^{فڕۆکە جەنگییەکانی ئیسرائیل ژمارەیەک بنکەی سەربازیی میلیشیایەکی ئێران بۆردومان دەکەن و کوژراو و بریندار هەن.}

^{چالاکوانانی سووریا لە تۆڕە کۆمەڵایەتییەکان بڵاویان کردووەتەوە، کە بۆردومانەکە رۆژی سێشەممە 29/5/2018 کراوەتە سەر ژمارەیەک بنکەی میلیشیای حزبوڵڵای لوبنانی لە نزیک ناوچەی قەسیر لە گوندەوارەکانی حمس.}

^{هەروەک ئەو چالاکوانانە باسیدەکەن، جگە لە کوژران و برینداربوونی ژمارەیەک چەکداری میلیشیاکە و یەکێک لە فەرماندەکانی، بەهۆی بۆردومانەکەوە بنکەی هەماهەنگیی ئۆپەراسیۆنە سەربازییەکانی حزبوڵڵا لەسەر سنووری نێوان سووریا و لوبنان. وێران بووە و ئاگری گرتووە.}

^{تا ئێستا سوپای ئیسرائیل هیچ لێدوانێکی لەبارەی ئەو هێرشە مووشەکییەی فڕۆکە جەنگییەکانی بڵاو نەکردووەتەوە.}

^{سوپا و فڕۆکە جەنگییەکانی ئیسرائیل چەندین جار بنکە و بارەگاکانی حزبوڵڵای لوبنانی و میلیشیا ئێرانییەکانیان لە سووریا بۆردومان کردووە.}

^{لە سەرەتای شەڕی ناوخۆیی سووریاوە، ئێران و حزبوڵڵا بە ناردنی چەک و چەکدار، هاوکاریی رژێمی سووریا لە دژی گرووپەکانی ئۆپۆزیسیۆن دەکەن.}

^{حزبوڵڵا میلیشیایەکی چەکداریی شیعەمەزهەبی لوبنانییە. دارایی و چەکی ئەو میلیشیایە لەلایەن سوپای پاسدارانی ئێرانەوە دابین دەکرێت.}

^{لە مانگی ئاداری 2011ـەوە شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.}

^{بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.}

29/5/2018