^{ڕۆژی دووشەممە، ٢٨ی جۆزەردان، سێ کارناسی مافی مرۆڤی ڕێکخراوی نەتەوەیەکگرتووەکان، بە بڵاوکردنەوەی پەیامێک داوایان لە بەرپرسانی کۆماری ئیسلامی کرد هەرچی زووتر سزای ئیعدامی ڕامین حسێن‌پەناهی هەڵبوەشێننەوە.}

^{ئاگنێس کالامار ڕێپۆرتێری تایبەتی ئیعدامە نایاساییەکان، داینووس پورس، ڕێپۆرتێری تایبەتی مافی سڵامەتی جەستەیی و دەروونی زیندانیان و نیلز مێلزر، ڕێپۆرتێری تایبەتی ئەشکەنجە نامرۆڤانەکان، بە سزای ئیعدامی ڕامین حسێن‌پەناهی کاردانەوەیان نیشاندا و بە بڵاوکردنەوەی ڕاگەیەندراوێک خوازیاری هەڵوەشانەوەی ئەم سزا ناعادڵانەیە بوون.}

^{لە بەشێکی ئەم پەیامەدا هاتووە: سزای ئیعدامی ڕامین حسێن‌پەناهی ناعادڵانەیە و مافی پارێزەر و پێڕاگەیشتنی پزیشکی و چاوپێکەوتن لە گەڵ بنەماڵەکەی مافی ڕامین حسێن‌پەناهیە و زەوت کردنی ئەم مافانە لە ناوبراو جێی نیگەرانییە و مەترسی گیانی هەیە بۆ سەر ئەم چالاکە سیاسییە.}

^{ڕامین حوسێن پەناهی، ڕێکەوتی ۲ی پووشپەڕی ساڵی ۱۳۹٦ی هەتاوی، لەلایەن هێزە ئەمنیەتییەکانی کۆماری ئیسلامیەوە دەستبەسەر کرا و ڕێکەوتی ۲٥ی ڕێبەندانی ۱۳۹٦، لە کاتێکدا کە تەنیا دانیشتنێکی دادگا بۆ پێداچوونەوە بە تۆمەتەکانی ڕێکخرابوو، لەلایەن لقی یەکی دادگای ئینقلابی شاری سنە بە سەرۆکایەتی دادوەر سەعیدی، بە تۆمەتی هەوڵدان بۆ شێواندنی ئاسایشی گشتی و ئەندام بوون لە کۆمەڵە حوکمی ئیعدامی بەسەردا سەپا، تا ئێستا چەندین جار داوای هەڵوەشانەوەی سزای ئیعدامی ڕامین لە لایەن پارێزەرەکەیەوە ئاراستەی دیوانی باڵای وڵات کراوە بەڵام سەرلەنوێ سزاکەی پشتڕاست کراوەتەوە و ئێستاکە لە ژێر هەڕەشەی جیدیی سزای ئیعدام دایە.}

22/6/2018