^{باوکی زیندانییەکی سیاسیی کورد لە لایەن کەسانێکی نەناسراو لە پارێزگای سلێمانی سەر به کوردستانی عێراق تێرور کرا.}

^{تەرمی بێ گیانی "ئیقباڵ مورادی"، باوکی زانیار مورادی زیندانیی سیاسیی مەحکووم بە ئێعدام لە زیندانی ڕەجایی شاری کەرەج کاتژمێر ١١:٣٠ خولەکی شەوی سێشەممە ٢٦ی پووشپەڕ، لە نزیک ڕووباری "ئاڵیاوێ"ـی شاری پێنجوێن سەر بە پارێزگای سلێمانی دۆزرایەوە.}

^{بە وتەی یەکێک لە شایەتحاڵەکان، شوێنی چەند گووللەیەک بە جەستەی ئیقباڵ مورادیەوە دیار بووە.}

^{هەواڵدەریی "فرات" نزیک لە پارتی کرێکارانی کوردستان لەو بارەیەوە نووسیوویەتی: "ئیقباڵ مورادی باوکی زانیار مورادی زیندانیی سیاسیی مەحکووم بە ئێعدام لە لایەن کەسانێکی نەناسراوەوە لە شاری پێنجوێن ڕفێندراوە و پاش کاتژمێرێک تەرمی بێ‌گیانی ناوبراو لە نزیک ڕووباری ئاڵیاوێی ئەو شارە دۆزراوەتەوە".}

^{ئەو هەواڵدەرییه لە زاری سەرچاوەیەکی ئاگادار نووسیوویەتی: "ئیقباڵ مورادی پێش لە ساڵی ٨٧ هەتاوی لە نزیک پێنجوێن کرایە ئامانجی هێرشی تێرۆریستی و پاش برینداربوونی، گوێزرایەوە بۆ نەخۆشخانە و لە مردن ڕزگاری بوو، بەڵگەکان و شێوازی تێرۆری ئیقباڵ مورادی نیشان دەدات کە ناوبراو لە لایەن دەستوپەیوەندییەدانی ڕێژیمی کۆماری ئیسلامیی ئێران تێرۆر کراوە.}

^{گەڵاڵەی تێرۆری ناوبراو لە ساڵی ٨٧ی هەتاویش هەر لە لایەن دەستوپەیوەندییەکانی سەر بە ڕێژیمی ئێران هەبووە و دواتریش جێبەجێ کراوە".}

^{زانیار و لوقمان مورادی رێكەوتی ١٠ی گەلاوێژ و ٥ی رەزبەری ساڵی ١٣٨٨دوو لاوی كورد بە تۆمەتی كوشتنی كوڕی ئیمام جومعەی شاری مەریوان لە لایەن هێزە ئەمنییەتییەكانی ئیسلامیی ئێرانەوە دەستبەسەر كران و لە لایەن دادوەر سەڵواتی لە لقی ١٥ی دادگایی ئینقلابی شاری تاران بە تۆمەتی "محاربە لەگەڵ خوا" بە ئێعدام مەحکووم کرا.}

19/7/2018