوترێ لە هێزەکانی رێژیم چەندین کوژرا و بریندار هەیە، بەڵام تائێستا راگەیاندنەکانی ئێران هیچ زانیارییەکیان لەو بارەوە بڵاو نەکردوتەوە.
راگەیاندنی حیزبی دێموکراتی کوردستان وێڕای بەرزڕاگرتنی یادی شەهیدانی کوردستان، لەگەڵ سەرجەم کەسوکارو بنەماڵەو هاوسەنگەرانی ئەو پۆلە شەهیدە هاوخەمی دەردەبڕێ و، خۆی لە خەمیان بە شەریک وبەشدار دەزانێ.
سەنگەری خەباتیان ئاوەدان.}

15/8/2018