^{دۆخی نەشیاوی ژیان لە ناوچە بوومەلەرزەلێدراوانی کرماشان، بەتایبەت کەمپە کاتییەکان لە ناوچەی سەرپێڵ بەردەوام کارەساتی بەسەردا دێت و هەواڵی ناخۆشی لێ بڵاو دەبیتەوە.}

^{ئێوارەی دوێنێ ٥شەممە ڕێکەوتی ٣ی جۆزەردان لە گەڕەکی فەرهەنگییانی سەرپێڵی زەهاو کەپسوولێکی گاز تەقییەوە کە بەهۆیەوە دەیان کانێکس و خێوەت کە وەک شوێنی نیشتەجێ‌بوونی کاتیی بوومەلەرزەلێدراوان دابین کرابوو ئاگریان گرت و هەموو کەلوپەل و شتومەکەکانیان لە ئاگردا سووتان.}

^{ئەمە یەکەم جار نییە کە خەڵکی خەساردیتووی سەرپێڵ کارەساتی وایان بەسەردا دێت و پێشتریش بە هۆکاری هاوشێوە بەشێک لەم خەڵکە بەڵادیتووە تووشی خەساری گیانی و ماددی بوون و هانایان بۆ چالاکانی مەدەنی کوردستان برد.}

^{سەرەڕای تێپەڕینی زیاتر لە ٦ مانگ بەسەر کارەساتی ٢١ی خەزەڵوەری ساڵی ڕابردوو، خەڵکی بەڵالێدراو لە ناوچەکانی وەک سەرپێڵی زەهاو و داڵاهو بە سەختی ژیان بەسەر دەبەن؛ ئەم ڕەوشەش وای کردووە کە بەپێی دوایین ئامارە فەرمییەکان زیاتر لە ٣٠%ی بوومەلەرزەلێدراوانی سەرپێڵی‌زەهاو ناچار بن زێدی خۆیان بەجێ بهێڵن.}

^{چاودێران و میدیاکارانی ناوچەی سەرپێڵ پێیان وایە کەمتەرخەمییە بەئەنقەستەکانی ڕێژیم لە ناوچە بوومەلەرزەلێدراوەکان، باری خراپی ژیان، بێبەشبوون لە سەرەتاییترین پێداویستییەکانی ژیان و هاتنی وەرزی گەرما بوونەتە هۆی ئەوەیکە خەڵکی لێقەوماوی سەرپێڵی‌زەهاو، هیوایان بە ژیان لە زێدی خۆیان نەمینێت و دەرفەتێک بدۆزنەوە بۆ کۆچ لەو ناوچەیە.}

٢٦/٥/٢٠١٨