^{قوتابخانە و قوتابییانی کوردستان و ئیران، لەژێر دەسەڵاتی بەرپرسانی ڕێژیمی ئێران بەرەو هەڵدیر دەڕۆن و چارەنووسیان ناڕوونه.}

^{"مێهروڵڵا ڕەخشانی مێهر"، سەرۆکی ڕێکخراوی نۆژەنکردنەوە، گەشەپێدان و تەیارکردنی قوتابخانەکانی ڕێژیمی ئێران لە پرێسکۆنفڕانسێکدا باسی لەوە کردووە، ٢٧ لەسەدی قوتابخانەکانی ئێران لە بواری بیناسازییەوە وەک داڕماو ئەژمار دەکرێن.}

^{ناوبراو وتوویەتی ٣٤ لەسەد پێویستیان بە نۆژەنکردنەوە و تەنیا ٣٩ لەسەدی قوتابخانەکان قایم و پتەون.}

^{ئەو بەرپرسەی ڕێژیم لە قسەکانیدا باسی لەوە کردووە، کە یەک هەزار و ٧٠٠ پۆلی وانەوتنەوە لە کانێکسدا بەڕێوە دەچێت و ٩٨٧ پۆلی وانەوتنەوەی دیکەش لە قوڕ و خشت ساز کراون.}

^{ناوبراو لە قسەکانیدا ئاماژەی بەوە داوە، ئەو قوتابخانانەی کە ماوەی ٣٠ ساڵ بۆ دەبێت کە دروست کراون وەک داڕما ئەژمار دەکرێن.}

^{ساڵی ١٣٩٣ی هەتاوی، بەرپرسانی ڕێژیمی ئێران باسیان لەوە کردبوو، کە ساڵی نوێی خوێندن لە کاتێکدا دەستی پێ کردووە، کە لەسەدا ٥٠ی قوتابخانەکانی ئەو وڵاتە لە قوڕ و خشت دروست کراون و خودی بەرپرسانی ڕێژیمیش ئەو قوتابخانانەیان بە بۆمبی قورمیشکراو، شوبهاندووە.}

^{ڕەخشانی مێهر لەو پرێسکۆنفڕانسەدا ئاماژەی بەوە داوە، کە لە بودجەی ساڵی ٩٧دا بڕی یەک هەزار و ٢٠٠ میلیارد تمەن پارە بۆ نۆژەنکردنەوەی قوتابخانەکان دابین کراوە، بەڵام کەمترین ئیمکانەتی ئەمنییەتی و خوێندن بۆ قوتابخانەکان دابین نەکراوە.}

^{ڕێژیمی ئیسلامیی ئێران، ٣٦ هەزار میلیارد بوودجەی بۆ ساڵی ١٣٩٧ی هەتاوی بۆ بەشی پەروەردە تەرخان کردووە، که بەبەراورد لەگەڵ ساڵی ڕابردوو، ٤ هەزار میلیارد کەمتره.}

^{له گەڵاڵەی پیشنێاری بوودجەی ساڵی ١٣٩٧ی هەتاوی، بۆ بەشی پەروەردە، ٣٦ هەزار میلیارد بوودجه دابین کراوە که ٢ هەزار و ٨٣١ میلیارد تمەنی بۆ بەشی ئیجرایی دانراوە، ئەمەش بە بەراورد لەگەڵ ساڵی ڕابردوو، زیاتر له ٤ هەزار میلیارد، کەمی کردووە.}

^{بەپێی ئامارەکانی ڕێژیم، ٣٠ لەسەدی قوتابخانەکانی ئێران دەبێ بڕوخێن و سەرلەنۆی ساز بکرێنەوە، هەروەها ٤٢ لەسەدی قوتابخانەکانی ئێران، سیستمی گەرمایییان نییە و له زۆرێک لە پارێزگاکانی ئێران قوتابخانەکان بە شێوەی کانێکس و خێوەت ساز کراون.}

^{لە لایەکی دیکەشەوە وەزارەتی پەروەردەی ڕێژیم، توانای پێدانی مووچەی مامۆستاکانی نییە و ٦ هەزار میلیارد تمەن به مامۆستاکان قەرزدارە و لە کاتی خۆیدا ناتوانێت مووچەیان پێ بدات.}

^{بەپێی مادەی ٣٠ی یاسای بنەڕەتیی ڕێژیمی ئێران، خوێندن هەتا ئاستی دواناوەندیی دەبێت به بێبەرانبەر بێت و بوودجەی تایبەت بۆ بردنە سەرەوەی ئاستی فەزای پەروەردە دابین بکرێت، بەڵام له هێندێک قوتابخانه هەتا ٧٥٠ هەزار تمەن پارەیان له قوتابییان وەرگرتووە.}

1/6/2018