^{وەزیری دەرەوەی ئەمریکا، دوێنێ لە لێدوانێکدا مەرجەکانی واشنتۆنی بۆ وتووێژ لەگەڵ ڕێبەرانی باڵای کۆماری ئیسلامیی ئێرانی ئاشکرا کرد.}

^{بەپێی زانیاریی میدیا جیهانییەکان، یەک کاتژمێر دوای قسەکانی دۆناڵد ترەمپ، سەرکۆماری ئەمریکا لەبارەی دانیشتنی بێ‌مەرج لەگەڵ ڕێبەرانی ئێران، مایک پۆمپیۆ وەزیری دەرەوەی ئەمریکا لە لێدوانێکدا چەند مەرج و ڕێکارێکی بۆ دانوستان لەگەڵ ڕێبەرانی ئێرانی خستە ڕوو.}

^{پۆمپیۆ کە لەگەڵ تەلەفزیۆنی (CNN)ی ئەمریکا قسەی دەکرد، گوتی: "ئێمە ئەم پرسەمان پێشتریش باس کردووە کە سەرکۆماری ئەمریکا ئامادەیە بۆ چارەسەرکردنی ئەو گرفتانە ئەو دیدارانە ئەنجام بدات، بەڵام بۆ سەرکەوتنی ئەو وتووێژانە هەندێ مەرجیش لەبەرچاو گیراوە و گوتی: "ئەگەر ئێران بەڵێنی بدات، بە شێوەی بنەڕەتی ڕەفتار و هەڵسوکەوتی لەگەڵ خەڵکی خۆی بگۆڕێ و هەوڵی تێکدەرانەی وەلا بنێت، و ئەوە قەبووڵ بکەن کە بایەخی ئەوەی هەیە بچنە ناوی ڕێککەوتنێکی ئەتۆمییەوە کە لەڕاستیدا ببێتە هۆی پێشگیری لە چەکی ئەتۆمی ئەوکاتە سەرکۆماری ئەمریکا ئامادەیە لەگەڵیان دابنیشێت و گفتوگۆ بکات".}

^{دیار نییە ئایا مەبەستی پۆمپیۆ ئامادەیی ڕێبەرانی ئێران بۆ دانوستان لەبارەی قەبووڵکردنی ئەو مەرجانەیە، یان ئەوەی باوەڕی وایە کە دەبێ ئەو مەرجانە بەرلە دانوستانەکان قەبووڵ بکەن.}

^{ئەو قسانەی مایک پۆمپیۆ دوای ئەوە کراون کە دۆناڵد ترەمپ، لە کۆنفرانسێکی ڕۆژنامەنووسیدا لەگەڵ سەرۆکوەزیرانی ئیتالیا لە وەڵامی پرسیارێکدا کە ئایا ئامادەیە لەگەڵ ئێران وتووێژ بکات، گوتی: "بەڵێ بێگومان ئامادەیە "بەبێ هیچ مەرج"ێکلەگەڵ بەرپرسانی ئێران دانوستان بکات، سەرکۆماری ئەمریکا هاوکات ئاماژەی بەوەش دا: "ئەم پێشنیارە نە لەڕووی لاوازی و لەڕووی هێزەوە ناخەمە ڕوو، بەڵکوو پێم وایە کارێکی گونجاوە و دروستە".}

^{سەرەتای ئەمساڵ پاش چەندین مانگ شەڕە قسە و لێدوانی توند لە نێوان بەرپرسانی ئەمریکا و کۆریای باکوور و هەڕەشەی هەردوو لایەن لە یەکتر و ئەگەری بەکارهێنانی هێرشی سەربازی، سەرەنجام ڕێبەری کۆریای باکوور پێشنیاری کۆبوونەوەی لەگەڵ ترەمپ کرد و ئەم وتووێژەش ڕێکەوتی 2018/6/12 لە سەنگاپوور بەڕیوە چوو.}

^{لە مانگی مەی و پاش کشانەوەی ئەمریکا لە ڕێککەوتنی ئەتۆمی، وەزیری دەرەوەی ئەو وڵاتە دوازدە مەرجی بۆ دانوستان لەگەڵ ئێران خستە ڕوو و بەمدوایانەش دۆناڵد ترەمپ لە چەند لێدوان و تویتێکدا بە توندی رەخنەی لە حکوومەتی ئێران گرت کە ڕەفتاری لەگەڵ خەڵک خراپە و هەندێ لە ەبرپرسانی ئێرانی بە گەندڵی دارایی تاوانبار کرد و گوتی: "حکوومەتی ئێران زیاتر لە مافیایەک دەچێ، هەتا سیستەمی دەوڵەت" و پاش ئەوەش حەسەن ڕۆحانی و چەند بەپرسی باڵای سیاسی و سەربازی بۆ وێنە قاسم سلێمانی بە توندی هێرشیان کردە سەر ئەمریکا و شەخسی دۆناڵد ترەمپ و ئەم گرژی و ئاڵۆزی و شەڕە قسە و لێدوانە توندانەی نێوان ئێران و ئەمریکا ڕۆژ لەدوای ڕۆژ پەرە دەستێنن.}

2/8/2018